ပူႇႁဵင် (ဢုၵ်ႉၵထ) ဝၢၼ်ႈၵုင်းပဝ်း ဢိူင်ႇၼမ်ႉမႃႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ၊ ထုၵ်ႇၵူၼ်းဢမ်ႇႁူႉၸၵ်း ၸုမ်းယိုဝ်း တီႈႁိမ်းတိၼ်သူၼ်ႁႆႈမၼ်း ဢၼ်ဢမ်ႇပေႃးၵႆမေႃႇထၢၼ်ႇၼႃးၵုၼ်၊ မၢၵ်ႇၵွင်ႈတိူဝ်ႉၸွမ်းတူဝ်တီႈယမ် လူႉတၢႆထင်တီႈ။

မိူဝ်ႈဝၼ်းတီႈ 26/02/2017 (လိူၼ်သီႇမႂ်ႇၼိုင်ႈၶမ်ႈ) ၶၢဝ်းယၢမ်းမွၵ်ႈ 4 မူင်းႁူဝ်ၶမ်ႈ၊ ပူႇႁဵင်လုင်းၸၢင်းၸၢမ်ႇၽေႇ ဝၢၼ်ႈၵုင်းပဝ်း ဢိူင်ႇၼမ်ႉမႃႉ ၸႄႈဝဵင်းသီႇပေႃႉ ထုၵ်ႇယိုဝ်းတၢႆထင်တီႈ တီႈႁိမ်းတိၼ်သူၼ်မၼ်း ဢၼ်မီးႁိမ်းၸမ် မေႃႇထၢၼ်ႇၼႃးၵုၼ်။ မၢၵ်ႇၵွင်ႈတိူဝ်ႉၺႃးတီႈၼႃႈၽၢၵ်ႇ၊ ၸွမ်းပဵမ်ႉ၊ တီႈႁူဝ်ၸႂ်၊ ၸွမ်းၶႅၼ်ၾၢႆႇသၢႆႉၸိူဝ်းၼႆႉ။ ပီႈၼွင်ႉၸိူဝ်ႉၶိူဝ်းတၢင်းႁိူၼ်း ၵူၼ်းဝၢၼ်ႈၵူၼ်းသူၼ် လႆႈဢဝ်ပူၼ်ႉၶၢပ်ႈတူဝ်ၵႂႃႇမိူဝ်ႈဝၼ်းတီႈ 27 တီႈႁိမ်းၾၢႆႇတူၵ်း ႁႆႈမၼ်းၼၼ်ႉ-ၼႆယဝ်ႉ။


လုင်းသၢင်ႇၽေႇၼႆႉ ဢွၼ်ၼႃႈၼၼ်ႉ မိူဝ်ႈဝၼ်းလိူၼ်သၢမ်လပ်း (ဝၼ်းတီႈ 25/02/2017)ၼၼ်ႉ မၼ်းတင်း ဢူၺ်းၵေႃႉ ၶီႇလူတ်ႉၵႃးဢွၵ်ႇၶၢဝ်းတၢင်းၵႂႃႇၼႃႈၵၢၼ်သေ ၸွမ်းတၢင်းလႆႈမႃးၵိုတ်းဝႄႉတီႈၶူဝ်ၼၢင်းၾႃႉ ဢၼ်မီးသိုၵ်းမၢၼ်ႈတူင်ႉၼိုင်ယူႇသဝ်းပၵ်းပႂ်ႉဝႆႉ၊ ဝၢႆးၼၼ်ႉၵေႃႈ သိုပ်ႇပွၵ်ႈၶိုၼ်းတီႈဝၢၼ်ႈၵုင်းပဝ်း။ ထိုင်မႃးဝၼ်းတီႈ 26 မၼ်းလုၵ်ႉတီႈဝၢၼ်ႈၵုင်းပဝ်းသေ ၵႂႃႇတီႈသူၼ်ႁႆႈမၼ်းတီႈၼႃးၵုၼ်၊ ဢဝ်ၵႃးမၼ်းၵိုတ်းဝႆႉတီႈတိၼ်ႁႆႈမၼ်း ၸွမ်းတၢင်းၵႃးသေ ၵႂႃႇတီႇႁႆႈမၼ်း။ တီႈႁႆႈမၼ်းၼႆႉ ဢမ်ႇၵႆမေႃႇထၢၼ်ႇၼႃးၵုၼ်၊ မုင်ႈႁၼ်ၵၼ်ယူႇ။ ဝၢႆးဝၼ်းၼၼ်ႉ ထိုင်မႃးၶၢဝ်းယၢမ်းမွၵ်ႈ 4 ႁူဝ်ၶမ်ႈၵေႃႈ မၼ်းၼွၼ်းတၢႆယူႇတီႈႁိမ်းၵႃးမၼ်း- ၼႆယဝ်ႉ။


