ၸွမ်ၽွင်းလူင်လႄႈ ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး တိုၵ်းသူၼ်းႁႂ်ႈႁႅင်းၵၢၼ် ဢွၼ်ၵၼ်ႁဵတ်းဝတ်းဝႂ်ၸွမ်း ၶၵ်ႉတွၼ်ႈလႄႈ ၶၢဝ်းယၢမ်းဢၼ်မၵ်းမၼ်ႈဝႆႉၼၼ်ႉ ။


ဝၼ်းတီႈ 28/08/2017 ၸွမ်ၽွင်းလူင်မိူင်းထႆး ၸွမ်သိုၵ်းလူင်ပရႃႊယုတ်း ၸၼ်ႊဢူဝ်ႊၶျႃႊ ၾၢင်ႉထိုင်ႁႂ်ႈ ႁႅင်းၵၢၼ် ႁဵတ်းၸွမ်းၶၵ်ႉတွၼ်ႈၸွမ်းၼင်ႇ ၶၢဝ်းယၢမ်းဢၼ်လူင်ပွင်ၸိုင်ႈ မၵ်းမၼ်ႈဝႆႉၼၼ်ႉ ဝႃႈၼႆ။


ၸွမ်သိုၵ်းလူင် ပရႃႊယုတ်ႊ ၸၼ်ႊဢူဝ်ႊၶျႃႊ လၢတ်ႈဝႃႈ -  “ ႁႂ်ႈႁႅင်းၵၢၼ်ဢွၼ်ၵၼ်ၶတ်းၸႂ် ႁဵတ်းဝတ်းဝႂ်ႁႂ်ႈ ယဝ်ႉတူဝ်ႈ ၸွမ်းၼင်ႇၶၢဝ်းယၢမ်းဢၼ်မၵ်းမၼ်ႈ ပေႃးပူၼ်ႉၶၢဝ်းယၢမ်းယဝ်ႉၸိုင် တေဢမ်ႇၶႂၢၵ်ႈၶၢဝ်းယၢမ်း ဢမ်ႇယွၼ်ႇယၢၼ်းပၼ် ထႅင်ႈယဝ်ႉ။ ပိူဝ်ႈတႃႇဢမ်ႇႁႂ်ႈမီးလွင်ႈပူၼ်ႉပႅၼ်သုၼ်ႇလႆႈ ၊ ၵိၼ်ၸိၵ်းတွၵ်ႇၸွၵ်းၼိူဝ်ႁႅင်းၵၢၼ်ၼၼ်ႉၵေႃႈ လႆႈသင်ႇႁႂ်ႈ ၸဝ်ႈၼႃႈတီႈႁဵတ်းၸွမ်းၼင်ႇပၵ်းပိူင်မၢႆမီႈ ” ။

ႁွင်ႈၵၢၼ်ၾၢႆႇႁႅင်းၵၢၼ်ပိုၼ်ၽၢဝ်ႇမိူဝ်ႈဝၼ်းတီႈ 28/08/2017 ဝႃႈၸဝ်ႈၼႃႈတီႈလႆႈတွင်ႈထၢမ် လွင်ႈပဵၼ် ပေႃႈလဵင်ႉ /မႄႈလဵင်ႉ လုၵ်ႈလဵင်ႉၵၼ်တႄႉတႄႉ  မီးပေႃႈလဵင်ႉ / မႄႈလဵင်ႉ (ၼၢႆးၸၢင်ႈ) ဢၼ်ထုၵ်ႇမႅၼ်ႈမီး 130,000 ၵေႃႉ ၵူၼ်းႁႅင်းၵၢၼ် ဢၼ်ထုၵ်ႇမႅၼ်ႈၽၢၼ်ႇပူၼ်ႉလွင်ႈထတ်းထွင်မီး 481,000 ၵေႃႉ ၊ ဢၼ်ဢမ်ႇၽၢၼ်ႇသမ်ႉ  မီး 12,000 ၵေႃႉ ။


