ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ တင်းပီႈၼွင်ႉတၵ်ႉၵႃႇသတ်ႉထႃး ႁူမ်ႈၵၼ် လူႇတၢၼ်းငိုၼ်းၵမ်ႉထႅမ် ပၼ်ၵၢၼ်ႁဵၼ်း သင်ၶတႆး ဢၼ်မႃးၶိုၼ်ႈႁဵၼ်းၸၼ်ႉၸွမ် တီႈၼႂ်းၵုင်းထဵပ်ႈ(မိူင်းၵွၵ်ႇ) တႃႇ 53 တူၼ်။


ဝၼ်းတီႈ 27/08/2017 ယၢမ်းဝၢႆးဝၼ်း 12:30 မူင်းၼၼ်ႉ ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ဢွၼ် ႁူဝ်ၼမ်းၼႃႈ ပီႈၼွင်ႉတၵ်ႉၵႃႇသတ်ႉထႃး ၼႂ်းမိူင်းၵွၵ်ႇ လူႇတၢၼ်းငိုၼ်းၵမ်ႉထႅမ် ၵၢၼ်ႁဵၼ်း သင်ၶတႆး ၸုပ်ႈတီႈ 13 တီႈဝတ်ႉမႂ်ႇ (ဝတ်ႉတႆး) သႃထုပရႃႇတဵတ်ႇ မိူင်းၵွၵ်ႇ ၸိုင်ႈထႆး။ ၼင်ႇႁိုဝ် တေပဵၼ်ႁႅင်းၸႂ် လုၵ်ႈႁဵၼ်းသင်ၶတႆး ၸုပ်ႈ မႂ်ႇၸိူဝ်း ဢွၵ်ႇ ႁဵၼ်းလိၵ်ႈၼွၵ်ႈမိူင်း ဝႃႈၼႆ။

ၸဝ်ႈၶူးၼေႃႇလႅင်း တေႇၸၺႃႇၼ ၽူႈၵိူဝ်းၵုမ်/ ၾၢႆႇႁႃငိုၼ်းတိုၼ်း ၵမ်ႉထႅမ်လုၵ်ႈႁဵၼ်းသင်ၶတႆး ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ လၢတ်ႈဝႃႈ “ ၼႂ်းပီ 2017 ၼႆႉ သင်ၶတႆးႁဝ်း ဢၼ်ၶဝ်ႈမႃးႁဵၼ်းၼႂ်းမိူင်းထႆး တီႈၵုင်း ထဵပ်ႈၼႆႉ မီး 53 တူၼ်။ ၼႂ်း 53 တူၼ်ၼၼ်ႉ ဢၼ်ၶိုၼ်ႈၸၼ်ႉ B.A 45 တူၼ်၊ ၸၼ်ႉ M.A 8 တူၼ်။ ပီၼႆႉ ၸၼ်ႉ B.A သမ်ႉ လႆႈၵမ်ႉထႅမ်ငိုၼ်း ၼိုင်ႈၸဝ်ႈလႂ် 5,000 ဝၢတ်ႇ၊ ၸၼ်ႉ M.A သမ်ႉ 7,000 ဝၢတ်ႇ။ ဢၼ်ႁဝ်းၶႃႈ တၢၼ်း ငိုၼ်းၵမ်ႉထႅမ် ၵၢၼ်ႁဵၼ်းၼႆႉ ၸွမ်းၼင်ႇ ႁဝ်းၶႃႈ ပွင်ပဵၼ်လႆႈ ႁႂ်ႈမၼ်းပေႃးၵုမ်ႇထူၼ်ႈတင်းမူတ်းတႄႉၵေႃႈ ဢမ်ႇ ၵုမ်ႇၼင်ႇၵဝ်ႇ။ ယိူင်းဢၢၼ်းတႄႉ ႁဝ်းၶႃႈ ပၼ်ႁႅင်း ယုၵ်ႉယွင်ႈၼမ်ႉၸႂ်ၵၼ် ထႅင်ႈၾၢႆႇၼိုင်ႈၵေႃႈ တင်းတၵ်ႉၵႃႇ တႆးႁဝ်း ဢွၼ်ႁူဝ်ၼမ်းၼႃႈၵၼ်သေ ယုၵ်ႉယွင်ႈ သႃ သၼႃ၊ ယုၵ်ႉယွင်ႈ သင်ၶၸဝ်ႈ ႁႂ်ႈပေႃးမီးႁႅင်းၸႂ် ၸဵမ်ၸိူဝ်းၼႆႉ ၸင်ႇဢွၼ်ၵၼ်ၸတ်းႁဵတ်း” ဝႃႈၼႆ။


ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ဢွၼ်ၸတ်းႁဵတ်းမႃး ပၢင်လူႇတၢၼ်းငိုၼ်းၵမ်ႉထႅမ် လုၵ်ႈႁဵၼ်း သင်ၶတႆး တႄႇဢဝ် ၸုပ်ႈ(1) ထိုင် ၸုပ်ႈ (13) ၼႆႉ မီးၵႂႃႇယဝ်ႉ 200 ပၢႆ။


ၸဝ်ႈၶူးၼေႃႇလႅင်း တေႇၸၺႃႇၼ လၢတ်ႈဝႃႈ ပၢင်လူႇတၢၼ်းငိုၼ်းၵမ်ႉထႅမ် သင်ၶတႆးႁဝ်းၶႃႈၼႆႉ ၼိုင်ႈပီ ၼိုင်ႈပွၵ်ႈ ပဵၼ်သင်ၶတႆး ၸုပ်ႈမႂ်ႇ ဢၼ်လုၵ်ႉမိူင်းတႆးႁဝ်းသေမႃး။ မိူဝ်ႈပီ 2016 ၼၼ်ႉ ၸၼ်ႉ Ph.D မီး 2 ၸဝ်ႈ လႆႈၵမ်ႉထႅမ် ပၼ် ၼိုင်ႈၸဝ်ႈ 10,000 ဝၢတ်ႇ။ ၵူၺ်းၵႃႈ ပီၼႆႉ ၸၼ်ႉ Ph.D ဢမ်ႇမီး။ ပီ 2017 ၼႆႉသမ်ႉ လုၵ်ႈႁဵၼ်းသင်ၶတႆး ၶႂ်ႈ ဝႃႈၼမ်လိူဝ်ၵူႈပီပူၼ်ႉမႃးၼၼ်ႉ ဝႃႈၼႆ။


သင်ၶတႆး ၵမ်ႈၼမ် ၸိူဝ်းၵႂႃႇၶိုၼ်ႈႁဵၼ်း ၸၼ်ႉၸွမ် တီႈမိူင်းၵွၵ်ႇ ၸိုင်ႈထႆးသမ်ႉ မိူၼ်ၼင်ႇ ၸၼ်ႉၸွမ် မႁႃမူင်းၵုတ်ႇ၊ ၸၼ်ႉၸွမ်မႁႃၵျူးလႃးလူင်းၵွၼ်း၊ ၸၼ်ႉၸွမ်သယၢမ်၊ ၸၼ်ႉၸွမ်ဢေးပႅၵ်ႇလႄႈ ၸၼ်ႉၸွမ်မႁိတူလ်း ၸဵမ်ၸိူဝ်း ၼႆႉ။ တေႃႈလဵဝ် သင်ၶတႆး ဢၼ်ၶိုၼ်ႈႁဵၼ်းၸၼ်ႉၸွမ်ဝႆႉ မိူၼ်ၼင်ႇ B.A M.A လႄႈ Ph.D တင်းမူတ်း မီးမွၵ်ႈ 170 တူၼ် ဝႃႈၼႆ။