ၵူၼ်းပၢႆႈၽေးသိုၵ်း ၼႂ်းဢိူင်ႇလွႆပႄး ၸိူဝ်းသွၼ်ႈယူႇဝႆႉတီႈဝတ်ႉပူၵ်ႉပႃႇယူင်ႇ ၸႄႈဝဵင်းၼမ်ႉတူႈ 402 ၵေႃႉၼၼ်ႉ တေႃႈလဵဝ် ဢွၼ်ၵၼ်ပွၵ်ႈၶိုၼ်းႁိူၼ်းယေး ယွၼ်ႉဝႃႈ ငဝ်းလၢႆးပၢင်တိုၵ်း ၼိမ်သဝ်းၵတ်းယဵၼ်ယဝ်ႉ ဝႃႈၼႆ။


ဝၼ်းတီႈ 24/07/2017 ယၢမ်းၵၢင်ၼႂ် 9:30 မူင်းပၢႆ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ ၸတ်းၵၢၼ်ႁၢင်ႈႁႅၼ်း သူင်ႇၵူၼ်းပၢႆႈၽေးပွၵ်ႈၶိုၼ်းႁိူၼ်းယေးၽႂ်မၼ်း မိူၼ်ၼင်ႇ ဝၢၼ်ႈပၢင်လေႃႉ၊ ဝၢၼ်ႈၵုင်းၸူင်၊ ဝၢၼ်ႈၼွင်ၵဝ်ႈလုၵ်ႈ၊ ဝၢၼ်ႈပၢင်ၶၢမ်၊ ဝၢၼ်ႈပၢင်သၢၼ်ႈ၊ ဝၢၼ်ႈၸၢမ်မႂ်ႇလႄႈ ဝၢၼ်ႈဢိူၵ်ႇၾႃႉ ၼႂ်းဢိူင်ႇလွႆပႄး ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ တင်းမူတ်းဢွၼ်ၵၼ်ပွၵ်ႈမိူဝ်း 200 ပၢႆ ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၾၢႆႇၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈဝႃႈ “ ၵူၼ်းပၢႆႈၽေးသိုၵ်း ၼႂ်းဢိူင်ႇလွႆပႄး 402 ၵေႃႉတႄႉ ဢွၼ်ၵၼ်ပွၵ်ႈမိူဝ်းၶိုၼ်းမူတ်းယဝ်ႉ။ လႆႈသူင်ႇပွၵ်ႈမိူဝ်း ပဵၼ်သွင်တွၼ်ႈ၊ မိူဝ်ႈဝႃး လႆႈသူင်ႇပွၵ်ႈမိူဝ်း 200 ပၢႆ ၊ မိူဝ်ႈပူၼ်ႉမႃး 3-4 ဝၼ်း ၵေႃႈ ပွၵ်ႈမိူဝ်း 200 ပၢႆ။  ယူႇတီႈၸုမ်းၸွႆႈထႅမ်ၵူၼ်းပၢႆႈၽေး သိုၵ်း ၸႄႈဝဵင်းၼမ်ႉတူႈ လႆႈဢဝ်လူတ်ႉၵႃး 3 လမ်း ႁပ်ႉတေႃႉသူင်ႇပၼ်။ ၵူၺ်းၵႃႈ ဢမ်ႇလႆႈသူင်ႇပီႈၼွင်ႉ ၵူၼ်းပၢႆႈ ၽေး ထိုင်တီႈဝၢၼ်ႈၶဝ် ယွၼ်ႉဝႃႈ သဵၼ်ႈတၢင်းၵႃး ဢမ်ႇပွင်ႇထိုင်ဝၢၼ်ႈ” ဝႃႈၼႆ။


ၵူၼ်းပၢႆႈၽေးသိုၵ်း ၼႂ်းဢိူင်ႇလွႆပႄး ဢွၼ်ၵၼ်ပၢႆႈမႃးယူႇသွၼ်ႈသဝ်းဝႆႉတီႈ ဝတ်ႉပူၵ်ႉပႃႇယူင်ႇ ပွၵ်ႉ 8 ၸႄႈဝဵင်း ၼမ်ႉတူႈ တႃႇၶၢဝ်းတၢင်း 20 ဝၼ်း။ ၵဵဝ်ႇၵပ်းလွင်ႈၼႆႉ ယူႇတီႈၸုမ်း NGO ၊ ၸုမ်းတူင်ႉၼိုင်တူင်ႇဝူင်းၵူၼ်း ဢိၵ်ႇ ထႅင်ႈလၢႆလၢႆၸုမ်း ႁူမ်ႈၵၼ်မႃးၸွႆႈၵမ်ႉထႅမ်လွင်ႈၶဝ်ႈၼမ်ႉတင်းၵိၼ်ယူႇ ဝႃႈၼႆ။


