ႁႅင်းၵၢၼ်တႆး ၼၢင်းလထေး ဢၼ်ၶဝ်ႈမႃးႁဵတ်းၵၢၼ်ၼႂ်းၵဵင်းမႆႇ ၸိုင်ႈထႆး  ဢၼ်ပဵၼ်ပေႃႈလဵင်ႉ/မႄႈလဵင်ႉ(ၼၢႆးၸၢင်ႈ)မၼ်းၼၢင်း လႆႈတူၺ်းလွမ်လဵင်ႉလူလုၵ်ႈမၼ်းၼၢင်းဝႆႉ 3 ၵေႃႉၼၼ်ႉ မၼ်းၼၢင်းယွၼ်းၶိုၼ်းလုၵ်ႈ ဝႃႈတေဢဝ်မိူဝ်းလဵင်ႉ၊ ၵေႃႉပဵၼ် ပေႃႈလဵင်ႉ(ၼၢႆးၸၢင်ႈ) ၵေႃႈသမ်ႉဢမ်ႇၶႂ်ႈၶိုၼ်းပၼ် ၵွပ်ႈလုၵ်ႈဢွၼ်ႇပဵၼ်ၽွင်းတိုၵ်ႉလီႁၵ်ႉလႄႈ  ၶႂ်ႈသိုပ်ႇၵဵပ်းလဵင်ႉလူလွမ်ၵႂႃႇ   ဝႃႈၵူဝ်မၼ်းၼၢင်း ၵေႃႉပဵၼ်မႄႈ ဢမ်ႇလဵင်ႉလူတူၺ်းလွမ်ၵုမ်ႇထူၼ်ႈပဵင်းၸႂ်လႆႈ ဢိၵ်ႇတင်း ပိူဝ်ႈတႃႇၵၢၼ်ႁဵၼ်းလႄႈတိုဝ်ႉတၢင်း လုၵ်ႈဢွၼ်ႇမိူဝ်းၼႃႈ။


ဝၼ်းတီႈ 19/08/2017 ယၢမ်းၵၢင်ၼႂ် 11 မူင်း ၼၢင်းလထေး (မႄႈလုၵ်ႈဢွၼ်ႇ) တင်း ဢဵၵ်ႇၵၽူတ်း မေႃၽဵတ်း (ပေႃႈလဵင်ႉ) လႆႈဢုပ်ႇထဵင်မေႃးၵၼ် လွင်ႈလုၵ်ႈဢွၼ်ႇ တၢင်ႇၾၢႆႇတၢင်ၶႂ်ႈဢဝ်လဵင်ႉလႄႈထိုင်ပေႃးလႆႈၶိုၼ်ႈႁူင်းပလိၵ်ႈၸႄႈဝဵင်းမႄႈရိမ်း ၸႄႈတွၼ်ႈၵဵင်းမႆႇ မႃးလၢႆပွၵ်ႈလၢႆၵမ်းယဝ်ႉ။ လိုၼ်းသုတ်းလႆႈၸႂ်တူၵ်းလူင်းၵၼ်ဝႃႈတေမွပ်ႈပၼ်ၶိုၼ်းၵေႃႉပဵၼ်မႄႈၼႆသေ လႆႈၽတ်းၼတ်ႉၵၼ် တေဢဝ်လုၵ်ႈဢွၼ်ႇၶိုၼ်းမွပ်ႈပၼ်ၶိုၼ်းၼၢင်းလထေးၵေႃႉပဵၼ်မႄႈ ၼႂ်းဝၼ်းတီႈ 19 ။ မီး ဢႆႊယႃႊၵၢၼ် (ၾၢႆႇတတ်းသိၼ်လုမ်းတြႃး) ၾၢႆႇလူလွမ်ပႂ်ႉပႃးသုၼ်ႇလႆႈလုၵ်ႈဢွၼ်ႇလႄႈပလိၵ်ႈ ႁူမ်ႈတင်း ၽူႈၸွႆႈၾၢႆႇၼၢင်းလထေး ၼၢင်းသႅင်ၶမ်းၼူၼ်း ၼၢင်းယုၽိၼ်း လႄႈၾၢႆႇပေႃႈလဵင်ႉမႄႈလဵင်ႉလႆႈလူင်းလၢႆးမိုဝ်းသေ မွပ်ႈလုၵ်ႈဢွၼ်ႇ 2 ၵေႃႉ  ပၼ်ၶိုၼ်းၵေႃႉပဵၼ် မႄႈၼၢင်းလထေး။ ထႅင်ႈၵေႃႉပီႈလႄႈၵေႃႉၼွင်ႉသုတ်း 2 ၵေႃႉ ၸၢႆးမိူင်း ဢႃယု 8 ၶူပ်ႇၸၢႆးၽိမ်း ဢႃယု 4 ၶူပ်ႇ ပၼ်ၼႂ်းမိုဝ်းၵေႃႉပဵၼ်မႄႈ တီႈႁူင်းပလိၵ်ႈ ၸႄႈဝဵင်းမႄႈရိမ်း ၸႄႈတွၼ်ႈၵဵင်းမႆႇ ၸိုင်ႈထႆး တေႃႇၼႃႈၵူႈၾၢႆႇၾၢႆႇ။ ဢွၼ်ၼႃႈၼၼ်ႉတႄႉလႆႈမွပ်ႈလုၵ်ႈယိင်းၵေႃႉၵၢင်ၼၼ်ႉပၼ် ၼၢင်းလထေးၵႂႃႇယဝ်ႉ။

