ၸဝ်ႈၼႃႈတီႈမိူင်းလႃးၵူတ်ႇထတ်းတွင်ႈထၢမ် ၵူၼ်းပႅၵ်ႇၼႃႈ မိူဝ်ႈဝၼ်းတီႈ5/4/2017တီႉမတ်ႉလႆႈ ၽူႈလၵ်ႉ 3 ၵေႃႉ၊ ၸိူဝ်းယၢမ်ႈလၵ်ႉဢဝ်ငိုၼ်းတွင်း၊ ဝႂ်ယေးငိုၼ်း ATM လႄႈ သူင်ႇတူဝ်ၶဝ်ၵုမ်းၶင် ဝႆႉၼႂ်းၶွၵ်ႈလူင်မိူင်းလႃး။


ၽူႈလၵ်ႉ 3 ၵေႃႉ ၸၢႆးသိူၼ်မူင်ႇ၊ သိူၼ်မူင်ႇမူင်ႇ၊ တၢင်ႇမူင်ႇ ၼႆတင်ႈဢဝ်ႁူဝ်လိူၼ်မေႊမႃး ဢႅဝ်ႇႁႃလၵ်ႉ ၶူဝ်းၶွင်ပိူၼ်ႈ၊ ၼႂ်းႁၢၼ်ႉၵဵမ်းပၢင်လွင်းတူႈပႃ၊ လၵ်ႉဢဝ်ထူင်ငိုၼ်း၊ ဢႅပ်ႇငိုၼ်း ၸိူဝ်းၼႆႉ။  တူဝ်ငိုၼ်း ဢၼ်ၺႃးလၵ်ႉၵႂႃႇ ငိုၼ်းၶႄႇ 3600 ယႂၼ်  (တူၵ်းမႅၼ်ႈငိုၼ်းမၢၼ်ႈ မွၵ်ႈ 7 သႅၼ်)။ လိူဝ်ၼၼ်ႉ ၵူၼ်းၸွမ်းတၢင်းၵေႃႈ လၢႆလၢႆၵေႃႉ ၺႃးၸုမ်းၽူႈလၵ်ႉၼႆႉ ၸၵ်ႉၶုတ်ႈထူင်ငိုၼ်း လႅၼ်ႈပၢႆႈ ၊ ဢၼ်ၶဝ် လၵ်ႉၵႂႃႇ ပႃးဝႂ်ႇယေးငိုၼ်း ATM – 10 ပၢႆ။ ငိုၼ်းၼႂ်းၼၼ်ႉ ၵေႃႈမီးတင်းၼမ် ဝႃႈၼႆ။

ၸဝ်ႈၼႃႈတီႈၾၢႆႇတႅပ်းတတ်းသိၼ် ၸုမ်းမိူင်းလႃးလၢတ်ႈဝႃႈ “ပေႃးၵၢင်ၶမ်ႈၵၢင်ၶိုၼ် ဢမ်ႇၶႂ်ႈႁႂ်ႈ ၵူၼ်းဢႅဝ်ႇတၢင်းၼွၵ်ႈ ၸၢင်ႈမီးၽေး၊ ၵူၼ်းလၵ်ႉၸွမ်းတၢင်းလူင်ၸိူဝ်းၼႆႉၵေႃႈ တေလႆႈၾၢင်ႉသတိ ဢမ်ႇၶႂ်ႈႁႂ်ႈၵႂႃႇတီႈဢမ်ႇမီးၵူၼ်း ၼမ်လႄႈ တီႈလပ်းသိင်ႇ၊ ဢမ်ႇၶႂ်ႈႁႂ်ႈပႃးထူင်ဢၼ် ႁွႆႈဝႃႇၾၢႆႇလဵဝ်  ၊ ႁူပ်ႉႁၼ်ၺႃးၽႂ်ၵေႃႈ ထုၵ်ႇလီၶတ်းၸႂ် တွင်းၼႃႈတွင်းတႃ ၊  ၶူဝ်းၼုင်ႈၽူႈလၵ်ႉ။ ၵူၼ်းဢၼ်ယၢမ်ႈ လၵ်ႉၶူဝ်းၸိူဝ်းၼႆႉပေႃးႁူႉဝႃႈၶဝ်ၵႂႃႇတၢင်းလႂ်ၼႆ  ႁႂ်ႈပွင်ႇၶၢဝ်ႇၵမ်းလဵဝ် ၶႂ်ႈႁႂ်ႈၵူၼ်းလၵ်ႉၸိူဝ်းၼႆႉလႆႈၺႃးတၢမ်ႇႁႂ်ႈၶဝ်လႆႈမေႃမူၼ်ႉမေးတူဝ်ၵဝ်ႇၶိုၼ်းဝႃႈၼႆ။”


