ထိုင်ၶၢဝ်းၵတ်းယဝ်ႉ ပဵၼ်ၶၢဝ်းဢဝ်ၶဝ်ႈဢဝ်ၼမ်ႉ ၵူႈၸိူဝ်ႉၵူႈယင်ႇ ၵၢင်ၼ်ႂမိူင်းသ်ႂ ယူႇၵေႃႈ မွၵ်ႇၵုမ်ႈၼမ်ႉၼၢႆးတူၵ်း မၢင်တီႈသမ်ႉပေႃးတၼ်၊ ၸၢတ်ႈပၢၼ်ၵူၼ်းၸိူဝ်းႁဵတ်းၵိၼ်ႁႆႈသူၼ်ၼႃးၶဝ်တႄႉ ဢွၼ်ၵၼ်ပႃးႁေႃႇၶဝ်ႈၸွၵ်းၽၵ်း သႂ်ႇပႅမ်းသႂ်ႇသွင်းသေ ၵႂႃႇဢဝ်ၶဝ်ႈၵၢပ်ႇဝႃႇ မၢင်းၸိူဝ်းသမ်ႉ ၵႂႃႇပၢတ်ႇၶဝ်ႈၼႃး မၢင်ၸိူဝ်းၵေႃႈၵႂႃႇပုမ်ႇၶဝ်ႈ ၸွမ်းၼင်ႇၶိင်ႇၶၢဝ်းလ်ႂၶၢဝ်းၼၼ်ႉ ပီႈၼွင်ႉၵူၼ်းမိူင်း ဝၢၼ်ႈၼွၵ်ႇၼႃးပၢင်ႇ ဢွၼ်ႇႁဝ်းတႄႉ ၶတ်းၸ်ႂႁဵတ်းသၢင်ႈ ၵၢၼ်ႁႃၵိၼ်လဵင်ႉတွင်ႉ ၸွမ်းသၽႃႇဝ ၼင်ႇႁိုဝ်သမ်ႉပေႃးတေမီးငိုၼ်းမီႈၶဝ်ႈ မီးလူတ်ႉၵႃး ပႃးၸဵမ်ႁိူၼ်းတိူၵ်ႈၼၼ်ႉ ၶတ်းၸ်ႂယူႇၵူႈဝၼ်းယဝ်ႉ ။

ၵူၺ်းၵႃႈဝႃႈ ပီႈၼွင်ႉတႆးႁဝ်းမၢင်တီႈ ထိုင်ၶၢဝ်းၵတ်းယဝ်ႉၼႆ ၸွမ်းၼင်ႇၾိင်ႈထုင်းပီလ်ႂပီၼၼ်ႉ ၼင်ႇႁိုဝ်တေ ဢမ်ႇဝွတ်ႈဝၢႆးႁၢႆၵႂႃႇၼၼ်ႉ ၸၢႆးၼုမ်ႇယိင်းၼုမ်ႇ ပႃးၸဵမ်ၵူၼ်းလူင်ပေႃႈထဝ်ႈမႄႈၵႄႇ ဢုပ်ႇဢူဝ်းငူပ်ႉငီႉၵၼ် ၼင်ႇႁိုဝ်ပေႃးတေပဵၼ်မႃးပီမႂ်ႇတႆးၼၼ်ႉ ၸၢႆးယိင်းၼုမ်ႇၶဝ် ဢွၼ်ၵၼ်ပႃးၵွင်မွင်းသေ ၸဵမ်ၽဵင်းၵႂၢမ်း တၢင်းၵႃႈ ၵူႈၸိူဝ်ႉၵူႈယင်ႇ  ၵႂႃႇႁႃတူၵ်းသူး ၼမ်ႉၸ်ႂပီႈၼွင်ႉ ၸိူဝ်းမီးၸ်ႂၶႂ်ႈၸွႆႈထႅမ် တႃႇတေပဵၼ်မႃး ပၢင်ပွႆးႁူမ်ၸူမ်းႁပ်ႉတွၼ်ႈ ပီမႂ်ႇတႆးၼၼ်ႉ ၼိုင်ႈၵေႃႉၼိုင်ႈဢိတ်းၼိုင်ႈဢီႈသေ ႁူမ်ႈၵၼ်ၶတ်းၸ်ႂပၼ်ႁႅင်းတႆးႁဝ်း ႁႂ်ႈပေႃးပဵၼ်မႃးပၢင်ပွႆး လဝ်ႇမူၼ်ႈတူၼ်ႈၸ်ႂ ပီမႂ်ႇ၊ ၼႂ်းဝၼ်းပွႆးၼၼ်ႉၵေႃႈ ပီႈၼွင်ႉၵူႈတီႈၵူႈတၢင်း ၸိူဝ်းမႃးၶဝ်ႈႁူမ်ႈလႆႈၵေႃႈ ဢွၼ်ၵၼ်ပႃးၸဵမ်တၢင်းၵႃႈၸိူဝ်းၼႆႉ မႃးပၼ်ႁႅင်း မႃးၵႃႈမူၼ်ႈၸ်ႂပၼ် ပီႈၼွင်ႉမႃးၶဝ်ႈပွႆးၶဝ် သဵင်ႁုၼ်ႉသမ်ႉပေႃးပၼ်းလူင်ၵႂႃႇယဝ်ႉ ။


မိူၼ်ၸိူင်ႉၼင်ႇ ပီႈၼွင်ႉတႆးႁဝ်းမၢင်တီႈသမ်ႉ ထိုင်ၶိင်ႇၶၢဝ်းသမ်ႉ မွင်းထိုင်ၶၢဝ်းမႆႈ၊ ထိုင်ၶၢဝ်းမႆႈၵေႃႈ မွင်းထိုင်ၶၢဝ်းၾူၼ်၊ ထိုၼ်ၶၢဝ်းၾူၼ်သမ်ႉ မွင်းၶၢဝ်းၵတ်း ဢမ်ႇထၢင်ႇဢမ်ႇဝၢႆး မွင်းယူႇတိၵ်းတိၵ်း၊ ၵွပ်ႈဢမ်ႇၸၢင်ႈႁဵတ်းသင် ၶမ်ၸ်ႂၵႂႃႇလ်ႂဢမ်ႇလႆႈ မၢင်ပွၵ်ႈၶႂ်ႈႁႆႈ မၢင်ပွၵ်ႈသမ်ႉၶႂ်ႈၶူဝ် မၢင်ပွၵ်ႈၵူဝ်တူဝ်သမ်ႉပေႃးသၼ်ႇ ၵွပ်ႈပိူဝ်ႈထၢင်ႇဝႃႈပဵၼ် ဢိင်ႇသၼ်ႇၽႅၼ်လိၼ်ဝႆ၊ ၽိူဝ်ႇထွမ်ႇတူၺ်းလီလီ သမ်ႉဢမ်ႇၸႂ်ႈသဵင်ၽႅၼ်ႇလိၼ်ဝႆ၊ ၵမ်းၼႆႉ ဢွၼ်ၵၼ်တူၵ်းၸ်ႂလ်ႂတိုၼ်ႇ ၵမ်ႈၽွင်ႈလႅၼ်ႈၶုၼ်ႇသမ်ႉပေႃးဢမ်ႇၶႂ်ႈၸပ်းတၢင်း၊ ၾၢႆႇတူၵ်းၵေႃႈသမ်ႉမေႃး တၢင်ႉတၢင်ႉ၊ ၾၢႆႇၸၢၼ်းၵေႃႈသမ်ႉမေႃးထူင်ႉထူင်ႉ၊ သဵင်ႈၵွင်ႈသဵင်မၢၵ်ႇႁူၼ်ႈပၼ်းသမ်ႉပေႃးတဵမ်ၵႂႃႇသဵင်ႈ၊ ၸဵမ်လုၵ်ႈဢွၼ်ႇပူႇမွၼ်ႇၵူၼ်းထဝ်ႈၵေႃႈ ၸၢင်ႈႁဵတ်းႁိုဝ်၊ ဢွၼ်ႇၵၼ်ပၢႆႈသမ်ႉပေႃးဢမ်ႇတၼ်းလႆႈသင်၊ ၶၢၼ်ၸ်ႂယဝ်ႉဢိူဝ်ႈၵမ်းၼႆႉ၊ ပိူဝ်ႈတႃႇဢႃႇယုဢသၢၵ်ႈဢွၼ်ႇသမ်ႉပေႃးတေလွတ်ႈၼၼ်ႉ ၵႂႃႇႁႃသွၼ်ႈယူႇတႂ်ႈ ဝတ်ႉၵျွင်းမုၼ်ၸဝ်ႈ ဢွင်ႈတီႈႁပ်ႉၵူၼ်းပၢႆႈၽေး ၸိူဝ်းၼႆႉယဝ်ႉ ။


