ႁူင်းႁဵၼ်းလူင်ပွင်ၸိုင်ႈမၢၼ်ႈတူဝ်ႈမိူင်း ပိုတ်ႇသွၼ်ႁဵၼ်းမႃး လႆႈၶၢဝ်းတၢင်းႁိမ်းလိူၼ်သေတႃႉ ႁူင်းႁဵၼ်းတႃႇ 9 လင် ၊ ၼႂ်းၸႄႈဝဵင်းၵျွၵ်ႉမႄး ၊ ဢၼ်မီးလုၵ်ႈႁဵၼ်း 2,000 ပၢႆၼၼ်ႉ ယင်းပႆႇပိုတ်ႇ ။ လုၵ်ႈႁဵၼ်းၸၼ်ႉၵၢင် တင်းၸၼ်ႉသုင် ၼပ်ႉႁူဝ်ပၢၵ်ႇ လႆႈမႃးသိုပ်ႇၶဝ်ႈ ႁူင်းႁဵၼ်းၼႂ်းဝဵင်းၵျွၵ်ႉမႄး ။

တင်ႈတႄႇဝၼ်းတီႈ 01/06/2016 မႃးၼႆႉ ႁူင်းႁဵၼ်းၼႂ်းၸိုင်ႈမိူင်းႁူမ်ႈတုမ်မၢၼ်ႈပတ်းပိုၼ်ႉ ပိုတ်ႇႁူင်းႁဵၼ်းမႃးယဝ်ႉ ။ ဝၼ်းတီႈ 1 ပဵၼ်ဝၼ်းပိုတ်ႇႁူင်းႁဵၼ်း ၼႂ်းၸိုင်ႈမိူင်းဝၼ်းႁႅၵ်ႈ ။ ၵူၺ်းၵႃႈ ႁူင်းႁဵၼ်းလူင်ပွင်ၸိုင်ႈမၢၼ်ႈ ၼႂ်းဢိူင်ႇပၢင်မၢၵ်ႇမိုဝ်း ၊ ဢိူင်ႇတေႃႉသၢင်ႇလႄႈ ဢိူင်ႇပၢင်ၸၢမ် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၸိူဝ်းၼႆႉ  တင်းမူတ်း 9 လင် ၊ ဢၼ်မီးလုၵ်ႈႁဵၼ်းတင်းမူတ်း 2,000 ပၢႆၼၼ်ႉ ယင်းပႆႇပိုတ်ႇႁဵၼ်းပိုတ်ႇသွၼ်။ ႁဵတ်းႁႂ်ႈလုၵ်ႈႁဵၼ်းတႃႇ 400 ပၢႆ လႆႈသိုပ်ႇၶၢႆႉမႃးၶဝ်ႈႁူင်းႁဵၼ်း တီႈၼႂ်းဝဵင်းၵျွၵ်ႉမႄး - ၼႆယဝ်ႉ ။


ၸၢႆးတၢၼ်းမွင်ႇ ၽူႈၶဝ်ႈၶွမ်ႊမတီႊငဝ်ႈငုၼ်း ပႃႊတီႊႁူဝ်သိူဝ် ၵျွၵ်ႉမႄး (SNLD)  လၢတ်ႈဝႃႈ - “တေႃႈလဵဝ် ယူႇတီႈႁူင်းယႃႈယႃသိူဝ်ႁႃႈတူဝ် လႆႈႁပ်ႉလဵင်ႉလူပၼ်လုၵ်ႈဢွၼ်ႇပၢႆႈၽေးသိုၵ်း တႃႇၶိုၼ်ႈႁူင်းႁဵၼ်းမီး 41 ၵေႃႉ ။ လုၵ်ႈဢွၼ်ႇၸိူဝ်းၼႆႉ ၸပ်းတၢင်းပဵၼ်ၵေႃႈၼမ် ။ မိူၼ်ၼင်ႇၸပ်းတၢင်းပဵၼ်တွင်ႉၸဵပ်း၊ တွင်ႉႁႄႈတွင်ႉၵႃႇ ၊ ၼၢဝ် ၊ ႁူဝ်ၸဵပ်းႁူဝ်ၶႆႈ ၸဵမ်ၸိူဝ်းၼႆႉ ။ ၸၢင်ႈပဵၼ်ယွၼ်ႉ လုၵ်ႈဢွၼ်ႇတေဝူၼ်ႉၼမ် ၵေႃႈပိူင်ၼိုင်ႈ ၊ ၸႂ်ထိုင်ပေႃႈမႄႈတီႈႁေႃတီႈႁိူၼ်းသေ ၶႂ်ႈပွၵ်ႈမိူဝ်းၶိုၼ်းႁိူၼ်းၵေႃႈပိူင်ၼိုင်ႈ ။ ထႅင်ႈၾၢႆႇၼိုင်ႈသမ်ႉ ၶဝ်တေၵိၼ်မၢၵ်ႇသူမ်ႈမၢၵ်ႇဝၢၼ်ၵေႃႈပိူင်ၼိုင်ႈ ” - ဝႃႈၼႆ ။


