ၸုမ်းၵူၼ်းၼုမ်ႇၼႂ်းၸႄႈဝဵင်းသီႇပေႃႉ၊ ထုင်ႉမိူင်းၶိူဝ်း၊သႅင်ၵႅဝ်ႉ ႁူမ်ႈၵၼ်ၸတ်းႁဵတ်းပၢင်လပ်ႉၼမ်ႉၵတ်ႉ ၵူၼ်းၼုမ်ႇ ႁႂ်ႈၵူၼ်းၼုမ်ႇႁူႉၵႃႈၶၼ်ၶၢဝ်းယၢမ်းလႄႈ ၵႆယၢၼ်ယႃႈမဝ်းၵမ် မေႃၶဝ်ႈႁႃၵၼ်ပူၵ်းပွင်ၵၼ် ၶိုၼ်ႈသင်ႉ။


ဝၼ်းတီႈ 01-03/09/2017 ၸုမ်းၵူၼ်းၼုမ်ႇမိူင်းၶိူဝ်း ၊ ၸုမ်းၵူၼ်းၼုမ်ႇသႅင်ၵႅဝ်ႉ၊ ၸုမ်းၵူၼ်းၼုမ်ႇတႆး TYO ႁူမ်ႈၵၼ်ၸတ်းႁဵတ်းပၢင်ၾိုၵ်းလပ်ႉၼမ်ႉၵတ်ႉၵူၼ်းၼုမ်ႇလၢႆတီႈ။ မိူၼ်ၼင်ႇ(1).ၵျွင်းမိူင်းၶိူဝ်း ၵူၼ်းမႃးထွမ်ႇမီး 98 ၵေႃႉ၊ (2) ၵျွင်းၵုၼ်ၼႃး 48 ၵေႃႉ၊ (3) ၵျွင်းသၢႆးၶၢဝ် (ၼႃးလိူဝ်ႇ) 62ၵေႃႉ၊( 4) ၵျွင်းႁူဝ်ၶူဝ် 38ၵေႃႉ၊ (5)ၵျွင်းလိၼ်ႁွင်း 55ၵေႃႉ၊ (6) ၵျွင်းၼႃးၼိဝ်ႉ (ၼွင်ဝၼ်း) 92 ၵေႃႉ ။

ၼႂ်းပၢင်ၼႆႉပူင်သွၼ်ပၼ် လၢႆလွင်ႈမိူၼ်ၼင်ႇ ၵၢၼ်ပဵၼ်ၵူၼ်းမိူင်းလီ၊ လၢႆးၸႅၵ်ႇၸႂ်ႉၶၢဝ်းယၢမ်း၊ ၽွၼ်းၸႃႉယႃႈ မဝ်းၵမ်၊ လၢႆးသူၼ်း တုမ်၊ လွင်ႈသိင်ႇဝႅတ်ႉလွမ်ႉ၊ သုၼ်ႇလႆႈသုၼ်ႇပဵၼ်ၵူၼ်းလႄႈ သုၼ်ႇလႆႈ ၼၢင်းယိင်း လႄႈ လုၵ်ႈဢွၼ်ႇၸိူဝ်းၼႆႉ ၊ ၶူးပူင်သွၼ်ပဵၼ် ၸၢႆးမၢဝ်းႁၢၼ် (ၸုမ်းၵူၼ်းၼုမ်ႇမိူင်းၶိူဝ်း ) ၸၢႆးထုၼ်းဢွင်ႇ  ( ၸုမ်း ၵူၼ်းၼုမ်ႇသႅင်ၵႅဝ်ႉ) ၊ ၸၢႆးသၢႆဝၼ်းဢူး ( ၸုမ်းၵူၼ်းၼုမ်ႇတႆး TYO) ။


ၸၢႆးမၢဝ်းႁၢၼ် ႁူဝ်ၼႃႈၵူၼ်းၼုမ်ႇမိူင်းၶိူဝ်း လၢတ်ႈဝႃႈ - “ ၶႂ်ႈယွၼ်းႁႂ်ႈၸုမ်းၵူၼ်းၼုမ်ႇပိုၼ်ႉတီႈၽႂ်မၼ်း ဢွၼ်ၵၼ်ၸတ်းႁဵတ်းပၢင်ၾိုၵ်းလပ်ႉၼမ်ႉၵတ်ႉၵူၼ်းၼုမ်ႇၼမ်ၼမ် ၼင်ႇႁိုဝ်ၵူၼ်းၼုမ်ႇတႆးၵူႈတီႈၵူႈမိူင်း တေပဵၼ်မႃးၵူၼ်းမီးၼမ်ႉၵတ်ႉတၢင်းမေႃ ပေႃးႁဵတ်းၼၼ်ၸင်ႇ ႁဝ်းတေၶိုၼ်ႈယႂ်ႇ ၶိုတ်းၸၼ်ႉပဵင်းပိူၼ်ႈ ယွၼ်ႉဝႃႈတႆးႁဝ်းယင်းတိုၵ်ႉတူၵ်းလိုၼ်းပိူၼ်ႈဝႆႉယူႇ ” ဝႃႈၼႆ။


ၸုမ်းၵူၼ်းၼုမ်ႇမိူင်းၶိူဝ်းၼႆႉ ၸတ်းပၢင်ၾိုၵ်းလပ်ႉၼမ်ႉၵတ်ႉၵူၼ်းၼုမ်ႇမႃးၶိူဝ်းယႂ်း မၢင်ပွၵ်ႈၵေႃႈႁူမ်ႈ တင်းၸုမ်းၵူၼ်းၼုမ်ႇတၢင်ႇၸုမ်းသေၸတ်းႁဵတ်း  မိူဝ်ႈဝၼ်းတီႈ 08-10/08/2017 ၼၼ်ႉၵေႃႈ ၸုမ်းၵူၼ်းၼုမ်ႇမိူင်းၶိူဝ်းၸတ်းႁဵတ်းပၢင်ၾိုၵ်းၽွၼ်ႉၼမ်ႉၵတ်ႉၵူၼ်းၼုမ်ႇ တီႈဝတ်ႉ (ၵျွင်း) ထမ်မသုၶ ဝိႁႃရ ထုင်ႉမိူင်းၶိူဝ်း ။ ပူင်သွၼ်ပၼ် မိူၼ်ၼင်ႇ ၵၢၼ်ပဵၼ်ၵူၼ်းမိူင်းလီ၊ လွင်ႈသိင်ႇ ဝႅတ်ႉလွမ်ႉ၊ လၢႆးသူၼ်းတုမ်၊ ၵၢၼ်ပူၵ်းပွင်၊ ၽွၼ်းၸႃႉယႃႈမဝ်းၵမ်ၸိူဝ်းၼႆႉ။ ၶူးပူင်သွၼ်ပဵၼ် ၸၢႆးမၢဝ်းႁၢၼ်၊ ၸၢႆးထုၼ်းဢွင်ႇ၊ ၼၢင်းသႅင်လၢဝ်၊ ၼၢင်းမူၺ်ဢွၼ်ႇ ၸိူဝ်းၼႆႉ။


Photo by Tai Youth Mong Hko