တၢင်းႁၼ်ထိုင် တူဝ်တႅၼ်းတႆး ၸိူဝ်းၶိုၼ်ႈႁွတ်ႈၶဝ်ႈႁူမ်ႈ ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ၼႂ်းတူင်ႇတၢင်ႇပိုၼ်ႉတီႈ

ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး ဢမ်ႇပႆႇလႆႈၸတ်းႁဵတ်းသေ လွင်ႈတၢင်းလႆႈ ၶိုၼ်ႈႁွတ်ႈၶဝ်ႈႁူမ်ႈ ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ တူင်ႇတၢင်ႇပိုၼ်ႉတီႈ  ဢၼ်လူင်ပွင်ၸိုင်ႈၸတ်းႁဵတ်း တီႈဝဵင်းလူင်တူၼ်ႈတီးၼၼ်ႉ ၼၢင်းသႅင်ၽူး လႆႈတွင်ႈထၢမ်သေ တူဝ်တႅၼ်းလၢႆမူႇၸုမ်း ဢၼ်ၶဝ်ႈႁူမ်ႈပၢင်ၵုမ် တွပ်ႇလၢတ်ႈဝႆႉ ၼင်ႇၼႆ။

ၸဝ်ႈသိုၵ်းၸၢႆးဢူး ၸဝ်ႈၼႃႈတီႈလုမ်းၵပ်းသၢၼ် ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA  ဝဵင်းတူၼ်ႈတီး

"ဢၼ်ႁဝ်းမႃးၶိုၼ်ႈ (ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ တူင်ႇတၢင်ႇပိုၼ်ႉတီႈ)ၼႆႉ ၵွပ်ႈပိူဝ်ႈၸုမ်းႁဝ်းၵေႃႈ ပဵၼ်ၸုမ်းဢၼ်လူင်းလၢႆးမိုဝ်း NCA ယူႇ၊ သမ်ႉဝႃႈပၢင်ၵုမ်ၸၼ်ႉၸိူဝ်ႉၸၢတ်ႈတႆး ဢမ်ႇပႆႇလႆႈႁဵတ်းသေတႃႉ၊ ႁႂ်ႈႁဝ်းၶႃႈလႆႈမႃး လဵပ်ႈႁဵၼ်းဝႃႈ တီႈၸၼ်ႉပိုၼ်ႉတီႈၼႆႉ ၶဝ်ဢုပ်ႇဢူဝ်းသင်လၢႆလၢႆ၊ မီးသင်လၢႆလၢႆ၊ ယူဝ်မၼ်းပဵၼ် ဢၼ်ၵမ်ႉထႅမ်မိူဝ်ႈႁဝ်းႁဵတ်းမႃး။ ႁဝ်းလႆႈႁူႉဝႃႈ ၼႂ်းၸႄႈဝဵင်းလႂ်၊ ၸႄႈတွၼ်ႈလႂ်၊ ၸုမ်းသင်လၢႆလၢႆ ဢၼ်မႃးလဵပ်ႈႁဵၼ်းၸွမ်း"၊၊

"လွင်ႈမုင်ႈမွင်းၼၼ်ႉ ႁႂ်ႈမုင်ႈမွင်းယႂ်ႇလူင်တေပႆႇမီး။ ၵူၺ်းၵႃႈ ဢၼ်လႆႈႁဵတ်းၵႂႃႇယူႇၸိူဝ်းၼၼ်ႉ ထွမ်ႇသဵင်ဝႃႈ ပႃႇတီႇဢၼ်လႂ်၊ ပိုၼ်ႉတီႈဢၼ်လႂ် ဢၼ်တၢင်တူဝ်မႃးၼၼ်ႉ ၶဝ်မုင်ႈမွင်းသင်လၢႆလၢႆ၊ မီးသင်လၢႆလၢႆ၊ ႁဝ်းလႆႈႁူႉတၢင်းမုင်ႈမွင်းၶဝ်"။

