ၸုမ်းၶၢဝ်ႇၽူႈတွႆႇႁွၵ်ႈ (05/03/2017)


ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) လႄႈ တႅဝ်းႁူမ်ႈပူတ်းပွႆႇမိူင်းပလွင်ႈ/တပ်ႉသိုၵ်း ပူတ်းပွႆႇၸိူဝ်ႉၸၢတ်ႈတဢၢင်း (PSLF/TNLA) ၼႆႉ ယိူင်းဢၢၼ်းၼင်ႇႁိုဝ်ၵၢၼ်ၽွမ်ႉႁူမ်ႈ ၼႂ်းၵႄႈသွင်မူႇၸုမ်း ပၼ်ႈၵႅၼ်ႇၼႅၼ်ႈၼႃၼႆသေ ႁူပ်ႉထူပ်းဢုပ်ႇဢူဝ်း လႆႈၸႂ်တူၵ်းလူင်းၵၼ်ယဝ်ႉ ဢွၵ်ႇလိၵ်ႈပိုၼ်ၽၢဝ်ႇ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးသု လၢတ်ႈဝႃႈ- သွင်ၾၢႆႇလႆႈၸႂ်ၵၼ်မိူဝ်ႈဝၼ်းတီႈ 28 ၊ ၵူၺ်းၵႃႈလိၵ်ႈလၢႆးတႄႉ တိုၵ်ႉလႆႈဢွၵ်ႇပိုၼ်မိူဝ်ႈၼႆႉ (05/03/2017) ၵူၺ်း။ ယိူင်းထိုင်ၼင်ႇႁိုဝ် ၸိူဝ်ႉၸၢတ်ႈတႆး တင်းၸိူဝ်ႉၸၢတ်ႈပလွင်ႈ ပေႃးတေဢမ်ႇပဵၼ်လွင်ႈပၼ်ႁႃ ၶိူဝ်းၵူၼ်းတေႃႇၶိူဝ်းၵူၼ်းပႅင်းၸင်းၵၼ်ၵႂႃႇၶၢဝ်းယၢဝ်း၊ ႁႂ်ႈပေႃးမီးလွင်ႈယုမ်ႇယမ်ၵၼ်၊ ပိၼ်ႇပႆႇလႅၵ်ႈလၢႆႈၵၼ်"- ဝႃႈၼႆ။


သိုပ်ႇလၢတ်ႈဝႃႈ- "ၾၢႆႇၼိုင်ႈၵေႃႈ တီႈပေႃႈမႄႈၵူၼ်းမိူင်းႁဝ်း၊ မိူဝ်ႈပူၼ်ႉမႃး တီႈဢၼ်ႁူႉၵေႃႈမီး၊ တီႈဢၼ်ဢမ်ႇႁူႉၵေႃႈမီး၊ ဢၼ်ၺႃးၸၢၵ်ႇသိုၵ်းသိူဝ် ၺႃးတီႉၺွပ်းဢဝ်တၢႆဢဝ်ႁၢႆၵႂႃႇၸဵမ်ၸိူဝ်းၼၼ်ႉ လွင်ႈၼႆႉပဵၼ်လွင်ႈႁူမ်ႈမိုဝ်း ဢုပ်ႇဢူဝ်းတူၵ်းလူင်းၵၼ်၊ ၵူၼ်းမိူင်းၸိူဝ်းဢမ်ႇမီးတၢင်းၽိတ်းသင်ၸိူဝ်းၼၼ်ႉ ယႃႇႁႂ်ႈလႆႈထုၵ်ႇတီႉၺွပ်းဢဝ်တၢႆႁၢႆလၢႆ။ ၵွပ်ႈၼႆ ပေႃးဝႃႈဢမ်ႇၵဵဝ်ႇလူၺ်ႈၸုမ်းသိုၵ်းၽူႈၶဵၼ်ၵၼ်တင်း ပလွင်ႈၸိူဝ်းၼၼ်ႉ ၸုမ်းလႂ်ၽႂ်ၵေႃႈလီ ႁႂ်ႈၵပ်းသိုပ်ႇၵပ်းသၢၼ်ၼႂ်းၶၢဝ်းတၢင်း 3 ဝၼ်း၊ ယူႇတီႈပႃႇတီႇမႂ်ႇသုင်ၸိုင်ႈတႆး တေၵႅတ်ႇၶႄပၼ် လၢတ်ႈဢဝ်လႆႈယူႇ၊ ၶႂ်ႈပိုၼ်ၽၢဝ်ႇဝႆႉၸိူင်ႉၼင်ႇၼႆ"- ဝႃႈၼႆ။


