ၵူၼ်းဝၢၼ်ႈ ၼႂ်းၸႄႈဝဵင်းလႃႈသဵဝ်ႈ တုၵ်းယွၼ်း ထိုင်ၽူႈတႅၼ်းသၽႃးၸိူဝ်ႉၸၢတ်ႈ ႁႂ်ႈၸွႆႈတုၵ်းယွၼ်းပၼ် တီႈလိၼ် သူၼ်ႁႆႈၼႃး ၵူၼ်းမိူင်း 1000 ဢေႊၶိူဝ်ႊပၢႆ ဢၼ်သိုၵ်းလူင်ပွင်ၸိုင်ႈ ယိုတ်းဝႆႉ မိူဝ်ႈ 1996။


ဝၼ်းတီႈ 11/09/2017 ၼႆႉၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈလႃႈသဵဝ်ႈ ႁူပ်ႉထူပ်း ၵူၼ်းဝၢၼ်ႈ ၼႂ်းဢိူင်ႇၶိူဝ်းၼိမ်း ၸႄႈဝဵင်းလႃႈသဵဝ်ႈ။ ၵူၼ်းဝၢၼ်ႈ တုၵ်းယွၼ်း ႁႂ်ႈၸွႆႈဢဝ်ပၼ်တီႈလိၼ် 1000 ဢေႊ ၶိူဝ်ႊပၢႆ ဢၼ်သိုၵ်းလူင်ပွင်ၸိုင်ႈမၢၼ်ႈ ယိုတ်းဢဝ်ဝႆႉ။


တီႈလိၼ်ၸိူဝ်းၼၼ်ႉ ပဵၼ်တီႈလိၼ်သူၼ်ႁႆႈၼႃးၵူၼ်း မိူင်း ႁဵတ်းၵၢၼ်ႁႃၵိၼ်လဵင်ႉတွင်ႉမႃး ၸဵမ်ပၢၼ်ပူႇပၢၼ်မွၼ်ႇ။ ပၢင်ႁူပ်ႉထူပ်းၵူၼ်းဝၢၼ်ႈ ၼႂ်းဢိူင်ႇၶိူဝ်းၼိမ်းၼႆႉ ၸတ်း ႁဵတ်းတီႈဝတ်ႉဝိႁၢရ်ၶိူဝ်းၼိမ်း ဢိူင်ႇၶိူဝ်းၼိမ်း ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ပႃႇတီႇႁူဝ်သိူဝ် SNLD လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ႁဝ်းၵဵပ်းဝႆႉၶေႃႈမုလ်းသေ တၢင်ႇၵႂႃႇတီႈၾၢႆႇၶွမ်ႊမတီႊၸဝ်ႈႁႆႈၸဝ်ႈၼႃး မိူင်းႁူမ်ႈတုမ်မိူင်းမၢၼ်ႈ လိူၼ်သဵပ်ႊထႅမ်ႊ ၿိူဝ်ႊ ၼႆႉယဝ်ႉ။ ပေႃးဝႃႈလူဝ်ႇ ႁွင်ႉၸဝ်ႈႁႆႈ ၸဝ်ႈၼႃးၵႂႃႇၼေႇပျီႇတေႃႇၵေႃႈ တေႁွင်ႉၵႂႃႇ။ ႁႂ်ႈၾၢႆႇသိုၵ်းမၢၼ်ႈပေႃး ၸုၼ်ႉ တီႈလိၼ်ပၼ်ၶိုၼ်း ၵူၼ်းမိူင်း မူတ်းမူတ်း။ ထႅင်ႈၾၢႆႇၼိုင်ႈၵေႃႈ တေၶိုင်တၢင်ႇထိုင် တီႈဢွင်ႇသၢၼ်းၸူႉ ၵျီႇၵေႃႈ  ႁႂ်ႈမၼ်းၼၢင်းယိပ်းဢမူႉၼႆႉၵႂႃႇ ဢုပ်ႇၵုမ်တီႈသိုၵ်း ၶဝ်ၵမ်းသိုဝ်ႈ၊ တေႃႈလဵဝ် လႆႈၶတ်းၸႂ် ႁၢင်ႈႁႅၼ်း ဝႆႉၸိူင်ႉၼႆ” ဝႃႈၼႆ။


တီႈလိၼ် 1000 ဢေႊၶိူဝ်ႊပၢႆၼႆႉ ပဵၼ်လိၼ်သူၼ်ႁႆႈၼႃးၵူၼ်းဝၢၼ်ႈ ၼႂ်းဢိူင်ႇၶိူဝ်းၼိမ်း၊ ဢိူင်ႇလွႆလွမ်ႉ၊ ဢိူင်ႇၼွင်မွၼ်၊ ဢိူင်ႇႁူဝ်ပိုၵ်ႉ၊ ဢိူင်ႇသွင်ၵေး တေႃႇထိုင် ဝဵင်းသႅၼ်ဝီ။ ၸဝ်ႈၶွင်သူၼ်ႁႆႈၼႃး ဢၼ်ထုၵ်ႇယိုတ်း တီႈလိၼ်ၼႆႉ ၵမ်ႈၼမ်ပဵၼ်ၶိူဝ်းတႆး၊ လီႉသေႃးလႄႈ လွႆ(တဢၢင်း) ၸိူဝ်းၼႆႉ ဝႃႈၼႆ။


ၸၢႆးဝၼ်းလႅင်းၶမ်း ဝႃႈ လိၼ် ဢၼ်သိုၵ်းမၢၼ်ႈယိုတ်းဝႆႉၼၼ်ႉ ပဵၼ် တပ်ႉၵပ်းသိုပ်ႇတိတ်း တေႃႇ ယိုတ်းဝႆႉ လၢႆဢေႊၶိူဝ်ႊ၊ တပ်ႉၵွင်ႈလူင်ယိုတ်းဝႆႉလၢႆဢေႊၶိူဝ်ႊ၊ တပ်ႉၵွင်ၶလယ/ၶမယၵေႃႈ ယိုတ်း ဝႆႉလၢႆဢေႊၶိူဝ်ႊ၊ ပဵၼ်တပ်ႉတႂ်ႈတိူင်းသိုၵ်း ၶမရ လႃႈသဵဝ်ႈမူတ်းမူတ်းယဝ်ႉ ဝႃႈၼႆ။


တီႈလိၼ် 1000 ဢေႊၶိူဝ်ႊပၢႆ ဢၼ်တပ်ႉသိုၵ်းမၢၼ်ႈ ယိုတ်းဢဝ်ဝႆႉ 20 ပီပၢႆၼႆႉ မၢင်တီႈၽုၵ်ႇသွမ်ႈဝႆႉ၊ မၢင်တီႈၵေႃႈ ပွႆႇႁၢမ်းဝႆႉ၊ မၢင်တီႈၵေႃႈပၼ်ပိူၼ်ႈၶၢတ်ႈၽုၵ်ႇၶဝ်ႈၵၢပ်ႇဝႆႉ ၸဵမ်ၸိူဝ်းၼႆႉ ဝႃႈၼႆ။