ၽူႈႁွင်ႉၽဵင်းၵႂၢမ်းတႆး ၸၢႆးၸွမ်ဝူင်း သဵင်ႈမုၼ်လူႉတၢႆ တီႈၼႂ်းၶွၵ်ႈတွင်ႇလေးလူင်း ၸႄႈဝဵင်း တူၼ်ႈတီး 

ဢဝ်ၶၢပ်ႈတူဝ်မႃးဝႆႉတီႈႁူင်းယႃလူင်ၸဝ်ႈၸၢမ်ႇထုၼ်း။

ဝၼ်းတီႈ 06/04/2017 ယၢမ်းၵၢင်ၶမ်ႈ 21:00 မူင်းပၢႆၼၼ်ႉ ၽူႈႁွင်ႉၽဵင်းၵႂၢမ်းတႆးၸိုဝ်ႈသဵင်ယႂ်ႇ ၸၢႆးၸွမ်ဝူင်း ဢႃယု 46 ပီ လူႉသဵင်ႈတၢႆၵႂႃႇတီႈ ၼႂ်းၶွၵ်ႈတွင်ႇလေးလူင်း ဢိူင်ႇတွင်ႇ လေးလူင်း ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။ မၼ်းၸၢႆးၸပ်းတၢင်းပဵၼ်ပွတ်ႇ၊ တၢင်းပဵၼ်တႂ်သေ လႆႈသုတ်းမုၼ်ၵႂႃႇ။

ၼၢင်းမျႃႉမေႇ ၵေႃႉပဵၼ်မေးၼၢင်း ၸၢႆးၸွမ်ဝူင်း လၢတ်ႈဝႃႈ “ ၵေႃႉပဵၼ်ၽူဝ်ၶႃႈႁဝ်း လႆႈလူႉ သဵင်ႈၵႂႃႇ မိူဝ်ႈဝႃး ဝၼ်းတီႈ 6 ယၢမ်းၵၢင်ၶမ်ႈ ၵူၺ်းၵႃႈ လၢႆမူင်းတႄႉ ဢမ်ႇပႆႇလႆႈႁူႉလီ၊ တေႃႈလဵဝ် ၶႃႈႁဝ်းလႄႈ တင်းလုၵ်ႈၸၢႆး/ ယိင်း တိုၵ်ႉတေဢွၵ်ႇၵႂႃႇလုမ်းလႃးၶၢပ်ႈတူဝ် ပီႈၸွမ်ဝူင်း တီႈတူၼ်ႈတီး၊ ၶၢပ်ႈတူဝ်ပီႈ ၸွမ်ဝူင်းတႄႉ တေပူၼ်ႉဝၼ်းမိူဝ်ႈၽုၵ်ႈ ဝၼ်းတီႈ 08/04/2017” ဝႃႈၼႆ။

ၸၢႆးသုၼ်ယုၵ်ႉ ၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လူင်/ ၵေႃႉႁူႉၸၵ်းမိုတ်ႈ 

ၵိုတ်းတင်းၸၢႆးၸွမ်ဝူင်း လၢတ်ႈဝႃႈ “ လႆႈယိၼ်းၶၢဝ်ႇဝႃႈ ၸၢႆးၸွမ်ဝူင်းလႆႈလူႉတၢႆၵႂႃႇၼႆ ႁဝ်းၵေႃႈ ပဵၼ်ဢၼ်ၸႂ်လဵၵ်ႉၶေႃးၶူမ်ၸွမ်းတႄႉတႄႉ။ ၸၢႆးၸွမ် ဝူင်းၼႆႉ မၼ်းပဵၼ်ၵူၼ်းမီးၸိုဝ်ႈသဵင် ၽူႈႁွင်ႉၵႂၢမ်းတႆး(ပၢႆးမွၼ်းတႆး) ၵေႃႉၼိုင်ႈ” ဝႃႈၼႆ။

ၸၢႆးၸွမ်ဝူင်းၼႆႉ ပဵၼ်ၽူႈႁွင်ႉၽဵင်းၵႂၢမ်းတႆး ၸိုဝ်ႈသဵင်လိုဝ်းလင်ၼႂ်းပၢႆးမွၼ်းတႆး ၵေႃႉၼိုင်ႈ။ မိူဝ်ႈပူၼ်ႉမႃးၼၼ်ႉ မၼ်းၸၢႆးတူင်ႉၼိုင်ၼႂ်းၵၢၼ်တူင်ႇဝူင်းတႆး၊ ဢွၼ်ႁူဝ်သူၼ်းတုမ်ၾၢႆႇၵူၼ်းၼုမ်ႇ ၸဵမ်ၸိူဝ်းၼႆႉ ဝႃႈၼႆ။

ၸၢႆးၸွမ်ဝူင်းတႄႇၼႃႈႁိူၼ်းၵိုၵ်း ၼၢင်းမေး ၼၢင်းမျႃႉမေႇသေ မီးလုၵ်ႈႁူမ်ႈၵၼ် 3 ၵေႃႉ၊ ၸၢႆး 2 ၵေႃႉ၊ ယိင်း 1 ၵေႃႉ၊ လုၵ်ႈယိင်းၵေႃႉလဵၵ်ႉသမ်ႉ တိုၵ်ႉတွပ်ႇဝႆႉၸၼ်ႉၵဝ်ႈ တေၶိုၼ်ႈၸၼ်ႉသိပ်း၊ လုၵ်ႈၸၢႆးၵေႃႉၵၢင်သမ်ႉ 

တွပ်ႇဝႆႉၸၼ်ႉသိပ်းလႄႈ လုၵ်ႈၸၢႆးၵေႃႉယႂ်ႇတႄႉ ၵိုတ်းယင်ႉၵၢၼ်ႁဵၼ်းဝႆႉ ဝႃႈၼႆ။

ၸၢႆးၸွမ်ဝူင်းၼႆႉ ပဵၼ်လုၵ်ႈၸၢႆး လုင်းၸၢင်းထုၼ်းဢွင်ႇတင်းပႃႈၸၢင်းၶွင်ႇ မီးပီႈၼွင်ႉႁူမ်ႈတွင်ႉၵၼ် 5 ၵေႃႉ (ၸၢႆး 3 ယိင်း 2)။ 1) ပႃႈငူၺ်ႇ၊ 2) ပႃႈပုၼ်ႉ၊ 3) ၸဝ်ႈသိုၵ်းလူင်ၵၢၼ်းယွတ်ႈ ၽူႈၼမ်းတပ်ႉသိုၵ်းၸိူဝ်ႉၸၢတ်ႈ

ၸိုင်ႈတႆး SSNA (ႁူမ်ႈ RCSS မိူဝ်ႈပီ 2005 ဝၢႆးၸဝ်ႈ ၵၢၼ်းယွတ်ႈ လူႉ)၊ 4) ၸၢႆးသၢႆလႅင်း (ၼမ်ႉၽိတ်ႉၽူး)၊ 5 ၸၢႆးၸွမ်ဝူင်း(ၶူၼ်ႉၶိုၼ်းၶေႃႈၶိုၵ်ႉၶႅမ်ႉ ၸၢႆးမူး 2) ၸဵမ်ၸိူဝ်းၼႆႉ။