တူဝ်တႅၼ်း ၵူၼ်းမိူင်းလၢင်းၶိူဝ်း၊ လူင်ပွင်ၸိုင်ႈ၊ တပ်ႉသိုၵ်းမၢၼ်ႈ၊ တပ်ႉသိုၵ်းပဢူဝ်း PNLO လႄႈ တပ်ႉသိုၵ်းၸိုင်ႈတႆး RCSS/SSA ႁူမ်ႈၵၼ်ၶွတ်ႇၽွတ်ႈ ပိုတ်ႇလုမ်း JMC-L တႃႇပၵ်းတႃပႂ်ႉတူၺ်း လွင်ႈၵိုတ်းယိုဝ်း ၼႂ်းပိုၼ်ႉတီႈ ၼႂ်းၸႄႈတွၼ်ႈလၢင်းၶိူဝ်း ဝႃႈၼႆ။

ဝၼ်းတီႈ 28/06/2017 ယၢမ်းၵၢင်ဝၼ်း 10:00 မူင်း တူဝ်တႅၼ်းၵူၼ်းမိူင်း ဝဵင်းလၢင်းၶိူဝ်း 2 ၵေႃႉ၊ တူဝ်တႅၼ်း တပ်ႉ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး 1 ၵေႃႉ၊ တူဝ်တႅၼ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLO 2 ၵေႃႉ၊ လူင်ပွင်ၸိုင်ႈ 1 ၵေႃႉ၊ တပ်ႉသိုၵ်းမၢၼ်ႈ 2 ၵေႃႉလႄႈ တူဝ်တႅၼ်း ၸုမ်း JMC-S 5 ၵေႃႉ ႁူမ်ႈၵၼ် ပိုတ်ႇလုမ်း JMC-L တီႈဝၢၼ်ႈပုင်းထုၼ် ၾၢႆႇၸၢၼ်းဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း မီးပီႈၼွင်ႉ ၵူၼ်းမိူင်းလႄႈ ၸုမ်းတူင်ႉ ၼိုင်တူင်ႇဝူင်းၵူၼ်း ၶဝ်ႈႁူမ်ႈ 200 ပၢႆ ဝႃႈၼႆ။


ၸၢႆးပႃႉႁၢၼ်ႇ ၽူႈၶဝ်ႈၸုမ်း JMC-L လၢတ်ႈဝႃႈ “တေႃႈလဵဝ်ၼႆႉ တႃႇၼင်ႈလုမ်းတႃႇႁဵတ်းၵၢၼ်တႄႉ  JMC-S ၶဝ် မႃးၸွႆႈထႅမ်ဝႆႉပၼ်။ ၾၢႆႇလႂ်ၵေႃႈ လူင်းလၢႆးမိုဝ်း ၵိုတ်းတိုၵ်း NCA ယဝ်ႉလႄႈ သင်ဝႃႈ မီးတၢင်းယၢပ်ႇၽိုတ်ႇၼႆ ႁႂ်ႈၵူၼ်းမိူင်းဢွၼ်ၵၼ်မႃးၵပ်းသိုပ်ႇတီႈလုမ်း။ ယူႇတီႈႁဝ်းၶႃႈ ပဵၼ်ၵူၼ်းမိူင်း ၵေႃႉၼိုင်ႈသေ သင်ဝႃႈမီးသိုၵ်းၸုမ်းလႂ် မႃးပေႉၵိၼ်ၵူၼ်းမိူင်းႁဝ်း ႁႂ်ႈဢွၼ်ၵၼ်မႃးတၢင်ႇလၢတ်ႈတီႈလုမ်းၼႆႉ ယွၼ်ႉဝႃႈ လုမ်းၼႆႉ ပိုတ်ႇဝႆႉတႃႇပၵ်းတႃပႂ်ႉ တူၺ်း လွင်ႈၵိုတ်းတိုၵ်းလွင်ႈငမ်းယဵၼ် ၼႂ်းပိုၼ်ႉတီႈ ” ဝႃႈၼႆ။


သိုပ်ႇလၢတ်ႈထႅင်ႈဝႃႈ JMC-L ၼႆႉ ႁူဝ်ပဝ်ႈပဵၼ် ပိဝ်ႇႁႃႇမူး ၽူႈၵွၼ်းၸႄႈတွၼ်ႈ လၢင်းၶိူဝ်း၊ ၵႅမ်ႁူဝ်ပဝ်ႈ ပဵၼ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA၊ ၽူႈၼမ်းၼႂ်းသမ်ႉ ပဵၼ်ၼႂ်းတပ်ႉသိုၵ်းမၢၼ်ႈ ၼႂ်းၸႄႈ ဝဵင်းလၢင်းၶိူဝ်းလႄႈတူဝ်တႅၼ်းၵူၼ်းမိူင်းၽွင်ႈ။ ယၢမ်းလဵဝ်ၵူၼ်းမိူင်းဢမ်ႇပႆႇပေႃးၶဝ်ႈၸႂ် ၼိူဝ်လွင်ႈၼႆႉလႄႈ ပေႃး လိူၼ်ၼႃးမႃး တေသိုပ်ႇလူင်းႁူပ်ႉထူပ်း သပ်းလႅင်းၼႄပၼ် ၵူၼ်းမိူင်းတၢင်းပွတ်းၸႄႈ ဝဵင်းမွၵ်ႇမႆႇ လွင်ႈပိုတ်ႇ လုမ်း JMC တင်း NCA လႆႈဝၢင်းၽႅၼ်ဝႆႉ ဝႃႈၼႆ။


ပၢင်ပိုတ်ႇလုမ်း ပၵ်းတႃပႂ်ႉတူၺ်း လွင်ႈၵိုတ်းတိုၵ်း ၸၼ်ႉပိုၼ်ႉတီႈ တီႈဝဵင်းလၢင်းၶိူဝ်းၼႆႉ မီးပေႃႈမႄႈပီႈၼွင်ႉ ၵူၼ်းမိူင်း၊ ၵေႃလိၵ်ႈလၢႆး ဝဵင်းလၢင်းၶိူဝ်း၊ ပႃႇတီႇၵၢၼ်မိူင်းလႄႈ ၸုမ်းတူင်ႉၼိုင်တူင်ႇဝူင်းၵူၼ်း ၼႂ်းဝဵင်းလၢင်းၶိူဝ်း ၶဝ်ႈႁူမ်ႈပၼ်ႁႅင်းၵႂႃႇ ဝႃႈၼႆ။


လုမ်းပၵ်းတႃ ပႂ်ႉတူၺ်းလွင်ႈၵိုတ်းတိုၵ်း ၼႂ်းပိုၼ်ႉတီႈ JMC-L ၼႆႉၼႂ်းၸိုင်ႈတႆးတၢင်းပွတ်းၸၢၼ်း တိုၵ်ႉပိုတ်ႇတီႈဝဵင်း လၢင်းၶိူဝ်း ပဵၼ်လုမ်းႁႅၵ်ႈ။