ပႃႈၼၢင်းလႃႉ ၵူၼ်းပၢႆႈၽေးၵေႃႉၼိုင်ႈတႄႉလၢတ်ႈဝႃႈ- “ ၶၢဝ်းၼႆႉ ထိုင်ၶၢဝ်းဢဝ်ၶဝ်ႈဢဝ်ၼမ်ႉယဝ်ႉ ၶဝ်ႈႁဝ်းၵေႃႈ ဢမ်ႇလႆႈဢဝ် ၽုၵ်ႇဝႆႉၶဝ်ႈၵၢပ်ႇၵေႃႈ ၵုမ်ႇပဵၼ်ဝူဝ်းပဵၼ်ၵႂၢႆးၵိၼ် ၵႂၢႆးတဝ် သမ်ႉပေႃးလူႉလႅဝ်ၵႂႃႇသဵင်ႈ၊ တေဝႃႈမိူဝ်းပႂ်ႉၼႆၵေႃႈ ႁဝ်းၶႃႈဢမ်ႇႁတ်း ၵွပ်ႈပိူၼ်ႈတိုၵ်ႉယိုဝ်းၵၼ်၊ ၵူၼ်းဝၢၼ်ႈႁဝ်းၶႃႈမၢင်ၸိူဝ်းမိူဝ်းႁိူၼ်းၵေႃႈ လႆႈထုၵ်ႇသိုၵ်းၶဝ်ယိုဝ်းတၢႆပႅတ်ႈ ၸွမ်းတၢင်း။ မိူဝ်ႈလဵဝ်ႁဝ်းၶႃႈၵေႃႈဢမ်ႇႁတ်းမိူဝ်းႁိူၼ်း၊ ႁိူၼ်းၸိူဝ်းတွၼ်ႈႁဝ်းၶႃႈမၢင်ဝၢၼ်ႈၵေႃႈ ထုၵ်ႇသိုၵ်းၶဝ် ဢဝ်ၾႆးၽဝ်ပႅတ်ႈ။ လိူဝ်သေၼၼ်ႉ ဢမ်ႇၵႃး တွၼ်ႈတႃႇတေၵိၼ်ၵႂႃႇ မိူဝ်းၼႃႈၼၼ်ႉၵေႃႈ ႁဝ်းၶႃႈဢမ်ႇမီးယဝ်ႉ၊ ၵွပ်ႈပိူဝ်ႈဝႃႈ ႁဝ်းၶႃႈႁဵတ်းၵိၼ်သူၼ်ႁႆႈၼႃးၼႆႉ ႁဵတ်းပီၼႆႉ တႃႇၵိၼ်ပီတေမႃး ၊ မိူၼ်မိူဝ်ႈလဵဝ် တႃႇတေဢဝ်ၶဝ်ႈၼမ်ႉတၢင်းၵိၼ်ႁဝ်းၶႃႈၵေႃႈ ဢမ်ႇၸၢင်ႈတေႁဵတ်းၸိူင်ႉႁိုဝ်ယူႇၵႂႃႇ၊ တႃႇတၢင်းၼႃႈၵေႃႈဢမ်ႇႁူႉ”- ဝႃႈၼႆ ။


လုင်းၸၢႆး ၵူၼ်းပၢႆႈၽေးၵေႃႈလၢတ်ႈဝႃႈ ပၢင်တိုၵ်းၼႆႉ “ ဢမ်ႇၶႂ်ႈႁႂ်ႈၵိူတ်ႇၶိုၼ်ႈသေဢိတ်း၊ ပေႃးဝႃႈပၢင်တိုၵ်း ၵိူတ်ႇၶိုၼ်ႈတီႈလႂ်ၵေႃႈ ၵူၼ်းမိူင်းတီႈၼၼ်ႈ တိုၼ်းလႆႈပၢႆႈၶူဝ်းႁိူၼ်းပေႃးဢမ်ႇတၼ်းလႆႈသင်၊ မိူၼ်ၼင်ႇႁဝ်းၶႃႈ လႆႈပၢႆႈမႃးၸိူင်ႉၼႆ တေႃႉတႄႉတၼ်းဢဝ်တူဝ်လွတ်ႈၵူၺ်း ၶူဝ်းႁိူၼ်းယေးၵိုတ်းတၢင်းလင်ၵေႃႈ ၸုမ်းယိပ်းၵွင်ႈၵၢင်ႇၶဝ် တဝ်သွၵ်ႈဢဝ်လၢႆ ၸဵမ်တူဝ်ဢုၵ်ႉၸႃႇ ၵူၼ်းမိူင်း ဢမ်ႇၵိုတ်းႁၼ်သင်ၵေႃႈဢဝ်။ လိူဝ်သေၼၼ်ႉ ၵူၼ်းၸၢႆးၵူၼ်းယိင်း ထုၵ်ႇၺွပ်ႉပေႃႉထုပ်ႉ ပူၼ်ႉပႅၼ်ၼိူဝ်ၵၼ်ၸိူဝ်းၼႆႉ ပဵၼ်ယွၼ်ႉတၢမ်ႇပၢင်တိုၵ်းလၢႆလၢႆ ဢၼ်ၵူၼ်းမိူင်းလႆႈၶၢမ်ႇ”  ဝႃႈၼႆ ။


ပေႃးမႃးတူၺ်းလွင်ႈပၢင်တိုၵ်းလႄႈ ၵူၼ်းမိူင်းႁဝ်းၶႃႈလႆႈၶၢမ်ႇၼႆႉ မိူၼ်ၸိူင်ႉၼင်ႇ ပီ 2015 ၽွင်းၶၢဝ်း ၸမ်ပၢင်လိူၵ်ႈတင်ႈၼၼ်ႉ သိုၵ်းမၢၼ်ႈၶဝ်ထႅမ်ႁႅင်းသိုၵ်း ပိုတ်ႇၼႃႈသိုၵ်းၸူး တပ်ႉသိုၵ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး တၢင်းပွတ်းတွၼ်ႈမိူင်းဢၢၵ်ႇ ဝၢၼ်ႈလူၺ် ၸိူဝ်းႁိမ်းႁွမ်း တႃႈသၢမ်ပူး ႁိမ်းႁွမ်းဝၢၼ်ႈႁၢႆးပႃ  မိူင်းသူႈ  ၽၢႆႇၸၢၼ်းဝၢၼ်ႈႁႆး  ၼႂ်းၼႃႈတီႈၵုမ်းၵမ် တပ်ႉသိုၵ်းၸိုင်ႈတႆး ၼႆႉ သွင်ၾၢႆႇလႆႈပဵၼ်ပၢင်တိုၵ်းၵၼ် ၶၢဝ်းတၢင်းၸမ်သွင်လိူၼ်။ ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈဝိၼ် မႅင်းမီႈလႄႈၶိူင်ႈဝိၼ်ၵျႅတ်ႉ လၢႆလၢႆလမ်းၶဝ်ႈလေႃႇတိုၵ်းၸွႆႈ ။


ၽွင်းၼၼ်ႉၵူၼ်းမိူင်းၶဝ် လႆႈဢွၼ်ၵၼ်ပၢႆႈၽေးသိုၵ်း ႁူဝ်ၼပ်ၵူၼ်း သမ်ႉပေႃးမီးမွၵ်ႈမိုၼ်ႇပၢႆ ပၢႆႈၵႂႃႇၵူႈတီႈၵူႈတၢင်း  မိူဝ်ႈၽွင်းၶၢဝ်းၼၼ်ႉၵေႃႈ ပဵၼ်းၶၢဝ်းၸမ်ထိုင်ၶၢဝ်းၵတ်းလႄႈ လူဝ်ႇဢဝ်ၶဝ်ႈၼမ်ႉ တၢင်းၵိၼ်မိူၼ်ၵၼ် ၵူၼ်းမိူင်းၵေႃႈဢမ်ႇၸၢင်ႈဢဝ် ဢမ်ႇႁတ်းမိူဝ်းဢဝ်၊ ႁိူၼ်းၵေႃႈဢမ်ႇႁတ်းမိူဝ်း၊ လႆႈသေႃႉႁူမ်ႈတႂ်ႈဢွင်ႈၶႅမ်ႉၵူၼ်းပၢႆႈၽေးလႄႈ မွင်းပႂ်ႉၽူႈမီးၼမ်ႉၸ်ႂလီၶဝ် မႃးၸွႆႈထႅမ် ၵဵဝ်ႇၵပ်းလူၺ်ႈလွင်ႈၶဝ်ႈၼမ်ႉတၢင်းၵိၼ် ၸိူဝ်းၼႆႉယူႇ ။


