သိုၵ်းမၢၼ်ႈတပ်ႉမမေႃႇ ပႃႈတႂ်ႈတိူင်းသိုၵ်းလႃႈသဵဝ်ႈ တပ်ႉတၢင်ႉယၢၼ်း၊ မိူင်းၵၢဝ် ၶိုၼ်ႈၸူးတပ်ႉသိုၵ်းၸိုင်ႈတႆး (SSPP/SSA) ၼႃႈတၢင်းၸၢၼ်းလွႆၸေး၊ သွင်ၾၢႆႇပဵၼ်ပၢင်တိုၵ်းၵၼ် တေႃႇၶမ်ႈလပ်းသိင်ႇၼႆႉ ။

ဝၼ်းတီႈ 28/08/2016 (မိူဝ်ႈၼႆႉ) ၶၢဝ်းယၢမ်း 16:14 မူင်း၊ ၸုမ်းသိုၵ်းမၢၼ်ႈ တပ်ႉမတေႃႇ ၾၢႆႇတႂ်ႈၵၢၼ် ၵုမ်းၵမ် တိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ၶမယ) လႃႈသဵဝ်ႈ တင်း တပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ်တီႈ ၵွင်းဢိူၵ်ႇလႅင် (ၵွင်းလွႆလႅင်) ႁိမ်းၶူဝ်တုမ်း ဢိူင်ႇမိူင်းၵၢဝ် ၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ။


လွင်ႈတၢင်းလႆႈပဵၼ်ပၢင်တိုၵ်းၼႆႉ ဢွၼ်ၼႃႈၼၼ်ႉ ၾၢႆႇသိုၵ်းမၢၼ်ႈ (ပိဝ်ႇႁႃႇမၢႆ 3 တၢင်ႉယၢၼ်း) ဢဵၼ်ႁႅင်း 30 ၵေႃႉ လုၵ်ႉတၢင်းတၢင်ႉယၢၼ်း မႃးႁူမ်ႈတပ်ႉ 33 မိူင်းၵၢဝ်ထႅင်ႈ 30 ၵေႃႉ၊ ႁၢင်ႈႁႅၼ်းၶူဝ်းဝႆႉတီႈ ဝၢၼ်ႈပဵင်းသၢႆး ထႅင်ႈ 30 ၵေႃႉသေ လုၵ်ႉတၢင်းမိူင်းၵၢဝ် ၶိုၼ်ႈလေႃႇတိုၵ်းတပ်ႉသိုၵ်းၸိုင်ႈတႆး (SSPP/SSA) ၼႃႈတၢင်းၸၢၼ်း လွႆၸေး- ၵူၼ်းပွတ်းမိူင်းၵၢဝ် ၵေႃႉၼိုင်ႈလၢတ်ႈ ။


သိုပ်ႇလၢတ်ႈဝႃႈ- တေႃႇထိုင်ၵၢင်ၶမ်ႈယၢမ်း 7 မူင်းၼႆႉၵေႃႈ သွင်ၾၢႆႇတိုၵ်ႉပဵၼ်ပၢင်တိုၵ်းၵၼ်ယူႇ၊ ၾၢႆႇသိုၵ်းမၢၼ်ႈတိုၵ်ႉဢဝ်ၵွင်ႈလူင်ယိုဝ်းသႂ်ႇၸူး တပ်ႉသိုၵ်းၸိုင်ႈတႆး (SSPP/SSA) ယူႇ- ဝႃႈၼႆ ။


ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA)ၼႆႉ ဢၼ်ပဵၼ်ၸုမ်းလူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ်ဝႆႉ တင်းလူင်ပွင်ၸိုင်ႈမၢၼ်ႈ/သိုၵ်းမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်း ႁူမ်ႈတုမ်။ ထုင်ႉလွႆၸေးလွႆလၢၼ်း ၸႄႈဝဵင်းတၢင်ႉယၢၼ်းၼႆႉ SSPP/SSA ပၵ်းယူႇမႃးၶၢဝ်းတၢင်းႁိုင်။ တႃႇတေထွၼ်ဢွၵ်ႇပၼ် ၸွမ်းၼင်ႇၾၢႆႇသိုၵ်းမၢၼ်ႈၸီႉသင်ႇမႃးၼၼ်ႉ မၼ်းယၢပ်ႇ ။


ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်းႁွင်ႈၵၢၼ်ၾၢႆႇၶၢဝ်ႇ SSPP/SSA ယၢမ်ႈလၢတ်ႈဝႃႈ- တၢင်းပွတ်းလွႆၸေး လွႆလၢၼ်း ၼႂ်းၸႄႈဝဵင်းတၢင်ႉယၢၼ်းၼႆႉ SSA ပၵ်းယူႇမႃးမီး 40-50 ပီမိူင်းယဝ်ႉ၊ လွင်ႈၼႆႉ ၶႂ်ႈႁႂ်ႈၾၢႆႇသိုၵ်းမၢၼ်ႈၶဝ်ႁူႉပွင်ႇ၊ ယႃႇပေမႃးၸႂ်ႉႁဝ်းထွႆ ၼႆၵေႃႈလၢတ်ႈၶဝ်ၵႂႃႇယူႇ။ ပေႃးဝႃႈ SSPP/SSA ထွၼ်ဢွၵ်ႇထုင်ႉၼႆႉပၼ်ၶဝ်ၸိုင် တၢင်းတွၼ်ႈပွတ်းတႂ်ႈ တၢင်းမိူင်းသူႈၵေႃႈ တေလႆႈထွၼ်ပၼ်။ ပေႃးဢဝ်ပၢႆးၵၢၼ်သိုၵ်းဝႃႈ ၾၢႆႇသိုၵ်းမၢၼ်ႈၶဝ်ၵိၼ်ၶၢတ်ႇၵႂႃႇ။ ၵွပ်ႈၼၼ် မိူၼ်ၸိူင်ႉၼင်ႇပၼ်ဢၼုၺၢတ်ႈ ႁႂ်ႈသိုၵ်းမၢၼ်ႈမႃးလွမ်ႉႁွပ်ႈဝၢၼ်ႈႁႆး ၵမ်းလဵဝ်ယဝ်ႉ၊ ၵွပ်ႈၼၼ်လႄႈ တႃႇတေထွၼ်ၼႆႉမၼ်းယၢပ်ႇ- ဝႃႈၼႆ ။


ထုင်ႉသၼ်လွႆၸေးလွႆလၢၼ်းၼႆႉ ပဵၼ်ပိုၼ်ႉတီႈၼႃႈလိၼ် သဵၼ်ႈတၢင်းတိတ်းတေႃႇၵပ်းသိုပ်ႇ ဝႃႉတင်းတႆး (SSPP/SSA) ။ သင်ၸိူဝ်ႉဝႃႈ SSPP/SSA ဢမ်ႇယွမ်းထွၼ်သေ ၾၢႆႇတပ်ႉသိုၵ်းမၢၼ်ႈၶဝ် ႁၢင်ႈသိုၵ်းမႃးလေႃႇတိုၵ်းၵေႃႈ မိူၼ်ၵၼ်တင်းမႃးယွၵ်ႈမွၼ်ႇ တပ်ႉသိုၵ်းမိူင်းဝႃႉၽွမ်ႉႁူမ်ႈယဝ်ႉ- ၽူႈလဵပ်ႈႁဵၼ်း ၵၢၼ်မိူင်း ဢူးၵႃႇမၼိ ယၢမ်ႈလၢတ်ႈဝႆႉၼင်ႇၼႆ ။


ပိုၼ်ႉတီႈၼႃႈလိၼ်တွၼ်ႈၼႆႉ ပူၼ်ႉမႃးမိူဝ်ႈပီ 2014 ၵေႃႈ ၾၢႆႇသိုၵ်းမၢၼ်ႈယၢမ်ႈၸႂ်ႉ SSPP/SSA ထွၼ်ဢွၵ်ႇ။ ဢွၼ်ၼႃႈၼၼ်ႉ မိူဝ်ႈပီ 2011 ၵေႃႈ သိုၵ်းမၢၼ်ႈၸႂ်ႉထွၼ်ပွတ်းတွၼ်ႈၼႆႉသေ သွင်ၾၢႆႇလႆႈပဵၼ်ပၢင်တိုၵ်းၵၼ် ႁၢဝ်ႈႁႅင်း။ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ၼပ်ႉႁူဝ်ႁဵင် လႆႈပၢႆႈၽေးသိုၵ်း ၵႂႃႇယူႇတီႈၼမ်ႉလဝ်း မိူင်းၵၢဝ် ဝဵင်းတၢင်ႉယၢၼ်းၸိူဝ်းၼႆႉ ။