ၸဝ်ႈၼႃႈတီႈပလိၵ်ႈၽူႈမီးပုၼ်ႈၽွၼ်း ႁူင်းပလိၵ်ႈၸႄႈဝဵင်းမႄႈရိမ်း လၢတ်ႈဝႃႈ “တင်းသွင်ၾၢႆႇၼႆႉ ႁၵ်ႉလုၵ်ႈၼင်ႇၵၼ်ယဝ်ႉ ၾၢႆႇဢဵၵ်ႇၵၽူတ်း မေႃၽဵတ်းၵေႃႈ ယိူင်းဢၢၼ်းႁႂ်ႈလုၵ်ႈဢွၼ်ႇ လႆႈမီးဢၼႃးၶူတ်း(ဢၼႃႇၵၢတ်ႈ) လႆႈႁဵၼ်းသုင် ပဵၼ်ၵူၼ်း မီးတၢင်းႁူႉတၢင်းႁၼ်ယႂ်ႇၵႂၢင်ႈလႄႈဢၢၼ်းသူင်ႇႁဵၼ်းထိုင်ၸၼ်ႉသုင်၊ ၾၢႆႇၼိုင်ႈ ၵေႃႉပဵၼ်မႄႈၵေႃႈ ၵွပ်ႈပဵၼ်လုၵ်ႈၼႂ်းတွင်ႉ ၼႂ်းသႆႈလႄႈၶႂ်ႈဢဝ်မိူဝ်းလဵင်ႉလူၶိုၼ်းၼႂ်းမိူင်းတႆး။ မိူဝ်ႈလဵဝ်ၼႆႉတင်းသွင်ၾၢႆႇ တူၵ်းလူင်းလႆႈၸႂ်ၵၼ်လီငၢမ်းယဝ်ႉ ၵေႃႉပဵၼ် ဢဵၵ်ႇၵၽူတ်း မေႃၽဵတ်း(ပေႃႈလဵင်ႉ)ၵေႃႈ ယွမ်းဢဝ်လုၵ်ႈဢွၼ်ႇ 2 ၵေႃႉ မွပ်ႈယိုၼ်ႈပၼ်ၶိုၼ်း ၼႂ်းမိုဝ်းၵေႃႉပဵၼ်မႄႈတႄႉ ၼၼ်ႉယဝ်ႉ” - ဝႃႈၼႆ။


ဢဵၵ်ႇၵၽူတ်း မေႃၽဵတ်း ၵေႃႉပဵၼ်ပေႃႈလဵင်ႉ ဢၼ်လဵင်ႉလူတူၺ်းလွမ်လုၵ်ႈဢွၼ်ႇ 3  ၵေႃႉပီႈၼွင်ႉမႃးၼၼ်ႉ  လၢတ်ႈဝႃႈ “ ၶႃႈ ႁဝ်းတင်ႈၸႂ်ဝႆႉ သင်ဝႃႈလုၵ်ႈဢွၼ်ႇၼႆႉ လႆႈယူႇၸွမ်းၶႃႈႁဝ်းၸိုင် ဝၼ်းမိူဝ်းၼႃႈၼႆႉ ႁႂ်ႈၶဝ်လႆႈႁဵၼ်းလိၵ်ႈသုင် မီးတၢင်းႁူႉယႂ်ႇ ပဵၼ်ၵူၼ်းၵတ်ႉၶႅၼ်ႇ ၶႂ်ႈႁဵၼ်းလိၵ်ႈထႆးႁႃႉ၊ ဢင်းၵိတ်းႁႃႉ၊ တႆးႁႃႉ ၵမ်ႈၸႂ်ၶဝ်လူၺ်ႈတၢင်းၶတ်းၸႂ်ၶဝ်။ ပေႃးဝၼ်းၼိုင်ႈမႃး ၶဝ်တေပဵၼ်ႁႅင်းတႃႇမိူင်းတႆး ဝၼ်းမိူဝ်းၼႃႈ။ မိူဝ်ႈလဵဝ် ၵူၼ်းဢႃယုယႂ်ႇယဝ်ႉၼႆႉ ၶဝ်ၵုမ်ႇမိုင်ႉႁဵတ်းႁႃၵိၼ်ၵၼ်ၵူႈၵေႃႉလႄႈ ၶဝ်တေလိုမ်းပႅတ်ႈၵၢၼ်ဝၢၼ်ႈမိူင်းတႆးယဝ်ႉ။ ပေႃးဝၼ်းၼိုင်ႈမႃး သင်ႁဝ်းၾိုၵ်းပၼ် လုၵ်ႈဢွၼ်ႇလႆႈႁဵၼ်းႁူႉမီးၼမ်ႉၵတ်ႉၸိုင် ၶဝ်တေၶဝ်ႈၸႂ် ၶိုၼ်းမိူဝ်းပူၵ်းပွင် ဢွင်ႈတီႈၵိူတ်ႇၾင်ႁူၵ်ႉၾင်ႁႄႇၶဝ်” ဝႃႈၼႆ။