"ႁဝ်းလႆႈထွမ်ႇတူၺ်း ဢၼ်ၶဝ်တၢင်ႇယူႇၸိူဝ်းၼႆႉ မၢင်တီႈမၢင်ဢၼ် မၼ်းၵေႃႈမီးလွင်ႈၶိုၵ်ႉၶႅမ်ႉ ပုၼ်ႈတႃႇႁဝ်းယူႇ။ ၵူၺ်းၵႃႈ ဢၼ်ၶဝ်တၢင်ႇၵႂႃႇၸိူဝ်းၼႆႉ ဢမ်ႇမီးလွင်ႈႁၢင်ႈႁႅၼ်း၊ ၵွပ်ႈၶၢဝ်းယၢမ်းမၼ်းၸမ်ႁႅင်း လႆႈႁိပ်ႈၼႅတ်ႈ။ ၵမ်ႈၽွင်ႈၼႆႉ မႃးဝူၼ်ႉဢဝ် ၼႂ်းၶၢဝ်းတၢင်းဝၼ်းသွင်ဝၼ်းသေမႃးတႅမ်ႈ၊  ႁႂ်ႈမၼ်းတဵမ်ထူၼ်ႈၼၼ်ႉ တေဢမ်ႇငၢႆႈငၢႆႈ။ ၵူၺ်းၵႃႈ ဢၼ်ႁဵတ်းပွၵ်ႈၼႆႉ ႁႂ်ႈမၼ်းၶႅမ်ႉၵမ်းလဵဝ်တႄႉ တေဢမ်ႇပဵၼ်လႆႈ၊ တေလႆႈႁဵတ်းလၢႆလၢႆပွၵ်ႈ ယုမ်ႇယမ်ဝႃႈ မၼ်းၸင်ႇတေၶႅမ်ႉလႅပ်ႈ"။

"ႁဝ်းၶႃႈတိုၼ်းလူဝ်ႇႁဵၼ်းဝႆႉဝႃႈ  ပိူၼ်ႈယၢင်ႈၶိုၼ်ႈလွၵ်းလႂ်၊ ပဵၼ်ၸိူင်ႉႁိူဝ်ၼၼ်ႉ ႁဝ်းၵေႃႈလူဝ်ႇလႆႈႁူႉ။ ၶေႃႈသဵင်ႁဝ်းၶႃႈ တႃႇပီႈၼွင်တႆးၼၼ်ႉၵေႃႈ ႁဝ်းၶႃႈလူဝ်ႇလႆႈလၢတ်ႈဝႆႉ။ ၵွပ်ႈပိူဝ်ႈၼၼ်လႄႈ ပၢင်ဢုပ်ႇဢူဝ်းပွၵ်ႈၼႆႉတႄႉ ႁဝ်းၶႃႈႁၼ်ထိုင်ဝႃႈ မၼ်းၶၢမ်ႈၸၼ်ႉမၼ်းၵႂႃႇဢၼ်ၼိုင်ႈယဝ်ႉ။ ၵွပ်ႈပိူဝ်ႈၼၼ်လႄႈ တီႈၼႂ်းမိူင်းတႆးၼႆႉ တိုၵ်ႉၸတ်းႁဵတ်းတႃႇ ၸၢဝ်းၶိူဝ်းပဢူဝ်းၵူၺ်း"။ 

"ဢိင်ၼိူဝ်ၶေႃႈပီႈၼွင်ႉပဢူဝ်းသေ ၼႂ်းၸၢဝ်းၶိူဝ်းပဢူဝ်း မႃးႁဵတ်း (ဒေသအလိုက်) ။ ၼႂ်းမိူင်းတႆး ၸၢဝ်းၶိူဝ်းတႆး ပႆႇလႆႈႁဵတ်းလႄႈ မၼ်းၶၢမ်ႈပူၼ်ႉလွၵ်းမၼ်းၵႂႃႇ လွၵ်းၼိုင်ႈယဝ်ႉ၊ ႁဝ်းၶႃႈႁၼ်ထိုင်ၸိူင်ႉၼၼ်"၊၊

