ၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network ဢွၼ်ႁူဝ်ၼမ်းၼႃႈသေ တေၽုၵ်ႇမွၵ်ႇၵွၼ် 1,500 ၼႂ်းၸႄႈ ဝဵင်းလႃႈသဵဝ်ႈ ႁႂ်ႈပဵၼ်မိၵ်ႈမၢႆမိူင်းတႆး။


တူၼ်ႈမွၵ်ႇၵွၼ် 1500 တူၼ်ႈၼႆႉ တေၽုၵ်ႇၼႂ်းဝၼ်းတီႈ 16/07/2017 ယၢမ်းၵၢင်ၼႂ် 9 ထိုင် 4 မူင်းဝၢႆးဝၼ်း ယူႇ တီႈၵေႃႁူမ်ႈသၢင်ႈၵူၼ်းၼုမ်ႇတႆး TYN ဢွၼ်ႁူဝ်သေ တေၽုၵ်ႇမွၵ်ႇၵွၼ် ၼႂ်းဢိူင်ႇမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ဝႃႈၼႆ။

ၸၢႆးၼေႃႇသႅင် ၽူႈပွင်ၵၢၼ်ၸုမ်း TYN လၢတ်ႈၼႄဝႃႈ “ ႁိမ်းၶႅပ်ႇၶၢင်ႈတၢင်းသွင်ၾၢႆႇ သုတ်းသၢႆတၢင်းၼၼ်ႉ တေၽုၵ်ႇတူၼ်ႈမွၵ်ႇၵွၼ်တေႃႇထိုင်မိူင်းယေႃ ။ ပေႃးယဝ်ႉၵေႃႈ တေၽုၵ်ႇပၼ်ပႃးတီႈပၢင်ႇလဵင်ႉဝူဝ်း/ပၢင်ႇပဵင်း မိူင်းယေႃ” ဝႃႈၼႆ။


မွၵ်ႇၵွၼ် 1,500 တူၼ်ႈၼႆႉ မၼ်းမီးၸဝ်ႈတႃႇၼၶဝ် မႃးၵမ်ႉၸွႆႈလူႇတၢၼ်းဝႆႉပၼ် တီႈၸုမ်းၵေႃႁူမ်ႈ သၢင်ႈၵူၼ်း ၼုမ်ႇတႆး TYN သေ ယူႇတီႈၸုမ်း TYN ၵေႃႈ ႁပ်ႉပုၼ်ႈၽွၼ်းႁႃဢွင်ႈတီႈလႄႈ ၽုၵ်ႇ ဝႃႈၼႆ။


