လူင်ပွင်ၸိုင်ႈမိူင်းထႆး ပိုၼ်ၽၢဝ်ႇပိုၼ်ႉတီႈတႃႇႁႂ်ႈႁႅင်းၵၢၼ်လႆႈႁဵတ်းဝႂ်ၵပ်းတူဝ် ၊ ဝႂ်ႁဵတ်းၵၢၼ် ၸိူဝ်းမီး ပေႃႈလဵင်ႉသေ ပႆႇမီးဝႂ်ႁဵတ်းၵၢၼ်ၸိူဝ်ႉၼႆႉ။


ဝၼ်းတီႈ 24 /07 ထိုင်07/08/2017 ၼႆႉ လူင်ပွင်ၸိုင်ႈမိူင်းထႆး ပိုၼ်ၽၢဝ်ႇႁႂ်ႈပေႃႈလဵင်ႉၼၢႆးၸၢင်ႈ ဢွၼ်ဢဝ်လုၵ်ႈလဵင်ႉဢၼ်ဢမ်ႇမီးဝတ်းဝႂ်သင်ၼၼ်ႉ ၵႂႃႇတၢင်ႇယွၼ်းႁဵတ်းဝတ်းဝႂ်တီႈႁွင်ႈၵၢၼ် ၾၢႆႇၸတ်းႁႃၵၢၼ်ငၢၼ်းၵဵင်းမႆႇ တီႈႁွင်ႈၵၢၼ်ၾၢႆႇၵၢၼ်ၵႃႉပွတ်းၼိူဝ် ( ศูนย์สินค้าเกษตรภาคเหนือ ) ၊ ႁွင်ႈၵၢၼ်ၾၢႆႇၸတ်းႁႃၵၢၼ်တီႈမိူင်းၵွၵ်ႇ မိူၼ်ၼင်ႇတီႈၶဵတ်ႇၿၢင်းၼႃး၊ ၶဵတ်ႇမိၼ်းၿူးရီး၊ ၶဵတ်ႇၸတူႊ ၸၵ်ႊၸိူဝ်းၼႆႉလႄႈ ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်းၼႂ်းၸႄႈတွၼ်ႈၽႂ်မၼ်း။ ၸိူဝ်းဢၼ်ႁဵတ်း ဢမ်ႇမႅၼ်ႈတီႈ ၸိုဝ်ႈပေႃႈလဵင်ႉမႄႈလဵင်ႉ(ၼၢႆးၸၢင်ႈ)ဢမ်ႇမႅၼ်ႈၵၼ်ၸိူဝ်းၼႆႉ ႁႂ်ႈၵႂႃႇၶပ်းၶိုင်ၼႂ်းၶၢဝ်း တၢင်း 6 လိူၼ်။

Photo : Media Studio

ၼၢင်းယဝ်ႊဝၽႃႊ ၽိၿုၼ်ႊၽူၼ်ႊ ႁွင်ႈၵၢၼ်ၾၢႆႇၵူၼ်းႁဵတ်းၵၢၼ် ၵဵင်းမႆႇ လၢတ်ႈဝႃႈ - “ မိူဝ်ႈၽွင်း လူင်ပွင်ၸိုင်ႈ ပိုတ်ႇၶၢဝ်းယၢမ်းပၼ်ၼႆႉ ႁႂ်ႈပေႃႈလဵင်ႉၼၢႆးၸၢင်ႈ ၸိူဝ်းမီးလုၵ်ႈလဵင်ႉဢၼ်ဢမ်ႇပႆႇ မီးဝႂ်သင်ၼၼ်ႉ ႁႂ်ႈၵႂႃႇတၢင်ႇယိုၼ်ႈႁဵတ်းဝႂ် ၸွမ်းၼင်ႇၶၢဝ်းယၢမ်းဢၼ်မၵ်းမၼ်ႈ 15 ဝၼ်း ဢမ်ႇ မီးဝၼ်းလိုဝ်ႈ(လူင်ပွင်ၸိုင်ႈ) ပေႃးဝၼ်းမၼ်းပူၼ်ႉၵႂႃႇယဝ်ႉ ႁဝ်းၶႃႈတေဢမ်ႇႁပ်ႉယဝ်ႉ၊  ၵပ်းသိုပ်ႇ တွင်ႈထၢမ်ႁူဝ်ယွႆႈလႆႈတီႈလုမ်းၾၢႆႇၸတ်းႁႃၵၢၼ်ၵဵင်းမႆႇ  0 5311 2912-4  ” ဝႃႈၼႆ။


ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ၵေႃႈလၢတ်ႈဝႃႈ – “ မိူဝ်ႈလဵဝ် ၼႆႉ တေလႆႈဝႃႈပဵၼ်တိုဝ်ႉတၢင်းလီတႄႉတႄႉ ဢၼ်လူင်ပွင်ၸိုင်ႈၶဝ်ပိုတ်ႇတိုဝ်ႉတၢင်းပၼ်ၸိူဝ်း ဢၼ်မီးပေႃႈလဵင်ႉၼၢႆးၸၢင်ႈသေ ဢမ်ႇမီးဝတ်းဝႂ်ၼၼ်ႉ ႁႂ်ႈႁၢင်ႈႁႅၼ်းတူဝ်ၵႂႃႇတၢင်ႇယိုၼ်ႈၸွမ်းၼင်ႇ ဢၼ်မၵ်းမၼ်ႈဝႆႉၼၼ်ႉသေၵမ်း ” ဝႃႈၼႆ။


ဝၢႆးသေလူင်ပွင်ၸိုင်ႈထႆးပိုၼ်ၽၢဝ်ႇပၵ်းပိူင်မႂ်ႇ တွၼ်ႈတႃႇႁႅင်းၵၢၼ် ပီ 2017 ဢွၵ်ႇမႃးဝႃႈ –  ၽူႈလႂ် ၽႂ်ႁပ်ႉၵူၼ်းႁဵတ်းၵၢၼ် ဢမ်ႇမီးဝတ်းဝႂ်၊ ႁဵတ်းၵၢၼ်ၽိတ်းတီႈ၊ ႁဵတ်းၵၢၼ်ၽိတ်းပၵ်းပိူင်ၼႆၸိုင် တေ မႂ် 400,000 – 800, 000 ၿၢတ်ႇ တေႃႇၵူၼ်းႁဵတ်းၵၢၼ်ၼိုင်ႈၵေႃႉလႄႈ ႁဵတ်းႁႂ်ႈႁႅင်းၵၢၼ်ဢွၼ် ၵၼ်ပွၵ်ႈႁိူၼ်းတင်းၼမ်ၼပ်ႉႁူဝ်မိုၼ်ႇ။