"ယူႇတီႈၵူၼ်းမိူင်းတႆးႁဝ်းၶႃႈမုင်ႈမွင်း၊ ပႃႇတီႇသိူဝ်ၽိူၵ်ႇႁဝ်းၶႃႈ မုင်ႈမွင်းဝႆႉတႄႉ လွင်ႈထၢင်ႇႁၢင်ႈၶွင်တႆးႁဝ်း၊ လွင်ႈထၢင်ႇႁၢင်ႈၶွင်ၽူႈဢွၼ်ႁူဝ်ႁဝ်းၶႃႈ ဢၼ်လႆႈလူင်းလၢႆးမိုဝ်းႁူမ်ႈၵၼ်တင်းပီႈၼွင်ႉ ထုင်ႉလိၼ်ပဵင်း၊ ပီႈၼွင်ႉမၢၼ်ႈၶဝ်လႄႈ ၵူႈၸၢဝ်းၶိူဝ်းမႃးႁူမ်ႈၵၼ်ဝႆႉၼၼ်ႉ။ လွင်ႈထၢင်ႇႁၢင်ႈၽူႈဢွၼ်ႁူဝ် ႁဝ်းၶႃႈ 1947 ၼၼ်ႉ လႆႈဢုပ်ႇဢူဝ်းၵၼ်ၸိူင်ႉႁိူဝ်၊ ပိူဝ်ႈတႃႇႁဝ်းၶႃႈတေမီး လွင်ႈထၢင်ႇႁၢင်ႈၸိူင်ႉၼၼ်သေ ဢုပ်ႇလၢတ်ႈၵၼ် တီႈပၢင်ၵုမ်လူင်ပၢင်လူင် 21 ပွၵ်ႈၵမ်းထူၼ်ႈ 2 ၼၼ်ႉ ႁဝ်းၶႃႈႁႂ်ႈလႆႈမီးလွင်ႈၵမ်ႉထႅမ်ၼႆသေ လႆႈမႃးၶဝ်ႈႁူမ်ႈ"။

 

"လွင်ႈၼႆႉၶႂ်ႈလၢတ်ႈထိုင်ဝႃႈ ပီႈၼွင်တႆးႁဝ်းၶႃႈ ဢိၵ်ႇပီႈၼွင်ႉၵူႈၸၢဝ်းၶိူဝ်း ၼႂ်းမိူင်းႁဝ်းၶႃႈ ၸိူဝ်းပႆႇတူဝ်ႈတၼ်း၊ ၸိူဝ်းတိုၵ်ႉၼွၼ်းလပ်းဝႆႉယူႇၼၼ်ႉ ႁႂ်ႈလုၵ်ႉတိုၼ်ႇၶိုၼ်ႈမႃးႁဵတ်းသေ ႁဵတ်းသၢင်ႈၵၢၼ်ငၢၼ်းၵႂႃႇႁူမ်ႈၵၼ်။ တွၼ်ႈတႃႇၵၢၼ်မိူင်းဝၼ်းမိူဝ်းၼႃႈၼၼ်ႉ ႁဝ်းၶႃႈႁၼ်ထိုင်ဝႃႈ ႁႂ်ႈလႆႈမီးလွင်ႈပွင်ႇၶၢဝ်ႇပွင်ႇလႅင်းထိုင်ၵၼ်သေ ႁူမ်ႈႁဵတ်းသၢင်ႈၸွမ်းၵၼ်၊ ႁႂ်ႈမၼ်းပဵၼ်လွင်ႈၵမ်ႉထႅမ် တႃႇမိူင်းႁူမ်ႈတုမ်ၵႂႃႇ။ ႁ်ႂ်ႈပွင်ႇၶၢဝ်ႇထိုင်ၵၼ် ႁႂ်ႈလႆႈၼပ်ႉယမ်ၵၼ် ၵူႈမူႇၵူႈၸုမ်း"။