ၸၢႆးၼေႃႇသႅင် သိုပ်ႇလၢတ်ႈထႅင်ႈဝႃႈ မိူဝ်ႈတႄႇမၼ်းတႄႉ တူၼ်ႈမွၵ်ႇၵွၼ် 1,500 တူၼ်ႈၼႆႉ မၼ်းမီးတၢင်းယၢပ်ႇ ၽိုတ်ႇ ဝူၼ်ႉဝႃႈတေၽုၵ်ႇတီႈလႂ် မိူၼ်ၼင်ႇ တီႈၼႂ်းၼမ်ႉလၼ်ႈႁႃႉ၊ တီႈၸၼ်ႉၸွမ်ပုတ်ႉထ မိူင်းတႆးႁႃႉ၊ တီႈၵွင်းမူး ၼၢင်းၵိၼ်ပူ ၸႄႈဝဵင်းပၢင်လူင်ႁႃႉ ၸဵမ်ၸိူဝ်းၼႆႉ ႁဝ်းၶႃႈလႆႈဢွၼ်ၵၼ်ဝူၼ်ႉသေ ဝႃႈတေၽုၵ်ႇတီႈလႂ်ၼႆ ၸင်ႇလႆႈ မႃးဢုပ်ႇၵုမ်ၵၼ်။ ၽိူဝ်ႇၼၼ်ႉယဝ်ႉ ၸင်ႇၵပ်းသိုပ်ႇတူၺ်းဢွင်ႈတီႈၸိူဝ်းၼၼ်ႉသေ သမ်ႉမီးတၢင်းယၢပ်ႇ ၽိုတ်ႇတီႈ လိၼ်ၼႆလႄႈ ဢမ်ႇပဵၼ်။ ၵမ်းၼၼ်ႉ ႁဝ်းၶႃႈ လႆႈတၢင်းၵပ်းသိုပ်ႇတၢင်းမိူင်းယေႃသေ ယူႇတီႈပီႈၼွင်ႉၵူၼ်းမိူင်း/ ၵူၼ်းၼုမ်ႇမိူင်းယေႃၶဝ်ၵေႃႈ လၢတ်ႈမႃးဝႃႈ တီႈမိူင်းယေႃၼႆႉ မီးတီႈတေၽုၵ်ႇၼႆလႄႈ ၸင်ႇတႅပ်းတတ်း မိူဝ်းၽုၵ်ႇ တၢင်းမိူင်းယေႃ။ ယိူင်းဢၢၼ်းတႄႉၵေႃႈ ႁႂ်ႈပဵၼ်ၵၢၼ်တူင်ႉၼိုင်ၸုမ်းၵူၼ်းၼုမ်ႇတႆးသေ ႁႂ်ႈပဵၼ်မိၵ်ႈ မၢႆမိူင်းတႆး လွင်ႈၼႆႉ ပဵၼ်ပိူင်လူင်။ ဢမ်ႇၸႂ်ႈဝႃႈ ပဵၼ်တီႈမၢႆတွင်းဝၼ်းၼၼ်ႉ ဝၼ်းၼႆႉသေၽုၵ်ႇ ဢမ်ႇၸႂ်ႈ” ဝႃႈၼႆ။


တူၼ်ႈမွၵ်ႇၵွၼ်ဢၼ်ဝႃႈၼၼ်ႉ မၼ်းပဵၼ်မိၵ်ႈမၢႆ ဢၼ်ၵိုၵ်းတင်းမိူင်းတႆးဢၼ်ၼိုင်ႈ သမ်ႉထႅင်ႈဢၼ်ၼိုင်ႈၵေႃႈ ပဵၼ်ဢၼ်တၢင်တူဝ်မိူင်းတႆးၵေႃႈဝႃႈလႆႈ။ ယိူင်းဢၢၼ်းဢၼ်ၽုၵ်ႇၼႆႉတႄႉ တႃႇႁႂ်ႈၼမ်ႉလိၼ်ႁိၼ်ၽႃမိူင်းတႆး ၶဵဝ်ၸမ်ႉၼမ်ႉလိူင်ႇ။ ယွၼ်ႉၼၼ် ၵူၼ်းၼုမ်ႇတႆးၵေႃႈ ၸင်ႇဢွၼ်ၵၼ်သႂ်ႇၸႂ်သႂ်ႇႁႅင်းသေ ၸွႆႈထႅမ်တႃႇတေ ၽုၵ်ႇမွၵ်ႇ လႄႈ ႁၵ်ႉသႃၼမ်ႉလိၼ်ႁိၼ်ၽႃမိူင်းတႆး ဝႃႈၼႆ။


ၵေႃႁူမ်ႈသၢင်ႈၵူၼ်းၼုမ်ႇတႆး TYN ၼႆႉ မီးယိူင်းဢၢၼ်းဝႃႈ ၼင်ႇႁိုဝ်ၵူၼ်းၼုမ်ႇတႆး ပေႃးတေမေႃႁၵ်ႉသႃ သိင်ႇဝႅတ်ႉ လွမ်ႉလႄႈ ယၢၼ်ၵႆယႃႈမဝ်းၵမ် ႁႂ်ႈၼႄၾၢင်ႁၢင်ႈၽွမ်ႉႁူမ်ႈၵၼ်သေ ၶိုၼ်ႈလွႆသုင် ဢၼ်ၸိုဝ်ႈ သဵင်လင်ၼႂ်းမိူင်းတႆး မႃးၵူႈပီ ဝႃႈၼႆ။