ဝၼ်းတီႈ 2/5/2017 ၼၼ်ႉ ၵေႃႈ ၽူႈလၵ်ႉၵေႃႉ ၼိုင်ႈ ၸၵ်ႉၶုတ်ႈဢဝ် ထူင်ၼၢင်းယိင်းၵေႃႉၼိုင်ႈလႅၼ်ႈပၢႆႈ ပႃးၵႂႃႇဝႂ်ယေးငိုၼ်း ATM 5 ဢၼ်၊ ဝႂ်ၵပ်တူဝ် (မှတ်ပုံတင်)၊IphoneS6 ၼိုင်ႈၶိူင်ႈ၊ငိုၼ်းၶႄႇ မွၵ်ႈ 600 ယႂၼ် (တူၵ်းမႅၼ်ႈငိုၼ်းမၢၼ်ႈ 115200 ၵျၢတ်ႉ) မိူဝ်ႈဝၼ်းတီႈ 4/5/2017 ယၢမ်းၵၢင်ၶမ်ႈ ၼၼ်ႉ ၽူႈလၵ်ႉၸိူဝ်းၼၼ်ႉ ပႂ်ႉၸွမ်းတၢင်း ႁိမ်းၵၢတ်ႇလူင် မိူင်းလႃးသေၸၵ်ႉၶုတ်ႈဢဝ်ဢႅပ်ႇငိုၼ်း ၵူၼ်းၶီႇလူတ်ႉၶိူင်ႈၵႂႃႇမႃး။ တူဝ်ၶဝ်ၵေႃႈ ၶီႇလူတ်ႉၶိူင်ႈ ပၼ်ႇၵႂႃႇပၼ်ႇမႃးသေၺႃးၸဝ်ႈၼႃႈတီႈမိူင်းလႃးတီႉမတ်ႉ ပၼ်တူတ်ႈတၢမ်ႇ ယဵတ်ႈၶွၵ်ႈ။


တေၺႃးတူတ်ႈၶွၵ်ႈ ႁိုင်ၵႃႈႁိုဝ်ၼႆ လုမ်းၾၢႆႇတတ်းသိၼ်ထမ်းတြႃးမိူင်းလႃး တေၵူတ်ႇထတ်းတႅပ်းတတ်း ပၼ်တူတ်ႈ တၢမ်ႇထႅင်ႈၵမ်းၼိုင်ႈ။


ၵူၼ်းဢၼ်ၺႃးတီႉၼႆႉ ၽူႈယႂ်ႇၵူၼ်းလူင်မိူင်းလႃးဝႃႈ လႅပ်ႈမီးမူႇမီးၸုမ်း၊ ဢၼ်ပႆႇၺႃးတီႉၵေႃႈ ၶေးၸၢင်ႈမီးထႅင်ႈလူးၵွၼ်ႇ။ ၶဝ်ၸိူဝ်းၼႆႉ ဢမ်ႇၸႂ်ႈ ၵူၼ်းၸႃႇတိမိူင်းလႃးလုၵ်ႉတၢင်ႇတီႈသီႇလႅၼ်မႃးယူႇ။ ဢၼ်လုၵ်ႉတၢင်းမိူင်းၶႄႇလူင်းမႃးၵေႃႈမီးဝႃႈၼႆ။