ၵဵဝ်ႇၵပ်းလူၺ်ႈပၢင်တိုၵ်းၼႆႉ ၶႂ်ႈယွၼ်းၵိုတ်းယိုတ်း၊ ယႃႇႁႂ်ႈပဵၼ်သေၵမ်း၊ သိုၵ်းတေႃႇသိုၵ်းတႄႉ ဢဝ်ၼႃႈၶႅင်ႈသေ ႁဵတ်းသဝ်ၶဵင်ႇတႃႉၵၼ်လႆႈယူႇ၊ ၵူၺ်းၵႃႈ ပေႃးပဵၼ်ပၢင်တိုၵ်းၵၼ်မႃးမိူဝ်ႈလ်ႂၵေႃႈ တိူဝ်ႉသၢင်ႈၵူၼ်းမိူင်းယူႇတႃႇသေႇ။ ပေႃးထိုင်ၶၢဝ်းၵတ်းၸိူင်ႉၼႆၶႅၼ်းၼႃႇ ၽႃႈၽႅၼ်ႇၵေႃႈဢမ်ႇမီး၊ ပၢႆသေလိူဝ်ပဵၼ်ၶၢဝ်းၵတ်း သမ်ႉဢမ်ႇလႆႈၵိၼ်လီ ၼွၼ်းလီ  ၽႃႈၽႅၼ်ႇသိူဝ်ႈၶူဝ်းၼုင်ႈ ႁႂ်ႈပေႃးဢုၼ်ႇၵေႃႈဢမ်ႇမီး၊ တေႃႉတႄႉလႆႈၼုင်ႈလႆႈမႆ ဢၼ်ပိူၼ်ႈမႃး ၸွႆႈထႅမ်ၸိူင်ႉၼႆၵူၺ်း။ ၵဵဝ်ႇၵပ်းလူၺ်ႈပၢႆးယူႇလီၵေႃႈဢမ်ႇတဵမ်ထူၼ်ႈ၊ ပၢင်တိုၵ်းၼႆႉ တုၵ်းယွၼ်းယႃႇႁႂ်ႈ ၵိူတ်ႇၶိုၼ်ႈလႄႈ ၵိုတ်းယိုတ်းပၼ်သေၵမ်း။ လိူဝ်သေၼၼ်ႉ ယွၼ်းယႃႇႁႂ်ႈမီးလွင်ႈပူၼ်ႉပႅၼ် ၼိူဝ်ၵူၼ်းမိူင်းသေၵမ်းၼႆ- ၵူၼ်းၵႂႃႇၸွႆႈထႅမ်ၵူၼ်းပၢႆႈၽေး ၵေႃႉၼိုင်ႈလၢတ်ႈၼႄၼင်ႇၼႆ ။


မိူဝ်ႈပဵၼ်ပၢင်တိုၵ်းၵၼ် တီႈတၢင်းႁၢႆးပႃၼၼ်ႉ တေႃႇထိုင်မိူဝ်ႈလဵဝ် ၵူၼ်းၸိူဝ်းဢၼ်ပၢႆႈၽေးသိုၵ်းၼၼ်ႉ  ယင်းဢမ်ႇၸၢင်ႈပွၵ်ႈမိူဝ်းၶိုၼ်းႁိူၼ်း၊ ႁူဝ်ၼပ်ႉၵူၼ်းယင်းတိုၵ်ႉၵိုတ်းယူႇႁဵင်ပၢႆ ၸဵမ်လုၵ်ႈဢွၼ်ႇၵူၼ်းထဝ်ႈ ယင်းတိုၵ်ႉလူဝ်ႇတၢင်းၸွႆႈထႅမ်ယူႇ၊ မိူၼ်ၼင်ႇလုၵ်ႈဢွၼ်ႇၵေႃႈ ၸဵမ်ပၢႆးပၺ်ႇၺႃႇ ပၢႆးယူႇလီလႄႈ လွင်ႈၵိၼ်ယႅမ်ႉၸိူဝ်းၼႆႉ တိုၵ်ႉလူဝ်ႇတၢင်းၸွႆႈထႅမ်ယူႇ ။


