သိုၵ်းဝႃႉ သူင်ႇႁႅင်းသိုၵ်း ၼပ်ႉပၢၵ်ႇ ပႃးတင်းၵႃးၵၢပ်ႇလဵၵ်း ပူၼ်ႉပႅၼ်ၶဝ်ႈ ၼႂ်းၼႃႈလိၼ် တပ်ႉသိုၵ်း မိူင်းလႃးသေ ၶဝ်ႈယိုတ်းတပ်ႉပၢင်သဝ်း ဢၼ်မီးဝူင်ႈၵၢင် ၵဵင်းတုင်မိူင်းလႃး၊ တိပႃး ၵူၼ်းသိုၵ်းမိူင်းလႃး ဝႆႉ 150 ပၢႆ၊ မိူဝ်ႈၽွင်းၸုမ်းမိူင်းလႃး ဢမ်ႇတၼ်းတင်ႈတူဝ် ။

ႁၢင်ႈ- သိုၵ်းဝႃႉၶဝ်ႈယိုတ်းတပ်ႉပၢင်သဝ်းမိူင်းလႃး

ဝၼ်းတီႈ 28 ၵၢင်ၼႂ် မွၵ်ႈ 8:00 မူင်း ပၢႆၼၼ်ႉ သိုၵ်းဝႃႉ တပ်ႉၸုမ်း 468 မိူင်းပွၵ်ႉ သူင်ႇႁႅင်းသိုၵ်း ၵႃးလူင် တူင်းၾိူင်း 60 ပၢႆ၊ ႁႅင်းသိုၵ်း 600  ပၢႆ၊ၵႃးၵၢပ်ႇလဵၵ်း 5 လမ်း ၶဝ်ႈၼႂ်းၼႃႈ လိၼ် တပ်ႉသိုၵ်းမိူင်းလႃး ၊ ၶဝ်ႈယိုတ်းဢဝ် တပ်ႉၵိဝ်ႇသၢႆး၊ တပ်ႉလွႆသၢမ်သုမ်၊ လၢၼ်ႇ (ၵဵတ်ႉ) ပၢင်မၢၵ်ႇၾႆး ဢၼ်မီးၼိူဝ်သဵၼ်ႈတၢင်း ၵဵင်းတုင် မိူင်းလႃး၊ တိၺွပ်းၵူၼ်းသိုၵ်း ၸုမ်းမိူင်းလႃး 151 ၵေႃႉ။ ၼႂ်းၼၼ်ႉပွႆႇၶိုၼ်း 17 ၵေႃႉ ။


လွင်ႈၼႆႉၾၢႆႇၸုမ်းမိူင်းလႃးလၢတ်ႈဝႃႈ ယွၼ်ႉယုမ်ႇယမ်ဝႃႈပဵၼ်ဢူၺ်းလီသေ ပွႆႇၸုမ်းဝႃႉၶဝ်ႈမႃး သမ်ႉပူၼ်ႉပႅၼ်ၼိူဝ်ၸုမ်းဢူၺ်းလီၸိူင်ႉၼႆၼႆႉဢမ်ႇထုၵ်ႇလီပဵၼ် တိုၵ်ႉႁႃတၢင်းၵႄႈၵၼ် ႁႂ်ႈပေႃး ပဵၼ်လွင်ႈ လီယူႇဝႃႈၼႆ။ ၾၢႆႇဝႃႉတႄႉလၢတ်ႈဝႃႈ ဢိင်ၼိူဝ်ၶေႃႈၸိသင်တၢင်းၼိူဝ်သေ မႃးလႄႈ ပေႃးဢမ်ႇလႆႈၶေႃႈၸိသင်ႇတၢင်းၼိူဝ် ဢမ်ႇၸၢင်ႈထွၼ်ပွၵ်ႈဝႃႈၼႆ ။