"ယွၼ်ႉပိူၼ်ႈၽိတ်ႈမွၵ်ႇၵေႃႈပိူင်ၼိူင်ႈ၊ သမ်ႉထႅင်ႈၽိုၼ်လိၵ်ႈဢၼ်ႁဝ်း တေတၢင်ႇၵႂႃႇၼႆႉၵေႃႈ ႁႂ်ႈလႆႈၶဝ်ႈပႃးၵႂႃႇတီႈၶဝ်ၼႆလႄႈ ႁဝ်းလႆႈၶိုၼ်ႈမႃးၸွမ်း။ ပၢင်ၵုမ်ၸၼ်ႉၸိူဝ်ႉၸၢတ်ႈ ၸၢဝ်းၶိူဝ်းတႆးႁဝ်းပႆႇလႆႈႁဵတ်းသေတႃႉ တီႈဢေႇသုတ်းမၼ်း သဵင်ႁဝ်းပႃးၵႂႃႇတီႈၼႆႈဢိတ်းၼိုင်ႈၵေႃႈ လီယူႇ၊ ပေႃးပဵၼ်လႆႈတႄႉ ၶႂ်ႈႁႂ်ႈတီႈၸၢဝ်းၶိူဝ်းႁဝ်း ၸတ်းႁဵတ်းဢွၼ်တၢင်းသေ ၸင်ႇၵွႆႈၸတ်းႁဵတ်း ၸင်ႇၵွႆႈၶိုၼ်ႈပၢင်ၵုမ်ဢၼ်ၼႆႉတႄႉ ပဵၼ်ၵၢင်ၸႂ်ႁဝ်းယူႇ။ ၵူၺ်းၵႃႈ မၼ်းသမ်ႉပႆႇပဵၼ်မႃး။ ပၢင်ၵုမ်ပွၵ်ႈၼႆႉ ႁဝ်းသမ်ႉဢမ်ႇလႆႈႁူႉဢွၼ်တၢင်း၊ ၵိုင်ႉၵၢင်ႉၸတ်းသေ ႁဝ်းၵေႃႈၼႅတ်ႈႁၢင်ႈႁႅၼ်းသေမႃး ၶဝ်ႈႁူမ်ႈၸွမ်း။ သဵင်ႁဝ်းတႄႉတီႈဢေႇသုတ်းမၼ်း တေပႃးၵႂႃႇယူႇ"။

 

"လွင်ႈမုင်ႈမွင်းတႄႉ လွင်ႈဢၼ်ၶဝ်တမ်းဝၢင်းပၼ်ႁဝ်း လွင်ႈပၢႆးမိူင်း၊ ပၢႆးမၢၵ်ႈမီး ၊ သၽႃႇဝႃႉႁိမ်းႁွမ်းၸိူဝ်းၼၼ်ႉ ဢၼ်ႁဝ်းတႅမ်ႈဝႆႉသေတၢင်ႇၵႂႃႇၼၼ်ႉ သဵင်ႁဝ်းၵေႃႈတေပႃးၵႂႃႇၸွမ်းယူႇၼႆၵေႃႈ ပွင်ႇဝႃႈႁဝ်ႈၵေႃႈႁၢၼ်ႉၸႂ်ဢိတ်းၼိုင်ႈယူႇ ၶႅၼ်းသေဢမ်ႇပႃး"။ 

"လွင်ႈၵၢၼ်ပၢႆးမိူင်းၼႆႉ ဢၼ်မုင်ႈမွင်းဝႆႉတႄႉ ပဵၼ်ဢၼ်ႁဝ်းတိုၼ်းဝႃႈယူႇတႃႇသေႇၼၼ်ႉ ႁဝ်းၶႂ်ႈမူၼ်ႉမႄး ၶိုၼ်းလၵ်းမိူင်းပီ 2008 ၊ တႃႇလႆႈမူၼ်ႉမႄးၶိုၼ်းၼႆႉတႄႉ ဢွၼ်ၵၼ်ၶတ်းၸႂ်၊ တေလႆႈၶတ်းၸႂ်တီႈတၢင်းၼွၵ်ႈမၼ်းႁႃႉ တေလႆႈၶဝ်ႈလိူၵ်ႈၵဵပ်းႁဵတ်းတႅၼ်းၽွင်းသေ ၶဝ်ႈၵႂႃႇၼႂ်းသၽႃးသေႁဵတ်းႁႃႉ?၊ တေၸၢင်ႈပဵၼ်မႃးလၢႆလွင်ႈ လၢႆတၢင်း။ မၼ်းတေမႄးယၢပ်ႇသေတႃႉ ပိူင်လူင်မၼ်းတႄႉ ပေႃးဢမ်ႇမႄးလႆႈၸိုင် ပုၼ်ႈတႃႇပေႃႈမႄႈၵူၼ်းမိူင်းႁဝ်း ဢမ်ႇမီးၽွၼ်းလီလႆႈ။ တႃႇတေမူၼ်ႉမႄးလႆႈၼၼ်ႉ ႁဝ်းတေၶတ်းၸႂ်ၵႂႃႇ လွႆးလွႆး။ ၼႂ်းတိုဝ်ႉတၢင်းသၢင်ႈလွင်ႈငမ်းယဵၼ်ၼႆႉ တေမီးတိုဝ်ႉတၢင်းႁဵတ်းလႆႈယူႇ"၊၊