ပၢင်ၵုမ်လူင် ဢုပ်ႇၵုမ်လႅၵ်ႈလၢႆႈတၢင်းႁူႉ ႁႃလၢႆးတၢင်းတႃႇငမ်းယဵၼ်မိူင်းႁူမ်ႈတုမ်၊ ဢၼ်ၸတ်းႁဵတ်းၵႂႃႇတီႈ ဝဵင်းလူင်တူၼ်ႈတီးၼၼ်ႉ ႁူဝ်ပဝ်ႈငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၸၢတ်ႈ (NLD) မိူင်းတႆး ၊ တေႃႇၶိၼ်ႇမူဝ်းမူဝ်း ၶဝ်ႈႁူမ်ႈ ၵၢဝ်ႇလၢတ်ႈဝႃႈ - ပၢင်ၵုမ်လူင်ၵၢၼ်မိူင်းမိူင်းတႆးၼႆႉ လမ်ႇလွင်ႈ တွၼ်ႈတႃႇၵေႃႇသၢင်ႈပဵၼ်မႃးၸႄႈမိူင်း ဢၼ်ပိုၼ်ႉထၢၼ်ပဵၼ်ၾႅတ်ႊၻရႄႊလ် ။

“ ပၢင်ၵုမ်ၸိူင်ႉၼႆၼႆႉ လမ်ႇလွင်ႈတႄႉတႄႉ ။ တွၼ်ႈတႃႇလႆႈလွင်ႈငမ်းယဵၼ်လႄႈသင် ၊ တႃႇတေပဵၼ်မႃး ၸႄႈမိူင်းၾႅတ်ႊၻရႄႊလ်လႄႈသင် ၊ ထုၵ်ႇလႆႈမီးပၢင်ၵုမ်ၸိူင်ႉၼႆတႄႉတႄႉ ။ ပေႃးဝႃႈၸတ်းႁဵတ်း ပၢင်ၵုမ်ၸိူင်ႉၼႆၼမ်ၼမ် ၵူၼ်းဝၢၼ်ႈၵူၼ်းမိူင်း / ၸၢဝ်းၶိူဝ်းၵေႃႈတေလႆႈႁူႉမႃးဝႃႈ ၸႄႈမိူင်းၾႅတ်ႊၻရႄႊလ် (Federal State) ၼႆႉ ပဵၼ်သင် ။ ၶေႃႈၸႂ်ႉတိုဝ်းၼႂ်းၾႅတ်ႊၻရႄႊလ်ၼၼ်ႉ ပဵၼ်သင်လၢႆလၢႆ ၊ ဢၼ်တေၵေႃႇသၢင်ႈၾႅတ်ႊၻရႄႊလ်ၼႆႉ ထုၵ်ႇလႆႈမီးသင်လၢႆလၢႆ။ တႃႇတေပဵၼ်မႃးၸႄႈမိူင်း ၾႅတ်ႊၻရႄႊလ်ၼႆႉ ႁဝ်းတေလႆႈႁူမ်ႈမိုဝ်းၵၼ်သေ ႁဵတ်းႁႂ်ႈၼႂ်းၸႄႈတွၼ်ႈႁဝ်းလႆႈၵတ်းယဵၼ် ။ ႁဝ်းတေလႆႈႁူမ်ႈမိုဝ်းၵၼ်ၸိူင်ႉႁိုဝ် ၵူၼ်းဝၢၼ်ႈၵူၼ်းမိူင်းၵေႃႈ တေၶဝ်ႈၸႂ်မႃး ၊ ပေႃးၶဝ်ၶဝ်ႈၸႂ်မႃး ၶဝ်ၵေႃႈတေၸၢင်ႈပၼ်တၢင်းၶႆႈၸႂ် ၼိူဝ်ႁဝ်းၶႃႈၵူၼ်းႁဵတ်းၵၢၼ် တႃႇၸိူဝ်ႉၸၢတ်ႈမႃး ။ ၵွပ်ႈပိူဝ်ႈၸိူင်ႉၼႆလႄႈ ပၢင်ၵုမ်ၵၼ်ၸိူင်ႉၼင်ႇ ဢၼ်ႁဵတ်းၵႂႃႇယၢမ်းလဵဝ်ၼႆႉ ပဵၼ်ပၢင်ၵုမ်လူင် ဢၼ်လမ်ႇလွင်ႈတွၼ်ႈတႃႇ ၸႄႈမိူင်းၾႅတ်ႊၻရႄႊလ် တႄႉတႄႉယဝ်ႉ ”- ႁူဝ်ပဝ်ႈ NLD မိူင်းတႆး တေႃႇၶိၼ်ႇမူဝ်းမူဝ်း လၢတ်ႈ ။


