ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတႃႈၶီႈလဵၵ်း ဢွၼ်ႁူဝ်ၼမ်းၼႃႈ ၸတ်းႁဵတ်း ပၢင်တၢၼ်ႈၶႆႈ လိၵ်ႈလၢႆးပၢႆးႁၼ် တီႈဝတ်ႉႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း ၊ မီးၽူႈလူင်ႉလႅၼ်ႇၼႂ်းတႆး 3 ၵေႃႉ ၶဝ်ႈႁူမ်ႈပၼ်တၢင်းႁူႉ ၊ ၵူၼ်းဝၢၼ်ႈၵူၼ်းမိူင်း ၶဝ်ႈႁူမ်ႈထွမ်ႇငိၼ်း ႁႃႈပၢၵ်ႇပၢႆ ။

ဝၼ်းတီႈ 26/07/2016 တင်ႈတႄႇယၢမ်း 19:00-22:00 မူင်း (ၵၢင်ၶမ်ႈ) ၊ ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတႃႈၶီႈလဵၵ်း ဢွၼ်ႁူဝ်ၼမ်းၼႃႈ တင်း ၸုမ်းတူင်ႉၼိုင်တူင်ႇဝူင်းၵူၼ်းတႆး ႁူမ်ႈၵၼ် ၸတ်းႁဵတ်း ပၢင်တၢၼ်ႈၶႆႈလိၵ်ႈလၢႆးပၢႆးႁၼ် တီႈဝတ်ႉဝၢၼ်ႈႁွင်ႇ ႁွင်ႈလိုၵ်ႉ (ဝတ်ႉၽိူဝ်ၶမ်း) ၸႄႈဝဵင်း တႃႈၶီႈလဵၵ်း ၸိုင်ႈတႆးပွတ်းဢွၵ်ႇ ။ ၽူႈမႃးပၼ်ပိုၼ်ႉႁူႉတၢင်းႁၼ် မွၵ်ႈလၢတ်ႈၶေႃႈၵႂၢမ်း တီႈပၢင်တၢၼ်ႈၶႆႈမီး 3 ၵေႃႉ ၊ ႁိုၼ်း ၵႃယၢင်း ၊ ၶုၼ်ယုင်းၶဵဝ်၊ ၶူးသွၼ်လူင်ၸၢႆးၾႃႈ ။ မီးပေႃႈမႄႈၵူၼ်းမိူင်း ၼႂ်းပိုၼ်ႉတီႈတႃႈၶီႈလဵၵ်း လႄႈႁိမ်းႁွမ်း မႃးၶဝ်ႈႁူမ်ႈထွမ်ႇငိၼ်း မွၵ်ႈ 500 ပၢႆ - ၸၢႆးဝၼ်း ၸုမ်းႁူဝ်မိူင်းသႂ် တႃႈၶီႈလဵၵ်း ၊ ဢၼ်ၶဝ်ႈၸွႆႈထႅမ်တႃႇပဵၼ်မႃးပၢင်တၢၼ်ၶႆႈ လၢတ်ႈ ။


ၸၢႆးၾႃႈ မွၵ်ႇလၢတ်ႈဝႃႈ - ၼင်ႇႁိုဝ်တႆးႁဝ်း တေပဵၼ်ၼမ်ႉၼိုင်ႈၸႂ်လဵဝ်ၵၼ်ၼႆႉ တႆးၵူႈၶိူဝ်းၶိူဝ်းၼႆႉ ႁႂ်ႈႁွင်ႉဝႃႈတႆး ပိူင်လဵဝ်ၵူၺ်း ၊ ယႃႇႁႂ်ႈလႆႈၸႅၵ်ႇၽႄၵၼ် ။ ပေႃးဢမ်ႇၼၼ် တႃႇတႆးတေမီးဢဵၼ်ႁႅင်းၵႂႃႇမိူဝ်းၼႃႈၼၼ်ႉ သဵၼ်ႈႁူဝ်ၵူၼ်းတႆးႁဝ်း တေဢေႇၵႂႃႇတိၵ်းတိၵ်း ၊ ယႃႇပေႁႂ်ႈမီးၵၢၼ်ၸႅၵ်ႇၽႄဝႃႈ ႁဝ်းပဵၼ်တႆးလိုဝ်ႉ တႆးၶိုၼ် တႆးလူင် လႂ်ၸိူဝ်းၼႆႉ ။


