ၵႂၢမ်းၼမ်း


ၸွမ်းၼင်ႇႁဝ်းလႆႈၵွင်လင်လတ်းၽၢၼ်ႇပၢၼ်ၶိူင်ႈၸၢၵ်ႈသေ ယၢင်ႈယဵပ်ႇၶဝ်ႈမႃးၼႂ်းပၢၼ်ၶေႃႈမုလ်း ဢၼ်ဢွၼ်ၵၼ်ႁွင်ႉဝႃႈၸူဝ်ႈပၢၼ် ဢၢႆႊထီႊၼႆႉ။ ပၢႆးပၺ်ၺႃၼႆႉၵေႃႈလမ်ႇလွင်ႈတႃႇၸူဝ်ႈပၢၼ်ၵူၼ်းႁဝ်းမႃး ၵူႈမိုဝ်ႉၵူႈဝၼ်း လိူဝ်သေမိူဝ်ႈပၢၼ်ၵူႈပွၵ်ႈၵူႈၽဝ်ႇႁဵင်ပုၼ်ႈသႅၼ်ပုၼ်ႈယဝ်ႉ။ ၵႃႈၶၼ်ပၺ်ၺႃ ၼၼ်ႉၵေႃႈတိူဝ်းမီးၵႃႈမီးၶၼ်မႃးလိူဝ်ၵဝ်ႇ။ ၶေႃႈထၢမ်တွၼ်ႇတႃႇၸိူဝ်းႁဝ်းၼႂ်းဝၼ်းမိူဝ်ႈၼႆႉတႄႉ ꧦၸွင်ႇတၢင်းႁူႉတၢင်းႁၼ် ဢၼ်ႁဝ်းၶႃႈလႆႈႁပ်ႉသွၼ်ဢဝ်တီႈႁူင်းႁဵၼ်းၼၼ်ႉ ၵုမ်ႇထူၼ်ႈၵမ်ႉယၼ်ပၼ်တႃႇတေတေႃႇသူႈၵႂႃႇ ၼႂ်းၸူဝ်ႈပၢၼ်ႁဝ်းမိူဝ်းၼႃႈၼၼ်ႉယဝ်ႉႁိုဝ်?ꧦ။


ၼႂ်းၸူဝ်ႈပၢၼ်ၶိူင်ႈၸၢၵ်ႈၼၼ်ႉတႄႉ ႁဝ်းဢွၼ်ၵၼ်ၵႂႃႇႁူင်းႁဵၼ်း၊ ယဝ်ႉၵေႃႈယဝ်ႉၵၢၼ်ႁဵၼ်းလႆႈၸုမ်ႈလႆႈၶူး။ ပေႃးယဝ်ႉႁဵၼ်းယဝ်ႉၵေႃႈ ဢွၼ်ၵၼ်ဢွၵ်ႇႁႃႁဵတ်းၵၢၼ်တေႃႇသူႈၸူဝ်ႈပၢၼ်ၽႂ်မႂ်း ၼင်ႇၼမ်ႉၵတ်ႉမီး ဢမ်ႇၼၼ် ၸွမ်းၼင်ႇဢၼ်လႆႈႁဵၼ်းႁူႉမႃးတီႈႁူင်းႁဵၼ်းသွၼ်ၼၼ်ႉ။ ႁဝ်းၶႃႈဢမ်ႇတွၼ်ႉဝူၼ်ႉမႆႈၸႂ်ဝႃႈ လူဝ်ႇလႆႈမီးတၢင်းႁူႉတၢင်းႁၼ်သင်မႃးၵႅမ်ၸွမ်းထႅင်ႈၵႃႈႁိုဝ်၊ ၵွပ်ႈပိူဝ်ႈပၢၼ် ၶိူင်ႈၸၢၵ်ႈၼႆႉ မၼ်းပၼ်ႇလႅၵ်ႈလၢႆႈ လွႆးလွႆး ႁိုဝ်ဢမ်ႇလႅၵ်ႈလၢႆႈၽႂ်းၼင်ႇပၢၼ် ဢၢႆႊထီႊမိူဝ်ႈလဵဝ်။ ပေႃးလၢတ်ႈသိုဝ်ႈသိုဝ်ႈမၼ်းၵေႃႈ တၢင်းႁူႉမေႃဢၼ်လႆႈမႃးတီႈႁူင်းႁဵၼ်းသွၼ်ၼၼ်ႉ ၵိၼ်ၸၢႆႇ ပေႃးဢမ်ႇသဵင်ႈ ၵုမ်ႇထုၼ်ႈတႃႇတေႃႇၸူဝ်ႈ ပၢၼ်ႁဝ်းယဝ်ႉ ၼႆယူႇ။

ၵူၼ်းႁဝ်းဝၼ်းမိူဝ်ႈၼႆႉ တူဝ်ႈတၼ်းတႃႇလိုဝ်ႈၵၢၼ်ၸဝ်ႉမိူဝ်ႈၸူဝ်ႈၶူပ်ႇတိုၵ်ႉလဵၵ်ႉၼုမ်ႇၼၼ်ႉလိူဝ်မိူဝ်ႈၵူႈပွၵ်ႈ။ ဝႃႈၼၼ်သေတႃႉ ၵူၼ်းႁဝ်းတၢင်ႇၵေႃႉတႄႉႁၼ်ထိုင်ဝႃႈ တၢင်းႁူႉတၢင်းႁၼ်ဢၼ်ၶဝ်လႆႈပူင်သွၼ်မႃး ၸိူဝ်းၼၼ်ႉ ဢမ်ႇပႆႇၵုမ်ႇထူၼ်ႈတႃႇတေႃႇသူႈၸူဝ်ႈပၢၼ်ၶဝ်လႃးလႃး။ ၼႂ်းပၢၼ်မိူဝ်ႈဢွၼ်တၢင်းတႄႉ ၵေႃႉယဝ်ႉၵၢၼ်ႁဵၼ်းလႄႈၵေႃႉဢမ်ႇယဝ်ႉၵၢၼ်ႁဵၼ်းၼၼ်ႉ ထူပ်းပၼ်ႁႃၵၢၼ်ငိုၼ်းမိူၼ်ၵၼ် ဢမ်ႇပိူင်ႈသင်ၵၼ်ၵႃႈႁိုဝ်ၼင်ႇဝႃႈ။ ၵူၺ်းၵႃႈၼႂ်းပၢၼ်မိူဝ်ႈလဵဝ်ၼႆႉ ၵူၼ်းႁဝ်းဢွၼ်ၵၼ်တူၵ်းၸႂ်တူင်ႉတိုၼ်ႇသေႁႃသွၼ်ဢဝ်တၢင်းႁူႉႁၼ် ဢၼ်လိူဝ်မၼ်းၽိူမ်ႉထႅင်ႈတင်းၼမ် မိူၼ်ၸိူင်ႉၼင်ႇသွၼ်လိၵ်ႈဢင်းၵိတ်ႉ၊ သွၼ်ၶွမ်းၸၵႂႃႇထႅင်ႈတင်းၼမ်။


