ၸုမ်းၵူၼ်းၼုမ်ႇတႆး TYO ဢွၼ်ႁူဝ်ၸတ်းႁဵတ်း ပၢင်သွၼ် “ သုၼ်ႇလႆႈယိင်း/ၸၢႆး၊ လွင်ႈႁူမ်ႇလူမ်ႈငမ်းယဵၼ် ၼၢင်းယိင်း” တီႈဝတ်ႉသုဝၼ်ႇၼသီရိ ၵျွင်းၶမ်း ၸႄႈဝဵင်းၵေးသီး။


ဝၼ်းတီႈ 13-14/06/2017 ယၢမ်းၵၢင်ၼႂ် 09:00-17:00 မူင်းႁူဝ်ၶမ်ႈ ၸုမ်းၵူၼ်းၼုမ်ႇတႆး TYO ၸုမ်းၼေႃႇတႅၼ်း ၶိူဝ်းလႄႈ ႁူမ်ႈပႃး ၸုမ်းၼႅင်ႈသၢၼ်ၼၢင်းယိင်း ၼႂ်းမိူင်းတႆး ႁူမ်ႈၵၼ်ၸတ်းႁဵတ်းပၢင်သွၼ်ပိုတ်ႇႁူ ပိုတ်ႇတႃ ၵဵဝ်ႇၵပ်း လွင်ႈႁူမ်ႇလူမ်ႈ၊ လွင်ႈၽဵင်ႇပဵင်းယိင်း/ၸၢႆးလႄႈ လွင်ႈငမ်းယဵၼ်ၼၢင်းယိင်း ၸဵမ်ၸိူဝ်းၼႆႉ။ ပၢင်သွၼ်ၼႆႉ ၸတ်းႁဵတ်း တီႈဝတ်ႉသုဝၼ်ႇၼသီရိ ၵျွင်းၶမ်း ပွၵ်ႉၵၢင်ပၢင်ႇ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။ ၼင်ႇႁိုဝ် ၼၢင်း ယိင်းပေႃး တေလႆႈႁပ်ႉႁူႉလွင်ႈငဝ်းလၢႆး ဢၼ်ပဵၼ်ယူႇယၢမ်းလဵဝ်လႄႈ ႁႂ်ႈလႆႈၶဝ်ႈပႃး ၼႂ်းၶၵ်ႉ ၵၢၼ်လွင်ႈငမ်းယဵၼ် ဝႃႈၼႆ။

Photo: Nang Yingnoung

ၼၢင်းယိင်းၼွင်ႉ ၵႅမ်ႁူဝ်ပဝ်ႈ ၸုမ်းၵူၼ်းၼုမ်ႇတႆး TYO လၢတ်ႈဝႃႈ “ ယိူင်းဢၢၼ်းဢၼ်ႁဝ်းၶႃႈၸတ်း ႁဵတ်းပၢင် သွၼ်ၼႆႉ ႁႂ်ႈၵူၼ်းဝၢၼ်ႈၵူၼ်းမိူင်းႁဝ်းၶႃႈ လႆႈပိုတ်ႇႁူပိုတ်ႇတႃ၊ ယဝ်ႉၵေႃႈ လွင်ႈငမ်းယဵၼ်ဢၼ်ႁဵတ်းယူႇ တေႃႈလဵဝ်ၼႆႉ ႁႂ်ႈၼၢင်းယိင်းႁဝ်း ၶဝ်ႈပႃးတင်းၼမ်။ ၼွၵ်ႈလိူဝ်ၼၼ်ႉ ယူႇတီႈႁဝ်းၶႃႈၵေႃႈ လႆႈသပ်းလႅင်းၼႄပၼ် လွင်ႈငမ်းယဵၼ်တေႃႈလဵဝ်ၼႆႉ မၼ်းၵႂႃႇသဵၼ်ႈတၢင်းလႂ် ၸဵမ်မိူဝ်ႈလူင်းလၢႆးမိုဝ်း NCA မႃး တေႃႈထိုင်ယၢမ်းလဵဝ် သမ်ႉၽႅဝ်ၵႂႃႇတီႈလႂ်   ႁဝ်းဝႃႈထိုင်ၶၵ်ႉတွၼ်ႈလႂ်ယဝ်ႉ။ မိူၼ်ၼင်ႇ ၼႂ်း NCA ဢၼ်လူင်းလၢႆးမိုဝ်းၵႂႃႇသေ ဢၼ်ပၢင် ၵုမ်လူင် ႁူဝ်ပၢၵ်ႇပီ 21 ပၢင်လူင်ၸိူဝ်းၼႆႉ ၸွင်ႇႁဝ်းၵေႃႈၵဵဝ်ႇ ၊ ယွၼ်ႉၼၼ် ႁႂ်ႈႁူႉဝႃႈ လွင်ႈႁဵတ်းယူႇၸိူင်ႉၼႆ ၵူၼ်းမိူင်းပိုၼ်ႉတီႈႁဝ်းၵေႃႈၵဵဝ်ႇပႃးယူႇ ၊ ၵမ်ႈၽွင်ႈၵေႃႈ သမ်ႉဢမ်ႇယၢမ်ႈႁူႉမႃးလႄႈ ထၢင်ႇဝႃႈ  ဢမ်ႇၵဵဝ်ႇၸွမ်းႁဝ်း” ဝႃႈၼႆ။


