ဝၼ်းတီႈ 17-20/08/2017 တီႈဝတ်ႉၵၢင်တူင်ႈ ဢိူင်ႇထုင်ႉယိူင်း ၸႄႈဝဵင်းလၢႆးၶႃႈၼၼ်ႉ လႆႈၸတ်းႁဵတ်း ပၢင်ပၼ်ပိုၼ်ႉႁူႉ လၢႆးၽူႈဢွၼ်ႁူဝ် ပွၵ်ႈၵမ်းႁႅၵ်ႈသေ ၸဝ်ႈသင်ၶ လႄႈ ၵူၼ်းဝၢၼ်ႈ မႃးၶဝ်ႈႁဵၼ်း မီး70 ပၢႆ။


ၼႂ်းၶၢဝ်းတၢင်း ပၢင်သွၼ် သီႇဝၼ်းၼႆႉ မေႃသွၼ် ၸိူဝ်းလုၵ်ႉတၢင်းၵႃလီႉ မႃးပူင်သွၼ်ပၼ် မီးႁူဝ်ၶေႃႈ “ၽူႈဢွၼ်ႁူဝ်၊ ၵူၼ်းမိူင်းလီ၊ ပၢႆးၸတ်းၵၢၼ်၊ ၵၢၼ်သၢင်ႈတူင်ႇဝူင်းၵူၼ်း ႁႂ်ႈၵႅၼ်ႇၶႅင်၊  ပိုၼ်ႉထၢၼ်ၻီႊမူဝ်ႊၶရေႊသီႊ ၸဵမ်ၸိူဝ်းၼႆႉသေ ဢိၵ်ႇပႃး တင်းၵၢၼ်သိုဝ်ႇၶၢဝ်ႇ ၼႆယဝ်ႉ။

ၶၢဝ်းတၢင်း 4 ဝၼ်းၼႆႉ ယၢမ်းၵၢင်ဝၼ်း ပဵၼ်ပၢင်သွၼ်၊ ယၢမ်းႁူဝ်ၶမ်ႈ မီးပၢင်ထမ်းတြႃး ၸဝ်ႈၶူး သီႇရိထမ်ႇမ ဝတ်ႉၾႃႉဝဵင်းဢိၼ်း မႃးတေႇသၼႃႇထမ်းတြႃး တႃႇၶၢဝ်းတၢင်း သွင်ဝၼ်း၊ ၸဝ်ႈၶူး ပၼ်ႇတဝ ဝဵင်းလၢႆးၶႃႈၵေႃႈ လႆႈမႃးပွၼ်ႈသွၼ်ပၼ်ထမ်းတြႃး ၼႆယဝ်ႉ။


ၸူဝ်ႈၶၢဝ်းပၢင်သွၼ်ၼၼ်ႉ ၸဝ်ႈသင်ၶ ဢိၵ်ႇတင်း ၽူႈတႅၼ်းၽွင်း ၸၢႆးၵျေႃႇၸေႇယ လႄႈ မေႃသွၼ်ၶဝ် လႆႈၵႂႃႇလဵပ်ႈႁဵၼ်းသူႇၸႂ်း ႁူင်းႁဵၼ်းၸၼ်ႉငဝ်ႈ ဢၼ်မီးဝႆႉ ၼႂ်းဝၢၼ်ႈၽြႃးလိူၼ်သီႇ ဢိူင်ႇထုင်ႉယိူင်း ၸႄႈဝဵင်းလၢႆးၶႃႈ တီႈဢၼ်မီးလုၵ်ႈႁဵၼ်းယူႇ 38 ၵေႃႉလႄႈ မီးမေႃသွၼ်ယိင်း ၼိုင်ႈၵေႃႉ ၼႆယဝ်ႉ။ ႁူင်းႁဵၼ်းၼႆႉ လႆႈတႄႇၵေႃႇတင်ႈမႃး မိူဝ်ႈၼႂ်းပီ 2016 ၼႆယဝ်ႉ။


ၽူႈတႅၼ်းၽွင်း ၸၢႆးၵျေႃႇၸေႇယ လၢတ်ႈဝႃႈ- "ၼင်ႇႁိုဝ် ၵူၼ်းမိူင်းတေမေႃပူၵ်းပွင် ဝၢၼ်ႈဢိူင်ႇတူဝ်ၵဝ်ႇ ႁႂ်ႈၶိုၼ်ႈယႂ်ႇၵႂႃႇ ဝၼ်းတႃမိူဝ်းၼႃႈၼၼ်ႉ တေၶတ်းၸႂ် ႁႃႁဵတ်းပၼ် တႃႇၵူၼ်းမိူင်း ၵႃႈၼင်ႇပွင်ပဵၼ်လႆႈ"- ဝႃႈၼႆ။