ပီၼႆႉသမ်ႉ ထိုင်ၶၢဝ်းဢဝ်ၶဝ်ႈၼမ်ႉမိူၼ်ၵၼ်ထႅင်ႈ ၵေႃႈပဵၼ်ပၢင်တိုၵ်းၵၼ်ထႅင်ႈ ႁၢဝ်ႈႁၢဝ်ႈႁႅင်းႁႅင်း၊ ၵူၼ်းမိူင်းထုၵ်ႇၶႃႈတၢႆဢဝ်ႁၢႆပႅတ်ႈ လူၺ်ႈဢမ်ႇမီးတၢင်းၽိတ်းသင် ၸဵမ်လူတ်ႉၵႃးလူင် ဢၼ်တၢင်ႇၵုၼ်ႇတၢင်းၵူၼ်းၸိူဝ်းၼႆႉ ထုၵ်ႇသိုၵ်းၶဝ်ဢဝ်ၾႆးၽဝ်ပႅတ်ႈ ဢမ်ႇမီးလွင်ႈသၢႆႈတႅၼ်း၊ ၵူၼ်းမိူင်းဝၢၼ်ႈၼွၵ်ႈၼႃးပၢင်ႇႁဝ်း  တႃႇတေႁဵတ်းၵိၼ်ၵၢၼ် လဵင်ႉတွင်ႉလႄႈ မီးငိုၼ်းၶဝ်ႈၼၼ်ႉ ၵူၺ်းႁဵတ်းသူၼ်ၶဝ်ႈၵၢပ်ႇ ႁႆႈၶဝ်ႈ ၼႃး သူၼ်မၢၵ်ႇဝၢၼ်၊ မၢၵ်ႇၸွၵ်း ၊ မၢၵ်ႇၵဵင် ၊ မိူဝ်လဵဝ်သမ်ႉမႃး ပဵၼ်ပၢင်တိုၵ်းၵၼ်  မိူၼ်ၼင်ႇတၢင်းပွတ်းတွၼ်ႈမူႇၸႄႈ ၊ ၵူတ်ႉၶၢႆ ၊ ပၢင်ႇသၢႆး ၊ မိူင်းၵူဝ်း ၊   ယိုဝ်းၵၼ်သဵင်မၢၵ်ႇသဵင်ၵွင်ႈႁူၼ်ႈပၼ်း ၵွၼ်းသမ်ႉပေႃးမူဝ်း  ၵူၼ်းမိူင်းၵႂႃႇမႃး ၺႃးယိုဝ်းတၢႆ  ၊ ၶၼ်ၵၢၼ်ၵႃႉၵၢၼ်ၶၢႆၵေႃႈတူၵ်း၊ ၵူၼ်းမိူင်းၸႂ်ယႂ်ႇၶူဝ်းၶွင် ဢၼ်ဢွၵ်ႇၼႂ်းသူၼ်ၼႂ်းႁိူၵ်ႈ ထၢင်ႇဝႃႈတေလႆႈၶၢႆလီ  သမ်ႉမႃးပဵၼ်ၸိူင်ႉၼႆ ပဵၼ်ၽ်ႂၵေႃႈသမ်ႉပေႃးၶီငဝ်သဝ်ႈမွင် ။


ၵမ်ႈၽွင်ႈၵေႃႈဝႃႈ ၵၢပ်ႈပၢၼ်ဝၢၼ်ႈမိူင်းလႅၵ်ႈလၢႆႈမႃးယဝ်ႉ ပဵၼ်ၵၢပ်ႈပၢၼ် တီႇမူဝ်ႇၶရေႇၸီႇ မီးသုၼ်ႇၽဵင်ႇပဵင်းဝႃႇ၊ တေလႆႈဝႃႈၼၼ်တႄႉႁိုဝ်ၼေႃ  မိူဝ်ႈပူၼ်ႉမႃးၼၼ်ႉတႄႉ  ပဵၼ်ပၢင်တိုၵ်းၵၼ် ၸွမ်းထိူၼ်ႇ ၵူၼ်းဝၢၼ်ႈၼွၵ်ႈၼႃးပၢင်ႇၵႆႉ ထုၵ်ႇတဵၵ်းတဵင်၊ မိူဝ်ႈလဵဝ်တႄႉ ၸဵမ်ၼႂ်းဝဵင်းဝၢၼ်ႈၼွၵ်ႈ ပဵၼ်ပၢင်တိုၵ်းလႄႈ သဵင်ႈၵွင်ႈသမ်ႉပေႃးႁူၼ်ႈၵႂႃႇသဵင်ႈ၊ တီႇမူဝ်ႇၶရေႇၸီႇ ဢၼ်မၢၼ်ႈၶဝ် ၶႂ်ႈပဵၼ်ၼႆႉ ၸိူင်ႉၼႆႁႃႉ ။


