ပၢင်ၵုမ်လူင်သႅၼ်းၽူႈၼမ်းၸုမ်းယိပ်းၵွင်ႈၵၢင်ႇ ၵမ်းထူၼ်ႈ 3 ဢၼ်ၸတ်းႁဵတ်းတီႈဝဵင်းပၢင်သၢင်းၼၼ်ႉ ႁူဝ်ပဝ်ႈဝႃႉပဝ်းယဵဝ်ႇသျႅင် လၢတ်ႈတိုၵ်းသူၼ်း တီႈပၢင်ၵႅဝ်ႈပိုတ်ႇပၢင်ၵုမ်ဝၼ်းႁႅၵ်ႈဝႃႈ ၵၢၼ်ၵိုတ်းတိုၵ်းတူဝ်ႈမိူင်း NCA ၼႆႉ ဢမ်ႇႁဵတ်းႁႂ်ႈၵိုတ်းပၢင်တိုၵ်းတေႃးၼႂ်းမိူင်းလႆႈ။ ၵွပ်ႈၼၼ် ယူႇတီႈပၢင်ၵုမ်ၼႆႉသေ ထုၵ်ႇလီဝူၼ်ႉသၢင်ၶိုၼ်းၶၵ်ႉၵၢၼ်ငမ်းယဵၼ် ဢၼ်လႆႈႁဵတ်းသၢင်ႈမႃးၸိူဝ်းၼၼ်ႉသေ ႁႃလွၵ်းလၢႆးဢၼ်မႂ်ႇ။

ပၢင်ၵုမ်လူင်သႅၼ်းၽူႈၼမ်း ၸုမ်းယိပ်းၵွင်ႈၵၢင်ႇ ၵမ်းထူၼ်ႈ 3 တီႈဝဵင်းပၢင်သၢင်း Photo: UWSA

ဝၼ်းတီႈ 22/02/2017 ဢၼ်ပဵၼ်ဝၼ်းတႄႇပၢင်ၵုမ်ဝၼ်းႁႅၵ်ႈၼၼ်ႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းႁွင်ႉမွၵ်ႇဝႆႉၶိုၼ်ႈႁွတ်ႈၶဝ်ႈႁူမ်ႈလၢႆမူႇလၢႆၸုမ်း၊ ပဵၼ်ၸုမ်းၸိူဝ်းပႆႇလူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း NCA ၶဝ်ႈႁူမ်ႈ။ ယူႇတီႈၽူႈၼမ်းဝႃႉ ပဝ်းယဵဝ်ႇသျႅင် မွၵ်ႇလၢတ်ႈတိုၵ်းသူၼ်းၵႂႃႇမီး 4 လွင်ႈ- 1.ၼမ်ႉၸႂ်ပၢင်လူင် ဢၼ်ဝႃႈၼၼ်ႉ မၼ်းႁဵတ်းႁႂ်ႈပဵၼ်လွင်ႈဢမ်ႇၸႅင်ႈလႅင်း၊ ၵွပ်ႈၼၼ် တီႈပွင်ႇၵႂၢမ်းမၢႆၼမ်ႉၸႂ်ပၢင်လူင် ဢၼ်ဝႃႈၼၼ်ႉ ပဵၼ်ဢီႈသင်၊ ထုၵ်ႇလီႁူမ်ႈၵၼ်ပိုတ်ႇတီႈပွင်ႇမၼ်း။ 2.ၶေႃႈၵႂၢမ်းၵၢၼ်မိူင်း ၵဵဝ်ႇၵပ်းလွင်ႈ ၻီႊမူဝ်ႊၶရေႊသီႊ၊ သုၼ်ႇလႆႈၽဵင်ႇပဵင်း၊ သုၼ်ႇလႆႈၽွင်းငမ်းတူဝ်ၵဝ်ႇႁင်းၶေႃ၊ ၵၢၼ်ၵေႃႇတင်ႈၸိုင်ႈမိူင်း ႁူမ်ႈတုမ်ၸိူဝ်းၼႆႉ ဢမ်ႇပိုတ်ႇတီႈပွင်ႇမၼ်းၼႅၼ်ႈၼႃလႄႈ လႆႈထုၵ်ႇမၢၼ်ႈၶဝ်ဢဝ်ၸႂ်ႉပဵၼ်ၶိူင်ႈမိုဝ်း။ ၼင်ႇႁိုဝ်တေဢမ်ႇထုၵ်ႇမၢၼ်ႈၶဝ်ဢဝ်ၸႂ်ႉပဵၼ်ၶိူင်ႈမိုဝ်းၼၼ်ႉ ၵိုင်ႇလီပိုတ်ႇတီႈပွင်ႇမၼ်းတႅတ်ႈတေႃး။ 3.လိၵ်ႈၶေႃႈၵိၼ်ၵႅၼ်ႇ NCA ၼႆႉၵေႃႈ ႁဵတ်းႁႂ်ႈၸုမ်းၸၢဝ်းၶိူဝ်းၼင်ႇၵၼ်တႅၵ်ႇၵၼ် ပဵၼ်သၢမ်ၾၢႆႇၵႂႃႇ၊ ဢမ်ႇၵိုတ်းတိုၵ်းၵၼ်လႆႈၵူၺ်းဢမ်ႇၵႃး ႁဵတ်းႁႂ်ႈပဵၼ်ပၢင်တိုၵ်းသိုၵ်းသိူဝ်ၼႂ်းမိူင်းမႃးလႄႈ ၵိုင်ႇလီႁူမ်ႈၵၼ်ႁႃ တၢင်းဢွၵ်ႇၸိူင်ႉႁိုဝ်။ 4.လူင်ပွင်ၸိုင်ႈမၢၼ်ႈၶဝ်ၼႆႉ ပေႃးဝႃႈဢုပ်ႇဢူဝ်းၵၢၼ်မိူင်းၼႆၵေႃႈ ၽႃႇထႅၵ်ႇၸႅၵ်ႇၸၵ်း ၸုမ်းၸၢဝ်းၶိူဝ်းသေ ဢုပ်ႇမႃးတႃႇသေႇ။ ပေႃးဢုပ်ႇဢူဝ်းၵၢၼ်မိူင်း ၼင်ႇႁိုဝ်ပေႃးတေဢမ်ႇပဵၼ်ၸိူင်ႉၼၼ်ၼၼ်ႉ မီးသဵၼ်ႈတၢင်းပၢႆးတိုၵ်း (မႁႃႇပိဝ်ႇႁႃႇ) ၸိူင်ႉႁိုဝ်၊ တေႁဵတ်းႁိုဝ်ႁူမ်ႈၵၼ်တႅပ်းတတ်းၸိူဝ်းၼႆႉ- ၼႆယဝ်ႉ။


ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉဢၼ်ၵႂႃႇၶဝ်ႈႁူမ်ႈပၢင်ၵုမ် ၸဝ်ႈၼိုင်ႈလၢတ်ႈဝႃႈ- ပေႃးတူၺ်းလိၵ်ႈဢၼ်ၸုမ်းဝႃႉ တၢင်ႇမႃး 21 ၼႃႈၼၼ်ႉ ၵၢင်ၸႂ်ဝႃႉမီးၸိူင်ႉႁိုဝ်ၼႆၵေႃႈ တေလႆႈႁၼ်တႅၵ်ႇတႅၵ်ႇလႅင်းလႅင်း။ ၼၢင်းဢွင်ႇသၢၼ်းၸုၵျီႇၼႆႉ ဢၼ်မၼ်းၼၢင်းမႃးဢွၼ်ႁူဝ်ၵၢၼ်မိူင်းဝႆႉယူႇယၢမ်းလဵဝ်ၼႆႉ ဢၼ်မၼ်းၼၢင်း ၶူင်သၢင်ႈမႂ်ႇမႃးႁင်းၵူၺ်းဢမ်ႇမီးသင်၊ ႁဵတ်းၸွမ်းၼင်ႇဢၼ်ဢူးတဵင်းၸဵင်ႇ လူင်ပွင်ၸိုင်ႈသိုၵ်းၶဝ်တမ်းဝၢင်းဝႆႉ ၼၼ်ႉၵူၺ်း။


