ဢိင်ၼိူဝ် ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ယူႇတီႈ NRPC ၽိတ်ႈမွၵ်ႇမႃးသေ ဝၼ်းတီႈ 10/09/2017  ၸွမ်သိုၵ်းလူင်ယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ဢွၼ်ႁူဝ်မူႇၸုမ်းၸိူဝ်း  ဢွၵ်ႇၶၢဝ်းတၢင်းၵႂႃႇတီႈၼေႇပျီႇတေႃႇ။


တိုဝ်ႉတၢင်းၼႆႉ ဝၼ်းတီႈ 11/09/2017 RCSS ႁူပ်ႉထူပ်းၽူႈၵိူဝ်းၵုမ်ၸိုင်ႈမိူင်း ဢွင်ႇသၢၼ်းၸုၵျီႇ။ တေႁူပ်ႉထူပ်းပႃးၽူႈဢွၼ်ႁူဝ်တပ်ႉမတေႃႇ။ ဝၼ်းတီႈ 12 ႁူပ်ႉၸုမ်းၽွင်းလူင်ၶဝ်ၵူႈၵေႃႉၵေႃႉ တီႈဝဵင်းလူင်တႃႈၵုင်ႈ။ တေဢုပ်ႇဢူဝ်းၵၼ် ၵဵဝ်ႇၵပ်းၵၢၼ်မိူင်း၊ ၵၢၼ်ပူၵ်းပွင်၊ ၵၢၼ်ပၢႆးမၢၵ်ႈမီးၸိူဝ်းၼႆႉ။

ၵဵဝ်ႇၵပ်းလွင်ႈၼႆႉ ၸဝ်ႈယွတ်ႈသိုၵ်း လၢတ်ႈမိူဝ်ႈပၢင်သပ်းလႅင်းၸႅင်ႈၶၢဝ်ႇ မိူဝ်ႈဝၼ်းတီႈ 09/09/2017 တီႈၽူႈသိုဝ်ႇၶၢဝ်ႇၶဝ်ဝႃႈ- "ငဝ်းလၢႆးမိူင်းႁူမ်ႈတုမ်မိူင်းမၢၼ်ႈၼႆႉ ႁဝ်းၵိုတ်းသိုၵ်းၵၼ်မႃးၶၢဝ်းတၢင်း 5 ပီယဝ်ႉ၊ ၵူၺ်းၵႃႈ လွင်ႈၶိုပ်ႈၼႃႈၼႆႉဢမ်ႇပေႃးမီး။ ပွၵ်ႈၼႆႉ ဢိင်ၼိူဝ် NRPC တႅမ်ႈလိၵ်ႈႁွင်ႉမွၵ်ႇမႃး ႁႂ်ႈလႆႈႁူပ်ႉထူပ်းၵၼ် သၢင်ႈလွင်ႈယုမ်ႇယၼ်ၵၼ်။ ၼႂ်းတိုဝ်ႉတၢင်းၼႆႉ RCSS မုင်ႈမွင်းဝႃႈ တေလႆႈလွင်ႈယုမ်ႇယမ်ၵၼ်ၶိုၼ်ႈမႃး။


ပၼ်ႁႃဢၼ်မီးလွင်ႈထၢင်ႇၽိတ်းထၢင်ႇပိူင်ႈၼိူဝ်ၵၼ်ၸိူဝ်းၼႆႉၵေႃႈ မၼ်းတေလီၶိုၼ်ႈမႃး၊ မၼ်းတေႁၢႆၵႂႃႇ"- ၸဝ်ႈယွတ်ႈသိုၵ်း လၢတ်ႈ။


ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ တင်းႁူဝ်ပဝ်ႈ RCSS ၸွမ်သိုၵ်းလူင်ယွတ်ႈသိုၵ်း ႁူပ်ႉထူပ်းၵၼ်ပွၵ်ႈၵမ်းၼႆႉ ဝၢႆးသေပႃႇတီႇ NLD ၶိုၼ်ႈပဵၼ်လူင်ပွင်ၸိုင်ႈမႃးၼႆႉ ပဵၼ်ပွၵ်ႈထီႉၼိုင်ႈ။ မိူဝ်ႈပႆႇပဵၼ်လူင်ပွင်ၸိုင်ႈၼၼ်ႉၵေႃႈ သွင်ၾၢႆႇယၢမ်ႈထူပ်းၵၼ်ပွၵ်ႈၼိုင်ႈ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ် လူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း (NCA) သေ ပဵၼ်ၸုမ်းဢၼ် လူင်ပွင်ၸိုင်ႈသိုၵ်းမၢၼ်ႈ ပိုၼ်ၽၢဝ်ႇပူတ်းဢွၵ်ႇပႅတ်ႈသဵၼ်ႈၸိုဝ်ႈ ၸုမ်းၼွၵ်ႈမၢႆမီႈ မိူဝ်ႈၵၢင်လိူၼ်ၼူဝ်ႊဝႅမ်ႊၿိူဝ်ႊ ပီ 2015 ပူၼ်ႉမႃး။ ၽွင်းၵေႃႇသၢင်ႈလွင်ႈငမ်းယဵၼ်ယူႇၼႆႉ ပၢင်ၵုမ်လူင်လွင်ႈငမ်းယဵၼ်ၸၼ်ႉ ၸိုင်ႈမိူင်းႁူမ်ႈတုမ် ႁိုဝ် ပၢင်ၵုမ်လူင်ပၢင်လူင်ႁူဝ်ပၢၵ်ႇပီ 21 ပၢင်လူင်ၵေႃႈ ၶိုၼ်ႈႁွတ်ႈၶဝ်ႈႁူမ်ႈ ဢုပ်ႇဢူဝ်းၵၢၼ်မိူင်းမႃး။