ၶွမ်ႊမတီႊသုင်သုတ်းဝူင်ႈၵၢင်သွင်မိူင်းထႆး - မၢၼ်ႈ HLC ၸတ်းႁဵတ်းပၢင်ဢုပ်ႇၵုမ် ၵမ်းထူၼ် 5 တီႈၶွၼ်ၵႅၼ်ႇ ၽူႈၵွၼ်းသိုၵ်းမိၼ်းဢွင်ႇလၢႆႇ တင်းၽူႈၵွၼ်းသိုၵ်းထႆး ႁူပ်ႉထူပ်းဢုပ်ႇဢူဝ်းၵၼ် ႁႂ်ႈမီးလွင်ႈၸမ်ၸႂ်ၵၼ်လႄႈ ႁူမ်ႈမိုဝ်းၵၼ်ၵႂႃႇမိူဝ်းၼႃႈ။


ဝၼ်းတီႈ 28-30/08/2017 သိုဝ်ႇၶၢဝ်ႇထႆးရတ်ႊပိုၼ်ၽၢဝ်ႇဝႃႈ ၶွမ်ႊမတီႊသုင်သုတ်း (HLC) High Level Committee Meeting  Thailand – Myanmar ထႆး - မၢၼ်ႈ ၸတ်းႁဵတ်းပၢင်ၵုမ် တီႈ ႁူင်းႁႅမ်း ဢဝႃႊၼီႊ ၸႄႈတွၼ်ႈၶွၼ်ၵႅၼ်ႇ ၸိုင်ႈထႆး ။ ၽူႈၵွၼ်းသိုၵ်းထႆး ၸွမ်သိုၵ်းလူင် သူႊရၽူင်ႊ သူႊဝၼ်ႊၼဢတ်ႊ လႄႈ ၽူႈၵွၼ်းသိုၵ်းမၢၼ်ႈ ၸွမ်သိုၵ်းလူင် မိၼ်းဢွင်ႇလၢႆႇ  ဢွၼ်ဢဝ် ၸဝ်ႈၼႃႈ တီႈၾၢႆႇၵဵဝ်ႇၶွင်ႈတင်းသွင်ၾၢႆႇၶဝ်ႈႁူမ်ႈ။

ဢုပ်ႇဢူဝ်းၵၼ် လွင်ႈၵွင်ႉၵၢႆႇဝူင်ႈၵၢင်သွင်မိူင်း၊ လွင်ႈၵေႃၵမ်ၵၢၼ်လႅၼ်လိၼ် ၊ မေႃယႃၼႂ်းသိုၵ်း၊ လွင်ႈလႅၵ်ႈလၢႆႈၾိင်ႈႁိတ်ႈႁွႆး ၊ ၵၢၼ်ႁႄႉၵင်ႈၽေးယႃႈမဝ်းၵမ် ၸိူဝ်းၼႆႉ။


ပၢင်ၵုမ်ၶွမ်ႊမတီႊသုင်သုတ်း HLC ပွၵ်ႈၵမ်း 4 ၸတ်းႁဵတ်းမိူဝ်ႈဝၼ်းတီႈ 22-23/11/2016 တီႈ တီႈၼေႇပျီႇတေႃႇ ဢုပ်ႇဢူဝ်းၵၼ်ပိူဝ်ႈႁႂ်ႈသွင်မိူင်း မီးလွင်ႈၸမ်ၸႂ်ၵၼ်၊ ႁႂ်ႈၵူၼ်းမိူင်းတင်းသွင်မိူင်း ၸွမ်းလႅၼ်လိၼ်ယူႇမူၼ်ႈ၊ လွင်ႈၵူၼ်းပၢႆႈၽေးၸိူဝ်းၼႆႉ။ ပၢင်ၵုမ်ၵမ်းထူၼ်ႈ 6 တေမႃးသမ်ႉတေ ၸတ်းႁဵတ်းတီႈမိူင်းႁူမ်ႈတုမ်မၢၼ်ႈၶိုၼ်းဝႃႈၼႆ။


Photo by Thairath