ႁဝ်းဢဝ်သင်တႅပ်းတတ်းလွင်ႈၶိုၼ်ႈယႂ်ႇၵၢၼ်ႁဵၼ်းႁဝ်း


ႁဝ်းဢဝ်သင်သေတႅပ်းတတ်းမၵ်းမၼ်ႈ လွင်ႈၶိုၼ်ႈယႂ်ႇၵၢၼ်ႁဵၼ်းႁဝ်း? ပဵၼ်ၶႅပ်းဝႂ်ဢွင်ႇ ဢၼ်သူလႆႈႁပ်ႉဝၼ်းလိုၼ်းသုတ်းႁဵၼ်းသူၼၼ်ႉႁႃႉ? ဝႆႉဝႃႈသူႁပ်ႉလႆႈမိူဝ်ႈၸူဝ်ႈၶူပ်ႇတိုၵ်ႉလႆႈသၢဝ်းႁႃႈၼႆၵွၼ်ႇလႃႈ။ ဢမ်ႇၼၼ် ပဵၼ်ၼမ်ႉတွၼ်ႉ ဢၼ်သူလႆႈၸၢမ်ႇမိူဝ်ႈသူလိုဝ်ႈပေႃးၵၢၼ်ၼႂ်းၸူဝ်ႈပၢၼ်ႁႃႈသိပ်းႁူၵ်းၼၼ်ႉႁိုဝ်? ပေႃးမႃးတူၺ်းၶေႃႈမုလ်း ဢၼ်လူင်ပွင်ၸိုင်ၶဝ်ၶူၼ်ႉၶႂႃႉၼၼ်ႉၸိုင် လႆႈႁၼ်ဝႃႈၼႂ်းၵႃႈၵူၼ်းၸူဝ်ႈပၢၼ်ႁႃႈသိပ်းႁူၵ်း တႃႇပၢၵ်ႇၵေႃႉၼၼ်ႉ မီးၵူၼ်းၵေႃႉၼိုင်ႈၵူၺ်း ဢၼ်ပဵၼ်ၽူႈမၢၵ်ႈမီး၊ တႃႇသီႇၵေႃႉတႄႉလႆႈဝႃႈယူႇသႃႇလူမ်ၸႂ်ယူႇ။ တႃႇႁႃႈၵေႃႉတႄႉတိုၵ်ႉလုင်းႁူဝ်ၵၼ်တင်းၼႃႈၵၢၼ်ယူႇ။ တႃႇမွၵ်ႈႁႃႈသိပ်းႁူၵ်းၵေႃႉ သမ်ႉတိုၵ်ႇလႆႈယွၼ်းတၢင်းၸွႆႈထႅမ်တမ်ႈတီႈ လူင်ပွင်ၸိုင်ဢမ်ႇၼၼ်တီႈလုၵ်ႈလၢင်းၶဝ်ၶိုၼ်းယူႇ။ လိူဝ်ၼၼ်ႉတႄႉဢွၼ်ၵၼ် တၢႆပႅတ်ႈယဝ်ႉ။


ၵူၼ်းႁဝ်းၵႆႉဢွၼ်ၵၼ်ပၢၵ်ႇလၢတ်ႈဝႃႈ ꧦၵဝ်တႄႉ ပေႃးထဝ်ႈမႃးတႄႉ ဢမ်ႇပေႃးလူဝ်ႇငိုၼ်းၼမ်ၵႃႈႁိုဝ်ယဝ်ႉ၊ ယွၼ်ႉပိူဝ်ႈဝႃႈၶၼ်ၵူႈလွင်ႈလွင်ႈၵေႃႈ လူတ်းယွမ်းယဝ်ႉလူးꧦၼႆယူႇ။ တီႈတႄႉမၼ်းဢမ်ႇၸႂ်ႈၸိူင်ႉၼၼ် ၼိုင်ႈထဝ်ႈၼိုင်ႈၶႅၼ်းလူဝ်ႇငိုၼ်းၼမ်ယဝ်ႉ။ ယွၼ်ႉပိူဝ်ႈဝႃႈတၢင်းပဵၼ်တၢင်း တၢႆလူင်ၼၼ်ႉၵႆႉပေႃႇမႃး မိူဝ်ႈႁဝ်းထဝ်ႈၼၼ်ႉၵမ်ႈၼမ်ယဝ်ႉ။ ပၢႆးယူႇလီလူင်ၼၼ်ႉၵေႃႈ ၵႆႉလၢတ်ႈၵႂၢမ်းမိူဝ်ႈႁဝ်းထဝ်ႈၼၼ်ႉၵူၺ်း ၵမ်ႈၼမ်။ ၽႂ်မီးငိုၼ်းၵေႃႈမၼ်းတေယူႇႁိုင်၊ ၽႂ်ဢမ်ႇမီးငိုၼ်းၵေႃႈမၼ်းတေၸဵဝ်းၵႂႃႇၼၼ်ႉယဝ်ႉ။


ၶေႃႈထၢမ်ၵမ်းဢွၼ်တၢင်းသုတ်းတႄႉ သင်ႁဝ်းထဝ်ႈမႃးၸိုင် ၸွင်ႇပၢႆး ပၺ်ၺႃတၢင်းႁူႉတၢင်းႁၼ် ဢၼ်ႁဝ်းလႆႈပူင်သွၼ်မႃးတမ်ႈတီႈႁူင်းႁဵၼ်းၼၼ်ႉ တေလဵင်ႉလႆႈသႆၢၸႂ်ႁဝ်းတင်းၸူဝ်ႈတင်းၸၢတ်ႈႁိုဝ်?ꧦ


