ၵေႃႁူမ်ႈသၢင်ႈတူင်ႇဝူင်းၸိူဝ်ႉၶိူဝ်းတႆးႁူမ်ႈ  ၸတ်းႁဵတ်းပၢင်ၵုမ် တႃႇယုၵ်ႉမုၼ်းမူႇၸုမ်းလႄႈ တႃႇၵႄႈ လိတ်ႈပၼ်ႁႃႁူမ်ႈၵၼ် တီႈလႃႈသဵဝ်ႈ တူဝ်တႅၼ်းလၢႆမူႇၸုမ်းၶဝ်ႈႁူမ်ႈ။


ဝၼ်းတီႈ 16-19/07/2017 ၵေႃႁူမ်ႈသၢင်ႈတူင်ႇဝူင်းၸိူဝ်ႉၶိူဝ်းတႆးႁူမ်ႈ ၸတ်းႁဵတ်းပၢင်ၵုမ်ဢုပ်ႇဢူဝ်း တႃႇယုၵ်ႉမုၼ်း လွင်ႈႁုၼ်ႈမုၼ်းမႂ်ႇသုင်မူႇၸုမ်း တီႈလုမ်းၵေႃတႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်း ႁွင်ႇမီးတူဝ်တႅၼ်းလၢႆလၢႆၸုမ်း မိူၼ်ၼင်ႇၸုမ်းၼႂ်းၸိုင်ႈတႆးပွတ်းႁွင်ႇ ၼွင်ၶဵဝ်၊ ၵျွၵ်ႉမႄး၊ ၼမ်ႉတူႈ၊ တၢင်ႉယၢၼ်းမိူင်းၵၢဝ်လူင်၊ မိူင်းယႆ၊ လႃႈသဵဝ်ႈ၊ ၼမ်ႉလၼ်ႈဝၢၼ်ႈလီႈ၊ မိူင်းယု၊ ၵူတ်ႉၶၢႆ ၸိူဝ်းၼႆႉ 1 ၸုမ်းလႂ် သူင်ႇတူဝ်တႅၼ်းမႃး 2 ၵေႃႉ တင်းမူတ်းၽူႈၶဝ်ႈႁူမ်ႈ 30 ပၢႆ။

Photo By - Loi  Kham Pang

ဢုပ်ႇဢူဝ်းၵၼ်လၢႆလွင်ႈမိူၼ်ၼင်ႇ လွင်ႈၶွင်ႈၶမ်လႄႈပၼ်ႁႃၼႂ်းမုၵ်ႉၸုမ်း၊ ဢဵၼ်ႁႅင်းၸုမ်းၽႂ်မၼ်း၊ ယိူင်းဢၢၼ်းလႄႈၽႅၼ်ၵၢၼ်မိူဝ်းၼႃႈတေႁဵတ်းႁိုဝ်တမ်းဝၢင်း ၸိူဝ်းၼႆႉ။


လွႆၶမ်းပၢင်ႇ ၽူႈၶဝ်ႈပႃးၼႂ်းၸုမ်းၶၵ်ႉၵၢၼ် ၵေႃႁူမ်ႈသၢင်ႈတူင်ႇဝူင်းၸိူဝ်ႉၶိူဝ်းတႆးႁူမ်ႈ လၢတ်ႈဝႃႈ - “ၼႂ်းတႆးႁဝ်းၶႃႈ ပဵၼ်မူႇပဵၼ်ၸုမ်းသေ ယင်ႇၼိူဝ်ၸိူဝ်ႉၸၢတ်ႈႁဵတ်းၵၢၼ် တူင်ႇဝူင်းၵူၼ်းတႆးၶိုၼ်းၼႆႉ ႁႅင်းဢေႇၼႃႇ ၵွပ်ႈၼၼ်လႄႈ ႁႂ်ႈမီးၾိင်ႈယၢမ်ႈႁႅင်းၽွမ်ႉႁူမ်ႈၵၼ်သေ ပူၵ်းပွင်တူင်ႇဝူင်းၸိူဝ်ႉၶိူဝ်း တႆးသေၵမ်း ” ဝႃႈၼႆ။


ၵေႃႁူမ်ႈသၢင်ႈတူင်ႇဝူင်းၸိူဝ်ႉၶိူဝ်းတႆးႁူမ်ႈၼႆႉ မီးၸုမ်း 60 ၸုမ်းၶဝ်ႈႁူမ်ႈပႃးဝႆႉ မိူၼ်ၼင်ႇၵေႃလိၵ်ႈ လၢႆး၊၊ ၸုမ်းၵူၼ်းၼုမ်ႇ၊ၸုမ်းဝူင်းမဵတ်ႉတႃႇၸိူဝ်းၼႆႉႁူမ်ႈၵၼ်သေၶွတ်ႇၽွတ်ႈ မီးယိူင်းဢၢၼ်းၼင်ႇ ႁိုဝ်တေမီးလွင်ႈၸမ်ၸႂ်ၵၼ်၊ လွင်ႈၵွင်ႉသၢၼ်ၵၼ် ၊ ၸၢင်ႈလႅၵ်ႈလၢႆႈၵၼ်၊ ပေႃးမီးလွင်ႈၶွင်ႉၶမ်ၵေႃႈ ၸၢင်ႈၸွႆႈၵၼ်ၵႄႈလိတ်ႈ၊ ပိူဝ်ႈႁူမ်ႈၵၼ်ၸွႆႈပူၵ်းပွင်ႁႂ်ႈတူင်ႇဝူင်းၸိူဝ်ႉၶိူဝ်းတႆး ၶိုၼ်ႈယႂ်ႇၸိူဝ်းၼႆႉ။


ဝၼ်းထီႈ 24- 26 /07/2017 တေၸတ်းႁဵတ်းပၢင်ၵုမ်ထႅင်ႈပွၵ်ႈၼိုင်ႈ တေၽိတ်ႈမွၵ်ႇၸုမ်းၶဝ်ႈႁူမ်ႈ ဢၼ်ၵိုတ်းထႅင်ႈ ပွတ်းဢွၵ်ႇၶူင်းလႄႈ ပွတ်းၸၢၼ်း - ဝႃႈၼႆ။