ႁိုၼ်း ၵႃယၢင်း မွၵ်ႇလၢတ်ႈဝႃႈ- ၸုမ်းပႃႇတီႇၵၢၼ်မိူင်းလႄႈသင် ၊ ပေႃႈမႄႈၵူၼ်းမိူင်းလႄႈသင် ၶႂ်ႈႁဵတ်းသင်ၵေႃႈယဝ်ႉ ပႆႇၸၢင်ႈႁဵတ်းလႆႈတဵမ်တီႈ ၊ ၵွပ်ႈပိူဝ်ႈ မၼ်းတိုၵ်ႉမႃးၶွင်ႉၶမ်ယူႇတီႈ ပိူင်ငဝ်ႈပိုင်းမိူင်း (မၢႆမီႈလၵ်းမိူင်း) 2008 ၸိူဝ်းၼႆႉ ။ ၼွၵ်ႈသေၼၼ်ႉ လၢတ်ႈပႃးလွင်ႈ လိၵ်ႈႁူမ်ႈမၢႆပၢင်လူင် ၊ လွင်ႈသုၼ်ႇလႆႈ ၽဵင်ႇပဵင်း ။ လွင်ႈသုၼ်ႇလႆႈၽဵင်ႇပဵင်းၼႆႉ ၵႃႈပူၼ်ႉမႃးၵူၼ်းမိူင်းတႆး ပႆႇလၢႆႁပ်ႉပူၺ်ႈၽွၼ်းပၢင်ႈမၼ်း သေၸိူဝ်ႉသေပိူင် ၊ ၸိူဝ်းၼႆႉၵေႃႈ တိုၵ်းသူၼ်းပႃးပေႃႈမႄႈၵူၼ်းမိူင်း ႁႂ်ႈလႆႈႁပ်ႉႁူႉၸွမ်း ။


ၶုၼ်ယုင်းၶဵဝ် မွၵ်ႇလၢတ်ႈဝႃႈ - ၸုမ်းတႆးႁဝ်းၶႃႈၼႆႉ မီးယူႇလၢႆမူႇလၢႆၸုမ်း ၊ တင်ႈမူႇၸုမ်းမႃးယဝ်ႉ မၢင်ၸိူဝ်းၼႆႉ ၵဵင်ၸႂ်ၵၼ်သေ လႆႈႁပ်ႉၼႃႈတီႈပုၼ်ႈၽွၼ်း ။ ယုၵ်ႉၼႄတူဝ်ယၢင်ႇမၼ်း ၵူႈဝဵင်းဝဵင်းၼႆႉ မီးၵေႃလိၵ်ႈလၢႆး ယူႇသေတႃႉၵေႃႈ ပေႃးဝႃႈၶွတ်ႇၽွတ်ႈမႃးၸုမ်းပွင်ၵၢၼ်ၸိုင် ၸုမ်းပွင်ၵၢၼ်ၼႆႉ မီးၸိုဝ်ႈမီးသဵင်မၼ်းၵူၺ်း ။ ပေႃးဝႃႈထိုင်ၶၢဝ်း (လူဝ်ႇ)ႁဵတ်းၵၢၼ်မႃးတႄႉတႄႉ ဢမ်ႇပေႃးမီးၽႂ် ။ ပေႃးဝႃႈႁွင်ႉပၢင်ၵုမ်မႃးၼႆ မီးၵူၼ်း 10 ၵေႃႉ မႃးမွၵ်ႈ 2 ၵေႃႉၵူၺ်း၊ ဢၼ်လိူဝ် 8 ၵေႃႉၼၼ်ႉ ၵွပ်ႈဢမ်ႇႁဵတ်းၵၢၼ်တႄႉတႄႉလႄႈ ၼႃႈၵၢၼ်တႃငၢၼ်းႁဝ်း လႆႈယူပ်ႈယွမ်းမႃး ။ မိူဝ်းၼႃႈထႃႇပၢႆမႃး ဢၼ်လႆႈၵဵင်ၸႂ်ၵၼ်သေ လႆႈႁပ်ႉတၼ်းႁဵင်းၼၼ်ႉ ယႃႇႁႂ်ႈလႆႈမီး ၊ ႁႂ်ႈလႆႈမႅင်ႇမွပ်ႈမၢႆပၼ် ၵူၼ်းၸိူဝ်းပႃးၸႂ်ပႃးၶေႃး ၵဵဝ်ႇၵပ်းၵၢၼ်တူင်ႇဝူင်းၵူၼ်းတႆးႁဝ်းၼၼ်ႉ လႆႈႁပ်ႉတၼ်း ႁဵင်းၵႂႃႇ ၊ ႁႂ်ႈမၼ်းလႆႈႁဵတ်းၵၢၼ်ထိုင်တီႈထိုင်လႅၼ် - ၸၢႆးဝၼ်း လၢတ်ႈၵႂႃႇၼင်ႇၼႆ ။