ၼၢင်းလထေး ၵေႃႉပဵၼ်မႄႈၵိူတ်ႇ လၢတ်ႈဝႃႈ “ဢမ်ႇၶႂ်ႈယူႇယဝ်ႉ တီႈမိူင်းထႆးၼႆႉ ၶႃႈတေဢွၼ်ဢဝ်လုၵ်ႈၶႃႈပွၵ်ႈမိူဝ်းယဝ်ႉ ဢမ်ႇႁတ်းမႃးထႅင်ႈယဝ်ႉမိူင်းထႆးၼႆႉ ၵူဝ်ပိူၼ်ႈဢဝ်လုၵ်ႈၶႃႈထႅင်ႈ။ ႁဝ်းဢမ်ႇၶႂ်ႈပၼ်လုၵ်ႈၵေႃႈ ၶဝ်သမ်ႉၶႂ်ႈဢဝ်တိၵ်းတိၵ်း၊ ဢဝ်လၢႆးၼိုင်ႈယဝ်ႉလၢႆးၼိုင်ႈမႃးလွၵ်ႇငိုတ်ႈၶႃႈ ၶဝ်ဢမ်ႇၶႂ်ႈပၼ်လုၵ်ႈၶႃႈၶိုၼ်း၊ ၶႂ်ႈဢဝ်ႁဵတ်းပဵၼ်လုၵ်ႈၵဵပ်းၶဝ်။ ၶႃႈႁဝ်းယွၼ်းဢဝ် ပွၵ်ႈမိူဝ်းႁိူၼ်းတီႈမိူင်းတႆးမိူဝ်ႈလႂ်ၵေႃႈၶဝ်ဢမ်ႇပၼ် ပၢႆလၢတ်ႈဝႃႈ မႂ်းၶႂ်ႈမိူဝ်းၵေႃႈမိူဝ်းႁင်းၵွႆးမႂ်းလူး လုၵ်ႈဢွၼ်ႇၼႆႉဢမ်ႇပၼ် ဢဝ်မိူဝ်းၸွမ်း - ဝႃႈၼႆယူႇၶိူဝ်းၶိူဝ်းလႄႈၸင်ႇပဵၼ်လိူင်ႈၶိုၼ်ႈမႃးၸိူင်ႉၼႆ ၶႃႈလႅၼ်ႈၵႂႃႇၸႅင်ႈပလိၵ်ႈပေႃးၶႂ်ႈၸေးၵူႈႁူင်းပလိၵ်ႈ ယဝ်ႉ တီႈလႂ်ၵေႃႈပိူၼ်ႈဢမ်ႇပေႃးဝႆႉၼၵ်းၼႃ လိုၼ်းသုတ်းၵေႃႈလႅၼ်ႈႁႃၶိုၼ်းပီႈၼွင်ႉတႆးႁဝ်း ၸိူင်ႉၼင်ႇၼၢင်းသႅင်ၶမ်းၼူၼ်းၶဝ် ၼၢင်းယုၽိၼ်းၶဝ် လႄႈလၢႆလၢႆၵေႃႉၶဝ်ႈမႃးၸွႆႈထႅမ်ၶဝ်ႈလၢတ်ႈၶဝ်ႈထဵင်ပၼ်ၼႆႉၶႃႈယဝ်ႉ- ဝႃႈၼႆ။


ၵဵဝ်ႇၵပ်းလွင်ႈၼႆႉ တင်းသွင်ၾၢႆႇဢုပ်ႇဢူဝ်းလႆႈၸႂ်တူၵ်းလူင်းၵၼ် တီႈႁူင်းပလိၵ်ႈၸႄႈဝဵင်းမႄႈရိမ်း ၸႄႈတွၼ်ႈၵဵင်းမႆႇ ယဝ်ႉတူဝ်ႈ လီငၢမ်းယဝ်ႉ လုၵ်ႈဢွၼ်ႇထႅင်ႈသွင်ၵေႃႉၼႆႉၵေႃႈ ၼၢင်းလထေး လႆႈဢဝ်မိူဝ်းလဵင်ႉလူယူႇၸွမ်းမၼ်းၼၢင်း ၼင်ႇပုၼ်ႈၽွၼ်း မႄႈမီးၼၼ်ႉ။