လုင်းၸၢႆးပႃႉၺၢၼ်ႇ သိုပ်ႇလၢတ်ႈထႅင်ႈဝႃႈ “လွင်ႈၵိၼ်ယမ်ႉတႄႉ ဢမ်ႇလႆႈမႆႈၸႂ်ၵႃႈႁိုဝ်ၶႃႈ မီးပီႈၼွင်ႉ တီႈၸမ်/ ၵႆလႄႈ ၸုမ်းတူင်ႉၼိုင်တူင်ႇဝူင်းၵူၼ်းၶဝ် ၸိူဝ်းၼႆႉၵေႃႈ မႃးၸွႆႈထႅမ်ၵမ်ႈၼမ်ယူႇ။ လိူဝ်ၼၼ်ႉ ၶဝ်ႈသၢၼ်ယင်းတိုၵ်ႉ ၵိုတ်းလိူဝ် ဝႆႉ70 ထူင်ပၢႆ။ ႁဝ်းၶႃႈၵဵပ်းဝႆႉ သင်ဝႃႈ မီးၽေးၵိုင်ႉၵၢင်ၶိုၼ်ႈမႃး ၵူၼ်းပၢႆႈမႃးထႅင်ႈၸိုင် ႁဝ်းၶႃႈတေလႆႈႁၢင်ႈ ႁႅၼ်း ၸတ်းပၼ်ၶိုတ်းတၼ်း။ ၼွၵ်ႈလိူဝ်ၼၼ်ႉၵူၼ်းပၢႆႈၽေး ၸိူဝ်းမႃးႁွတ်ႈၽႅဝ်ဝႆႉတီႈ ဝဵင်းၼမ်ႉတူႈ ၸဵမ်မိူဝ်ႈလိူၼ် ၵျုၼ်ႊ -ၵျုႊလၢႆႊ 2016 ၼၼ်ႉၵေႃႈ ယင်းပႆႇ ပွၵ်ႈမိူဝ်းၶိုၼ်း။ ယူႇသဝ်းဝႆႉတီႈၵျွင်းၽြႃးၶရိတ်ႉယၼ်ႇၸၢဝ်းလီႇသူး၊ ၵျွင်းၽြႃးၶရိတ်ႉယၼ်ႇ ၸၢဝ်းၶၢင် K.B.C လႄႈ တီႈဝၢၼ်ႈၵိဝ်ႇသေႃႉ တင်းမူတ်းမီးယူႇ 500 ပၢႆ တိုၵ်ႉၵိုၵ်းဝႆႉယူႇ” ဝႃႈ ၼႆ။


ၵဵဝ်ႇၵပ်းလွင်ႈၼႆႉသေ ပူၼ်ႉမႃး 04-05/07/2017 ၼၼ်ႉ ယွၼ်ႉသိုၵ်းတဢၢင်း TNLA တင်း RCSS/SSA လႆႈပဵၼ်ပၢင်တိုၵ်းတေႃႇၵၼ် ၼႂ်းဢိူင်ႇလွႆပႄးသေ ယူႇတီႈတပ်ႉသိုၵ်းသွင်ၾၢႆႇ သင်ႇႁႂ်ႈၵူၼ်းဝၢၼ်ႈၵူၼ်းသူၼ် ၼႂ်းဢိူင်ႇလွႆပႄး ငိူင်ႈဝႄႈပၢင်တိုၵ်း ဝႃႈၼႆ။
ၼၢႆးၼၢင်း ၵူၼ်းပၢႆႈၽေး ၼႂ်းဢိူင်ႇလွႆပႄး ၸိူဝ်းႁွတ်ႈၽႅဝ်တီႈဝတ်ႉပူၵ်ႉပႃႇယူင်ႇ လၢတ်ႈဝႃႈ “ မိူဝ်ႈတႄႇမၼ်းတႄႉ တပ်ႉသိုၵ်း တင်းသွင်ၾၢႆႇလၢတ်ႈဝႃႈ တေမီးပၢင်တိုၵ်းၵၼ် ၼႂ်း 3-4 ဝၼ်းၵူၺ်းၼႆ ႁဵတ်းၼၼ်သေ ဢဝ်ပဵၼ်ၵႂႃႇ ၶၢဝ်းတၢင်းႁိုင် ႁဝ်းၶႃႈ မႃးယူႇသဝ်းဝႆႉတီႈဝတ်ႉပူၵ်ႉပႃႇယူင်ႇၼႆႉ တေမီးႁိမ်း 20 ဝၼ်းယဝ်ႉ ၸင်ႇတေလႆႈပွၵ်ႈ မိူဝ်းၶိုၼ်းႁိူၼ်း” ဝႃႈၼႆ။


ၵူၼ်းပၢႆႈၽေးသိုၵ်း ဢၼ်ဢွၼ်ၵၼ်ပၢႆႈၽေးမႃးယူႇသွၼ်ႈသဝ်းတီႈဝတ်ႉသမ်ႉ လင်ႁိူၼ်း 112 လင်၊ ႁူဝ်ၵူၼ်း 400  ၵေႃႉ၊ ၽူႈၸၢႆး 175 ၵေႃႉ၊ ၽူႈယိင်း 225 ၵေႃႉ။ ဢၼ်ပီႈၼွင်ႉၵူၼ်းပၢႆႈၽေးမႃး ၼႂ်းဝၼ်းတီႈ 4 သမ်ႉ ႁူဝ်ၵူၼ်း 290 ၵေႃႉ။ ဝၼ်းတီႈ 5 သမ်ႉ ၽိူမ်ႉလိူဝ်မႃးထႅင်ႈ 110 ၵေႃႉ ဝႃႈၼႆ။