လူင်ပွင်ၸိုင်ႈမိူင်းထႆး ၸွမ်သိုၵ်းလူင် ပရႃႊယုတ်ႊ ၸၼ်ႊဢူဝ်ႊၶျႃႊ မွၵ်ႇလၢတ်ႈတုၵ်းယွၼ်းႁႂ်ႈၵူႈ ၾၢႆႇ ႁူမ်ႈမိုဝ်းၵၼ်ၸွႆႈၵႄႈလိတ်ႈပၼ်ႁႃႁႅင်းၵၢၼ်ယၢၼ်မိူင်း ယႃႇမႆႈၸႂ်ၵူဝ်ႁႅင်းၵၢၼ်ယၢၼ်မိူင်းႁိမ် ၵၢၼ်ၵူၼ်းထႆး ၵၢၼ်မီးတင်းၼမ်ပေႃးၶႂ်ႈႁဵတ်း ဝႃႈၼႆ။


ဝၼ်းတီႈ 16/08/2017 သိုဝ်ႇၶၢဝ်ႇ Thairath ႁၢႆးငၢၼ်းဝႃႈ တီႈပၢင်ၵုမ် ႁၢင်ႈႁႅၼ်းၵၢၼ်ဝၢင်းၽႅၼ် လူင်းတိုၼ်း/ၸႂ်ႉၸၢႆႇငိုၼ်းတွင်း ပီ 2019 (2562)ၼၼ်ႉ ၸွမ်သိုၵ်းလူင်ပရႃႊယုတ်ႊ ၸၼ်ႊဢူဝ်ႊ ၶျႃႊ ၵေႃႉပဵၼ်ၸွမ်ၽွင်းလူင်မိူင်းထႆး  ပဵၼ်ၵဝ်ႉၵၼ်းၼႂ်းပၢင်ၵုမ်သေ ဢုပ်ႇဢူဝ်းတႃႇၵႄႈလိတ်ႈ ပၼ်ႁႃ ႁႅင်းၵၢၼ်ယၢၼ်မိူင်း မိူၼ်ၼင်ႇလွင်ႈလွၵ်ႇငိုတ်ႈ၊ လွင်ႈပူၼ်ႉပႅၼ်သုၼ်ႇလႆႈ၊ လွင်ႈၵၢၼ်ၵႃႉ ၵူၼ်း ၸိူဝ်းၼႆႉ။ ဢမ်ႇဝႃႈၵူၼ်းမိူင်း၊ ပလိၵ်ႈ၊ သိုၵ်း၊ ၶႃႈႁၢပ်ႇၵၢၼ်ၶုၼ် သင်ႁဵတ်းၽိတ်းပၵ်းပိူင် ၵိၼ်ၸိၵ်းတွၵ်ႇၸွၵ်းၼိူဝ်ႁႅင်းၵၢၼ်ၸိုင် တေၺႃးတူတ်ႈတၢမ်ႇ ၸွမ်းၼင်ႇမၢႆမီႈမိူင်းထႆးမီး ။

ၸွမ်းသိုၵ်းလူင်ပရႃႊယုတ်ႊ ၸၼ်ႊဢူဝ်းၶျႃႊ လၢတ်ႈဝႃႈ - “ ယၢမ်းလဵဝ်ႁႅင်းၵၢၼ် မႃးႁဵတ်းၵၢၼ်မိူင်း ထႆးဝႆႉ မိူဝ်ႈလဵဝ်ဝၢၼ်ႈမိူင်းၶဝ်ပဵၼ်ၶၢဝ်းပူၵ်းပွင် ပေႃးဝၢၼ်ႈမိူင်းၶဝ်ၶိုၼ်ႈယႂ်ႇမႃးၸိုင် ၶဝ်ၵေႃႈတေပွၵ်ႈ ၶိုၼ်းႁိူၼ်း ၵွပ်ႈၼၼ်ႁဝ်းၵေႃႈလူဝ်ႇႁၢင်ႈႁႅၼ်းႁႂ်ႈတူဝ်ႈတၼ်းဝႆႉ ယွၼ်ႉမိူင်းထႆးတိုၼ်းလူဝ်ႇပိုင်ႈႁႅင်း ၵၢၼ်  ယႃႇမႆႈၸႂ်ဝႃႈၵူဝ်ပိူၼ်ႈမႃးႁိမ်ၵၢၼ်ၵူၼ်းထႆးႁဝ်း ၵၢၼ်မီးတင်းၼမ်သွၼ်ႇႁႂ်ႈၶႂ်ႈႁဵတ်းၵူၺ်းလႃႈ  ” ဝႃႈၼႆ။


ၼၢင်းသူႇၵၼ်းတႃး သူၽတ်ႉတႃး တီႈၵိူဝ်းၵုမ်ၾၢႆႇၵေႃႇတင်ႈၸုမ်းႁႅင်းၵၢၼ်ယၢၼ်မိူင်း လၢတ်ႈဝႃႈ - “ ၵၢၼ်ဢၼ်ႁႅင်းၵၢၼ်ႁဵတ်းၼႆႉ မၼ်းပဵၼ်ၵၢၼ်ဢၼ်ၵူၼ်းထႆး ဢမ်ႇၶႂ်ႈႁဵတ်းလွၼ်ႉလွၼ်ႉ ၊ ႁႅင်းၵၢၼ် ဢၼ်ႁဵတ်းၵၢၼ်ယူႇတီႈမိူင်းထႆးၼႆႉ ၼင်ႇႁိုဝ်တေဢမ်ႇၺႃးပႅတ်ႉလႅၼ် ၊ ၺႃးပူၼ်ႉပႅၼ်သုၼ်ႇလႆႈ၊ ႁဵတ်းၵၢၼ်ဢမ်ႇလႆႈငိုၼ်းၸိူဝ်းၼႆႉ ႁဝ်းလူဝ်ႇၶဝ်ႈႁႃၵၼ် ပဵၼ်ဢၼ်ၼိုင်ႈဢၼ်လဵဝ်ၵၼ် ၽွမ်ႉၵၼ်၊ မီးၸႂ်ႁတ်းႁၢၼ်သေႁူမ်ႈၵၼ်တုၵ်းယွၼ်း၊ ႁူပ်ႉပၼ်ႁႃသင်ၵေႃႈ ႁူမ်ႈၵၼ်ၵႄႈလိတ်ႈပၼ်ႁႃ ” ဝႃႈၼႆ။


ႁႅင်းၵၢၼ်ယၢၼ်မိူင်း ဢၼ်လုၵ်ႉတၢင်းမိူင်းႁူမ်ႈတုမ်မၢၼ်ႈ မိူင်းတႆး ၵႂႃႇႁဵတ်းၵၢၼ်ၼႂ်းမိူင်းထႆး တင်း မူတ်း မီးမွၵ်ႈ 2.3 လၢၼ်ႉၵေႃႉ ၊ ႁႅင်းၵၢၼ် ဢၼ်ထုၵ်ႇမႅၼ်ႈ ၸွမ်းမၢႆမီႈထႆးမီးလၢၼ်ႉပၢႆၵူၺ်းဝႃႈၼႆ။


Photo by Prachachat.net &Thairath.co.th