ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း ၸိူဝ်းထုၵ်ႇသိုၵ်းမၢၼ်ႈတီႉၺွပ်း မိူဝ်ႈၽွင်း ၵၢင်လိူၼ်ၵျူႊလၢႆႊ၊ လူၺ်ႈတၢင်းၽိတ်း ထုၵ်ႇဢိင်ဢၢင်ႈၸီႉၼႄးဝႃႈ ဢမ်ႇပွင်ႇၶၢဝ်ႇသိုၵ်းတႆး RCSS ပၼ်တီႈတပ်ႉသိုၵ်းမၢၼ်ႈၼႆၼၼ်ႉ ၸိူဝ်းၶဝ်တေလႆႈၶိုၼ်းလုမ်းတတ်းသိၼ်/ လုမ်းတြႃး ၼႂ်းဝၼ်းသုၵ်းတီႈ 8 လိူၼ်သႅပ်ႊထႅမ်ႊၿိူဝ်ႊၼႆႉ။


ၶဝ်သၢမ်ၵေႃႉၸိူဝ်းၼႆႉပဵၼ် ၸၢႆးၸိင်ႇတႃႇ ဢႃယု 28 ပီ၊ ၸၢႆးၵူဝ်ႇ၊ ၸၢႆးဢေႃးၼ ဢႃယု 40 ပီ။ ၸိူဝ်းၶဝ် လႆႈထုၵ်ႇၾၢႆႇသိုၵ်းမၢၼ်ႈ ၵၢဝ်ႇႁႃၸႅင်ႈၵႂၢမ်းလူၺ်ႈ ၽိတ်းမၢႆမီႈမၢႆမတ်ႉတႃ 3/3 လႄႈမၢႆမီႈမတ်ႉတႃ 5/4 ။

ၵဵဝ်ႇၵပ်းလွင်ႈၼႆႉ ၵူၼ်းၸိူဝ်းၺႃးတီႉၺွပ်းၼႂ်း 7 ၵေႃႉ ဢၼ်ပူၼ်ႉဢွၵ်ႇၶွၵ်ႈမႃး ၵေႃႉၼိုင်ႈလၢတ်ႈဝႃႈ- "သိုၵ်းမၢၼ်ႈၶဝ်မႃးထၢမ်ၶၢဝ်ႇ RCSS ။ ၶဝ်ထၢမ်ဝႃႈၸွင်ႇမီးၵူၼ်းထိူၼ်ႇ RCSS ၊ ယူႇတီႈၵူၼ်းဝၢၼ်ႈတွပ်ႇပၼ်ဝႃႈ မိူဝ်ႈပူၼ်ႉမႃးသၢမ်ဝၼ်းၼၼ်ႉတႄႉ ၶဝ်ဝႄႉၶဝ်ႈမႃးတီႈဝၢၼ်ႈႁဝ်းၶႃႈဢေႃႈ။ သိုၵ်းမၢၼ်ႈၶိုၼ်းထၢမ်ဝႃႈ တေႃႈလဵဝ်လူး၊ ၵူၼ်းဝၢၼ်ႈသမ်ႉၶိုၼ်းတွပ်ႇဝႃႈ ဢမ်ႇႁူႉ။ ပေႃးဢမ်ႇႁူႉၼႆႉၵေႃႈ သိုၵ်းမၢၼ်ႈလၢၵ်ႈဢဝ်ထူးမိုဝ်း ၽတ်ႉတွႆႇသႂ်ႇ၊ ဢဝ်ၵွင်ႈသွင်ႉသႂ်ႇသေပေႃႉလူမ်ႉယဝ်ႉလၢၵ်ႈၵႂႃႇၸွမ်းၶဝ် ဢွၵ်ႇၼႃႈသိုၵ်း။ ၵွပ်ႈၼၼ် ၶဝ်သၢမ်ၵေႃႉဢၼ်ၵိုတ်းဝႆႉ ယူႇတီႈၼႂ်းၶွၵ်ႈႁူဝ်ပူင်း ၸၢႆးၸိင်ႇတႃႇၶဝ်ၼၼ်ႉၵေႃႈ လႅပ်ႈတေၺႃးမိူၼ်ၼင်ႇ ႁဝ်းၶႃႈၼႆႉၵူၺ်း"- ဝႃႈၼႆ။