ၽူႈၸိူဝ်းဢၼ်ၽၢၼ်ႇ ယဝ်ႉၼၼ်ႉ ႁႂ်ႈၵႂႃႇၸၢႆႇငိုၼ်းၵႃႈ CI လႄႈ ဝႂ်ႁပ်ႉႁဵတ်းၵၢၼ် တီႈ 7ven eleven တႄႇဢဝ်ဝၼ်းတီႈ 28 /08/2017 ထိုင် 31/12/2017 သိုပ်ႇၼၼ်ႉ တေၶိၼ်းၵႂႃႇႁဵတ်းတီႈသုၼ် ႁဵတ်းဝတ်း တႄႇဝၼ်းတီႈ 15/09/2017 ၼႆႉၵႂႃႇ ။  ၵႃႈၸႂ်ႉၸၢႆႇဢၼ်တေလႆႈသဵင်ႈ  တီႈ 7ven eleven 310 ဝၢတ်ႇ ၊ ၵႃႈဝႂ်ႁဵတ်း ၵၢၼ် 560 ဝၢတ်ႇ ၊ ၵႃႈဝီႊသႃႊ 500 ဝၢတ်ႇ၊ၵႃႈထတ်းပၢႆးယူႇလီ 500 ဝၢတ်ႇ ၊ၵႃႈႁပ်ႉႁွင်းပၢႆးယူႇလီ 500 ဝၢတ်ႇ ။


ဝႃႊရႃႊၼူၼ်ႊ ပီႊတီႊဝၼ်ႊ ၸဝ်ႈၼႃႈတီႈႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်း လၢတ်ႈဝႃႈ -  “  ႁႂ်ႈပေႃႈလဵင်ႉၼၢႆးၸၢင်ႈလႄႈ လုၵ်ႈၸၢင်ႈ (လုၵ်ႈလဵင်ႉ) ဢွၼ်ၵၼ်ၵႂႃႇႁဵတ်းၸွမ်းၼင်ႇၶၵ်ႉတွၼ်ႈလႄႈ ၶၢဝ်းယၢမ်းဢၼ်မၵ်းမၼ်ႈဝႆႉ  ပေႃးပူၼ်ႉၶၢဝ်း ယၢမ်းယဝ်ႉၸိုင်တေဢမ်ႇႁဵတ်းပၼ်ယဝ်ႉ တေလႆႈပွၵ်ႈၶိုၼ်းမိူဝ်း ပေႃးၶႂ်ႈၶဝ်ႈမႃး မိူင်းထႆးၶိုၼ်းၵေႃႈ တေလႆႈႁဵတ်း MOU သေၶိုၼ်းၶဝ်ႈမႃး”  ဝႃႈၼႆ။


ႁွင်ႈၵၢၼ်ဢၼ်ႁပ်ႉႁဵတ်းပၼ်ဝတ်းႁႅင်းၵၢၼ်ဢၼ်လုၵ်ႉမိူင်းႁူမ်ႈတုမ်မၢၼ်ႈမႃးၼၼ်ႉ မီး 9 တီႈ မိူၼ်ၼင်ႇ သမုထ်ႊသႃႊ ၶွၼ်ႊ၊ သမုထ်ႊပရႃႊၵၢၼ်ႊ၊ ၵဵင်းႁၢႆး၊ တၢၵ်ႇ၊ ရႃႊၼွင်ႊ၊ ၵဵင်းမႆႇ၊ ၼၶွၼ်ႊသဝၼ်လႄႈ သူင်ႊၶလႃ ၸိူဝ်းၼႆႉ ။


ၵူၼ်းၸိူဝ်းၵႂႃႇပၼ်ၸဝ်ႈၼႃႈတီႈ ၸွပ်ႇထတ်းသေဢမ်ႇၽၢၼ်ႇ ၸိုဝ်ႈ ပေႃႈလဵင်ႉ၊ မႄႈလဵင်ႉ၊ လုၵ်ႈလဵင်ႉ၊ တီႈႁဵတ်းၵၢၼ် ဢၼ်ထုၵ်ႇမႅၼ်ႈ ၸိူဝ်းၼၼ်ႉတေလႆႈဢွၵ်ႇမိူင်းထႆး ပွၵ်ႈမိူဝ်းဝၢၼ်ႈၽႂ်မိူင်းမၼ်း။ ၵူၼ်းမိူင်းၶႅမ်ႊၿေႃႊတီႊယိူဝ်ႊ၊ လၢဝ်းၵေႃႈပွၵ်ႈမိူဝ်းၵူႈဝၼ်း မီးၵႂႃႇၵူၼ်း 5 – 6 ႁဵင်ယဝ်ႉ ဝႃႈၼႆ။


Photo : Chiang Mai News  / Pra Cha Chat