ပီႈၼွင်ႉတႆး ႁႅင်းၵၢၼ်ယၢၼ်မိူင်းသွင်ၵေႃႉၶီႇလူတ်ႉၶိူင်ႈ ၺႃးၵႃးၽႃႇ တီႈၸႄႈဝဵင်းလမ်းပုၼ်း တၢႆထင်တီႈ တင်းသွင်ၵေႃႉ ၽွင်းတိုၵ်ႉၵႂႃႇၸၢႆႇၵၢတ်ႇပွၵ်ႈမႃး ဝႃႈၼႆ ။

ဝၼ်းတီႈ 11/12/2016 ယၢမ်းၵၢင်ၶမ်ႈ 8 မူင်းပၢႆ ၸၢႆးထေးတင်းၸၢႆးၵျီး ထုၵ်ႇလူတ်ႉၵႃးၽႃႇ /တမ်သႂ်ႇတၢႆထင်တီႈ တီႈႁိမ်းဝတ်ႉဢူႇမူင်း သွႆး 8 ၼိူဝ်သဵၼ်ႈတၢင်းလူင် လမ်းပုၼ်း ၵဵင်းမႆႇ၊ ၽွင်းၶႃ သွင်ၵေႃႉ တိုၵ်ႉၸၢႆႇၵၢတ်ႇပွၵ်ႈမႃး။ တေႃႈလဵဝ် ယူႇတီႈ ၾၢႆႇ ၸဝ်ႈ ၼႃႈတီႈပလိၵ်ႈ လႆႈၼမ်းဢဝ် ၶၢပ်ႈတူဝ် တၢႆၶႃတင်းသွင် ၵႂႃႇဝႆႉတီႈႁူင်းယႃ ၵူၼ်းမိူင်း ၸႄႈဝဵင်း လမ်းပုၼ်းဝႆႉယဝ်ႉ ဝႃႈၼႆ ။


ၸၢႆးဝီႉ ၽူႈႁပ်ႉမဝ်ၵေႃႇသၢင်ႈ၊ ပဵၼ်ပေႃႈလဵင်ႉ ၶႃသွင်ၵေႃႉၼၼ်ႉ လၢတ်ႈဝႃႈ “ ၶဝ်သွင်ၵေႃႉ ဢဝ်လူတ်ႉ ၶိူင်ႈၶႃႈႁဝ်းၵႂႃႇၵၢတ်ႇ၊ မိူဝ်ႈၶဝ်သွင်ၵေႃႉ လုၵ်ႉၵၢတ်ႇပွၵ်ႈၶိုၼ်းမႃး၊ ၵႃးသမ်ႉ လုၵ်ႉတၢင်း ၵဵင်းမႆႇ မႃး တၢင်းလမ်းပုၼ်းသေတုမ်ႉၽႃႇၺႃးၵၼ်။ ၵူၺ်းၵႃႈ တၢင်းလႂ်ၽိတ်းဢၼ်ဝႃႈၼၼ်ႉ ၶႃႈႁဝ်းၵေႃႈသမ်ႉဢမ်ႇလႆႈ ႁၼ်တႂ်ႈၼႃႈ တႂ်ႈတႃ ၵူၼ်းႁေႃႈလူတ်ႉၵႃးၼၼ်ႉတႄႉ သွင်ႉပၢႆႈပႅတ်ႈ ယဝ်ႉ၊ ယၢမ်းလဵဝ် လူတ်ႉၵႃးၼၼ်ႉတႄႉ ယူႇတီႈၸဝ်ႈၼႃႈတီႈပလိၵ်ႈ ၸႄႈဝဵင်းလမ်းပုၼ်း လၢၵ်ႈ ဢဝ် ၵႂႃႇဝႆႉတီႈႁူင်းပလိၵ်ႈယဝ်ႉ၊ ၵူၼ်းႁေႃႈလူတ်ႉၼၼ်ႉ ယူႇတီႈၸဝ်ႈၼႃႈတီႈၶဝ် တေၸွမ်းႁႃ တူဝ်ႁႂ်ႈလႆႈ၊ ၽႂ်ၽိတ်းၽႂ်ထုၵ်ႇတႄႉ ႁဝ်းၵေႃႈဢမ်ႇႁူႉ ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ တေႃႈလဵဝ် တူဝ်တၢႆ ၼွင်ႉၶဝ်သွင်ၵေႃႉၼႆႉ လႆႈဢဝ်ၵႂႃႇဝႆႉတီႈႁူင်းယႃ လမ်းပုၼ်းယဝ်ႉ၊ ၵူၺ်းၵႃႈ ပီႈၼွင်ႉၶဝ် ယူႇတီႈလႂ် တၢင်းလႂ် ၼႂ်းမိူင်းထႆးၼႆႉ ႁဝ်းဢမ်ႇလႆႈႁူႉၸွမ်း။ ၵွပ်ႈၼႆလႄႈ သင်ဝႃႈၽႂ်လႆႈႁပ်ႉႁူႉလွင်ႈၼႆႉယဝ်ႉ ႁႂ်ႈၸွႆႈလၢတ်ႈပၼ်ပီႈၼွင်ႉၶဝ်သွင်ၵေႃႉၽွင်ႈ ” ဝႃႈၼႆ ။


ၸၢႆးထေးတင်း ၸၢႆးၵျီးၼႆႉ ဢႃယုၶႃ မီးမွၵ်ႈ 18-19 ပီ၊ ၸၢႆးထေးၼႆႉ ပဵၼ်ၵူၼ်းၸႃတိ ၸႄႈဝဵင်းမိူင်းယေႃ၊ ၸၢႆးၵျီးသမ်ႉ ပဵၼ်ၵူၼ်းၸႃတိ ၸႄႈဝဵင်းၼမ်ႉၸၢင်၊ ၶဝ်သွင်ၵေႃႉ တိုၵ်ႉႁႃလႆႈ မႃးႁဵတ်းၵၢၼ်ၵေႃႇသၢင်ႈ ၸွမ်းၸၢႆးဝီႉ တိုၵ်ႉလႆႈလၢႆလိူၼ်ၵူၺ်း ဝႃႈၼႆ ။


တူဝ်တၢႆၸၢႆးထေးတင်းၸၢႆးၵျီးၼႆႉ လႆႈၼမ်းဢဝ်ဝႆႉတီႈႁူင်းယႃ ၵူၼ်းမိူင်း ၸႄႈဝဵင်းလမ်းပုၼ်ႉဝႆႉ၊ တေႃႈလဵဝ် ယူႇတီႈၸဝ်ႈၼႃႈတီႈပလိၵ်ႈတင်း ၸၢႆးဝီႉ ၸွမ်းႁႃ ပီႈၼွင်ႉၶဝ်သွင် ၵေႃႉပႆႇႁၼ်၊ ယွၼ်ႉၼၼ် သင်ဝႃႈ ၽႂ်ႁူႉၸၵ်း ထူပ်းႁၼ် ပီႈၼွင်ႉၶဝ်သွင်ၵေႃႉၸိုင် ၶႅၼ်းတေႃႈ ၵပ်းသိုပ်ႇႁႃ ၸၢႆးဝီႉ ၽူႈၸွႆႈႁၢင်ႈႁႅၼ်းတူဝ်တၢႆၶဝ်သေၵမ်း။ မၢႆၾူၼ်း 083-5804645 ။


လႅင်ႇၶၢဝ်ႇ ၸၢႆးလိူၼ်ၶမ်း