ၵဵဝ်ႇၵပ်းလွင်ႈပၢင်သွၼ်ၼႆႉ မီးၽူႈလူင်ႉလႅၼ်ႇၵၢၼ်မိူင်း၊ ၵၢၼ်တူင်ႇဝူင်း၊ ၵၢၼ်ႁူမ်ႇလူမ်ႈ ဢိၵ်ႇထႅင်ႈႁူဝ်ၶေႃႈ လၢႆလၢႆ ဢၼ် ပူင်သွၼ်သပ်းလႅင်းၼႄပၼ် ပီႈၼွင်ႉၵူၼ်းမိူင်း မႃးၶဝ်ႈႁူမ်ႈ ႁိမ်း 50 ၵေႃႉ။ ပဵၼ်ၼၢင်းယိင်း တၢင်းပွတ်း ဝၢၼ်ႈၼႃးလွႆလႄႈ ဢိူင်ႇမိူင်းယဵၼ် ၼႂ်းၸႄႈဝဵင်းၵေးသီး။


ၼၢင်းယိင်းၼွင် လၢတ်ႈဝႃႈ ၵဵဝ်ႇၵပ်းပၢင်သွၼ်ဢၼ်ႁဝ်းၶႃႈ မႃးပူင်သွၼ်ပၼ်ၼႆႉ တေလႆႈဝႃႈပီႈၼွင်ႉၵူၼ်းမိူင်းႁဝ်း ၶဝ်ႈၸႂ်မႃးတင်းၼမ်။ မိူၼ်ၼင်ႇ လွင်ႈႁူမ်ႇလူမ်ႈ ထၢင်ႇဝႃႈတွၼ်ႈ ၼၢင်းယိင်းၵူၺ်းလူဝ်ႇ၊ တီႈတႄႉမၼ်းဢမ်ႇၸႂ်ႈ ၼၢင်းယိင်းၵူၺ်း ၵူၼ်းၸၢႆးၵေႃႈ ပေႃးလႆႈၵႂႃႇႁၢပ်ႇၶျေႃးၸဵမ်ၸိူဝ်းၼႆႉလွင်ႈႁူမ်ႇလူမ်ႈၵူၼ်းၸၢႆးၵေႃႈ လူဝ်ႇလႆႈ ဝူၼ်ႉပႃး၊ ႁႂ်ႈမၼ်းလႆႈၽဵင်ႇၵၼ် ဢမ်ႇၸႂ်ႈဝႃႈ တေမႃးၵမ်ႉ ၸွႆႈၾၢႆႇလဵဝ်။ ၵူၼ်းၸၢႆးၼၢင်းယိင်းၼႆႉ ႁႂ်ႈမီးလွင်ႈၽဵင်ႇ ပဵင်းၵၼ် ႁႂ်ႈလႆႈႁူႉ၊ ယူႇတီႈပီႈၼွင်ႉႁဝ်း ၸိူဝ်း ဢၼ်မႃးၶဝ်ႈႁူမ်ႈလဵပ်ႈႁဵၼ်းၵေႃႈ လႆႈယိၼ်းၸူမ်းသေ သင်ႇလၢတ်ႈ ပႃးဝႆႉထႅင်ႈ သင်မီးတိုဝ်ႉတၢင်းထႅင်ႈၼႆ ႁႂ်ႈမႃး ၸတ်းႁဵတ်းပၢင်သွၼ်ၸိူင်ႉၼႆၵႂႃႇထႅင်ႈ၊ တုၵ်းယွၼ်းႁႂ်ႈမႃးပူင်သွၼ် ပႃးလွင်ႈပၵ်းပိူင် ဝႃႈၼႆ။