ၾူၼ်လူင်တူၵ်းႁၢဝ်ႈႁႅင်းလႄႈၼမ်ႉၼွင်ယၢင်း ယိုင်ႈလူၼ်ႉၾင်ႇ ၼွင်းထူမ်ႈၵၢတ်ႇလူင် ဝဵင်းၵဵင်းတုင်လႄႈ ၸွမ်းပွၵ်ႉမူႇဝၢၼ်ႈၼႂ်းဝဵင်းၵဵင်းတုင်။


ဝၼ်းတီႈ 28/06/2017 ယၢမ်းဝၢႆးဝၼ်း မွၵ်ႈ 4 မူင်းၼၼ်ႉ ၾူၼ်လူင်တူၵ်းႁၢဝ်ႈႁႅင်း ၼႂ်းဝဵင်းၵဵင်းတုင် ၼမ်ႉၼွင် ယၢင်း ဢၼ်မီးတင်းဝၢၼ်ႈၼမ်ႉမေႃႇ ဝၢၼ်ႈၵဵင်းၶုမ်ႇ လႆလူင်းၸွမ်းႁွင်ႈၼမ်ႉ ဢမ်ႇတၼ်း ႁဵတ်းႁႂ်ႈၼမ်ႉထူမ်ႈ လၢႆလၢႆပွၵ်ႈ။ ယွၼ်ႉ ႁွင်ႈၼမ်ႉတၼ် မီးယုၵ်းယၵ်းၶမ် လူၼ်ႉၾင်ႇ ၼွင်းထူမ်ႈၼႂ်းၵၢတ်ႇလူင်ၵဵင်းတုင်၊ ဝၢၼ်ႈသေး တၢၼ်းဢွၼ်ႇ ၊ ၵဵင်းလၢၼ်းလႄႈ ထႅင်ႈလၢႆလၢႆတီႈ ၼႂ်း ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ဝႃႈၼႆ။

ၸၢႆးလူင် ၵူၼ်းမိူင်းၵဵင်းတုင် လၢတ်ႈဝႃႈ “ ၼမ်ႉဢၼ်လုၵ်ႉတီႈၼမ်ႉၼွင်ယၢင်းလႆလူင်းမႃးၼႆႉမၼ်းလႆယူႇတႃႇသေႇ။  လႆလူင်းမႃး တၢင်းၵၢတ်ႇလူင် ဢွၵ်ႇမႃး တၢင်းဝၢၼ်ႈသေးတၢၼ်းဢွၼ်ႇ လူင်းမႃးတင်း ဝၢၼ်ႈၵဵင်းလၢၼ်း ၸင်ႇဢွၵ်ႇ ၵႂႃႇတၢင်း ဝၢၼ်ႈယၢင်းၵူင်း။ တေႃႈလဵဝ်သမ်ႉ ပဵၼ်ၶၢဝ်းၾူၼ်  ၾူၼ်ၵေႃႈသမ်ႉတူၵ်းႁႅင်းၵေႃႈပိူင်ၼိုင်ႈ၊ ၼႂ်းၵၢတ်ႇသမ်ႉ ပႅတ်ႈယုၵ်းယၵ်း သႂ်ႇၼႂ်းႁွင်ႈ၊ ပႅတ်ႈဝုၺ်ႇပႅတ်ႈမိူဝ်သေ ႁွင်ႈၼမ်ႉၵေႃႈ ၶႂ်ႈတၼ်ၵႂႃႇ ၵွပ်ႈၼၼ် ၼမ်ႉၸင်ႇလႆ လူၼ်ႉၾင်ႇဢွၵ်ႇမႃး” ဝႃႈၼႆ။


ၵဵဝ်ႇၵပ်းလွင်ႈၼႆႉ ထဝ်ႈဝၢၼ်ႈထဝ်ႈၼႃး ၾၢင်ႉထိုင်ၵူၼ်းၵႃႉၶၢႆလႄႈ ၵူၼ်းၼႂ်းဝၢၼ်ႈဢိူင်ႇ ႁႂ်ႈပႅတ်ႈယုၵ်းယၵ်းပဵၼ်တီႈ ပဵၼ်တၢင်း၊ ပေႃးပႅတ်ႈဝူၺ်ႇ၊ မိူင်းတေႁၢင်ႈၸႃႉ၊ ၼမ်ႉတေထူမ်ႈတိၵ်းတိၵ်း ဝႃႈၼႆ။


ၼွၵ်ႈလိူဝ်ၼၼ်ႉ ၸဝ်ႈၼႃႈတီႈၾၢႆႇလိူမ်ႈလႆႇၵေႃႈ ဢမ်ႇႁဵတ်းလွင်ႈမူတ်းသႂ် ဢမ်ႇလၢင်းႁွင်ႈ ႁႂ်ႈၶိုတ်းတၼ်းလႄႈ လႆႈထူပ်းၽေးၼမ်ႉထူမ်ႈ ဝႃႈၼႆ။


ယၢမ်းလဵဝ် ပဵၼ်ၶၢဝ်း လူင်းႁႆႈလူင်းၼႃးလႄႈ ၼႂ်းၸႄႈဝဵင်းၵဵင်းတုင် မၢင်တီႈသမ်ႉဢမ်ႇမီးၼမ်ႉ တႃႇတေၽုၵ်ႇသွမ်ႈ၊ ၼႂ်းဝဵင်းသမ်ႉၼမ်ႉထူမ်ႈ။


ၸၢႆးဢွၼ်ႇ ၸဝ်ႈၼႃး ဝဵင်းၵဵင်းတုင် လၢတ်ႈဝႃႈ “ သၢႆတၢင်းဝၢၼ်ႈၼွင်တၢၼ်ႇ/ ၼွင်ၶွၼ်၊ ယဝ်ႉၵေႃႈ တၢင်းဝၢၼ်ႈ တူင်ႈသီႇ၊ ဝၢၼ်ႈပၢဝ်ႉ ၶိုၼ်ႈၵႂႃႇ ၸဝ်ႈၼႃးမၢင်ၵေႃႉ ယင်းဢမ်ႇၸၢင်ႈႁဵတ်းၼႃး ယွၼ်ႉဢမ်ႇမီးၼမ်ႉ” ဝႃႈၼႆ။


တၢင်းၸိုင်ႈတႆး ပွတ်းႁွင်ႇၵေႃႈ ၾူၼ်တူၵ်းဢမ်ႇထၢတ်ႇ 2-3 ဝၼ်းယဝ်ႉလႄႈ ၼမ်ႉထူမ်ႈၼႂ်းၸႄႈဝဵင်းၼမ်ႉလၼ်ႈ။ ႁူင်းႁဵၼ်းဢိုတ်းလိုဝ်ႈဝႆႉ 2 ဝၼ်းယဝ်ႉ ဝႃႈၼႆ။ ၾၢႆႇၶူၼ်ႉၶႂႃႉလဵပ်ႈႁဵၼ်း ၾိင်ႈၾႃႉရႃႇသီႇမိူင်းမၢၼ်ႈတႄႉ ပိုၼ်ၽၢဝ်ႇဝႆႉဝႃႈ- မိူင်းမၢၼ်ႈတွၼ်ႈၼိူဝ်လႄႈ ၼႂ်းမိူင်းတႆးၾူၼ်တေတူၵ်းထပ်းၵၼ်ထႅင်ႈ 2 ဝၼ်း ဝႃႈၼႆ။