ပၢင်ဢုပ်ႇၵုမ်လႅၵ်ႈလၢႆႈတၢင်းႁူႉ ႁႃလၢႆးတၢင်းတွၼ်ႈတႃႇငမ်းယဵၼ်မိူင်းမၢၼ်ႈ၊ ဢၼ်ႁွင်ႉဝႃႈ ပၢင်ၵုမ်ၵၢၼ်မိူင်း မိူင်းတႆးၼႆႉ လႆႈၸတ်းႁဵတ်းတီႈ (တွင်ႇၵျီးႁေႃႊတႄႊလ်) ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း မိူဝ်ႈဝၼ်းတီႈ 1-2/06/2016 ၼႆႉ ။ ဝၼ်းႁႅၵ်ႈ ၼၼ်ႉ ပႃႊတီႊ NLD ဢမ်ႇၶဝ်ႈႁူမ်ႈပႃး။ ၵူၺ်းၵႃႈ ဝၼ်းထူၼ်ႈ 2 သမ်ႉ တူဝ်ႁူဝ်ပဝ်ႈ NLD မိူင်းတႆး တေႃႇၶိၼ်ႇမူဝ်းမူဝ်း ၵေႃႉမႃးၶဝ်ႈႁူမ်ႈ ။


ပၢင်ၵုမ်လူင် 2 ဝၼ်းၼႆႉ လႆႈၸတ်းပဵၼ် 2 တွၼ်ႈသေ ဢုပ်ႇၵုမ်ၵၼ်ၵႂႃႇ ။ တွၼ်ႈၼိုင်ႈ ပဵၼ်ပိူဝ်ႈတႃႇသၢင်ႈ လွင်ႈၸမ်ၸႂ်ၸိူဝ်ႉၸၢတ်ႈ ။ ထႅင်ႈတွၼ်ႈၼိုင်ႈ ဢုပ်ႇၵုမ်ပၼ်တၢင်းၶႆႈၸႂ် ၵဵဝ်ႇၵပ်းလွင်ႈငမ်းယဵၼ်လႄႈ တႃႇသၢင်ႈၸိုင်ႈမိူင်းႁူမ်ႈတုမ်ၾႅတ်ႊၻရႄႊလ်မိူဝ်းၼႃႈ - ၽူႈၶဝ်ႈၸုမ်း ၽူႈၼမ်းၼႂ်း ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး (CSSU) ၸၢႆးၵျေႃႇၺုၼ်ႉ လၢတ်ႈ ။


“ ပိူင်လူင်မၼ်းတႄႉ လွင်ႈဢုပ်ႇၵုမ်ၵၼ်ၼႆႉ ပႃးလွင်ႈပၼ်တၢင်းၶႆႈၸႂ် ၵဵဝ်ႇၵပ်းလွင်ႈငမ်းယဵၼ်လႄႈ လွင်ႈၸမ်ၸႂ်ၸိူဝ်ႉၸၢတ်ႈ ။ ဝၢႆးၼႆႉမႃးၵေႃႈ တေႁဵတ်းႁိုဝ်ႁႂ်ႈၵူႈပႃႈၵူႈၾၢႆႇလႆႈၶဝ်ႈပႃးမႃး ။ လိူဝ်သေၼၼ်ႉ ၼင်ႇႁိုဝ်ပၢင်တိုၵ်းတေၵိုတ်းၵႂႃႇၼၼ်ႉ တေလႆႈႁဵတ်းႁိုဝ် ။ ထႅင်ႈတွၼ်ႈၼိုင်ႈ လႆႈဢုပ်ႇၵုမ်ၵၼ် တေႁဵတ်းႁိုဝ်ၵေႃႇတင်ႈမိူင်းႁူမ်ႈတုမ်ၾႅတ်ႊၻရႄႊလ် ဝၼ်းမိူဝ်းၼႃႈ ။ တႃႇတေဢွၼ်ႁူဝ်ၼမ်းၼႃႈၵၢၼ်မိူင်းၼႆႉ တေဢဝ်ၸွမ်ၸိုင်ႈၼမ်းၼႃႈၵႂႃႇႁႃႉ ၊ တေဢဝ်လူင်ပွင်ၸိုင်ႈ ဢွၼ်ႁူဝ်ၼမ်းၼႃႈၵႂႃႇႁႃႉ ၊ ဢမ်ႇၼၼ်ၵေႃႈ တေဢဝ်ၸွမ်ၽွင်းလူင် ဢွၼ်ႁူဝ်ၼမ်းၼႃႈၵႂႃႇႁႃႉ ၸိူဝ်းၼႆႉၵေႃႈလႆႈဢုပ်ႇၵုမ်ၵၼ်ပႃး ၼႂ်းပၢင်ၵုမ်ၼႆႉ ။ ၵၢၼ်ဢုပ်ႇဢူဝ်းၵၼ်တီႈပၢင်ၵုမ်ၼႆႉ ဢၼ်လီဢဝ်ၵႂႃႇလၢတ်ႈၼႂ်းသၽႃး ပဵၼ်ဢီႈသင်လၢႆလၢႆ ၸိူဝ်းၼႆႉၵေႃႈ လႆႈဢုပ်ႇၵုမ်ၵၼ်ၵႂႃႇ ။ ယၢမ်းလဵဝ် ဢၼ်ၶႂ်ႈလႆႈလွင်ႈငမ်းယဵၼ်ၼႆႉ ဢမ်ႇၸႂ်ႈမိူင်းတႆးမိူင်းလဵဝ်ၵူၺ်း ၊ ပႃးၸဵမ်ၵူႈၸႄႈတိူင်းလႄႈၵူႈၸႄႈမိူင်း ။ ဢၼ်လႆႈႁူပ်ႉထူပ်းၽေးသိုၵ်းသိူဝ်ယူႇယၢမ်းလဵဝ်ၼႆႉ ပဵၼ်ၼႂ်းၸႄႈမိူင်း - ၸၢႆးၵျေႃႇၺုၼ်ႉ လၢတ်ႈ ။