ၾၢႆႇၼိုင်ႈ ၶႂ်ႈလႆႈလွင်ႈငမ်းယဵၼ်၊ ထႅင်ႈၾၢႆႇၼိုင်ႈသမ်ႉ ပိုတ်ႇၼႃႈသိုၵ်းပိုတ်းယိုဝ်းၵၼ်ယူႇလႄႈ  လွင်ႈငမ်းယဵၼ် ဢၼ်မိူင်းမၢၼ်ႈ ႁဵတ်းယူႇၼႆႉ ၸွင်ႇၸႂ်ႈလွင်ႈငမ်းယဵၼ် ၸိုၼ်ႈၸၢင်ႇယူႇႁႃႉ ၊  ဢၼ်ႁွင်ႉပၢဝ်ႇယူႇဝႃႈ တေၶတ်းၸ်ႂပူၵ်းပွင် ဝၢၼ်ႈမိူင်းၶိုၼ်ႈယႂ်ႇၼၼ်ႉ  ၶတ်းၸ်ႂယူႇတီႈလ်ႂ ၸွင်ႇသမ်ႉၶိုၼ်ႈယႂ်ႇယူႇတႄႉႁႃႉ၊ ၵူၼ်းမိူင်းၸွင်ႇလႆႈၸႂ်ယူႇတႄႉႁိုဝ် ။


မိူဝ်ႈလဵဝ်ၵူၼ်းမိူင်း တူၵ်းတၢင်းယၢပ်ႇၽိုတ်ႇ၊ ၶၼ်ၵႃႉၶၢႆ မိူၼ်ၸိူင်ႉၼင်ႇ ၶဝ်ႈၵၢပ်ႇ ထူဝ်ႇလိၼ်  ၶဝ်ႈ ၸိူဝ်းၼႆႉၵေႃႈၶၼ်တူၵ်း၊ ၵႃႈၶၼ်တူၵ်းလူင်းၵႂႃႇၼိုင်ႈၶိုင်ႈ၊  တေလႆႈဝႃႈၵၢပ်ႈပၢၼ်ၶိုၼ်ႈယႂ်ႇႁႃႉ ဢမ်ႇၼၼ် တေပဵၼ်ၵၢပ်ႈပၢၼ်မိူင်းတူၵ်းတႅမ်ႇ၊ ၵူၼ်းမိူင်းၸိူဝ်းဢၼ်လႆႈတူၵ်းတၢင်းယၢပ်ႇၽိုတ်ႇတႄႉ ႁူႉမုင်ႈမွင်းဝၢၼ်ႈမိူင်းလီ ၵွပ်ႈယွၼ်ႉၶႂ်ႈယူႇလီမီးငိုၼ်း၊ ႁဵတ်းလွင်ႈၵႃႉၶၢႆလူမ်ၸ်ႂ။ ၵူၺ်းၵႃႈ ဢမ်ႇပဵၼ်ၼင်ႇဝူၼ်ႉမႃး မိူဝ်ႈလ်ႂၵေႃႈၺႃး တၢင်းယၢပ်ႇၽိုတ်ႇ၊ ၶူဝ်းၶွင်ၼႂ်းသူၼ်ၼႂ်းႁိူၵ်ႈၵေႃႈ တႃႇတေၶၢႆသေပဵၼ်ငိုၼ်း ပိူၼ်ႈသမ်ႉတဵၵ်းၵႃႈတဵၵ်းၶၼ်  ဢမ်ႇပၼ်လႆႈၵႃႈၶၼ်သၢင်ႇထုၵ်ႇ၊  ယူႇၼိူဝ်ၵၼ် ၵိၼ်ၸိၵ်းတွၵ်ႇၸွၵ်း ဢမ်ႇတွၼ်ႉပၼ်ၵၼ်သႃႇသေပွၵ်ႈ၊ ပဵၼ်ၸိူင်ႉၼႆႁႃႉ ။