ဝၼ်းတီႈ 05/05/2016 မႃးၼႆႉသိုၵ်းမၢၼ်ႈဢၼ်မႃးတင်ႈလၢၼ်ႇ (ၵဵတ်ႉ) တီႈဝၢၼ်ႈသွၼ်း ထုင်ႉလွႆ ႁူဝ်သိူဝ်ၸႄႈမိူင်းၶၢင် မၵ်းမၼ်ႈၶၢဝ်းယၢမ်းပိၵ်ႉ၊ပိုတ်ႇလၢၼ်ႇ (ၵဵတ်ႉ)  ပိုတ်ႇၵၢင်ၼႂ် 08:00 လႄႈ ၵၢင်ၶမ်ႈ 05:00 ပိုတ်ႇပၼ် 1 – 2 ၸူဝ်ႈမူင်းၵူၺ်း မၢင်ပွၵ်ႈ ၵေႃႈပိၵ်ႉၵႂႃႇႁိုင်ႁိုင်ၵေႃႈမီး လိူဝ်ၼၼ်ႉ သဵၼ်ႈတၢင်းၵေႃႈ ၵႅပ်ႈမႃးလႄႈႁဵတ်းႁႂ်ႈၵႃး ၊ ထူဝ်ႈ ၊ ၵေႃႈဢမ်ႇၵႂႃႇမႃးလႆႈ ၵူၼ်းမိူင်းယၢပ်ႇ ၽိုတ်ႇတႃႇႁႃ ၵိၼ်လဵင်ႉတွင်ႉ ။

ၵူၼ်းၼႂ်းပိုၼ်ႉတီႈ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ -  “ တႃႇတေၵႂႃႇႁဵတ်းႁႆႈ ၊ သူၼ် ၊ ၼႃး ၊ ၵၢၼ်ၵႃႉၵၢၼ်ၶၢႆၵေႃႈဢမ်ႇထၢင်ႇႁၢင်ႈလွတ်ႈလႅဝ်းမိူၼ်မိူဝ်ႈၵွၼ်ႇ ၵွပ်ႈၼၼ်ၶႂ်ႈႁႂ်ႈၽူႈယႂ်ႇၵူၼ်း လူင်ၽူႈမီးပုၼ်ႈၽွၼ်းမႃးၸွႆႈတူၺ်းပၼ်ဢိတ်းၼိုင်ႈ ” ဝႃႈၼႆ ။


ၵူၼ်းၼႂ်းပိုၼ်ႉတီႈထႅင်ႈၵေႃႉၼိုင်ႈၵေႃႈ လၢတ်ႈထႅင်ႈဝႃႈ - “ပေႃးပဵၼ်လႆႈၶႂ်ႈႁႂ်ႈပဵၼ်မိူၼ်ပၵ်းၵဝ်ႇပိူင် ၵဝ်ႇၶႂ်ႈႁႂ်ႈၵႂႃႇမႃးလႆႈထၢင်ႇႁၢင်ႈလွတ်ႈလႅဝ်းယဝ်ႉၵေႃႈတီႈၼႆၼႆႉမၼ်းဢမ်ႇမီးပၢင်တိုၵ်းလူး ၵွပ်ႈၼၼ် လႄႈဢမ်ႇထုၵ်ႇလီၶဵင်ႈၶႅင်ၸိူင်ႉၼႆယွၼ်ႉမၼ်းႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းၵႂႃႇမႃးႁႃၵိၼ်လဵင်ႉတွင်ႉ ယၢပ်ႇၽိုတ်ႇၵိၼ်းၸႂ် ” ဝႃႈၼႆ ။


ဝၢၼ်ႈသွၼ်း ထုင်ႉလွႆႁူဝ်သိူဝ် ၸႄႈမိူင်းၶၢင်ၼႆႉ မီးလင်ႁိူၼ်း 200 ပၢႆ ၵဵတ်ႉသိုၵ်းမၢၼ်ႈမႃးပၵ်းဝႆႉ ၼႆႉပဵၼ် ၼိူဝ်သဵၼ်ႈတၢင်းဢၼ်ၵူၼ်းဝၢၼ်ႈၼႂ်းထုင်ႉလွႆႁူဝ်သိူဝ် 18 ဝၢၼ်ႈ ၵႂႃႇမႃးၵႃႉၶၢႆ ပဵၼ်သဵၼ်ႈတၢင်း လတ်းၶဝ်ႈၵႂႃႇၼႂ်းမိူင်းၶႄႇဝႃႈၼႆ ။