ၼၢင်းလထေးၼႆႉ ဢႃယု ၸမ်မွၵ်ႈ 40 ပီ ပဵၼ်ၵူၼ်းဝၢၼ်ႈၼွင်ၵႂၢင် ဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ မီးလုၵ်ႈ 3 ၵေႃႉ ၵေႃႉယႂ်ႇသုတ်း ၸိုဝ်ႈႁွင်ႉ ၸၢႆးမိူင်း ဢႃယု 8 ၶူပ်ႇ၊ ၵေႃႉၵၢင်သမ်ႉၼၢင်းၽူၺ်း ဢႃယု 7 ၶူပ်ႇလႄႈ ၵေႃႉလိုၼ်းသုတ်း ၸၢႆးၽိမ်း ဢႃယု 4 ၶူပ်ႇ။ မိူဝ်ႈလဵဝ် လုၵ်ႈၵေႃႉၵၢင်တႄႉ လႆႈသူင်ႇပၼ်မိူဝ်းၵႂႃႇတီႈတၢင်းႁိူၼ်းတၢင်းမိူင်းတႆးဢွၼ်ၼႃႈၼႆႉယဝ်ႉ။ ၵိုတ်းထႅင်ႈၵေႃႉယႂ်ႇတင်းၵေႃႉလဵၵ်ႉသုတ်းတႄႉ ၼၢင်းလထေး တိုၵ်ႉမႃးလႆႈႁပ်ႉဢဝ်ဝၼ်းတီႈ 19 ၼႆႉ။


ၼၢင်းလထေးၼႆႉ ၶဝ်ႈႁဵတ်းၵၢၼ်ၼႂ်းမိူင်းထႆး ၶၢဝ်းတၢင်းၸမ် 5 ပီယဝ်ႉ။ ဝၢႆးၼၼ်ႉ ၶဝ်ႈႁဵတ်းၵၢၼ် တီႈႁူင်း သၵ်ႉ/တၢတ်ႈ သိူဝ်ႈၽႃႈ ၼႂ်းႁူင်းငၢၼ်းတီႈမႄႈရိမ်း ၸႄႈဝဵင်းၵဵင်းမႆႇသေ ထုၵ်ႇ ဢဵၵ်ႇၵၽူတ်း မေႃၽဵတ်း ၵေႃႉပဵၼ်ပေႃႈလဵင်ႉ/ မႄႈလဵင်ႉ (ၼၢႆးၸၢင်ႈ) ၼႆႉ ၸွႆႈလွမ်လူတူၺ်းလဵင်ႉပၼ်လုၵ်ႈဢွၼ်ႇၼၢင်းလထေး။


ဝၢႆးၼႆႉၵေႃႉပဵၼ်မႄႈ ၼၢင်းလထေး ယွၼ်းဢဝ်လုၵ်ႈၶိုၼ်းၵေႃႈ ပေႃႈလဵင်ႉ(ၼၢႆးၸၢင်ႈ) ဢမ်ႇၶႂ်ႈပၼ်။ လုၵ်ႈဢွၼ်ႇ 3 ၵေႃႉၼႆႉ ၵေႃႉယႂ်ႇသုတ်းတင်း ၵေႃႉၵၢင်တႄႉ ၵိူတ်ႇမိူင်းတႆး ပဵၼ်ပေႃႈဢၼ်ယူႇၼႂ်းမိူင်းတႆး ၼႃႈႁိူၼ်းလူႉၽၢတ်ႇၵၼ်သေ လုၵ်ႈၵေႃႉလဵၵ်း သုတ်းသမ်ႉ ၵိူတ်ႇၼႂ်းမိူင်းထႆး ပဵၼ်ထႅင်ႈပေႃႈၼိုင်ႈ။ “ၼႆႉၵေႃႈၽၢတ်ႇၵၼ်ယဝ်ႉ မိူဝ်ႈလဵဝ်ၵေႃႉပဵၼ်ၽူဝ် ဢမ်ႇႁပ်ႉပုၼ်ႈၽွၼ်း လူလွမ်တူၺ်းၸွႆႈသင် ဢွၼ်ၼႃႈၼႆႉၵေႃႈၶႃႈလဵင်ႉလူမႃးႁင်းၵွႆးၵူၺ်း” ၼၢင်းလထေး လၢတ်ႈၼႄၵႂႃႇၼင်ႇၼႆ။