တပ်ႉသိုၵ်းလူင်ပွင်ၸိုင်ႈမၢၼ်ႈ ၶဝ်ႈလေႃႇတိုၵ်း တပ်ႉပၢင်သဝ်းၸူဝ်ႈၶၢဝ်း တပ်ႉသိုၵ်းၸိုင်ႈတႆး (RCSS/SSA) ဢၼ်လူင်းလၢႆးမိုဝ်း NCA ဝႆႉ၊ တီႈၾၢႆႇဢွၵ်ႇမိူင်းပွၼ်။ ၽူႈၶၢၼ်ပၢၵ်ႇ RCSS/SSA ဝႃႈ ၸၢင်ႈတုမ်ႉတိူဝ်ႉ လွင်ႈယုမ်ႇယမ်ၵၼ်လႄႈ လွင်ႈငမ်းယဵၼ် ။

ဝၼ်းတီႈ 19/01/2017 (မိူဝ်ႈဝႃး) ယၢမ်းၵၢင်ၼႂ် 6 မူင်း၊ တပ်ႉသိုၵ်းလူင်ပွင်ၸိုင်ႈ တပ်ႉမတေႃႇမၢၼ်ႈ ၶဝ်ႈၵႂႃႇတိုၵ်းယိုဝ်း တပ်ႉပၢင်သဝ်းၸူဝ်ႈၶၢဝ်း တပ်ႉသိုၵ်းၸိုင်ႈတႆး (RCSS/SSA) တီႈႁိမ်းဝၢၼ်ႈၼွင်လေး ဢိူင်ႇပဵင်းၸႂ်၊ ၾၢႆႇဢွၵ်ႇဝဵင်းမိူင်းပွၼ် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ၾၢႆႇတပ်ႉသိုၵ်းမၢၼ်ႈ ပဵၼ်ငႃးသိုၵ်းပႃႈတႂ်ႈတပ်ႉ ၶမယ 429 ။ ၾၢႆႇတပ်ႉသိုၵ်းတႆး ပဵၼ်ၸဝ်ႈႁၢၼ်မုၼိဢွၼ်ႁူဝ်- ၼႆယဝ်ႉ ။


ၽူႈၵွၼ်းဝၢၼ်ႈ/ပူႇၵၢင်ႉ ၼႂ်းၸႄႈဝဵင်းလွႆလႅမ်ၵေႃႉၼိုင်ႈ လၢတ်ႈဝႃႈ- ပွတ်ႈတွၼ်ႈတီႈၼၼ်ႈၼႆႉ ၸဝ်ႈႁၢၼ်မုၼိ ဢွၼ်ႁူဝ်တူင်ႉၼိုင်ဝႆႉ။ မိူဝ်ႈဢွၼ်တၢင်းၼၼ်ႉၵေႃႈ ၵႆႉပဵၼ်ပၢင်တိုၵ်းၵၼ်တင်းၸုမ်းပီႇတုၸိတ်ႉပဢူဝ်းယူႇ၊ တီႈၼႂ်းပၢင်တိုၵ်းၼႆႉ တင်းသွင်ၾၢႆႇမီးလွင်ႈဝၢတ်ႇၸဵပ်းလူႉတၢႆသေတႃႉ ပႆႇလႆႈႁူႉတႅတ်ႈတေႃး- ဝႃႈၼႆ ။


ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ- ဢၼ်ပဵၼ်ပၢင်တိုၵ်းၵၼ်ၼႆႉ မၼ်းၸၢင်ႈၵႂႃႇ တုမ်ႉတိူဝ်ႉလွင်ႈယုမ်ႇယမ်ၵၼ်။ ဢၼ်ပဵၼ်ပၢင်တိုၵ်းၵၼ်ယူႇ တီႈၼႂ်းမိူင်းမၢၼ်ႈပတ်းပိုၼ်ႉၼႆႉ ၾၢႆႇတပ်ႉသိုၵ်းမၢၼ်ႈၶဝ် ၶႂ်ႈယုၵ်ႉၸၼ်ႉတပ်ႉမတေႃႇၶဝ်ၶိုၼ်ႈ၊ ယွၼ်ႉၼၼ် ၶဝ်ၸင်ႇႁဵတ်းပၢင်တိုၵ်းၵေႃႈ ၸၢင်ႈပဵၼ်လႆႈ။ ပေႃးဝႃႈၶဝ်ႁဵတ်းပၢင်တိုၵ်း ၸိူင်ႉၼႆယူႇတိၵ်းတိၵ်းတႄႉ မၼ်းတေၸၢင်ႈတုမ်ႉတိူဝ်ႉပႃး ၵၢၼ်သၢင်ႈလွင်ႈငမ်းယဵၼ်- ဝႃႈၼႆ ။


