ၸဝ်ႈၶုၼ်ထုၼ်းဢူး ႁူဝ်ပဝ်ႈလူင် ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး(ႁိုဝ်) ပႃႇတီႇႁူဝ်သိူဝ် (SNLD) တေလူင်းပိုၼ်ႉတီႈပၼ်ႁႅင်း ၸုမ်းပွင်ၵၢၼ်၊ လုၵ်ႈၸုမ်းလႄႈ ပီႈၼွင်ႉၵူၼ်းမိူင်းတႆး ၼႂ်း ၸႄႈဝဵင်းၵဵင်းတုင် ဝႃႈၼႆ။

ဝၼ်းတီႈ 27/03/2017 ယၢမ်းဝၢႆးဝၼ်း 13:30 မူင်း ၸဝ်ႈၶုၼ်ထုၼ်းဢူး တေသူႇၸႂ်းပၼ်ႁႅင်း ၵူၼ်းမိူင်းဝဵင်းၵဵင်းတုင် တႃႇပၢင်လိူၵ်ႈတင်ႈသွမ်ႈ ဢၼ်တေထိုင်မႃး ၼႂ်းဝၼ်းတီႈ 01/04/2017 ၼႆႉ။ ပၢင်ႁူပ်ႉထူပ်းသူႇၸႂ်းပၼ်ႁႅင်းၼႆႉ ၸတ်းႁဵတ်းတီႈ ႁူင်းႁေႃ သမူဝ်းသွၼ်တႆးလိုဝ်ႉ ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ဝႃႈၼႆ။


လုင်းၸၢႆးထုၼ်း ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းၵဵင်းတုင် လၢတ်ႈဝႃႈ “ ၸႂ်ႈယဝ်ႉၶႃႈ၊ ႁူဝ်ပဝ်ႈလူင် ႁဝ်း တေ မႃး ၼႂ်းဝၼ်းတီႈ 27 တေထိုင်ၼႆႉ၊ တေႃႈလဵဝ် ယူႇတီႈၸုမ်းပွင်ၵၢၼ်၊ လုၵ်ႈၸုမ်း တိုၵ်ႉ ဢွၼ် ၵၼ် ႁၢင်ႈႁႅၼ်းယူႇ။ ႁဝ်းၶႃႈ ယိူင်းဢၢၼ်း တႃႇပေႃႈမႄႈပီႈၼွင်ႉႁဝ်းတေမႃးၶဝ်ႈႁူမ်ႈ တင်းၼမ် တင်း လၢႆ၊ လိူဝ်ၼၼ်ႉ တၢင်ႇၸႄႈဝဵင်းတၢင်းပွတ်းဢွၵ်ႇၶူင်းၵေႃႈ ၸိူဝ်းပဵၼ်လုၵ်ႈၸုမ်း ပႃႇတီႇလႄႈ သင် ၵူၼ်းမိူင်းလႄႈသင် ယူႇတီႈႁဝ်းၶႃႈၵေႃႈ လႆႈမွၵ်ႇပႃးယူႇ” ဝႃႈၼႆ။


ၶပ်ႉမၢႆ ၼ်ႂ်းဝၼ်းတီႈ 27 ပၢင်ႁူပ်ႉထူပ်းၵူၼ်းမိူင်းၸႄႈဝဵင်းၵဵင်းတုင်ၼႆႉ ၶၢဝ်းယၢမ်း 10:30 မူင်း ပႂ်ႉႁပ်ႉ ၸဝ်ႈၶုၼ်ထုၼ်းဢူး တီႈၶူင်ႇႁိူဝ်းမိၼ် ၸႄႈဝဵင်းၵဵင်းတုင်။ ၶၢဝ်းယၢမ်း 13:30 မူင်းသမ်ႉ ႁူပ်ႉထူပ်း ၵူၼ်းမိူင်း တီႈႁူင်းႁေႃတႆးလိုဝ်ႉ။ ပေႃးထိုင်မႃး ဝၼ်းတီႈ 30/03/017 ယၢမ်း 12:00 မူင်းသမ်ႉ ယူႇတီႈပႃႇတီႇႁူဝ်သိူဝ် ၸႄႈဝဵင်းၵဵင်းတုင် တေၼႄဢဵၼ်ႁႅင်းလဵပ်ႈဝဵင်းၽွမ်ႉၵၼ် ၼင်ႇႁိုဝ် တေဢွင်ႇပေႉ ပၢင်လိူၵ်ႈတင်ႈ ဝႃႈၼႆ။


ၼေႃႇၽူႈတႅၼ်းပႃႇတီႇႁူဝ်သိူဝ် ၸႄႈဝဵင်းၵဵင်းတုင် ဢၼ်ၶဝ်ႈၶႅင်ႇသမ်ႉ ပဵၼ်လုင်းၸၢႆးလူင် ဝႃႈ ၼႆ။


ပႃႇတီႇၵၢၼ်မိူင်း ၼႂ်းၸႄႈဝဵင်းၵဵင်းတုင် ဢၼ်တေၶဝ်ႈၶႅင်ႇၵၼ် တင်းမူတ်းမီး 6 ပႃႇတီႇ ပႃႇတီႇႁူဝ် သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇဢႃးၶႃႇ၊ ပႃႇတီႇလႃးႁူႇ၊ ပႃႇတီႇၼူၵ်ႉယုင်းလႄႈ ပႃႇတီႇသၢင်ႇသီႈ ၸဵမ်ၸိူဝ်းၼႆႉ ဝႃႈၼႆ။


ပၢင်လိူၵ်ႈတင်ႈသွမ်ႈ ၼႂ်းဝၼ်းတီႈ 01/04/2017 ၼႆႉ ႁူင်းတွတ်ႈၶႅပ်းၵၢင်ၸႂ်ၼႂ်းၸႄႈဝဵင်းၵဵင်းတုင် တင်းမူတ်းမီး 57 ႁူင်း။ လိူဝ်ၼၼ်ႉ ပွၵ်ႉ/ ဢိူင်ႇဢၼ်မီးသုၼ်ႇတွတ်ႈၶႅပ်းၵၢင်ၸႂ် တႃႇၶဵတ်ႇလိူၵ်ႈ တင်ႈမၢႆ(2) သမ်ႉ မိူၼ်ၼင်ႇ ဢိူင်ႇယၢင်းလေႃး၊ ဢိူင်ႇလွႆလူင်၊ ဢိူင်ႇၵၢတ်ႇထၢႆႈ၊ ဢိူင်ႇဝတ်ႉသၢဝ်း၊ ဢိူင်ႇပဵင်းတၢဝ်ႉ၊ ဢိူင်ႇပၢင်မတ်း၊ ဢိူင်ႇမိူင်းပၼ်ႇမိူင်းသဵမ်၊ ဢိူင်ႇမိူင်းဢိၼ်း၊ ဢိူင်ႇမိူင်းပၵ်ႉ၊ ဢိူင်ႇမိူင်း ၶွၼ်၊ ဢိူင်ႇမူးၸႄႈ၊ ဢိူင်ႇၼွင်တဝ်း၊ ဢိူင်ႇၼမ်ႉၶၢၵ်ႉ၊ ဢိူင်ႇပၢင်ၵဵဝ် တင်းမူတ်း မီး 14 ဢိူင်ႇ။ ပွၵ်ႉၼႂ်းဝဵင်းသမ်ႉ မီးတီႈ ပွၵ်ႉ 1 တင်း ပွၵ်ႉ 5 ဝႃႈၼႆ။