ပီႈၼွင်ႉတႆးႁွတ်ႈၵဵင်းမႆႇ  ဢွၼ်ၵၼ်တူင်ႉၼိုင်ႁဵတ်းတၢင်းလီ ၼႂ်းဝၼ်းမႄႈ ဝၼ်းၵိူတ်ႇ ၸဝ်ႈၼၢင်း ႁေႃၶမ်းထႆးဢႃယု ၶွပ်ႈတဵမ် 85 ပီ ဝၼ်းတီႈ 12/08/2016 ယၢမ်း 18:00 မူင်း ပီႈၼွင်ႉတႆး ႁႅင်းၵၢၼ်ယၢၼ်မိူင်း ၼႂ်းၵဵင်းမႆႇ လၢႆမူႇ လၢႆၸုမ်း ႁူမ်ႈၵၼ် ၶဝ်ႈႁူမ်ႈပၢင်ၵႅဝ်ႈ ၵႃရဝ တႆႈတဵၼ်း ယွၼ်းပွၼ်းသူင်ႇထိုင်ပၼ်ၼၢင်းႁေႃၶမ်း ၸိုင်ႈထႆး။


ပၢင်ၵႅဝ်ႈၸတ်းႁဵတ်း တီႈသူၼ်မွၵ်ႇႁေႃၶမ်း (ရၢတ်ႉၶျၽရိုၵ်း) ဝဵင်းၵဵင်းမႆႇ ၸိုင်ႈထႆး ။ ဢဵၼ်ႁႅင်းတႆးႁိမ်းပၢၵ်ႇၶဝ်ႈႁူမ်ႈ တႆႈတဵၼ်းသူင်ႇပွၼ်း ထိုင်ႁႂ်ႈၸဝ်ႈၼၢင်းႁေႃၶမ်းလူင်ယူႇလီၵတ်း ယဵၼ်။

ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99 ဢွၼ်ႁူဝ် ပီႈၼွင်ႉတႆးၵႂႃႇၶဝ်ႈႁူမ်ႈၼၼ်ႉ လၢတ်ႈဝႃႈ “ ပေႃးထိုင်မႃးဝၼ်းမႄႈၸိုင် ႁဝ်းဢွၼ်ၵၼ်ႁဵတ်းတၢင်းလီပိူဝ်ႈတွပ်ႇတႅၼ်း ၵုၼ်းမုၼ် ၊ ဢၼ်မႃးၶဝ်ႈႁူမ်ႈဝၼ်းမိူဝ်ႈၼႆႉ လႆႈဝႃႈ တၢင်တူဝ်ပီႈၼွင်ႉတႆး ဢၼ်မႃးသဝ်းယူႇၼိူဝ်ၽႅၼ်ႇလိၼ် ၸိုင်ႈထႆး ၊ ၵွပ်ႈၼၼ်လႄႈ ၶႂ်ႈယွၼ်းႁႂ်ႈ ပီႈၼွင်ႉႁဝ်းၶႃႈဢွၼ်ၵၼ်မႃးၶဝ်ႈႁူမ်ႈၼမ်ၼမ်၊  ယိၼ်းၸူမ်း ထိုင်ၸုမ်းတႆးၵူႈၸုမ်းဢၼ်မႃးၶဝ်ႈႁူမ်ႈ ” ဝႃႈၼႆ။


ၸၢႆးၸွမ်လႅင်း ၽူႈၶဝ်ႈႁူမ်ႈ လၢတ်ႈဝႃႈ - “ ႁဝ်းၶႃႈလႆႈမႃးပိုင်ႈႁူမ်ႈၽူၺ်း ၸဝ်ႈၼႂ်းမိူင်းထႆးၼႆႉၵေႃႈ ပဵၼ်ဢၼ်ယိၼ်းၸူမ်းတႄႉၶႃႈ၊ မိူဝ်ႈၼႆႉၵေႃႈ ယွၼ်းသူးႁႂ်ႈၸဝ်ႈၼၢင်းႁေႃၶမ်း ဢႃယုယိုၼ်းယၢဝ်း ပၢႆးယူႇလီတဵမ်ထူၼ်ႈ ယူႇၵိုၵ်းပီႈၼွင်ႉထႆးလႄႈၸၢဝ်းသယၢမ် ၵႂႃႇပီယၢဝ်းၶၢဝ်းႁိုင်သေၵမ်း ” ဝႃႈၼႆ။


ပေႃးထိုင်မႃးဝၼ်းတီႈ 12 လိူၼ်ဢေႃႊၵတ်ႉသ် ပဵၼ်ဝၼ်းမႄႈၸိုင်ႈထႆးၼႆလႄႈ ၸုမ်းတူင်ႉၼိုင် တူင်ႇဝူင်းတႆးလႄႈ ပီႈၼွင်ႉတႆးဢွၼ်ၵၼ်တူင်ႉၼိုင် ႁဵတ်းလွင်ႈတၢင်းလီ မိူၼ်ၼင်ႇဢွၼ်ၵၼ် တၢၼ်းလိူတ်ႈ၊ တႆႈတဵၼ်းတိူင်ႇၵၢဝ်ႇၶေႃပွၼ်း (ယွၼ်းသူး)။


သူမ်ႊၻဵတ်ႊၽရႃႊၼၢင်းၸဝ်ႈသီႊရိႊၵိတ်ႊ ၽရႃႊပရူမ်ႊရႃႊၶျီႊၼီႊၼၢတ်ႊၼႆႉ ပဵၼ်ၸဝ်ႈၼၢင်း ၸုမ်ႈမိူင်းၶုၼ်ႁေႃၶမ်းထႆးတူၼ်ထူၼ်ႈ9 ပဵၼ်မႄႈၸဝ်ႈမုၼ်ယႂ်ႇၶုၼ်ႁေႃၶမ်းထႆးတူၼ်ထူၼ်ႈသိပ်း ဢၼ်သိုပ်ႇပုတ်ႈႁၢင်ႈႁေႃၸိုင်ႈထႆးၵႂႃႇယၢမ်းလဵဝ်။