"လုင်းၸၢင်းၸၢမ်ႇၽေႇၼႆႉ ၼင်ႇႁိုဝ်ၵူၼ်းဝၢၼ်ႈၵူၼ်းမိူင်း တေလႆႈယူႇလူမ်ၸႂ်ၼၼ်ႉ ဢမ်ႇဝႃႈၾၢႆႇသိုၵ်းမၢၼ်ႈ သိုၵ်းတႆး ၶတ်းၸႂ်ႈတိတ်းတေႃႇၶဝ်ႈဢွၵ်ႇ ႁႂ်ႈလီၸွမ်းၵူႈၾၢႆႇၵူႈတၢင်း၊ မၼ်းဢမ်ႇတွၼ်ႉမီးလွင်ႈထဵင်မေႃး ၽိတ်းၽႅၵ်ႇၽႂ် ၸုမ်းလႂ်ယႂ်ႇလူင်လၢင်။ ၵူၼ်းဢၼ်ယိုဝ်းၼႆႉ မၼ်းတိုၼ်းတေပဵၼ်ၸုမ်းယိပ်းၵွင်ႈၵၢ င်ႇ၊ ပဵၼ်ၵူၼ်းၶႅၼ်ႇၵၢၼ်ၵွင်ႈၵၢင်ႇ ၵွပ်ႈဝႃႈလိူၵ်ႈယိုဝ်းတီႈၵွၵ်းႁူဝ်၊ တီႈႁူဝ်ၸႂ်၊ တီႈပုမ်ၸိူဝ်းၼႆႉ မၼ်းယိုဝ်းတီႈယမ် တီႈၸၢင်ႈတၢႆမၼ်းလၢႆလၢႆ။ ၵူၼ်းယိုဝ်းၼႆႉ လႅပ်ႈယူႇၸမ်ၸမ်သေယိုဝ်းၵူၺ်း၊ မၢၵ်ႇၵွင်ႈဢမ်ႇတိူဝ်ႉပႃးလူတ်ႉၵႃးမၼ်း" ၸၢႆးၵျေႃႇ ၵူၼ်းသီႇပေႃႉလၢတ်ႈ။


သိုပ်ႇလၢတ်ႈဝႃႈ- လွင်ႈၼႆႉ တုၵ်းယွၼ်းႁႂ်ႈလူင်ပွင်ၸိုင်ႈ ၸွပ်ႇထတ်းပၼ်ဢိတ်းၼိုင်ႈ။ ပေႃးပဵၼ်ၸိူင်ႉၼႆၵႂႃႇ တိၵ်းတိၵ်း ၼႂ်းဝၢၼ်ႈၼႂ်းသူၼ်ၼႆႉ မၼ်းဢမ်ႇမီးလွင်ႈႁူမ်ႇလူမ်ႈယဝ်ႉ- ဝႃႈၼႆ။


လုင်းၸၢႆးၸၢမ်ႇၽေႇ ႁိုဝ် လုင်းၸၢင်းၸၢမ်ႇၽေႇၼႆႉ ဢႃယု 57 ပီ၊ ပဵၼ်ၽူႈၼမ်းၼႂ်းၵူႈလွင်ႈလွင်ႈ ၸုမ်း 4 ၼမ်ႉမႃႉ။ ၵိူတ်ႇမိူဝ်ႈပီၶရိတ်ႉ 1960 ၊ ၸႃတိတီႈၵိူတ်ႇဝၢၼ်ႈၼမ်ႉပူ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ၸိုဝ်ႈပေႃႈ ပူႇမိူင်းယုင်း၊ ၸိုဝ်ႈမႄႈဢွၵ်ႇလွႆမိူင်းၸိင်ႇ။ ၵၢၼ်ႁဵၼ်းထိုင်ၸၼ်ႉ 8 တီႈဝဵင်းလိူဝ်ႇ (မၼ်းတလေး)၊ တႄႇၼႃႈႁိူၼ်းၵိုၵ်း ၼၢင်းသႅင်ဢူး ၼႃးၵုၼ် ၼမ်ႉမႃႉ၊ မီးလုၵ်ႈလၢင်းႁူမ်ႈၵၼ် 7 ၵေႃႉ ယိင်း 5 ၸၢႆး 2 ။


ၼႂ်းပိုၼ်ႉတီႈၵိူတ်ႇလိူင်ႈၼႆႉ မီးတပ်ႉသိုၵ်းမၢၼ်ႈလႄႈ တပ်ႉပီႇတုၸိတ်ႉမၢၼ်ႈပၢင်ႇ ႁူမ်ႈၵၼ်တူင်ႉၼိုင်ယူႇသဝ်း ပၵ်းပႂ်ႉဝႆႉ တီႈၶူဝ်ၼၢင်းၾႃႉ။ ဝၢႆးပၢင်တိုၵ်းၼမ်ႉမႃႉ- ၼႃးတေႃယဝ်ႉၵႂႃႇယဝ်ႉ တပ်ႉသိုၵ်းၸိုင်ႈတႆး ငိူင်ႉထွၼ်ဢွၵ်ႇပိုၼ်ႉတီႈၼႆႉၵႂႃႇ ယၢၼ်ဢမ်ႇယွမ်းမွၵ်ႈ 15-20 လၵ်း- ၸၢႆးၵျေႃႇ ၵူၼ်းသီႇပေႃႉလၢတ်ႈၼႄပႃးၼင်ႇၼႆ။