ၵေႃႁူမ်ႈသၢင်ႈတူင်ႇဝူင်းၸိူဝ်ႉၶိူဝ်းတႆးႁူမ်ႈ ၸတ်းႁဵတ်းပၢင်ၵုမ် တီႈလႃႈသဵဝ်ႈ တႃႇယုၵ်ႉမုၼ်းမူႇ ၸုမ်းလႄႈ တႃႇၵႄႈလိတ်ႈပၼ်ႁႃႁူမ်ႈၵၼ် တူဝ်တႅၼ်းလၢႆမူႇၸုမ်းၶဝ်ႈႁူမ်ႈ။


ပၢင်ၵုမ်ၼႆႉ ၸတ်းႁဵတ်းၼႂ်းဝၼ်းတီႈ 25-26/07/2017 တီႈလုမ်းၵေႃတႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ မီးတူဝ်တႅၼ်းလၢႆလၢႆၸုမ်း မိူၼ်ၼင်ႇၸုမ်းၼႂ်းၸိုင်ႈတႆးပွတ်းဢွၵ်ႇ၊ ပွတ်း ၸၢၼ်းမိူၼ်ၼင်ႇ တူၼ်ႈတီး၊ ပၢင်လွင်း၊ လၢႆးၶႃႈ၊ ၵဵင်းတုင်၊ ႁူဝ်ပူင်း၊ ဝၢၼ်ႈၸၢမ်၊ မိူင်းၸီး၊ မိူင်းယေႃ ၸိူဝ်းၼႆႉဢမ်ႇၵႃးပႃးတၢင်းပီႈၼွင်ႉထုင်ႉလိၼ်ပဵင်းၵေႃႈ။ သူင်ႇတူဝ်တႅၼ်းမႃးတင်းမူတ်း ၽူႈၶဝ်ႈ ႁူမ်ႈမီး 20 ပၢႆ။

ၸၢႆးလႅင်းႁိူင်း ႁူဝ်ၼႃႈၵူၼ်းၼုမ်ႇလၢႆးၶႃႈ လၢတ်ႈဝႃႈ - “ ဢၼ်ႁဝ်းၶႃႈၶဝ်ႈၸုမ်းၼႆႉ မီးၽွၼ်းလီ တႄႉတႄႉ ႁဝ်းလႆႈႁူႉလွၵ်းလၢႆး ၵၢၼ်တမ်းဝၢင်းၼႃႈတီႈ၊ ၵၢၼ်ၸတ်းၵၢၼ်၊ ၵၢၼ်ပူၵ်းပွင် ၸိူဝ်းၼႆႉ ၼင်ႇႁိုဝ်မုၵ်ႉၸုမ်းႁဝ်းၶိုၼ်ႈယႂ်ႇ၊ မိူဝ်ႈပူၼ်ႉမႃးၼႆႉႁဝ်းႁူႉဝႃႈတင်ႈမုၵ်ႉၸုမ်းၵူၺ်း ႁဝ်းဢမ်ႇႁူႉ လၢႆး ၸတ်းၵၢၼ်မၼ်း ၼႃႈၵၢၼ်ႁဝ်းၵေႃႈဢမ်ႇပေႃးၶိုၼ်ႈ ” ဝႃႈၼႆ။


တီႈပၢင်ၼၼ်ႉဢုပ်ႇဢူဝ်းၵၼ်လၢႆလွင်ႈ မိူၼ်ၼင်ႇၵၢၼ်ၶူၼ်ႉၶႆႈထတ်းသၢင်ၵၢၼ်ႁုၼ်ႈမုၼ်းမုၵ်ႉၸုမ်း၊ ႁႅင်းဢီးၵၢၼ်လႅၵ်ႈလၢႆႈ၊ ၵၢၼ်တမ်းယိူင်းဢၢၼ်း၊ ယိူင်းမၢႆလႄႈ ၽႅၼ်ၵၢၼ်၊ လၢႆးႁဵတ်းၵၢၼ်၊ ၵၢၼ် တမ်းပၵ်းပိူင်၊ ၵၢၼ်ၸတ်းၵၢၼ်၊ ၵၢၼ်သၢင်ႈႁႅင်းၸႂ်၊ လၢႆးႁဵတ်းၵၢၼ်ပိူင်တီႇမူဝ်ႇၶရေႇၸီႇ ၊ ၵၢၼ်မၢၵ်ႈမီး တူင်ႇဝူင်းၵူၼ်းၸိူဝ်းၼႆႉ။


မိူဝ်ႈဝၼ်းတီႈ 16-19/07/2017 ၼၼ်ႉၵေႃႈ ၵေႃႁူမ်ႈသၢင်ႈတူင်ႇဝူင်းၸိူဝ်ႉၶိူဝ်းတႆးႁူမ်ႈ ၸတ်းႁဵတ်း ပၢင်ၵုမ်ဢုပ်ႇဢူဝ်း တႃႇယုၵ်ႉမုၼ်း လွင်ႈႁုၼ်ႈမုၼ်းမႂ်ႇသုင်မူႇၸုမ်း တီႈလုမ်းၵေႃတႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇမီးတူဝ်တႅၼ်း လၢႆလၢႆၸုမ်း ၼႂ်းၸိုင်ႈတႆးပွတ်းႁွင်ႇ ၼွင်ၶဵဝ်၊ ၵျွၵ်ႉမႄး၊ ၼမ်ႉတူႈ၊ တၢင်ႉယၢၼ်းမိူင်းၵၢဝ်လူင်၊ မိူင်းယႆ၊ လႃႈသဵဝ်ႈ၊ ၼမ်ႉလၼ်ႈဝၢၼ်ႈလီႈ၊ မိူင်းယု၊ ၵူတ်ႉၶၢႆ ၸိူဝ်းၼႆႉ သူင်ႇတူဝ်တႅၼ်းမႃးၶဝ်ႈႁူမ်ႈ 30 ပၢႆ။


ၵေႃႁူမ်ႈသၢင်ႈတူင်ႇဝူင်းၸိူဝ်ႉၶိူဝ်းတႆးႁူမ်ႈၼႆႉ မီးလုၵ်ႈၸုမ်း 60 ၸုမ်းၶဝ်ႈႁူမ်ႈပႃးဝႆႉ မိူၼ်ၼင်ႇၵေႃလိၵ်ႈလၢႆး၊၊ ၸုမ်းၵူၼ်း ၼုမ်ႇ၊ ၸုမ်းဝူင်းမဵတ်ႉတႃႇဢိၵ်ႇလၢႆလၢႆၸုမ်း။ မီးယိူင်းဢၢၼ်းၼင်ႇႁိုဝ် တေမီးလွင်ႈၸမ်ၸႂ်ၵၼ်၊ လွင်ႈၵွင်ႉသၢၼ်ၵၼ် ၊ ၸၢင်ႈလႅၵ်ႈလၢႆႈၵၼ်၊ ပေႃးမီးလွင်ႈၶွင်ႉၶမ်ၵေႃႈ ႁႂ်ႈလႆႈၸွႆႈၵၼ်ၵႄႈလိတ်ႈ၊ ပိူဝ်ႈႁူမ်ႈၵၼ်ၸွႆႈပူၵ်းပွင်ႁႂ်ႈတူင်ႇဝူင်းၸိူဝ်ႉ ၶိူဝ်းတႆးၶိုၼ်ႈယႂ်ႇ။