သိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းယိပ်းၵွင်ႈရူဝ်ႊႁိၼ်ႊၵျႃႇ  မီးလွင်ႈပိုတ်းယိုဝ်းၵၼ် တီႈၼႂ်းမိူင်း ရၶႅင်ႇသေ ႁဵတ်းႁႂ်ႈၸၢဝ်းပုတ်ႉ၊ ၸၢဝ်းရူဝ်ႊႁိၼ်ႊၵျႃႇ (မူႇသလိမ်ႊ) ဢွၵ်ႇပၢႆႈယၢၼ် ႁိူၼ်းယေး ၼပ်ႉမိုၼ်ႇ။


02/09/2017 ႁွင်ႈၵၢၼ်ၶၢဝ်ႇရွႆႊၻိူဝ်ႊ ပိုၼ်ၽၢဝ်ႇဝႃႈ ဢိင်ၼိူဝ် ၸုမ်း ARSA ဢၼ်လႆႈၸိုဝ်ႈဝႃႈၸုမ်း ၵေႃႇၵၢၼ်ႁၢႆႉ ၸၢဝ်းရူဝ်ႊႁိၼ်ႊၵျႃႇ တင်းသိုၵ်းလူင်ပွင်ၸိုင်ႈမၢၼ်ႈ ပိုတ်းယိုဝ်းၵၼ်ၼႂ်းၸႄႈဝဵင်း မွင်ႇ ၻေႃး ၸႄႈမိူင်းရၶႅင်ႇသေ ႁဵတ်းႁႂ်ႈမီးၵူၼ်းမၢတ်ႇၸဵပ်းတင်းၼမ်လႄႈ လူႉတၢႆ 400 ပၢႆဢွၼ်ၵၼ်ပၢႆႈ ဢွၵ်ႇႁိူၼ်းယေးတီႈယူႇမွၵ်ႈ 50,000 ၵေႃႉ။

ၸွမ်ၸိုင်ႈ မိူင်းတူႊရၵီႊ ရေႊၸဵပ်ႊ တႆႊယိပ်ႊ ဢႄႊၻူဝ်ႊဢၼ်ႊ  လၢတ်ႈဝႃႈ - “ လွင်ႈဢၼ်ပဵၼ်ယူႇ တီႈၼႂ်းၸႄႈမိူင်းရၶႅင်ႇမိူဝ်ႈလဵဝ်ၼႆႉ မၼ်းမိူၼ်တင်းၵႂၢတ်ႇလၢင်ႉၽဵဝ်ႈမူၺ်ႉၸၢဝ်းၶိူဝ်း ၽူႈမီးပုၼ်ႈ ၽွၼ်းဝၢၼ်ႈမိူင်းၶဝ်ၵေႃႈ ဢမ်ႇမႃးလၢတ်ႈသင်ၸွမ်း ၵွပ်ႈၼၼ်လႄႈ မိူင်းႁူမ်ႈတုမ်မၢၼ်ႈဢၼ်ဝႃႈပဵၼ် မိူင်းတီႊမူဝ်ႊၶရေႊၸီႊၼႆ ယင်းတိုၵ်ႉပဵၼ်မိူင်းတိုဝ်းၼႃႈၵၢၵ်ႇ ဝႆႉၵူၺ်း ” ဝႃႈၼႆ။


တီႈမိူင်းရၶႅင်ႇၼႆႉ မီးလႅၼ်လိၼ်တိတ်းၸပ်းၵၼ်တင်းမိူင်းၿင်ႊၵလႃႊတဵတ်ႊ မီးၵူၼ်းယူႇသဝ်းၵိူဝ်း ယမ်ပုတ်ႉထသႃသၼႃလႄႈ ဢီႊသလၢမ်ႊ ။ လူင်ပွင်ၸိုင်ႈဢမ်ႇယွမ်းႁပ်ႉ ၸၢဝ်းရူဝ်ႊႁိၼ်ႊၵျႃႇ ပဵၼ်ၵူၼ်း ၼႂ်းမိူင်းႁူမ်ႈတုမ်မၢၼ်ႈ ၊ ၸၢဝ်းရူဝ်ႊႁိၼ်ႊၵျႃႇသမ်ႉဝႃႈၶဝ် ပဵၼ်ၵူၼ်းၸၢဝ်းၶိူဝ်း ဢၼ်ယူႇ ၵိုၵ်းၼႂ်း ပိုၼ်ႉတီႈမႃးပီယၢဝ်းၶၢဝ်းႁိုင်ၼႆလႄႈ ၸင်ႇပဵၼ်ပၼ်ႁႃမႃး။


မိူဝ်ႈ ပီ2012 (2555) ၼၼ်ႉၵေႃႈ မီးလွင်ႈပိုတ်းယိုဝ်းၵၼ်ႁၢဝ်ႈႁႅင်းတီးဝဵင်းသိတ်ႉတူၺ်ႇ ငဝ်ႈဝဵင်း ၸႄႈမိူင်းရၶႅင်ႇ ႁဵတ်းႁႂ်ႈၵူၼ်းလႆႈလူႉတၢႆၸမ် 200 ၵေႃႉ ၵူၼ်းဢွၼ်ၵၼ်ဢွၵ်ႇပၢႆႈယၢၼ်ႁိူၼ်းယေး မီး 140,000 ၵေႃႉ ၵမ်ႈၼမ်ပဵၼ်ၸၢဝ်းရူဝ်ႊႁိၼ်ႊၵျႃႇ ။ မိူဝ်ႈပီၵၢႆပူၼ်ႉမႃးၵေႃႈ မီးလွင်ႈပိုတ်းယိုဝ်း ၵၼ်ႁၢဝ်ႈႁႅင်းမိူၼ်ၵၼ်ဝႃႈၼႆ။


Photo by MGR Online