သင်ၶၸဝ်ႈ တင်းပီႈၼွင်ႉၵူၼ်းမိူင်း ၸႄႈဝဵင်းသီႇပေႃႉ ဢုပ်ႇၵုမ်ၵၼ် တႃႇတေၸတ်းႁဵတ်း ပၢင်ပွႆးယုၵ်ႉယွင်ႈ ၸဝ်ႈပၢႆး မွၼ်းပၢၼ်ၵဝ်ႇ/မႂ်ႇလႄႈ ၶွပ်ႈၶူပ်ႇ 75 ပီ ၸၢတ်ႈသႅင်းတႆး ဝဵင်းသီႇပေႃႉ ပဵၼ်ပီၵွၼ်းသႅင် 75 ပီ မီးၽူႈၶဝ်ႈႁူမ်ႈဢုပ်ႇၵုမ် 60 ပၢႆ ဝႃႈၼႆ။


ဝၼ်းတီႈ 19/07/2017 ယၢမ်းၵၢင်ၼႂ် 9 မူင်း ၸဝ်ႈတူၼ်ၶူးပၺ်ၺႃသႃႇလဢိၵ်ႇသင်ၶၸဝ်ႈ လၢႆလၢႆတူၼ် ႁူမ်ႈပႃး လူၺ်ႈ ပီႈၼွင်ႉတၵ်ႉၵႃႇသတ်ႉထႃး 38 ဢိူင်ႇ ၸႄႈဝဵင်းသီႇပေႃႉ ႁူမ်ႈၵၼ်ၸတ်းႁဵတ်း ပၢင်ဢုပ်ႇၵုမ် လွင်ႈတေ ၸတ်းႁဵတ်း ပၢင်ပွႆးပီၵွၼ်းသႅင် ၶွပ်ႈၶူပ်ႇ 75 ပီ သႅင်းတႆးမွၵ်ႇၵွၼ်လႄႈ ယုၵ်ႉယွင်ႈၸဝ်ႈပၢႆးမွၼ်းတႆး ပၢၼ်ၵဝ်ႇ/ မႂ်ႇ ၸဵမ်ၸိူဝ်းၼႆႉ။ ပၢင်ဢုပ်ႇၵုမ်ၼႆႉ ၸတ်းႁဵတ်းတီႈဝတ်ႉဢွင်ႇမင်ႇၵလႃႇလူင် ၽူဝ်းတေႃႇ ၸႄႈဝဵင်း သီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

Photo: ဢွမ်သႅင်

လုင်းၸၢႆးလၢဝ်မွၼ်း ၶွမ်ႊမတီႊၽူႈပွင်ပဵၼ်ပၢင်ပွႆး ပီၵွၼ်းသႅင် 75 ပီ  ယုၵ်ႉယွင်ႈပၢႆးမွၼ်းတႆးၼၼ်ႉ လၢတ်ႈဝႃႈ “ ႁဝ်းၶႃႈဢုပ်ႇဢူဝ်း ဝၢင်းၽႅၼ်ၵၢၼ်ငၢၼ်း တႃႇတေၸတ်းႁဵတ်းပၢင်ပွႆး ပီၵွၼ်းသႅင် 75 ပီ ၶွပ်ႈၶူပ်ႇၸၢတ်ႈသႅင်းမွၵ်ႇ ၵွၼ်တႆး 75 ပီ ၵေႃႈၸႂ်ႈ။ တေၸတ်းႁဵတ်း ၼႂ်းလိူၼ်ၸဵင် ဝၼ်းတီႈတႄႉ ပႆႇတႅပ်းတတ်း။ ဢွင်ႈတီႈၵေႃႈ ဢိင်ဢဝ်ပီႈ ၼွင်ႉၵူၼ်းမိူင်းတင်းၼမ်သေ ၸင်ႇတေတႅပ်းတတ်းထႅင်ႈၵမ်းၼိုင်ႈ။ ၼွၵ်ႈလိူဝ်ၼၼ်ႉ ပေႃးၼႂ်းပၢင်ပွႆးမႃး တေၸတ်း ႁဵတ်းဢိတ်ႇဢွၵ်ႇပႃးပပ်ႉတင်း ၶႅပ်းဝီႊတီႊဢူဝ်ႊ ဢၼ်မေႃၵႂၢမ်းပၢၼ်ၵဝ်ႇတႆးႁဝ်း ႁွင်ႉမွၵ်ႇလွင်ႈပိုၼ်းတႆး ၸဵမ်ၸိူဝ်း ၼႆႉ” ဝႃႈၼႆ။


ပၢင်ၵုမ်ဢုပ်ႇဢူဝ်း ဝၢင်းၽႅၼ်တႃႇတေၸတ်းႁဵတ်းပၢင်ပွႆးပီၵွၼ်းသႅင် 75 ပီ  ၶေႃႈတႅပ်းတတ်းဢၼ်တေႁဵတ်းသၢင်ႈ ႁၢင်ႈပွင်သမ်ႉ တေၸတ်းႁဵတ်းမိူၼ်ၼင်ႇ ယုၵ်ႉယွင်ႈၵုင်ႇၸဝ်ႈၶူးမေႃလိၵ်ႈတႆး 8 ၸဝ်ႈ၊ ပွႆးသၢၵ်ႈၵုင်ႇၵေးၸူး ၸၢတ်ႈ သႅင်းတႆး တဵမ် 75 ပီ၊ ယုၵ်ႉယွင်ႈပွႆးပီၵွၼ်းသႅင် 75 ပီသေ တေၼႄၶူဝ်းၼုင်ႈတင်းဝႆ လွင်ႈမေႃတိၼ်မေႃ မိုဝ်းတႆး ၸဵမ်မိူဝ်ႈပၢၼ်ၵွၼ်ႇပၢၼ်မွၼ် ၶူဝ်းၶွင်တႆး၊ တေႁဵတ်းႁွင်ႈၼႄပိုၼ်း လွင်ႈၸဝ်ႈၾႃႉတႆး ႁၢင်ႈႁေႃ၊ ၶူဝ်းၼုင်ႈတင်းဝႆ ၸဝ်ႈၾႃႉ၊ တေၵွၵ်းၼႄပိုၼ်း လွင်ႈတႆးၵူႈတီႈတီႈ လွင်ႈလႆႈတႅၵ်ႇယၢႆႈၵၼ်ၵႂႃႇၵေႃႉတီႈၵေႃႉတၢင်း ၸဵမ်ၸိူဝ်းၼႆႉ ဝႃႈၼႆ။


ၽွင်းပီၵေႃးၸႃႇ 1304 (1943) မိူင်းၵေႃႈၸမ်လူႉ ၵျႃႇပၢၼ်ႇႁဵတ်းသိုၵ်း တိုၵ်းမႃးၼႂ်းမိူင်းမၢၼ်ႈမိူင်းတႆး မီးၸွတ်ႇ၊ သၢင်ႇဢေႃးၸေႇယ သေႃႇသူၼ်း ၵူၼ်းၼႂ်းမိူင်းသီႇပေႃႉသေ ၵေႃႇတင်ႈၸၢတ်ႈသႅင်းတႆး။ တင်ႈဢဝ်ဝၼ်းၼၼ်ႉမႃး သႅင်းတႆးသီႇပေႃႉ မီးမႃးႁိုင်ၼၢၼ်း ထိုင်ဝၼ်းမိူဝ်ႈၼႆႉ။