ၸဝ်ႈၶိုၼ်းသႂ် ၽူႈၵွၼ်းႁွင်ႈၵၢၼ် ပျီႇထွင်ႇၸုဢိၼ်သတီႇၵျုတ်ႉ ၾၢႆႇၵမ်ႉၸွႆႈၵၢၼ်ငမ်းယဵၼ် မိူင်းႁူမ်ႈတုမ် လၢတ်ႈဝႃႈ ဢၼ်ၸုမ်းဝႃႉ တင်း ၸုမ်းမိူင်းလႃး တွၵ်ႉတႅၵ်ႉၵၼ်ၸိူင်ႉၼႆၼႆႉ ၸၢင်ႈပဵၼ်ၵွပ်ႈ ၽူႈၼမ်း ၸုမ်းမိူင်းလႃး ၵႆႉၵႂႃႇၼႄႇပျီႇတေႃႇ၊ ၸုမ်းမိူင်းလႃး တုၵ်းယွၼ်းၼႃႈလိၼ်ၽွင်းငမ်းတူဝ်ၵဝ်ႇ သေဢမ်ႇၵႃး သမ်ႉၵႂႃႇၶဝ်ႈပႃး ၼႂ်းၶွမ်ႊမတီႊ ပွင်ပဵၼ်ပၢင်ၵုမ် ပီႁူဝ်ပၢၵ်ႇ 21 ပၢင်လူင် ၼၼ်ႉလႄႈ ဝႃႉလႅပ်ႈမႆႈၸႂ် ၵူဝ်ၸုမ်းမိူင်းလႃးၵႂႃႇၸမ်ၸႂ်လူင်ပွင်ၸိုင်ႈမၢၼ်ႈသိုၵ်းမၢၼ်ႈ  ၸဵမ်ၸိူဝ်းၼႆႉဝႃႈၼႆ ။


ၵူၺ်းၵႃႈ ဢူးဢွင်ႇမျိၼ်ႉ ၽူႈၶၢၼ်ပၢၵ်ႇတပ်ႉသိုၵ်းမိူင်းဝႃႉၽွမ်ႉႁူမ်ႈ တႄႉတွပ်ႇလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ  ဢိင်ၼိူဝ်ပၢႆးယူႇလီဢမ်ႇတဵမ်ထူၼ်ႈလႄႈ ၵဵဝ်ႇၵပ်းလွင်ႈၼႆႉဢမ်ႇလႆႈႁူႉၶၢဝ်ႇၶိုတ်းတၼ်းဝႃႈၼႆ ။


ဢိင်ၼိူဝ်သွင်ၾၢႆႇၶဵင်ႈၶႅင်ၵၢၼ်သိုၵ်းတေႃႇၵၼ်သေ သိုၵ်းမၢၼ်ႈ ၵေႃႈထႅမ်ႁႅင်းသိုၵ်း ၽိုတ်ႉဢိူမ်ႈ ၼႃႈလိၼ်ပွတ်းတွၼ်ႈပဵၼ်ပၼ်ႁႃၵၼ်ၼၼ်ႉယူႇဝႃႈၼႆ။


မိူဝ်ႈပီ 2009 ၽွင်း ၽူႈၵွၼ်းၸုမ်းႁူမ်ႇလူမ်ႈသိုၵ်း ၸွမ်သိုၵ်းယေးမိၼ်ႉ ၸႂ်ႉၸုမ်းယိပ်းၵွင်ႈ ၸိူဝ်းယူႇ လႅၼ်လိၼ် ထႆး လႅၼ်လိၼ်ၶႄႇ ပဵၼ်ႇလႅၵ်ႈပဵၼ် တပ်ႉပႂ်ႉလႅၼ်လိၼ်ၼၼ်ႉ ၸုမ်းဝႃႉ တင်း ၸုမ်းမိူင်းလႃးဢမ်ႇယွမ်း။ ဢိင်ၼိူဝ်ပဵၼ်ဢူၺ်းလီၵၼ်မႃး ၸဵမ်တႄႇၵၢၼ်လုၵ်ႉၽိုၼ်ႉသေ သွင်ၸုမ်း ၽွမ်ႉၵၼ်ထႅမ်ႁႅင်း ၸွမ်းလႅၼ်ၶႅၼ်ႇ သိုၵ်းလူင်ပွင်ၸိုင်ႈမၢၼ်ႈၵုမ်းၵမ် ။