ၶေႃႈထၢမ်မၢႆသွင်ၵေႃႈ ꧦၵူၼ်းထဝ်ႈၵူၼ်းၵႄႇလူင်ၸိူဝ်းၼႆႉ ၶဝ်သမ်ႉထုၵ်ႇလီႁဵတ်းသၢင်ႈသင်ပၼ်ဝႆႉတႃႇပၢႆး ပၺ်ၺႃလုၵ်ႈလုၵ်ႈလၢၼ်လၢၼ်ၶဝ်မိူဝ်းၼႃႈ?ꧦ ၶေႃႈတွပ်ႇတႃႇၶေႃႈထၢမ်သွင်ဢၼ်ၼႆႉတႄႉ- ၶေႃႈတွပ်ႇတႃႇ ဢၼ်ၼိုင်ႈတႄႉပဵၼ် လုၵ်ႈလုၵ်ႈသူၼၼ်ႉယဝ်ႉၵေႃႉဢၼ်တေလႆႈ လဵင်ႉလူ ၸၢႆႇ ပၼ်ၵႃႈယူတ်းယႃသူ မိူဝ်ႈသူထဝ်ႈၵႄႇမႃးၼၼ်ႉ၊ သင်ၸိူဝ်ႉဝႃႈသူဢမ်ႇ ၸၢႆႇ လႆႈႁင်းၵူၺ်ႈၵေႃႈ။ ၶေႃႈတွပ်ႇထႅင်ႈ ဢၼ်ၼိုင်ႈသမ်ႉၸွင်ႇပၢႆး ပၺ်ၺႃလုၵ်ႈဢွၼ်ႇသူၼၼ်ႉ တေၵုမ်ႇထူၼ်ႇပေႉတူဝ်လဵင်ႉလႆႈတင်းၸူဝ်ႈ တင်းၸၢတ်ႈမၼ်းလႄႈၼႃႈႁိူၼ်းမၼ်းလႆႈ ႁူမ်ႈပႃးၵူၼ်းထဝ်ႈၵူၼ်းၵႄႇလူၺ်ႈဢမ်ႇမီးပၼ်ႁႃၵၢၼ်ငိုၼ်း၊ ဢမ်ႇလႆႈယွၼ်းတၢင်းၸွႆႈထႅမ်ႈတီႈလူင်ပွင်ၸိုင်ႈၶဝ်ႁိုဝ်?


ပိူင်မၼ်းလႅၵ်ႈလၢႆႈယဝ်ႉ


ပိူင်ၼႂ်းၸူဝ်ႈပၢၼ်ၶိူင်ႈၸၢၵ်ႈၼၼ်ႉၵႂႃႇၶိုၼ်ႈႁဵၼ်းမၢၼ်ႇမၢၼ်ႇ၊ ၶတ်းၸႂ်ႁႂ်ႈလႆႈမၢတ်ႈလီလီ၊ ႁႃၵၢၼ်ဢၼ်ၶိုၵ်ႉၶႅမ်ႉ ဢၼ်မီးလွင်ႈမၼ်ႈၸႂ်ၵမ်ႉယၼ်ၸူဝ်ႈပၢၼ်လႆႈ၊ ယဝ်ႈၵေႃႈၵူဝ်ႈဢိူၵ်ႇၸွမ်းၼႃႈၵၢၼ်ၼၼ်ႉတၢင်းၸူဝ်ႈ။ ဝၢႆးသေသၢဝ်းပီပၢႆ ဢမ်ႇၼၼ် မိူဝ်ႈလိုဝ်ႈၵၢၼ်ၼၼ်ႉ လူင်ပွင်ၸိုင်ႈဢမ်ႇၼၼ်ၸဝ်ႈႁူင်းၵၢၼ်ၶဝ် ဢဝ်ပုၼ်ႈၽွၼ်း ပၼ်ၵူႈလွင်ႈလွင်ႈ တေႃႇၸူဝ်ႈပၢၼ်ပေႃးသုတ်းသဵင်ႈႁၢႆဝၢႆး။


ၼႂ်းၸူဝ်ႈပၢၼ်ၶေႃႈမုလ်း ဢမ်ႇၼၼ် ဢၢႆႊထီႊၼႆႉတႄႉ ပိူင်မၼ်းလၢႆႈယဝ်ႉ ပိၼ်ႇပႅင်ယဝ်ႉ။ ဢမ်ႇမိူၼ်မိူဝ်ႈ ပၢၼ်ၶိူင်ႈၸၢၵ်ႈၼၼ်ႉယဝ်ႉ။ ပိူင်မိူဝ်ႈလဵဝ်ၼႆႉတႄႉၵႂႃႇၶိုၼ်ႈႁဵၼ်းမၢၼ်ႇမၢၼ်ႇ၊ ၶတ်းၸႂ်ႁႂ်ႈလႆႈမၢတ်ႈလီလီ၊ ယဝ်ႉႁဵၼ်းယဝ်ႉၵေႃႈႁႃၵၢၼ်ၶိုၵ်ႉၶိုၵ်ႉ၊ ပေႃႈယဝ်ႉၵေႃႈၶတ်းၸႂ်လိုမ်ႉလပ်ႉၾိုၵ်းၼမ်ႉၵတ်ႉတူဝ်ၸဝ်ႈၵဝ်ႇ ႁႂ်ႈပေႃးတိူဝ်းမႃးလိူဝ်ၵဝ်ႇတႃႇၼႃႈၵၢၼ်ၸဝ်ႈၵဝ်ႇၼၼ်ႉ။ ၶတ်းၸႂ်ႁႃႁူင်းၵၢၼ်ဢၼ်မႂ်ႇ၊ ၼႃႈၵၢၼ်မႂ်ႇ၊ ယဝ်ႉၵေႃႈလိုမ်ႉလပ်ႉၾိုၵ်းၼမ်ႉၵတ်ႉၸဝ်ႈၵဝ်ႇ။ မုင်ႈမွင်းႁႂ်ႈမီးငိုၼ်းၼမ်ၼမ်လႄႈယွၼ်းသူးႁႂ်ႈငိုၼ်းၼၼ်ႉ ၵႅမ်းတူဝ်ဝႆႉတေႃႇၸူဝ်ႈပၢၼ်ႁူၵ်းသိပ်းပႆၢၼၼ်ႉလႄႈ။ ယွၼ်ႉပိူဝ်ႈဝႃႈမိူဝ်ႈၸူဝ်ႈပၢၼ်သူလႆႈႁႃႈသိပ်းပႆၢၼၼ်ႉ သူၸၢင်ႈလႆႈၸၢမ်ႇလီလီယဝ်ႉ။ ၼႂ်းၸူဝ်ႈပၢၼ်ၶိူင်ႈၸၢၵ်ႈၼၼ်ႉ ပဵၼ်ပၢၼ်ဢၼ်ဢဝ်ပိူင်ၸဝ်ႈ ပၢႆးသၢႆႈဢၢႆႈတႆးဢၼ်ဝႃႈ E = mc2 ၼၼ်ႉပဵၼ်ပိူင်လူင်။