လိူဝ်သေၼၼ်ႉ ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး လုင်းၸၢႆးလူင်မၢဝ်ႉ ၵေႃႈမွၵ်ႇလၢတ်ႈၵႂၢမ်းဝႃႈ - ယိၼ်းၸူမ်းၶွပ်ႈၸႂ်ထိုင် ၽူႈလူင်ႉလႅၼ်ႇတႆး ၊ ပိုၼ်းတႆးႁဝ်းၶႃႈ ဢၼ်လႆႈမႃးမွၵ်ႇလၢတ်ႈၶေႃႈၵႂၢမ်း ။ ယိၼ်းၸူမ်းၶွပ်ႈၸႂ်ပႃး တူင်ႇဝူင်းၵူၼ်းတႆး တႃႈၶီႈလဵၵ်း ၊ ပွၵ်ႈၼႆႉ လႆႈဝႃႈပဵၼ်ပွၵ်ႈဢွၼ်တၢင်းသုတ်း ဢၼ်လႆႈၸတ်းႁဵတ်းပၢင်တၢၼ်ႈၶႆႈ လိၵ်ႈလၢႆးပၢႆးႁၼ် တီႈတႃႈၶီႈလဵၵ်း ။ ၼင်ႇႁိုဝ်တီႈဝဵင်းတႃႈၶီႈလဵၵ်း တေမီးပၢင်တၢၼ်ႈၶႆႈထႅင်ႈၼၼ်ႉ ပေႃႈမႄႈပီႈၼွင်ႉမိူင်းတႃႈၶီႈလဵၵ်း ၵေႃႈယိၼ်းၸူမ်းႁပ်ႉတွၼ်ႈယူႇ - ၼႆယဝ်ႉ ။


မိူဝ်ႈၼႆႉ (ဝၼ်းတီႈ 27/07/2016) တေသိုပ်ႇၶၢဝ်းတၢင်းၵႂႃႇတႃႈလိူဝ်ႇ မိူင်းလဵၼ်း ၊ တေမီးပၢင်တၢၼ်ႈၶႆႈ လိၵ်ႈလၢႆးပၢႆးႁၼ် တီႈဝတ်ႉထၢတ်ႈႁူဝ်ၼမ်ႉ တင်ႈတႄႇဝၢႆးဝၼ်းယၢမ်း 1 မူင်းၵႂႃႇ ။ မိူဝ်ႈၽုၵ်ႈ တႄႇၶၢဝ်းယၢမ်း 1 မူင်း တေမႃးမီးတီႈမိူင်းၵူဝ်း မၢၵ်ႇယၢင်း ။ လိူဝ်သေၼၼ်ႉ တွၼ်ႈတႃႇ မီးပၢင်တၢၼ်ႈၶႆႈၼၼ်ႉ တၢင်းၵဵင်းတုင်ၵေႃႈ မီးလိၵ်ႈမႃးႁွင်ႉမွၵ်ႇထိုင်ဝႆႉ ။


ပိူဝ်ႈတႃႇ ပီႈၼွင်ႉၵူၼ်းမိူင်း တေမႃးၶဝ်ႈႁူမ်ႈထွမ်ႇငိၼ်း တီႈပၢင်တၢၼ်ႈၶႆႈမၢၵ်ႇယၢင်းၼႆႉ ႁဝ်းၶႃႈလႆႈ ဢဝ်ရူတ်ႉၵႃးၵႂႃႇၸွႆႈပိုၼ်ၽၢဝ်ႇပၼ် တၢင်းတႃႈလိူဝ်ႇမိူင်းလဵၼ်း ၊ မိူဝ်ႈၼႆႉ တေသိုပ်ႇၵႂႃႇတၢင်းမိူင်းၽူင်း ၊ ၼင်ႇႁိုဝ်ပီႈၼွင်ႉမိူင်းၽူင်းၶဝ် တေလႆႈႁပ်ႉႁူႉ ၊ ၸိူဝ်းမီးၶၢဝ်းယၢမ်းၵေႃႈ ၼင်ႇႁိုဝ်တေလႆႈမႃး ၶဝ်ႈႁူမ်ႈတီႈမၢၵ်ႇယၢင်း ။ လိူဝ်သေၼၼ်ႉ ၼင်ႇႁိုဝ်လုၵ်ႈလၢၼ်ႁဝ်း တေလႆႈႁူႉပၢႆးပိုၼ်း ၊ ပၢႆးလိၵ်ႈလၢႆး ၊ လွင်ႈၾိင်ႈငႄႈႁိတ်ႈႁွႆးတႆးႁဝ်း - ၸၢႆးဝၼ်း သိုပ်ႇလၢတ်ႈၵႂႃႇၼင်ႇၼႆ ။