သိုပ်ႇလၢတ်ႈဝႃႈ- ပေႃးဝႃႈၵဵဝ်ႇၵပ်းၵၢၼ်သိုၵ်းၼႆႉ ႁဝ်းၶႃႈလႆႈၶွတ်ႇၽွတ်ႈဝႆႉ ၶွမ်ႊမတီႊလူလွမ်ၵုမ်းတူၺ်း ၵၢၼ်ၵိုတ်းတိုၵ်း (JMC) ၸၼ်ႉမိူင်းႁူမ်ႈတုမ်၊ ၸၼ်ႉၸႄႈမိူင်း။ လိူဝ်ၼၼ်ႉၵေႃႈ ၸၼ်ႉၼႂ်းပိုၼ်ႉတီႈၵေႃႈ တေၶတ်းၸႂ်ၶွတ်ႇၽွတ်ႈ။ ပေႃးဝႃႈသွင်ၾၢႆႇမီးမႃးပၼ်ႁႃၼႆၵေႃႈ ႁႂ်ႈပေႃးလႆႈၵႄႈလိတ်ႈ။ ဢၼ်ၼႆႉၵေႃႈ ပိူဝ်ႈတႃႇလွင်ႈၵိုတ်းယိုဝ်းၵၼ်ၼႆႉ ႁႂ်ႈပေႃးယိုၼ်းယၢဝ်းၵႂႃႇ။ မိူဝ်ႈလဵဝ်ၵေႃႈ ႁဵတ်းသၢင်ႈယူႇ၊ ၵူၺ်းၵႃႈ ပေႃးၵမ်းၵမ်းၵႆႉပဵၼ်ပၢင်တိုၵ်းတႄႉ လွင်ႈယုမ်ႇယမ်ၵၼ်ၵေႃႈ တေလူတ်းယွမ်းၵႂႃႇၵမ်းဢိတ်းဢိတ်း။ ပေႃးဝႃႈလွင်ႈယုမ်ႇယမ်ၵၼ်ၼႆႉ လူတ်းယွမ်းၵႂႃႇၵမ်းဢိတ်းဢိတ်းသေ ထိုင်တီႈလူႉၵွႆၵႂႃႇယဝ်ႉၵေႃႈ လွင်ႈငမ်းယဵၼ်ၵေႃႈတိုၼ်းဝႃႈတေလူႉၵွႆၼၼ်ႉယဝ်ႉ- ဝႃႈၼႆ ။


ၽူႈၸမ်ၸႂ်တိူင်းသိုၵ်းဝၼ်းဢွၵ်ႇၵၢင် (ယလၶ) ၶူဝ်လမ်၊ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ဢၼ်ပဵၼ်ပၢင်တိုၵ်းၵၼ်ၼႆႉ မၼ်းပဵၼ်လွင်ႈလူင်းၵႂၢတ်ႇလၢင်ႉၼႃႈလိၼ်ၵူၺ်း။ မိူဝ်ႈၽွင်းတူင်ႉၼိုင် ၵၢၼ်ၵႂၢတ်ႇလၢင်ႉၼႃႈလိၼ်ယူႇၼၼ်ႉ ၶဝ်ၵႂႃႇၽႃႇႁိုၵ်ႉၺႃးၵၼ်သေ ပဵၼ်ပၢင်တိုၵ်းၵူၺ်း- ဝႃႈၼႆ ။


ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) ဝႆႉတင်း လူင်ပွင်ၸိုင်ႈမၢၼ်ႈ တပ်ႉမတေႃႇမၢၼ်ႈ ၸၼ်ႉၸႄႈမိူင်းလႄႈ ၸၼ်ႉမိူင်းႁူမ်ႈတုမ်ဝႆႉ ။


ဝၢႆးသေ RCSS/SSA လူင်းလၢႆးမိုဝ်းၵိုတ်းတိုၵ်းတူဝ်ႈမိူင်း (NCA) မိူဝ်ႈၼႂ်းပီ 2015 မႃးၼႆႉ လႆႈပဵၼ်ပၢင်တိုၵ်း ၵၼ်တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ဢမ်ႇယွမ်း 5 ပွၵ်ႈယဝ်ႉ။ ထိုင်မႃးမိူဝ်ႈၼႂ်းပီ 2016 ၽွင်းႁူဝ်လိူၼ် ဢွၵ်ႊထူဝ်ႊၿိူဝ်ႊၼၼ်ႉ လႆႈပဵၼ်ပၢင်တိုၵ်းၵၼ်တီႈပွတ်းတူင်ႇလၢဝ်း ၸႄႈဝဵင်းမိူင်းၵိုင် ဢမ်ႇယွမ်းၶၢဝ်းတၢင်း 3 ဝၼ်း ။