ၼႂ်းၸူဝ်ႈပၢၼ်ဢၢႆႊထီႊၼႆႉ ပဵၼ်ပၢၼ်ဢၼ်တေလႆႈဢဝ်လၢႆးပိူင်ၸဝ်ႈပၢႆးမၢၵ်ႈမီး Gordon Moore ပဵၼ်ပိူင်လူင်ယဝ်ႉ။ ပိူင်ဢၼ်တႅၵ်ႈၼႄလွင်ႈလႅၵ်ႈလၢႆႈလူင်ဢၼ်ၼိုင်ႈ၊ ပဵၼ်ပိူင်ဢၼ်တၢင်းႁူႉၶေႃႈမုလ်း လူင်လႅၵ်ႈလၢႆႈၶိုၼ်ႈပဵၼ်လၢႆးသွင်တူပ်ႉၼႂ်းၶၢဝ်းတၢင်းသိပ်းပႅတ်ႇလိူၼ်ၵူၺ်း။ ပေႃးမႃးလၢတ်ႈသိုဝ်ႈသိုဝ်ႈ မၼ်းၵေႃႈ ပေႃးဝႃႈသိပ်းပႅတ်ႇလိူၼ်ၼိုင်ႈပွၵ်ႈသူၵဝ်ႁဝ်းႁႃးတိုၼ်းလူဝ်ႇၶိုၼ်းလဵပ်ႈႁဵၼ်းၶိုၼ်းၵူႈလွင်ႈလွင်ႈ ဢမ်ႇၼၼ်ၵေႃႈပေႃးၶွပ်ႈၶူပ်ႇသိပ်းပႅတ်ႇလိူၼ်မႃးၼႆ ၶႂ်ႈဝႃႈၼႆႉတေလႆႈၵႂႃႇၶိုၼ်ႈႁူင်းႁဵၼ်း ၶိုၼ်းတိၵ်းတိၵ်းၼၼ်ႉယဝ်ႉ။


ၼႂ်းၸူဝ်ႈပၢၼ်ၶိူင်ႈၸၢၵ်ႈၼၼ်ႉ မၼ်းလႅၵ်ႈလႆၢႈလွႆးလွႆးၵူၺ်း။ ဢၼ်သူၵႂႃႇၶိုၼ်ႈႁဵၼ်းသေ သွၼ်ဢဝ်လႆႈမႃးၼၼ်ႉၵႃႈၶၼ်မၼ်းၵိုင်ႇတင်းၸူဝ်ႈတင်းၸၢတ်ႈယဝ်ႉ။ ၼႂ်းၸူဝ်ႈပၢၼ်ဢႆႊထီႊၼႆႉတႄႉ ဢၼ်ႁဝ်းႁဵၼ်းႁူႉမေႃၸိူဝ်းၼၼ်ႉၸဵဝ်းသဵင်ႈၼႃႇ၊ ၸဵဝ်းဢမ်ႇၶဝ်ႈတၢင်းတိုဝ်းသင်။ လွင်ႈလဵပ်ႈႁဵၼ်း ယူႇတႃႇသေႇၼၼ်ႉ ပဵၼ်ပိူင်လူင်မၼ်းယဝ်ႉ။ ဝႃႈၼၼ်သေတႃႉ ဢၼ်လမ်ႇလွင်ႈလိူဝ်ၼၼ်ႉထႅင်ႈတႄႉ ယိုင်ႈႁဵၼ်းၽႂ်းႁဵၼ်းလႆႈလီၵႃႈႁိုဝ်သေ ၶတ်းၸႂ်ဢဝ်မႃးပိၼ်ႇပႅင်သေဢဝ်ၶဝ်ႈတိၼ်ၶဝ်မိုဝ်းၽႂ်း ၵႃႈႁိုဝ်ၵေႃႈလီၵႃႈၼၼ်ႉယဝ်ႉ။ ၸိူဝ်းပဵၼ်ပေႃႈမႄႈလုၵ်ႈလၢင်းၶဝ်ၵေႃႈဢွၼ်ၵၼ်မႆႈၸႂ်တိုၵ်းသူၼ်း လုၵ်ႈလၢင်းၶဝ် ႁႂ်ႈၶိုၼ်ႈႁူင်းႁဵၼ်း လဵပ်ႈႁဵၼ်းၶိုတ်းၸွမ်းၵၢပ်ႈၸွမ်းပၢၼ်မၼ်းမႃးယဝ်ႉ။ ယွၼ်ႉပိူဝ်ႈဝႃႈ လွင်ႈဢၼ်လုၵ်ႈလၢင်းၶဝ်တေလႆႈတေႃႇသူႈ ဝၼ်းမိူဝ်းၼႃႈၼၼ်ႉ ယၢပ်ႇယၢၵ်ႈသူၼ်သိၼ်းသၢၼ်မႃး လိူဝ်ၵဝ်ႇပဵၼ်ၵွင်ပဵၼ်ပုၼ်ႈ။ ပဵၼ်ဢၼ်လၢမ်းၶၢတ်ႈႁူႉ ယၢပ်ႇဝႆႉတႄႉတႄႉၼင်ႇဝႃႈ။ ၸိူဝ်းတႂ်ႈၼႆႉ ပဵၼ်လွင်ႈလႅၵ်ႈလၢႆႈ ဢၼ်ပိူင်ႈၵၼ်ၼႂ်းပၢၼ်သွင်ပၢၼ်ၼၼ်ႉယဝ်ႉ။


• ၼႂ်းပၢၼ်ၶိူင်ႈၸၢၵ်ႈၼၼ်ႉ ၸဝ်ႈၵၢၼ်ၶဝ်ပဵၼ်ၽူႈဢဝ်ပုၼ်ႈၽွၼ်းၼိူဝ်ၵၢၼ်လိုဝ်ႈၵၢၼ်ႁဝ်း။

• ၼႂ်းပၢၼ်ဢၢႆႊထီႊၼႆႉႁဝ်းၽူႈၵူၼ်းႁဵၼ်းၵၢၼ်လႆႈဢဝ်ပုၼ်ႈၽွၼ်းၼိူဝ်ၵၢၼ်လိုဝ်ႈၵၢၼ်ႁဝ်းႁင်းၵူၺ်း။ မိူဝ်ႈၸူဝ်ႈၶူပ်ႇႁဝ်းလႆႈႁူၵ်းသိပ်းပႆၢၼၼ်ႉ သင်ဝႃႈႁဝ်းဢမ်ႇမီးငိုၼ်းႁိုဝ် သင်ဝႃႈငိုၼ်းႁဝ်း ဢမ်ႇၵုမ်ႇၸိုင် ပဵၼ်ပၼ်ႁႃသုၼ်ႇတူဝ်ႁင်းႁဝ်း၊ ၸဝ်ႈၵဝ်ႇတေလႆႈဢဝ်ပုၼ်ႈၽွၼ်းႁင်းၵူၺ်း။ ၸဝ်ႈၵၢၼ်ၶဝ်ဢမ်ႇမႃးဢဝ်ပုၼ်ႈၽွၼ်းပၼ် ယဝ်ႉၵေႃႈဢမ်ႇၸႂ်ႈပၼ်ႁႃၶဝ်။

