ၾူၼ်တူၵ်းထပ်းၵၼ်ႁၢဝ်ႈႁႅင်း 2-3 ဝၼ်း ၼမ်ႉသၢႆၼွင်းလူၼ်ႉၾင်ႇ ထူမ်ႈၼႂ်းၸႄႈဝဵင်းတႃႈၶီႈလဵၵ်း လၢႆလၢႆတီႈ တီႈၶူင်ႈတီႈယၢၼ်း ၸွမ်းမူႇဝၢၼ်ႈ ထူမ်ႈလိုၵ်ႉ ထိုင်ဢႅဝ်ၵေႃႈမီး လွင်ႈလူႉသုမ်းၸွမ်းၼမ်ႉၵေႃႈမီးၼမ် ဝႃႈၼႆ။


ဝၼ်းတီႈ 15-16/08/2017 ၼမ်ႉသၢႆၼွင်းထူမ်ႈ ၼႂ်းၵၢတ်ႇတႃႈလေႃႉ၊ ပွၵ်ႉလႄႈ ၵၢတ်ႇမၢၵ်ႇၵႃႇႁူဝ်ၶမ်း၊ တွင်ၵေႃႉ ၼႂ်း၊ ပွၵ်ႉပုင်းထုၼ် လႄႈ ပွၵ်ႉသၢႆးၶၢဝ် ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း။ ဝၢႆးၼမ်ႉ ထူမ်ႈယဝ်ႉ ၵူၼ်းဝၢၼ်ႈ/သူၼ် ဢွၼ်ၵၼ်ပတ်းၽဵဝ်ႈ ၶီႈၵူမ်ႇၶီႈငႂ်ႈ ၸွမ်းႁိူၼ်းယေး ပဵၼ်ဢၼ်ထူပ်းတၢင်းယၢပ်ႇၽိုတ်ႇ ဝႃႈၼႆ။

ၸၢႆးဝုၼ်း ၽူႈပွင်ၵၢၼ် ၸုမ်းၵူၼ်းၼုမ်ႇတႆး TYO ၸႄႈဝဵင်းတႃႈၶီႈလဵၵ်း လၢတ်ႈဝႃႈ “ ယွၼ်ႉၾူၼ်တူၵ်းထပ်းၵၼ် ႁၢဝ်ႈႁႅင်း 2-3 ဝၼ်းလႄႈ ၼမ်ႉသၢႆၶိုၼ်ႈသေ ၼႂ်းၸႄႈဝဵင်းတႃႈၶီႈလဵၵ်း လၢႆတီႈလၢႆပွၵ်ႉ ထုၵ်ႇၼမ်ႉထူမ်ႈ၊ မိူဝ်ႈဝၼ်း တီႈ 15 ၼၼ်ႉတႄႉ တေလႆႈဝႃႈ ထူမ်ႈႁၢဝ်ႈႁႅင်းတႄႉ၊ မိူဝ်ၶမ်ႈဝႃး ဝၼ်းတီႈ 16 သမ်ႉ ဢမ်ႇပေႃးၼွင်းပဵင်း ဝၼ်းတီႈ 15 ။  တီႈပွၵ်ႉတွင်ၵေႃႉၼႂ်းတႄႉ ၼမ်ႉလိုၵ်ႉထိုင်ဢႅဝ်လူးၵွၼ်ႇ၊ မိူဝ်ႈၼမ်ႉထူမ်ႈၼၼ်ႉ ဢမ်ႇၸႂ်ႈထူမ်ႈ တင်း ၶိုၼ်း မွၵ်ႈ 1-2 ၸူဝ်ႈမူင်းၵူၺ်းၵေႃႉ ယူပ်ႈယွမ်းလူင်းယဝ်ႉ” ဝႃႈၼႆ။


သိုပ်ႇလၢတ်ႈထႅင်ႈဝႃႈ မိူဝ်ႈၼႆႉ ယၢမ်းၵၢင်ၼႂ် ၼႂ်းၸႄႈဝဵင်းတႃႈၶီႈလဵၵ်းၼႆႉ ၾူၼ်တိုၵ်ႉႁိူတ်ႇၵႂႃႇ တေႃႈလဵဝ်တႄႉ ၼႃႈၾႃႉၵုမ်ႈဝႆႉ လႅတ်ႈၵေႃႈဢမ်ႇဢွၵ်ႇ၊ ၾူၼ်ၵေႃႈဢမ်ႇတူၵ်း၊ လိူဝ်ၼၼ်ႉ တီႈႁိူၼ်းဢူၺ်းၵေႃႉၶႃႈႁဝ်း တီႈပွၵ်ႉ သၢႆးၶၢဝ် ၼမ်ႉထူမ်ႈၽႅဝ်ၼႂ်းႁိူၼ်းယေး ၽႅဝ်ထိုင်ႁွင်ႈၼွၼ်းၶဝ်လူးၵွၼ်ႇ၊ မၢင်ႁိူၼ်းၵေႃႈ ယွၼ်ႉယၢမ်ႈထူပ်းမႃးလၢႆၵမ်း လႄႈၽဵဝ်ႈၶူဝ်းၶွင်မၢင်ဢၼ် ဝႆႉတီႈသုင်သေငိူင်ႉဝႄႈထႃႈ ဝႃႈၼႆ။


ၼႂ်းၸႄႈဝဵင်းတႃႈၶီႈလဵၵ်းၼႆႉ မိူဝ်ႈဝၼ်းတီႈ 15/08/2017 ယၢမ်းၵၢင်ၶိုၼ်း ၼမ်ႉထူမ်ႈၶိုၼ်ႈၵမ်းၼိုင်ႈ ၼႂ်းၶၢဝ်းတၢင်း 1-2 မူင်းသေ ယူပ်ႈလူင်းၵႂႃႇၶိုၼ်း။ ထိုင် မႃးဝၼ်းတီႈ 16/08/2017 ယၢမ်းၵၢင်ၶမ်ႈ 8 မူင်းၼၼ်ႉ ထူမ်ႈထႅင်ႈ ၵမ်းၼိုင်ႈ ထိုင်ယၢမ်း 10 မူင်းၵၢင်ၶိုၼ်း ၸင်ႇယွမ်းလူင်း ဝႃႈၼႆ။


ဝဵင်းတႃႈၶီႈလဵၵ်းၼႆႉ ဝၼ်းတီႈ 24-25/07/2017 ၼမ်ႉသၢႆၼွင်းထူမ်ႈႁိူၼ်းၵူၼ်းဝၢၼ်ႈ ၼႂ်းၵၢတ်ႇတႃႈလေႃႉ ၸွမ်းပွၵ်ႉ ပုင်းထုၼ်၊ သၼ်သၢႆး၊ မၢၵ်ႇၵႃႇႁူဝ်ၶမ်း မႃးယဝ်ႉၵမ်းၼိုင်ႈ ဝႃႈ ၼႆ။


Photo by Nai Hark