တေႃႇၶိၼ်ႇမူဝ်းမူဝ်း လၢတ်ႈတီႈၼႂ်းပၢင်ၵုမ်ထႅင်ႈဝႃႈ - ဢၼ်လႆႈႁူပ်ႉထူပ်းၽေးၵူႈလွင်ႈလွင်ႈ၊ ထူပ်းၽေး သိုၵ်းသိူဝ် ၼႂ်းၵၢပ်ႈပၢၼ်ဝၢၼ်ႈမိူင်းလႅၵ်ႈလၢႆႈၼႆႉ မိူင်းတႆးၼႆႉပဵၼ်မိူင်းၼိုင်ႈ ။ မိူၼ်ၼင်ႇမိူင်းတႆးၼႆႉ တီႈလိၼ်ၵေႃႈၵႂၢင်ႈ ၊ ၸၢဝ်းၶိူဝ်းၵေႃႈၼမ် ၊ ၸုမ်းယိပ်းၵွင်ႈၵၢင်ႇၵေႃႈၼမ် ။ ၵွပ်ႈၼၼ်လႄႈ ၵူၼ်းဝၢၼ်ႈ ၵူၼ်းမိူင်းၵေႃႈ ႁူပ်ႉထူပ်းလွင်ႈလိူတ်ႇႁွၼ်ႉမႆႈၸႂ်ၼမ် ၊ လွင်ႈငမ်းယဵၼ်ၵေႃႈ ၼၢၼ်းလႆႈလိူဝ်ၵူႈတီႈ ။ ၵွပ်ႈၼၼ်လႄႈ ၼင်ႇႁိုဝ်တေလႆႈလွင်ႈငမ်းယဵၼ်ဢၼ်ၸိုၼ်ႈၸၢင်ႇၼႆႉ ၸၢဝ်းၶိူဝ်းၼႂ်းမိူင်းတႆးတင်းသဵင်ႈ ၊ ပႃႊတီႊၵၢၼ်မိူင်းမိူင်းတႆးတင်းသဵင်ႈ ၊ ၸုမ်းယိပ်းၵွင်ႈၵၢင်ႇတင်းသဵင်ႈ တၵ်းတေလႆႈႁူမ်ႈမိုဝ်းၵၼ် ၶတ်းၸႂ်ႁဵတ်းသၢင်ႈၵႂႃႇ - ဝႃႈၼႆ ။


ပၢင်ၵုမ် ဢၼ်ၸတ်းႁဵတ်းၵႂႃႇၶၢဝ်းတၢင်း 2 ဝၼ်း (1-2/6/2016)ၼႆႉ ဢမ်ႇမီးၶေႃႈတႅပ်းတတ်းလႆႈၸႂ်သင်ၵၼ် ၊ ဢမ်ႇမီးပၢင်သပ်းၸႅင်ႈၶၢဝ်ႇ ၊ ဢမ်ႇမီးၶေႃႈပိုၼ်ၽၢဝ်ႇသင်သေပိူင် ၊ ဢုပ်ႇၵုမ်ၵၼ်ၵႂႃႇလွတ်ႈလွတ်ႈ လႅဝ်းလႅဝ်း လႅၵ်ႈလၢႆႈတၢင်းႁူႉၵၼ်ၵႂႃႇၸိူင်ႉၼၼ်ၵူၺ်း - ၼႆယဝ်ႉ ။