• ၼႂ်းပၢၼ်ၶိူင်ႈၸၢၵ်ႈၼၼ်ႉ ယိုင်ႈႁဝ်းထဝ်ႈယိုင်ႈၵႃႈၶၼ်ႁဝ်းၶိုၼ်ႈ။

• ၼႂ်းပၢၼ်ဢႆႊထီႊၼႆႉ ယိုင်ႈႁဝ်းထဝ်ႈယိုင်ႈၵႃႈၶၼ်ႁဝ်းတူၵ်း။

• ၼႂ်းပၢၼ်ၶိူင်ႈၸၢင်ႈၼၼ်ႉ ၵူၼ်းႁဝ်းႁဵတ်းၵၢၼ်တေႃႇၸူဝ်ႈပၢၼ်ႁိုဝ်တေႃႇပေႃးထဝ်ႈ။

• ၼႂ်းပၢၼ်ဢႆႊထီႊၼႆႉ ၵူၼ်းႁဝ်းတိၼ်ႇပဝ်ႇမိုဝ်းပဝ်ႇမႃးလိူဝ်ၵဝ်ႇ။

• ၼႂ်းပၢၼ်ၶိူင်ႈၸၢၵ်ႈၼၼ်ႉ လုၵ်ႈဢွၼ်ႇၶဝ်ပဵၼ်မႃးၼေႃႇတႅၼ်းၶိူဝ်းဢၼ်ဝၢၼ်ႈမိူင်း။ ပဵၼ်မႃးမေႃယႃ၊ ပဵၼ်မႃးၽူႈတတ်းသိၼ်။ ၶဝ်ပဵၼ်ၵွၼ်ႈၶမ်းလူင်ပဵၼ်တူဝ်ထႅၼ်ႈၶိုၵ်ႉတွၼ်းယဝ်ႉ။

• ၼႂ်းပၢၼ်ဢၢႆႊထီႊ ၼႆႉ ၸၢႆးၸိူင်း၊ ၽူႈႁွင်ႉၵႂၢမ်း၊ ၽူႈလဵၼ်ႈဢဵၼ်ႁႅင်းၶဝ်ၸိူဝ်းၼႆႉ ပဵၼ်တူဝ်ထႅၼ်ႈ လူင်ၶိုၵ်ႉတွၼ်းယဝ်ႉ။ ၽူႈတတ်းသိၼ်လႄႈမေႃယႃၶဝ် ၵႃႈၶၼ်ယွမ်းလူင်းလိူဝ်သေ မိူဝ်ႈပၢၼ်ၶိူင်ႈၸၢၵ်ႈၼၼ်ႉ ပဵၼ်ပုၼ်ႈပဵၼ်ပုၼ်ႈ။

• ၼႂ်းပၢၼ်ၶိူင်ႈၸၢၵ်ႈၼၼ်ႉ မိူဝ်ႈႁဝ်းမီးပၼ်ႁႃၵၢၼ်ငိုၼ်းတွင်းၼၼ်ႉ ႁဝ်းၸၢင်ႈပိုင်ႈဢိင်ပိုင်ႈၽူၺ်း လူင်ပွင်ၸိုင်ႈလႆႈယူႇ။

• ၼႂ်းပၢၼ် ဢၢႆႊထီႊၼႆႉ ႁဝ်းလႆႈငိၼ်းသဵင်ပွင်ႉၶၢင်းသဵင်ပၼ်ၵမ်းမၼ်ႈတမ်ႈတီႈ ၽူႈႁဵတ်းၵၢၼ်မိူင်း ၶဝ်ဝႃႈ တေၶတ်းၸႂ်ႁဵတ်းႁႂ်ႈဝၢၼ်ႈမိူင်းၵတ်းယဵၼ်သိူဝ်းသႃႇလႄႈ လွတ်ႈၽေးၶဵၼ်။ ႁဝ်းၶႃႈပေႃးတၼ်း လၢမ်းႁူႉလႆႈယဝ်ႉဝႃႈ လွင်ႈဢၼ်ၽူႈႁဵၼ်းၵၢၼ်မိူင်းၶဝ် တိုၵ်ႉတေပၼ်ၶေႃႈမၼ်ႈၵႅၼ်ႇသေ ႁဵတ်းသၢင်ႈၼၼ်ႉ မၼ်းသမ်ႉပေႃးတၼ်းသဵင်ႈလူႉႁၢႆလၢႆပႅတ်ႈ ယဝ်ႉၼႆႉ။ ႁဝ်းသမ်းပေႃးႁူႉယဝ်ႉဝႃႈ ၵႂၢမ်းမၼ်ႈၶဝ်ၼၼ်ႉဢမ်ႇပဵၼ်ၼမ်ႉပဵၼ်တူဝ် ဢဝ်ႁူဝ်ႁဵတ်းႁၢင် ဢဝ်ၵူၼ်းမိူင်းႁဵတ်းၵၢင်လႆၢလၢႆၵူၺ်း။


မိူဝ်ႈမီးလွင်ႈလႅၵ်ႈ လၢႆႈၽုတ်းပေႃႇမႃးၼင်ႇၼႆၼႆႉ ၸွမ်းၼင်ႇၾိင်ႈယၢမ်ႈၵူၼ်းႁဝ်းမီးၼၼ်ႉ လွင်ႈသေႃႉႁၼ်လွင်ႈၽွၼ်းလီမၼ်းသေဝၵ်ႉတၢဝ်းဢဝ်ႁႂ်ႈလႆႈၼၼ်ႉၵေႃႈမီးတင်းၼမ်ယူႇၼင်ႇၵဝ်ႇ။ မိူဝ်ႈပီပူၼ်ႉမႃးၸိူဝ်းၼၼ်ႉၵူၺ်း ႁဝ်းလႆႈႁၼ်ၵူၼ်းႁဝ်းဢွၼ်ၵၼ်တူင်ႉတိုၼ်ႇ ယၵ်ႉႁၼ်ၽွၼ်းပၢင်ႈၼႂ်းၵၢၼ်လႅၵ်ႈၼၼ်ႉယူႇ။


1. ၸၢႆးပိဝ်းၵဵၵ်ႉပဵၼ်မႃးၽူႈမၢၵ်ႈမီးသေပိူၼ်ႈၼႂ်းလူၵ်ႈၼႆႉ ယွၼ်ႉပိူဝ်ႈဝႃႈၽူႈမၢၵ်ႈမီးၼႂ်းပၢၼ်ၶိူင်ႈၸၢၵ်ႈၶဝ် လိုမ်းႁၼ်လွင်ႈလႅၵ်ႈလႆၢႈလူင်ၼၼ်ႉ။ ၵွပ်ႈပိူဝ်ႈၽူႈမၢၵ်ႈမိူဝ်ႈၵွၼ်ႇၶဝ်လိုမ်းၵွၵ်း ၶၢမ်ႈၸွမ်းလွၵ်းလႅၵ်ႈလႆၢႈလူင်ၼၼ်ႉလႄႈ ႁဵတ်းႁႂ်ႈၶဝ်လႆႈသုမ်းယႂ်ႇသုမ်းၵွင်။