မၢႆမီႈမၢႆမတ်ႉတႃ 3/3 လႄႈမၢႆမီႈမတ်ႉတႃ 5/4 ၼႆႉ ၽူႈၵေႃႉဢၼ်ဢွၵ်ႇၶေႃႈပူင်သိုၵ်းလႆႈၼၼ်ႉ မီးသုၼ်ႇပူင်သင်ႇလႆႈဝႃႈ- ၽႂ်တၵ်းတေဢမ်ႇလႆႈၵႂႃႇပႆယူႇသဝ်း ၼႂ်းၼႃႈလိၼ်ဢၼ်မီးပၢင်တိုၵ်းသိုၵ်းသိူဝ်ၼႆ မီးၶေႃႈပူင်ဝႆႉၸိူင်ႉၼႆ။ ပေႃးဝႃႈၶဝ်ဢွၵ်ႇၶေႃႈပူင်ဝႆႉၸိူင်ႉၼႆသေ ၺႃးတီႉၺွပ်းၼႆ ၸၢင်ႈၺႃးတူတ်ႈတၢမ်ႇၶွၵ်ႈ တေႃႇထိုင် 3 ပီ၊ ဢမ်ႇၼၼ်ၵေႃႈ ၸၢင်ႈၺႃးတၢမ်ႇငိုၼ်း၊ ဢမ်ႇၼၼ် ၸၢင်ႈၺႃးတၢမ်ႇငိုၼ်းတင်းတၢမ်ႇၶွၵ်ႈ ၸွမ်းၵၼ်ၵေႃႈၸၢင်ႈပဵၼ်လႆႈ။ တၢမ်ႇငိုၼ်းၼၼ်ႉ ၵႃႈႁိုဝ်ဢၼ်ဝႃႈၼၼ်ႉၵေႃႈ ဢိင်ၼိူဝ်ၽူႈတတ်းသိၼ်တြႃးၶဝ် တမ်းဝၢင်းၵူၺ်း- ၽူႈဢၼ်ၸွႆႈထႅမ်လိူင်ႈၶၻီး (ဢမု)ၶဝ် ၸဝ်ႈၼၢင်းမျႃႉဝတီႇ လၢတ်ႈ။


ၵဵဝ်ႇၵပ်းလွင်ႈၼႆႉ ၸဝ်ႈသိုၵ်းၸၢႆးဢူး ၽူႈၼင်ႈလုမ်းၵပ်းသၢၼ် RCSS တီႈတူၼ်ႈတီး လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ- "ဢၼ်ႁဝ်းၶႃႈလႆႈႁူႉတႄႉ ဢမ်ႇၵွမ်ႉၵႃႈၶဝ်သၢမ်ၵေႃႉၼႆႉၵူၺ်း၊ ဢၼ်ႁဝ်းၶႃႈမီးသဵၼ်ႈမၢႆဝႆႉၼၼ်ႉမီး 8 ၵေႃႉ။ ၼႂ်းပႅတ်ႇၵေႃႉၼၼ်ႉ ၼင်ႇႁိုဝ်ၸုမ်းသိုၵ်းမၢၼ်ႈၶဝ်ပေႃးတေပွႆႇပၼ်ၶိုၼ်းၼၼ်ႉ ႁဝ်းၶႃႈလႆႈဢဝ်သဵၼ်ႈၸိုဝ်ႈၶဝ်တၢင်ႇၵႂႃႇတီႈ ၶွမ်ႊမတီႊႁူမ်ႈလူလွမ်ပႂ်ႉတူၺ်းလွင်ႈငမ်းယဵၼ် JMC ဝႆႉယဝ်ႉ"- ဝႃႈၼႆ။


ပူၼ်ႉမႃးမိူဝ်ႈဝၼ်းတီႈ 17/07/2017 ၼၼ်ႉ သိုၵ်းမၢၼ်ႈပွင်ၸိုင်ႈမၢၼ်ႈ တပ်ႉၶလယ 225 လႄႈ 249 ဢၼ်မႃးတူင်ႉၼိုင် ၼႂ်းၸႄႈဝဵင်းႁူဝ်ပူင်း ပွတ်းတၢင်းၼမ်ႉၶူၵ်ႉ၊ လႆႈတီႉၺွပ်းၵႂႃႇၵူၼ်းဝၢၼ်ႈၵူၼ်းမိူင်း ၸၢႆးၸိင်ႇတႃႇ၊ ၸၢႆးၵူဝ်ႇ၊ ၸၢႆးဢေႃးၼ၊ ၼၢင်းပုၼ်ႉ၊ ၸၢႆးဝိယ၊ ၸၢႆးၵမ်ႇ၊ ၸၢႆးၼၼ်ႇတိ၊ ၸၢႆးပၼ်ႇတ၊ ၸၢႆးၶွင်ႇ၊ ၸၢႆးထုၼ်းငူၺ်ႇ ၸိူဝ်းၼႆႉတင်းမူတ်း 10 ၵေႃႉ။ ၸိူဝ်းၶဝ်ထုၵ်ႇၸီႉၼႄးဝႃႈ ဢမ်ႇပွင်ႇၶၢဝ်ႇၵူၼ်းထိူၼ်ႇ ပၼ်သိုၵ်းမၢၼ်ႈၼႆသေ ၺႃးတီႉၺွပ်း။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ် လူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း (NCA) သေ ပဵၼ်ၸုမ်းဢၼ် လူင်ပွင်ၸိုင်ႈသိုၵ်းမၢၼ်ႈ ပိုၼ်ၽၢဝ်ႇပူတ်းဢွၵ်ႇပႅတ်ႈသဵၼ်ႈၸိုဝ်ႈ ၸုမ်းၼွၵ်ႈမၢႆမီႈ မိူဝ်ႈၵၢင်လိူၼ်ၼူဝ်ႊဝႅမ်ႊၿိူဝ်ႊ ပီ 2015 ပူၼ်ႉမႃး။