ၾၢႆႇၼိုင်ႈၵေႃႈ ၽူႈၼမ်းမၢၼ်ႈၼႆႉ ပႃးၸဵမ်ဢွင်ႇသၢၼ်းၸုၵျီႇ၊ လွင်ႈဝႆႉၸႂ်ၼိူဝ်ၸၢဝ်းၶိူဝ်းၼႆႉ ဢမ်ႇပႅၵ်ႇပိူင်ႈသင်မႃး၊ မိူၼ်ၵၼ်မႃးတႃႇသေႇ။ ဢၼ်ၼၢင်းဢွင်ႇသၢၼ်းၸုၵျီႇဢွၼ်ႁဵတ်း ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ဢၼ်ဝႃႈၼႆႉၵေႃႈ တႃႇမွတ်ႇယႃႉပႅတ်ႈၶေႃႈၵိၼ်ၵႅၼ်ႇ လိၵ်ႈႁူမ်ႈမၢႆပၢင်လူင် 1947 ၼၼ်ႉၵူၺ်း၊ ၽူႈၼမ်းဝႃႉ ၶဝ်ႁၼ်ထိုင်ၸိူင်ႉၼႆ- ၽူႈမီးၸၼ်ႉ ၶဝ်ႈႁူမ်ႈပၢင်ၵုမ်လၢတ်ႈ။


ဢၼ်ၸတ်းႁဵတ်းပၢင်ၵုမ်လူင် ဝၼ်းတီႈ 22-24/02/2017 ၶၢဝ်းတၢင်း 3 ဝၼ်းပွၵ်ႈၵမ်းၼႆႉ ၾၢႆႇဝႃႉၶဝ်ၶႂ်ႈႁႃ ၶေႃႈလႆႈၸႂ်ၵၼ် မိူၼ်ၼင်ႇပိုတ်ႇတီႈပွင်ႇၵႂၢမ်းမၢႆၼမ်ႉၸႂ်ပၢင်လူင်၊ တီႈပွင်ႇၵႂၢမ်းမၢႆၵၢၼ်မိူင်း ဢၼ်မၢၼ်ႈၶဝ်ၸႂ်ႉ၊ လွင်ႈ NCA ဢမ်ႇပဵၼ်ၵၢၼ်ၸိူဝ်းၼႆႉ တေလႆႈႁႃတၢင်းၵႄႈလိတ်ႈၸိူင်ႉႁိုဝ်။ တႃႇတေဢုပ်ႇဢူဝ်း လူင်ပွင်ၸိုင်ႈမၢၼ်ႈၼႆႉ တေဝႆႉပၢႆးတိုၵ်း/မႁႃႇပိဝ်ႇႁႃႇၸိူင်ႉႁိုဝ်ၸိူဝ်းၼႆႉ ထုၵ်ႇလီႁႃၶေႃႈလႆႈၸႂ်ၵၼ်။ လွင်ႈၸိူဝ်းၼႆႉ ပဵၼ်ဢၼ်ၾၢႆႇဝႃႉၶဝ်တိုၵ်းသူၼ်း ႁႂ်ႈလႆႈၶေႃႈတွပ်ႇမၼ်း ၼႂ်းၶၢဝ်းတၢင်းပၢင်ၵုမ်ၼႆႉ- ၼႆယဝ်ႉ။


ပၢင်ၵုမ်ၶၢဝ်းတၢင်း 3 ဝၼ်းပွၵ်ႈၼႆႉ တႃႇတေပွင်ပဵၼ်ပၢင်ၵုမ်ၼႆႉ ၸုမ်းဝႃႉ (UWSA/UWSP) လႄႈၸုမ်းမိူင်းလႃး (MNDAA-ESS) ပဵၼ်ၵဝ်ႉၵၼ်းႁပ်ႉပဵၼ်ၸဝ်ႈတႃႇၼ။ ၸုမ်းၸၢဝ်းၶိူဝ်းၸိူဝ်းၶိုၼ်ႈႁွတ်ႈၶဝ်ႈႁူမ်ႈ မီးၸုမ်းဢူၺ်းလီပွတ်းႁွင်ႇ မိူၼ်ၼင်ႇၸုမ်းၶၢင် KIA ၊ ၸုမ်းတဢၢင်း TNLA (လွႆ)၊ ၸုမ်းၵူဝ်းၵၢင်ႉ MNDAA ၊ ၸုမ်းရၶႅင်ႇ AA ၸိူဝ်းၼႆႉ။ ၼွၵ်ႈသေၼၼ်ႉ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၵေႃႈၶဝ်ႈႁူမ်ႈ၊ ၵူၺ်းၵႃႈ ပႃႇတီႇမိူင်းမွၼ်းမႂ်ႇ (MNSP) ၊ ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် (KNPP) ၸိူဝ်းၼႆႉ ဢမ်ႇၶိုၼ်ႈႁွတ်ႈၶဝ်ႈႁူမ်ႈ။