လိၵ်ႈပိုၼ်ၽၢဝ်ႇ ဢၼ်သွင်မူႇသွင်ၸုမ်းလႆႈၸႂ်ၵၼ်သေထုၵ်ႈဢွၵ်ႇၼၼ်ႉ တင်းမူတ်းမီး 4 ၶေႃႈ။ ၶေႃႈၸီႉသင်ႇထိုင် ၽူႈမီးၸၼ်ႉတင်းသဵင်ႈလႄႈ ၽူႈၵွၼ်းတပ်ႉ လုၵ်ႈတပ်ႉတင်းသဵင်ႈ၊ ပႃးၸဵမ်ပေႃႈမႄႈၵူၼ်းမိူင်းတင်းသဵင်ႈဝႆႉ ၼင်ႇၼႆ။


1.ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) လႄႈ တႅဝ်းႁူမ်ႈပူတ်းပွႆႇမိူင်းပလွင်ႈ/ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (PSLF/TNLA) ၼႆႉ သွင်ၾၢႆႇလႆႈၸႂ်ၵၼ်ဝႃႈ ၽူႈၵွၼ်းတပ်ႉဢိၵ်ႇလုၵ်ႈတပ်ႉ လႄႈၸၢဝ်းၶိူဝ်းတႆးတင်း ၸၢဝ်းၶိူဝ်းတဢၢင်းတင်းသဵင်ႈ လွင်ႈတေတုမ်ႉတိူဝ်ႉ ၵၢၼ်ၽွမ်ႉႁူမ်ႈၼႂ်းၸၢဝ်းၶိူဝ်း၊ လွင်ႈလၢတ်ႈ၊ လွင်ႈတႅမ်ႈၸိူဝ်းၼႆႉ တိုၼ်းတေဢမ်ႇလႆႈႁဵတ်း။


2.သင်ဝႃႈတပ်ႉၾၢႆႇတႂ်ႈတင်းသွင်ၾၢႆႇပဵၼ်မႃးမီးမႃး ပၼ်ႁႃၵၼ်ၼႆၸိုင် တေဢမ်ႇလႆႈဢဝ်လၢႆး ၵၢၼ်သိုၵ်းၵႄႈလိတ်ႈ၊ ႁႂ်ႈၸၼ်ႉၾၢႆႇတႂ်ႈ တၢင်ႇထိုင်ၸၼ်ႉၾၢႆႇၼိူဝ်ယဝ်ႉၵႄႈလိတ်ႈ။ သင်ၸိူဝ်ႉဝႃႈ ၾၢႆႇတႂ်ႈၼင်ႇၵၼ်ဢမ်ႇၵႄႈလိတ်ႈၵၼ်ၸိုင် တေလႆႈတၢင်ႇထိုင်ၶွမ်ႊမတီႊငဝ်ႈငုၼ်းၽႂ်မၼ်းသေ ၵႄႈလိတ်ႈၵႂႃႇ။


3.ၼႃႈတီႈတူင်ႉၼိုင် ၼႂ်းႁဝ်းသွင်မူႇသွင်ၸုမ်းၼၼ်ႉ သင်ဝႃႈဢမ်ႇၸႂ်ႈၽူႈၶဵၼ် (ဢမ်ႇၼၼ်) ၽူႈၸိူဝ်းဢၼ်ဢမ်ႇယူႇၾၢႆႇၽူႈၶဵၼ်ၼႆၸိုင် တေဢမ်ႇလႆႈတီႉၺွပ်း၊ တဵၵ်းတဵင်ပေႃႉထုပ်ႉ၊ ႁႅမ်တၢႆဢဝ်ႁၢႆ ပေႃႈမႄႈၵူၼ်းမိူင်း။ သင်ၸိူဝ်ႉဝႃႈ မီးမႃးလွင်ႈထၢင်ႇထိူမ် ထၢင်ႇၽိတ်းထၢင်ႇပိူင်ႈၵၼ်ၼႆၸိုင် ၽူႈမီးပုၼ်ႈၽွၼ်းၶဝ်တေလႆႈၸွပ်ႇထတ်းသေယဝ်ႉ တေလႆႈသူင်ႇပၼ်ၶိုၼ်း တီႈၵဵဝ်ႇၶွင်ႈၸုမ်းၽႂ်မၼ်း။


4.ၵဵဝ်ႇလူၺ်ႈလွင်ႈလႆႈၸႂ်ၾၢႆႇၼိူဝ်ၸိူဝ်းၼႆႉသေ သင်ဝႃႈဢမ်ႇႁဵတ်းၸွမ်းၼႆၸိုင် ပဵၼ်ၸုမ်းလႂ်သေၵေႃႈယဝ်ႉ တေလႆႈထုၵ်ႇၵူတ်ႇထတ်း ဢဝ်လိူင်ႈၵၼ်ၵႂႃႇယူႇ။