ပီႈၼွင်ႉတႆးဢၼ်မီးယူႇတီႈၼွၵ်ႈမိူင်းလၢႆတီႈႁူမ်ႈလူႇငိုၼ်းၸွႆႈထႅမ်ၵူၼ်းထူပ်းၽေးဢၼ်သူင်ႇလတ်းၽၢၼ်ႇၸုမ်းၶၢဝ်ႇၽူႈတွႆႇႁွၵ်ႈၼၼ်ႉယၢမ်းလဵဝ်သူင်ႇမွပ်ႈပၼ်ၼႂ်းမိုဝ်းၵူၼ်းထူပ်းၽေးယဝ်ႉ ။

ဢိင်ၼိူဝ်ပီႈၼွင်ႉတႆးၸိူဝ်းယူႇၼွၵ်ႈမိူင်းလၢႆတီႈမိူၼ်ၼင်ႇ မိူင်းUSA ၊ မိူင်းၶႄႇ ၊ မိူင်းထႆးၸိူဝ်းၼႆႉ ဢွၼ် ၵၼ်လူႇငိုၼ်းဢူၼ်းမႃးတီႈၸုမ်းၶၢဝ်ႇၽူႈတွႆႇႁွၵ်ႈလႄႈၸုမ်းတူင်ႇဝူင်းၵူၼ်း Shan CBO’s ၵဵင်းမႆ ၸိုင်ႈထႆး ။ ငိုၼ်းထႆး 120,000 လႅၵ်ႈလႆႈငိုၼ်းမၢၼ်ႈ 40 သႅၼ်ၵျၢပ်ႈၼၼ်ႉ သူင်ႇမိူဝ်ႈတီႈၵေႃႇမတီႊ ၸွႆႈထႅမ်ၵူၼ်းထူပ်းၽေးတီႈမိူင်းသူႈယဝ်ႉ ။


ဝၼ်းတီႈ 07/06/2016 ၸုမ်းၵူၼ်းၼုမ်ႇမိူင်းသူႈဢဝ်ငိုၼ်း 40 သႅၼ်ၵျၢပ်ႈ ၼႆႉ ၵႂႃႇသိုဝ်ႉၶဝ်ႈ သၢၼ်တႃႇ 157 ထုင် ၵႂႃႇၸွႆႈထႅမ်ၵူၼ်းထူပ်းၽေးတီႈ ႁူင်းသဝ်းၵူၼ်းပၢႆႈၽေးဝၢၼ်ႈႁၢႆးပႃ ဝဵင်းမိူင်းသူႈ ၸိုင်ႈတႆးပွတ်းၸၢၼ်း ။


ၸၢႆးႁၵ်ႉၶိူဝ်း ၽူႈထတ်းလိၵ်ႈ (Editor) ၸုမ်းၶၢဝ်ႇၽူႈတွႆႇႁွၵ်ႈလၢတ်ႈဝႃႈ - “ လႆႈႁူႉဝႃႈၶဝ်ႈၵိၼ် မူတ်းၵႂႃႇမိူဝ်ႈလိူၼ်မေႊ ငိုၼ်းပႅၵ်ႉတေႃႇၸွႆႉ ဢၼ်ပီႈၼွင်ႉႁဝ်းၶႃႈၸွႆႈထႅမ်မႃးၼႆႉမီးၵႃႈၶၼ် တွၼ်ႈတႃႇပီႈၼွင်ႉၵူၼ်းထူပ်းၽေးတႄႉတႄႉ ။ ၵူၼ်းပၢႆႈၽေးတီႈႁၢႆးပႃၼႆႉ ယၢမ်းလဵဝ် တိုၵ်းမီးယူႇႁဵင်ပၢႆ ”။


မေႃသွၼ် ၼၢင်းသႅင်ႁိူင်း လၢတ်ႈဝႃႈ - “ ယိၼ်းၸူမ်းယႂ်ႇၼမ်ထိုင်ၽူႈမီးၼမ်ႉၸႂ်လီၵူႈၵေႃႉၵူႈတီႈ ဢၼ်လႆႈၸွႆႈထႅမ်မႃး မိူဝ်ႈလဵဝ်ၵူၼ်းပၢႆးၽေးတီႈႁၢႆးပႃၼႆႉၵေႃႈတိုၵ်းမီးတၢင်းယၢပ်ႇၽိုတ်ႇတႃႇႁႃၵိၼ် လဵင်ႉတွင်ႉ ႁိူၼ်းၵေႃႈပႆႇၸၢင်ႈပွၵ်ႈၶိုၼ်း ” ဝႃႈၼႆ ။


ဢိင်ၼိူဝ်တပ်ႉသိုၵ်းလူင်ပွင်ၸိုင်ႈမၢၼ်ႈႁႅၼ်းသိုၵ်းလေႃႇတိုၵ်းပႃႊတီႊမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၼႂ်းၸႄႈဝဵင်းမိူင်းသူႈ ၊ ၵေးသီး ၊ တၢင်ႉယၢၼ်းမိူဝ်ႈႁၢင်ႈပီ 2015 သေ ႁဵတ်းႁႂ်ႈၵူၼ်းမိူင်း ၼပ်ႉႁူဝ်ႁဵင်ပၢႆယၢၼ်ဢွၵ်ႇႁိူၼ်းတင်းၼမ် ။ မၢင်ၸိူဝ်းၵေႃႈပွၵ်ႈႁိူၼ်းယဝ်ႉသေတႃႉ ၊ မၢင်ၸိူဝ်းပႆႁတ်း ပွၵ်ႈ ။