2. ၼႂ်းဝၼ်းမိူဝ်ႈၼႆႉႁဝ်းလႆႈႁၼ်ၽူႈႁူင်းၵၢၼ်ၶဝ်တေႇႁဵတ်းၵၢၼ်ၼႂ်းၸူဝ်ႈပၢၼ်သၢဝ်းပႆၢ။ ႁူမ်ႈႁွမ်းၵၼ်တၢင်းၽူႈမၢၵ်ႈမီးၼႂ်းၸူဝ်ႈပၢၼ်ၶိူင်ႈၸၢၵ်ႈၶဝ်ၸိူဝ်းတိုၵ်ႉမီးၼႂ်းၸူဝ်ႈပၢၼ်သီႇသိပ်းပႆၢ။


3. ၼႂ်းပၢၼ်မိူဝ်ႈလဵဝ်ၽူႈၸူဝ်ႈပၢၼ်ၼုမ်ႇသၢဝ်းပႆၢၶဝ်ၵေႃႈ ပဵၼ်ၽူႈမၢၵ်ႈလူင်မႃး။ ယွၼ်ႉပိူဝ်ႈဝႃႈၶဝ်ႁႃႁၼ်သုၼ်ႇ ဢၼ်ၽူႈဢႃႇယူႉယႂ်ႇၶဝ်ဢမ်ႇႁၼ်ၼၼ်ႉယဝ်ႉ။


4. ၼႂ်းဝၼ်းမိူဝ်ႈၼႆႉ ႁဝ်းလႆႈႁၼ်ၽူႈမၢၵ်ႈမီး ဢၼ်ၸူဝ်ႇၶူပ်ႇသၢဝ်းပႆၢၶဝ်ပူၵ်းပွင်ၶိုၼ်ႈယႂ်ႇမၢၵ်ႈမီးမႃးႁင်းၵူၺ်းတူဝ်ႇၵဝ်ႇ။ ၼႂ်းယၢမ်းလဵဝ်ၵၼ်ၼၼ်ႉၵူၺ်းၼင်ႇၵဝ်ႇ ၽူႈမိူဝ်ႈပၢၼ်ၶိူင်ႈၸၢၵ်ႈၶဝ်ၵေႃႈၼႅတ်ႈႁႃၾိုၵ်းၽွၼ်ႉသွၼ်ဢဝ်ၼင်ႇႁိုဝ်တေဢမ်ႇတူၵ်းလိုၼ်းလုၵ်ႈဢွၼ်ႇၶဝ်။
5. လုၵ်ႈဢွၼ်ႇႁဵၼ်းၶဝ်ဢမ်ႇမုင်ႈမွင်းတူၺ်းႁူင်းၵၢၼ်လူင်ၸိူဝ်းၼၼ်ႉယဝ်ႉသေ ၶတ်းၸႂ်ပူၵ်းတင်ႈႁူင်းၵၢၼ်ဢွၼ်ႇႁင်းၵူၺ်းၶဝ်ၼႂ်းႁွင်ႈႁူင်းသဝ်းၶဝ်ႁင်းၵူၺ်း။ မိူၼ်ၸိူင်ႉၼင်ႇၸၼ်ႉၸွမ်ႁႃးဝိူတ်ႉပဵၼ်လုမ်းဢၼ်ၵိူတ်ႇဢွၵ်ႇမႃးပဵၼ်ၶိူင်ႈလႅၵ်ႈလႆၢႈလူင်တၢင်းၼမ်။


6. ႁူင်းႁဵၼ်းဢမ်ႇၼၼ်လုၵ်ႈဢွၼ်ႇ ဢၼ်လႆႈထုၵ်ႇၾိုၵ်းသွၼ်ပၼ်တီႈႁိူၼ်းၼၼ်ႉ ပဵၼ်မႃးၽူႈထႅၼ်ႈလိူဝ်သေလုၵ်ႈႁဵၼ်း ဢၼ်ထုၵ်ႇၾိုၵ်းသွၼ်ပၼ်တီႈႁွင်ႈႁဵၼ်းၼၼ်ႉ။


7. ပေႃႈမႄႈလုၵ်ႈဢွၼ်ႇၶဝ်ၵေႃႈၶတ်းၸႂ်သွၵ်ႇႁႃႁူင်းႁဵၼ်း ဢၼ်လီလီဢၼ်တေၾိုၵ်းသွၼ်ပၼ်ႇလုၵ်ႈဢွၼ်ႇၶဝ် ႁႂ်ႈပေႃးပဵၼ်ၽူႈလူင်ႉလႅၼ်ႇၼႂ်းၵၢၼ်မၢၵ်ႈမီး။ လိူဝ်ၼၼ်ႉ ပေႃႈမႄႈလုၵ်ႈဢွၼ်ႇၶဝ်ဢွၼ်ၵၼ်ပွင်ႇၸႂ်ႁူႉဝႃႈ ၵၢၼ်ႁဵၼ်းမိူဝ်ႈၸဝ်ႉၼႆႉ လမ်ႇလွင်ႈယႂ်ႇတႃႇၸူဝ်ႈပၢၼ်လုၵ်ႈၶဝ်လိူဝ်သေၸၼ်ႉၸွမ်ၶေႃးလဵၵ်ႉၶဝ်ၸိူဝ်းၼႆႉ။


8. ပေႃးမႃးလၢတ်ႈလၢတ်ႈသိုဝ်ႈသိုဝ်ႈၵေႃႈ ၼႂ်းၸူဝ်ႈပၢၼ်ဢၢႆႊထီႊၼႆႉ တေဢွၼ်ဢဝ်လွင်ႈလႅၵ်ႈလႆၢႈလူင်ပႆၢးမၢၵ်ႈမီးၼၼ်ႉ မႃးပၼ်ႁဝ်းသေ လွင်ႈပႅၵ်ႇပိူင်ႈၼႂ်းၵႄႈၵၢင်ၽူႈမီးလႄႈၽူႈဢမ်ႇမီးၼၼ်ႉ တေပိူင်ႈႁၢင်ႇၵၼ်ၵႆသေၵႆၵႂႃႇယူႇယဝ်ႉ။ တွၼ်ႈတႃႇၵူၼ်းတၢင်ႇၵေႃႉၸိုင် လွင်ႈလႅၵ်ႈလႆၢႈၼႆႉ ပဵၼ်သုၼ်ႇလၢပ်ႈလူင်ဢၼ်ၼိုင်ႈ။ တႃႇၵူၼ်းမၢင်ၵေႃႉသမ်ႉ လွင်ႈလႅၵ်ႈလႆၢႈၼႆႉပဵၼ်ငရႆၢးလူင်တႃႇၶဝ်ယဝ်ႉ။ တႃႇမၢင်ၵေႃႉတႄႉဢမ်ႇတိူဝ်ႉၼိူဝ်ႉတိူဝ်ႉၼင်သင်ၶဝ်။


