ပၢင်ၵုမ် ႁူဝ်ႁုပ်ႈလိူၼ် ၸုမ်းပၵ်းတႃပႂ်ႉတူၺ်း လွင်ႈငမ်းယဵၼ် ၸၼ်ႉၸႄႈမိူင်း JMC-S ၵမ်းထူၼ်ႈ 9 ၸတ်းႁဵတ်းတီႈ ဝဵင်းၶူဝ်လမ်။ ဢုပ်ႇဢူဝ်းထတ်းသၢင်ၶိုၼ်း လွင်ႈၼႃႈၵၢၼ် ဢၼ်တူင်ႉၼိုင်ႁဵတ်းမႃးလႄႈ လွင်ႈႁူပ်ႉထူပ်းၵူၼ်းမိူင်း ၸဵမ်ၸိူဝ်းၼႆႉ ဝႃႈၼႆ။


ဝၼ်းတီႈ 26/08/2017 ယၢမ်းဝၢႆးဝၼ်း 1 မူင်း ထိုင် 4 မူင်း ၸုမ်းပၵ်းတႃပႂ်ႉတူၺ်း လွင်းငမ်းယဵၼ် ၸၼ်ႉၸႄႈမိူင်း JMC-S ၸတ်းႁဵတ်းတီႈ လုမ်း JMC-S ၵိင်ႇၸႄႈဝဵင်းၶူဝ်လမ် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ မီးတူဝ်တႅၼ်း ၸုမ်း RCSS/SSA၊ ၸုမ်း PNLO တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ၶဝ်ႈႁူမ်ႈဢုပ်ႇဢူဝ်း ထတ်းသၢင်ၶိုၼ်း ၼႃႈ ၵၢၼ် ဢၼ်လႆႈတူင်ႉၼိုင် ႁဵတ်းသၢင်ႈမႃးလႄႈ ႁူပ်ႉထူပ်းၵူၼ်းမိူင်း တၢင်းပွတ်းၸၢၼ်း မိူၼ်ၼင်ႇ မိူင်းၵိုင်၊ လၢႆးၶႃႈ၊ ပၢင်လူင်လႄႈ ၼမ်ႉၸၢင် ၸဵမ်ၸိူဝ်းၼႆႉ။

ၽူႈမီးပုၼ်ႈၽွၼ်း လုမ်းၵပ်းသၢၼ် JMC-S ၸႄႈဝဵင်းၶူဝ်လမ် လၢတ်ႈဝႃႈ “  ပဵၼ်ပၢင်ၵုမ် ၼိုင်ႈလိူၼ်လႂ် ၼိုင်ႈပွၵ်ႈ၊ ဢုပ်ႇဢူဝ်း ထတ်းသၢင်ၶိုၼ်းလွင်ႈၵၢၼ်ငၢၼ်း ဢၼ်တူင်ႉၼိုင်ႁဵတ်းသၢင်ႈမႃးၸိူဝ်းၼၼ်ႉ။ ယဝ်ႉၵေႃႈ မိူဝ်ႈၼႃႈမႃး မီးၽႅၼ်ၵၢၼ် တႃႇတေလူင်းပိုၼ်ႉတီႈႁူပ်ႉထူပ်း ၵူၼ်းမိူင်း တၢင်းပွတ်းၸၢၼ်း ထႅင်ႈလၢႆလၢႆတီႈ ၸဵမ် ၸိူဝ်းၼႆႉ” ဝႃႈၼႆ။


လိူဝ်ၼၼ်ႉ ၸုမ်းၶၢဝ်ႇတႆးလွတ်ႈလႅဝ်းဢွၵ်ႇဝႆႉ ၼႂ်းဝႅပ်ႉသၢႆႉ ၼႂ်းဝၼ်းတီႈ 26 ပွတ်းတွၼ်ႈၵၢင်ၼႂ် တူဝ်တႅၼ်း UN ၸၢတ်ႈ ၸိုင်ႈလုမ်ႈၾႃႉတင်း တူဝ်တႅၼ်းၶွမ်ႊမတီႊ JMC-S ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းၶူဝ်လမ်၊ ဢုပ်ႇဢူဝ်း ၵၼ် လွင်ႈၸုမ်း UN တေၸၢင်ႈၵမ်ႉၸွႆႈလႆႈသင် ၸဵမ်ၸိူဝ်းၼႆႉ။


မိူဝ်ႈပူၼ်ႉမႃး ၵၢင်လိူၼ်ဢေႃႊၵတ်ႉသ်ၼႆႉ ၸုမ်းပၵ်းတႃပႂ်ႉတူၺ်း လွင်ႈငမ်းယဵၼ် ၸၼ်ႉၸႄႈမိူင်း JMC-S  ႁူပ်ႉထူပ်းၵူၼ်းမိူင်း ၸႄႈဝဵင်းမိူင်းၵိုင်၊ လၢႆးၶႃႈ၊ ပၢင်လူင် လႄႈ ၼမ်ႉၸၢင် ၸိူဝ်းၼႆႉ။ ႁူပ်ႉထူပ်းဢုပ်ႇဢူဝ်း သပ်းလႅင်းၼႄၵူၼ်းမိူင်း မိူၼ်ၼင်ႇ လွင်ႈ NCA လွင်ႈပိူင်တိုဝ်းၵမ်သိုၵ်း CoC ၸဵမ်ၸိူဝ်းၼႆႉ ဝႃႈၼႆ။


ပူၼ်ႉမႃး မိူဝ်ႈဝၼ်းတီႈ 30/05/2017 ၼၼ်ႉ တူဝ်တႅၼ်းတပ်ႉသိုၵ်း RCSS/SSA ၊ တူဝ်တႅၼ်းတပ်ႉသိုၵ်းလူင်ပွင် ၸိုင်ႈ မၢၼ်ႈ တိူင်းသိုၵ်းဝၼ်းဢွၵ်ႇၵၢင်(ၶူဝ်လမ်) လႄႈတူဝ်တႅၼ်းၵူၼ်းမိူင်းၸဵမ်ၸိူဝ်းၼႆႉ ႁူမ်ႈၵၼ်ပိုတ်ႇလုမ်းလူလွမ် ပႂ်ႉတူၺ်း လွင်ႈငမ်းယဵၼ်ၸၼ်ႉၸႄႈမိူင်း တီႈဝဵင်းၶူဝ်လမ်(ၶူဝ်ၶမ်း) ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။


Photo by Nang Swe Nwe