လုၵ်ႈဢွၼ်ႇယိင်းဢွၼ်ႇၵေႃႉၼိုင်ႈ ဢႃႇယု 9  ၶူပ်ႇ ယူႇဝၢၼ်ႈၵုင်းၺွင်ႇ ဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ႁၢႆတူဝ်ၵႂႃႇ ၽွင်းၵႂႃႇပွႆးပၢင်ၶႅၵ်ႇၵူပ်ႉၵူႈ ၼႂ်းဝၢၼ်ႈ။  ၵူၼ်းဝၢၼ်ႈ လၢတ်ႈဝႃႈ ၺႃးၵူၼ်းႁၢႆႉ ႁွင်ႉၵႂႃႇ - “လူလၢႆသေၶႃႈတၢႆ ၊ ထိူမ်ႈပႅတ်ႈဝႆႉၼႂ်းယုမ်း” - ႁိုင် 4 ဝၼ်း ယဝ်ႉၸင်ႇႁၼ် တူဝ်တၢႆၶိုၼ်း မိူဝ်ႈဝႃးၼႆႉ ဝႃႈၼႆ။

ဝၼ်းတီႈ 11/06/2017 ယၢမ်းတမ်းၶမ်ႈ မွၵ်ႈ 5 မူင်းၼၼ်ႉ ပီႈၼွင်ႉၵူၼ်းဝၢၼ်ႈၵူၼ်း သူၼ်ဢွၼ်ၵၼ်သွၵ်ႈ တဝ်ႁႃတူဝ်လုၵ်ႈဢွၼ်ႇၵေႃႉႁၢႆၵႂႃႇ - ၸိုဝ်ႈ ယိင်းလႃး (ဢမ်ႇၼၼ်) ၼၢင်းသိုဝ်ႉ ဢႃယု 9 ၶူပ်ႇ ပဵၼ်လုၵ်ႈယိင်း လုင်းတွမ်ႇလႄႈပႃႈမွၼ်း။ၵူၼ်းဝၢၼ်ႈၵႂႃႇ ထူပ်းႁၼ် တူဝ်တၢႆမၼ်းၼၢင်းတီႈၾၢႆႇတၢင်းၸၢၼ်းဝၢၼ်ႈၵုင်းၺွင်ႇ ဢိူင်ႇသႅင်ၵႅဝ်ႉ။ ၾၢင်ႁၢင်ႈတူဝ်တၢႆ ၺႃးမတ်ႉဝႆႉသေ ဢဝ် ထိူမ်ႈဝႆႉၼႂ်းယုမ်း၊ ပၢင်ႉၶႅမ်းဝႆႉယူႇ၊ တူဝ်ပေႃးတူႇၼဝ်ႈ ပွင်းၵႂ်ႈ မူတ်း ယဝ်ႉဝႃႈၼႆ။


မေႃသွၼ် ၼၢင်းလိုၼ်းမူဝ် ႁူင်းႁဵၼ်းထမ်ႇမ ဝၢၼ်ႈတိုဝ်ႉမွၼ်း လၢတ်ႈဝႃႈ -  “ ၾၢင်ႁၢင်ႈ လႅပ်ႈမိူၼ် တဵၵ်းမတ်ႉလုၵ်ႈဢွၼ်ႇသေ လူလၢႆ ဝႆႉ၊ ၵူၺ်းၼႃႇတူဝ်တူႇၼဝ်ႈမူတ်းယဝ်ႉ လႄႈတႃႇတေထတ်းႁူႉၵေႃႈ လႅပ်ႈဢမ်ႇငၢႆႈ ။ ဢဝ်တူဝ်တၢႆ သႂ်ႇၵွမ်ႇၵေႃႈ ဢမ်ႇငၢႆႈ သမ်ႉပဵၼ် လုၵ်ႈဢွၼ်ႇၵူၺ်းလႄႈ ၵူၼ်းဝၢၼ်ႈ ၵေႃႈ ၽဝ်ၵိုၵ်းယုမ်း ဢၼ်တူဝ် တၢႆ မၼ်းၼၢင်း ပၢင်ႉၶမ်ၶႅမ်း ၼၼ်ႉဝႆႉ” - ဝႃႈၼႆ။


ဝၼ်းတီႈ 7/6/2017 ၵၢင်ၼႂ် ၼၼ်ႉ  ယိင်းလႃး ယွၼ်းၵႂႃႇဢႅဝ်ႇပွႆးပၢင်ၶႅၵ်ႇၼႂ်းဝၢၼ်ႈ၊ တင်ႈဢဝ်ၼၼ်ႉသေ ႁၢႆတူဝ်ၵႂႃႇ ၊ ၵူၼ်းဝၢၼ်ႈ ၵူၼ်းသူၼ် ဢွၼ်ၵႂႃႇႁႃ ၵေႃႈဢမ်ႇႁၼ်၊ ယွၼ်ႉဢၢႆတူႇ ဢၢႆၼဝ်ႈ ဢွၵ်ႇမႃး၊ ၵူၼ်းဝၢၼ်ႈ မူၼ်ႉယုမ်း မူၼ်ႇယွမ်ႇႁႃတူၺ်းလႄႈ ၸင်ႇႁၼ်တူဝ်တၢႆ မၼ်းၼၢင်း ၼႂ်းဝၼ်းတီႈ 11/6/2017 ယၢမ်းၵၢင်ၶမ်ႈ 5 မူင်း။


ယိင်းလႃး(ႁွင်ႉ) ၼၢင်းသိုဝ်ႉၼႆႉ ပဵၼ်လုၵ်ႈႁဵၼ်း  ႁူင်းႁဵၼ်းထမ်ႇမ ဝတ်ႉတိုဝ်ႉမွၼ်း၊ တူင်ႇဝဵင်းသီႇပေႃႉ။  ပိူဝ်ႈတႃႇတီႉလႆႈတူဝ် ၵူၼ်းႁၢႆႉၼၼ်ႉ  ယူႇတီႈၽူႈယႂ်ႇၵူၼ်းလူင် ဝၢၼ်ႈ ယိုၼ်ႈလိူင်ႈထိုင် ၽူႈမီးပုၼ်ႈၽွၼ်း ၸုမ်းပျီႇတုၸိတ်ႉ သႅင်ၵႅဝ်ႉသေ ၵူတ်ႇထတ်း ၸွပ်ႇထၢမ် ၶႆႈငိူၼ်ႈ - ဝႃႈၽႂ် ႁူပ်ႉႁၼ် ၸိူင်ႉႁိုဝ်၊ လဵပ်ႈပဵၼ်ၽႂ် ၵေႃႉလႂ် ႁဵတ်းႁၢႆႉ ၶႃႈတၢႆမၼ်းၼၢင်း-ဝႃႈၼႆ။