ပၢႆးပၺ်ၺႃၼႆႉလမ်ႇလွင်ႈသေမိူဝ်ႈၵူႈပွၵ်ႈၵူႈၽဝ်ႇ


ပၢႆးပၺ်ၺႃၼႆႉ တိူဝ်းလမ်ႇလွင်ႈသေမိူဝ်ႈၵူႈပွၵ်ႈၵူႈၽဝ်ႇ ၵွပ်ႈပိူဝ်ႈလွင်ႈလႅၵ်ႈလႆၢႈလူင်ၼႆႉ ၽႂ်းလိူဝ်သေဢၼ်ႁဝ်းယၢမ်ႈႁၼ်မႃးၸိူဝ်းၼၼ်ႉႁိုဝ် ဢၼ်ႁဝ်းဝူၼ်ႉဝႆႉၼၼ်ႉလႆၢလႆၢပုၼ်ႈ။ ၼႂ်းႁူဝ်ႁႅၵ်ႈၼႃႈပိုၼ်းမႂ်ႇၼၼ်ႉ ၽူႈဢၼ်လႆႈမၢတ်ႈလီၼႂ်းႁူင်းႁဵၼ်းႁိုဝ် ၽူႈဢၼ်ယဝ်ႉၵၢၼ်ႁဵၼ်းၼၼ်ႉလႆႈထူပ်းတၢင်းယၢပ်ႇၽိုတ်ႇ ၵဵဝ်ႇလူၺ်ႈငိုၼ်းတွင်းမိူၼ်ၵၼ်တင်းၽူႈဢမ်ႇလႆႈမၢတ်ႈလီၶဝ်ၵူၺ်းၼင်ႇၵဝ်ႇ။ ယွၼ်ႉၼၼ် ၸိူဝ်းႁဝ်းလူဝ်ႇလႆႈဢွၼ်ၵၼ်ပၵ်းၸႂ်ၼိူဝ်ၵၢၼ်ႁဵၼ်းလိူဝ်ၵဝ်ႇ၊ လူဝ်ႇလႆႈဢွၼ်ၵၼ်တိူဝ်းပၼ်ႁႅင်းၼိူဝ်ၵၢၼ်ပၢႆးပၺ်ၺႃ လိူဝ်ႁဵင်ပုၼ်ႈလႆၢပုၼ်ႈ။ တႆးႁဝ်းယိုင်ႈၶႅၼ်းလီတိုင်ႈၶိုၼ်ႈႁႅင်းၽႂ်းလိူဝ်ၵဝ်ႇ။ ယဝ်ႉပေႃႈမႄႈလုၵ်ႈဢွၼ်ႇထုၵ်ႇလီဝူၼ်ႉသွၼ်ၶေႃႈထၢမ်တေႃႇတူဝ်ၵဝ်ႇႁိုဝ် ၼိူဝ်ၸူဝ်ႈပၢၼ်လုၵ်ႈဢွၼ်ႇၸဝ်ႈၵဝ်ႇမိူဝ်းၼႃႈၶၢဝ်းၵႆၼၼ်ႉ ၼင်ႇႁိုဝ်တေဢမ်ႇမီးပၼ်ႁႃၼႂ်းၵၢၼ်ငိုၼ်း၊ ၵၢၼ်ပၢႆးပၺ်ၺႃ ၸဵမ်ၵၢၼ်ၵူႈလွင်ႈလွင်ႈ။


• ၸွင်ႇပၢႆးပၺ်ၺႃ ဢၼ်လုၵ်ႈဢွၼ်ႇၶဝ်လႆႈႁပ်ႉႁဵၼ်းသွၼ်ယူႇမိူဝ်ႈလဵဝ်ၼႆႉ ၵုမ်ႇထူၼ်ႈတႃႇၶဝ်တႃႇတေႃႇသူႈၸူဝ်ႈပၢၼ်မိူဝ်းၼႃႈၶဝ်?

• ၸွင်ႇပိူင်ႁူင်းႁဵၼ်းၼၼ်ႉၵိုင်ႇငၢမ်ႇတင်းလွင်ႈလူဝ်ႇလုၵ်ႈဢွၼ်ႇၸဝ်ႈၵဝ်ႇ?

• သင်လုၵ်ႈဢွၼ်ႇၶဝ်ဢမ်ႇလႆႈၸႂ်ႁူင်းႁဵၼ်း ဢမ်ႇၼၼ်ဢမ်ႇလႆႈမၢတ်ႈလီၼႂ်းႁွင်ႈႁဵၼ်းၸိုင် ပေႃႈမႄႈလုၵ်ႈႁဵၼ်းၵိုင်ႇလီႁဵတ်းၸိူင်ႉႁိုဝ်?

• ၸွင်ႇလွင်ႈလႆႈမၢတ်ႈလီၼႂ်းႁွင်ႈႁဵၼ်းၼၼ်ႉ ယိုၼ်ႈယၼ်လွင်ႈၵၢၼ်ႁဵၼ်းၸူဝ်ႈပၢၼ်လႄႈလွင်ႈၵၢၼ်ငိုၼ်းတွင်းၸူဝ်ႈပၢၼ်လုၵ်ႈဢွၼ်ႇႁိုဝ်?

• ၸွင်ႇလုၵ်ႈဢွၼ်ႇၸဝ်ႈၵဝ်ႇလူဝ်ႇလႆႈႁႃၶိုၼ်ႈႁူင်းႁဵၼ်း၊ ပၢင်သွၼ်ဢၼ်တေထႅမ်ပၼ် ၼင်ႇၵၢင်ၸႂ်ၶဝ်ၼၼ်ႉတဵမ်ထူၼ်ႈႁိုဝ်?