လုၵ်ႈဢွၼ်ႇပၢႆႈၽေး ၸိူဝ်းၶၢႆႉမႃးယူႇသဝ်းတီႈၼႂ်းဝဵင်းၵျွၵ်ႉမႄးသေ သိုပ်ႇၶဝ်ႈႁူင်းႁဵၼ်းၼၼ်ႉ ပိုင်ႈဢိင်ယူႇသဝ်း တီႈဝတ်ႉႁူဝ်ဝဵင်း မီး 40 ၵေႃႉပၢႆ ၊ ဝတ်ႉဢွင်ႇသူႉပၢၼ်ႇ 79 ၵေႃႉလႄႈ တီႈႁူင်းယႃႈယႃသိူဝ်ႁႃႈတူဝ် 41 ၵေႃႉ ။ ၼွၵ်ႈသေၼၼ်ႉ  လုၵ်ႈဢွၼ်ႇၸိူဝ်းယူႇသဝ်းႁိူၼ်းပီႈႁိူၼ်းၼွင်ႉ ၼႂ်းဝဵင်းၵျွၵ်ႉမႄး မီးထႅင်ႈမွၵ်ႈ 200 ပၢႆ ၊ ႁူမ်ႈၵၼ်တင်းမူတ်းမီး 400 ပၢႆ ။ လုၵ်ႈဢွၼ်ႇၸိူဝ်းပၢႆႈၽေးသိုၵ်းသေ မႃးသိုပ်ႇၶဝ်ႈႁဵၼ်း တီႈၼႂ်းဝဵင်းၵျွၵ်ႉမႄးၼႆႉ ပဵၼ်လုၵ်ႈဢွၼ်ႇ ၸိူဝ်းတိုၵ်ႉၶိုၼ်ႈႁူင်းႁဵၼ်းၸၼ်ႉ 5 ထိုင်ၸၼ်ႉ 10 ။ လုၵ်ႈႁဵၼ်းၸၼ်ႉငဝ်ႈထိုင်ၸၼ်ႉ 4 ၶဝ် ဢမ်ႇမႃးၶိုၼ်ႈ ၊ ယွၼ်ႉဝႃႈတိုၵ်ႉလဵၵ်ႉယူႇလႄႈဢမ်ႇမႃး- ၼႆယဝ်ႉ ။


ႁူင်းႁဵၼ်းလူင်ပွင်ၸိုင်ႈမၢၼ်ႈ ၼႂ်းဢိူင်ႇပၢင်မၢၵ်ႇမိုဝ်း ၊ ဢိူင်ႇပၢင်ၸၢမ်လႄႈ ဢိူင်ႇတေႃႉသၢင်ႇၸိူဝ်းၼႆႉ တင်းမူတ်းလုၵ်ႈႁဵၼ်းမီး 2,000 ပၢႆ ၊ ဝၢၼ်ႈၵူၼ်းတင်းမူတ်းမီး 18 ဝၢၼ်ႈ ။ ႁူင်းႁဵၼ်းဢၼ်ပႆႇလႆႈ ပိုတ်ႇသွၼ်ႁဵၼ်းၶိုၼ်းမီး 9 လင် ၊ ႁူင်းႁဵၼ်းၸၼ်ႉငဝ်ႈ ၊ ႁူင်းႁဵၼ်းၸၼ်ႉၵၢင်လႄႈ ႁူင်းႁဵၼ်းၸၼ်ႉသုင် ။


လွင်ႈတၢင်းဢၼ်လႆႈဢိုတ်းႁူင်းႁဵၼ်း ၊ ႁၢၼ်ႉတေႃႇမိူဝ်ႈလဵဝ် ပႆႇပဵၼ်ပိုတ်ႇသွၼ်ႁဵၼ်းၶိုၼ်းၼႆႉ ယွၼ်ႉတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) တင်း တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ်။ သိုၵ်းတဢၢင်း / လွႆ TNLA တင်းသိုၵ်းမၢၼ်ႈ တပ်ႉမတေႃႇ ပဵၼ်ပၢင်တိုၵ်းၵၼ် ၸိူဝ်းၼႆႉ ၊ ႁဵတ်းႁႂ်ႈၵူၼ်းဝၢၼ်ႈ / လုၵ်ႈႁဵၼ်း လႆႈပၢႆႈၽေးသိုၵ်း ၊ ငဝ်းလၢႆးၼႂ်းပိုၼ်ႉတီႈဢမ်ႇၵတ်းယဵၼ် ။