ၶွတ်ႇယွတ်ႈၶေႃႈၵႂၢမ်း


ၼႂ်းလႆၢးလႂ်ၵေႃႈယႃႇဢမ်ႇဝႃႈတေပဵၼ်ယွၼ်ႉလူၵ်ႈၼႆႉလႅၵ်ႈလၢႆႈ ၽႂ်းႁိုဝ်ထိူင်း။ ပေႃႈမႄႈလုၵ်ႈဢွၼ်ႇတႆးလႄႈၵူၼ်းၼုမ်ႇတႆးႁဝ်းတႄႉ တိုၼ်းတေလႆႈၽိူမ်ႉထႅမ်ထႅင်ႈၵၢၼ်ပၢႆးပၺ်ၺႃဢမ်ႇၼၼ်ၵၢၼ်ပႆၢးမၢၵ်ႈမီးထႅင်ႈတႃႇတင်းၼမ်တင်းလႆၢ။


လွင်ႈယုမ်ႇယမ်ဢၼ်ၼိုင်ႈ ဢၼ်ၵႆႉဢွၼ်ၵၼ်လၢတ်ႈၸႃပၼ်ၾၢင်ႉၵၼ်ယူႇၼၼ်ႉတႄႉ ၼႂ်းပၢၼ်ဢၢႆႊထီႊၼႆႉပေႃႈမႄႈၼၼ်ႉယဝ်ႉ ပဵၼ်ၶူးမေႃသွၼ်လူင်တႃႇၸူဝ်ႈပၢၼ်လုၵ်ႈလၢၼ်ဢွၼ်ႇၶဝ်။ ပဵၼ်ၶူးမေႃသွၼ်လမ်ႇလွင်ႈတႃႇလုၵ်ႈလၢၼ်ဢွၼ်ႇၶဝ်သေ ၶူးမေႃသွၼ်ၼႂ်းႁွင်ႈႁဵၼ်းၼၼ်ႉ။ ပၢႆးပၺ်ၺႃၼႆႉတႄႉႁူႉမၼ်းတိုၼ်းလွင်ႈယႂ်ႇတႃႇၵူႈၸၢဝ်းၵူႈပၢၼ်ယဝ်ႉ။ ပၼ်ႁႃလူင်မၼ်းတႄႉၵေႃႈ ၽူႈဢၼ်လၢတ်ႈဝႃႈပၢႆးပၺ်ၺႃၼႆႉ လွင်ႈယႂ်ႇၼႆၼၼ်ႉ ဢမ်ႇတွၼ်ႉႁပ်ႉဢဝ်ပုၼ်ႈၽွၼ်းၶေႃႈၵႂၢမ်းဢၼ်ၶဝ်လၢတ်ႈၼၼ်ႉ။ ၵႆႉပဵၼ်ၵူၼ်းဢၼ်ၶၢၼ်ႉဢိူၼ်ၼိူဝ်ၵၢၼ်ႁဵၼ်းသွၼ်ထႅင်ႈ။ ပဵၼ်းၵူၼ်းဢၼ်ဢမ်ႇတူင်ႉၼိုင်ၵၢၼ်ပၢႆးပၺ်ၺႃသင်ၼၼ်ႉယဝ်ႉ။ ၵွပ်ႈၼၼ် ၸင်ႇဝႃႈလုၵ်ႈဢွၼ်ႇၶဝ်ၼႆႉ ၶဝ်ႈလဵပ်ႈႁဵၼ်းၼိူဝ်လွင်ႈႁဵတ်းသၢင်ႈၼၼ်ႉၼမ်လိူဝ်သေ ၵၢၼ်ထွမ်ႇငိၼ်းၼၼ်ႉယဝ်ႉ။ လုၵ်ႈဢွၼ်ႇၶဝ်ၼႆႉ လႆႈၸႂ်ယိူင်ႈၵိူဝ်ႉဢဝ်လွင်ႈဢၼ်ပေႃႈမႄႈၶဝ်လၢတ်ႈမဵဝ်းၼိုင်ႈသမ်ႉႁဵတ်းထႅင်ႈမဵဝ်းၼိုင်ႈၼၼ်ႉယဝ်ႉ။


ႁဵတ်းၼၼ်သေလႄႈလွင်ႈႁဵတ်းသၢင်ႈႁဝ်းၼၼ်ႉ လၢတ်ႈၵႂၢမ်းႁိုဝ်တိူဝ်းတိူဝ်ႉယမ်လိူဝ်သေၶေႃႈၵႂၢမ်းဢၼ်ႁဝ်းလၢတ်ႈသင်ႇသွၼ်ၶဝ်ယူႇဝၼ်းဝၼ်းၶိုၼ်းၶိုၼ်းၼၼ်ႉမႃးယဝ်ႉ။ သိုပ်ႇသေၼၼ်ႉ သင်ဝႃႈၸဝ်ႈၵဝ်ႇၶႂ်ႈပဵၼ်ပေႃႈမႄႈလီၵေႃႉၼိုင်ႈၸိုင် ၸဝ်ႈၵဝ်ႇလူဝ်ႇလႆႈပႆၶၢမ်ႈပႅတ်ႈၵၢၼ်လၢတ်ႈၼၼ်ႉ ႁႂ်ႈႁၢင်ႇၵႆလိူဝ်ၵဝ်ႇသေ ယၢင်ႈၸူးၵၢၼ်တူင်ႉၼိုင်ႁဵတ်းသၢင်ႈၼၼ်ႉၼမ်ၼမ်လူးၵွၼ်ႇ။


သင်ၸိူဝ်ႉဝႃႈသူၶဝ်မီးလုၵ်ႈမီးလၢင်းၼႆၸိုင် ဝူၼ်ႉဝႃႈသူၶဝ်တိုၼ်းတေသူၼ်ၸႂ်ၼိူဝ်ၵၢၼ်ပႆၢး ပၺ်ၺႃလုၵ်ႈလၢင်းသူၼၼ်ႉလႄႈၶႂ်ႈႁူႉႁၼ်လွၵ်းလႆၢး ဢၼ်တေၸၢင်ႈႁႂ်ႈလုၵ်ႈလၢင်းၸဝ်ႈၵဝ်ႇၶိုၼ်ႈယႂ်ႇၼၼ်ႉယူႇ။ သင်ဝႃႈၼၼ်ၵေႃႈ ထုၵ်ႇလီဢွၼ်ၵၼ်သေႃႉသွၵ်ႈႁဵၼ်းႁႃဢဝ်ၼင်ႇၵၢင်ၸႂ်မီးၼၼ်ႉယူႇ။ဢမ်ႇၵိုင်ႇလီပွႆႇဢိုၵ်ႉၼိုၵ်ႉၶမ်ဝႆႉၼႂ်းဢူၵ်းၸႂ်ဝႆႉ ႁဵတ်းပဵၼ်လွင်ႈၼႅင်ၸႂ်ယူႇႁဵတ်းသင်လႃႇ။


ၸၢႆးဢွင်ႇၶမ်း (ၽၵ်းၽဵတ်း)
4/3/2017