ဢိင်ၼိူဝ် ၵေႃႁူမ်ႈသၢင်ႈၸိုင်ႈတႆး (SSJAC) ၵေႃႇတင်ႈမႃးၶွပ်ႈတဵမ် 20 ပီလႄႈ ၸိူဝ်းပဵၼ်လုၵ်ႈၸုမ်း ႁူမ်ႈၵၼ်ၸတ်းႁဵတ်းပၢင်ၵႅဝ်ႈ ၶုၵ်းထူပ်း တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ မီးလုၵ်ႈၸုမ်းလႄႈ ပီႈၼွင်ႉၵူၼ်းဝၢၼ်ႈၵူၼ်းမိူင်းၶဝ်ႈႁူမ်ႈၼပ်ႉႁူဝ်ပၢၵ်ႇ။

ဝၼ်းတီႈ 06/06/2016 ဝၼ်းမိူဝ်ႈၼႆႉ တီႈပၢင်ၵႅဝ်ႈၶုၵ်းထူပ်း ၵေႃႁူမ်ႈသၢင်ႈၸိုင်ႈတႆး (SSJAC) ၶွပ်ႈတဵမ် 20 ပီၼၼ်ႉ ၽူႈယႂ်ႇၵူၼ်းလူင်ၸိူဝ်းၶဝ်ႈႁူမ်ႈမီး ႁူဝ်ပဝ်ႈၵေႃႁူမ်ႈသၢင်ႈၸိုင်ႈတႆး (SSJAC) ၸဝ်ႈၶုၼ်ထုၼ်းဢူး။ ၽူႈၼမ်းၼႃႈ ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၸွမ်သိုၵ်းလူင်သိူဝ်ထႅၼ်ႈ။ ႁူဝ်ၼႃႈၸုမ်းပီႇတုၸိတ်ႉသႅင်ၵႅဝ်ႉ ၸွမ်ႁၢၼ်လွႆမၢဝ်းလႄႈ ၸွမ်ႁၢၼ်ၵၢႆႇၾႃႉ ၸိူဝ်းၼႆႉ။ မီးလုၵ်ႈၸုမ်းလႄႈ ၼွင်ႉၵူၼ်းဝၢၼ်ႈၵူၼ်းမိူင်းၶဝ်ႈႁူမ်ႈ 500 ၵေႃႉပၢႆ။


တီႈပၢင်ၵႅဝ်ႈၼၼ်ႉ ႁူဝ်ပဝ်ႈလူင် SSJAC ၸဝ်ႈၶုၼ်ထုၼ်းဢူး ၵၢဝ်ႇလၢတ်ႈဝႃႈ- ယိူင်းဢၢၼ်းဢၼ်လႆႈ ၶွတ်ႇၽွတ်ႈမႃး ၵေႃႁူမ်ႈသၢင်ႈၸိုင်ႈတႆး (SSJAC) ၼႆႉ ပိူင်လူင်မၼ်း ပိူဝ်ႈတႃႇႁူမ်ႈသၢင်ႈၼႂ်းၵၢၼ်ပၢႆးမိူင်း။ ပိူဝ်ႈတႃႇမီးသုၼ်ႇလႆႈၽဵင်ႇပဵင်းၵၼ်ၵူႈၸၢဝ်းၶိူဝ်း ပႃးၸဵမ်မၢၼ်ႈ။ ၼင်ႇႁိုဝ်တေမီးသုၼ်ႇလႆႈၽွင်းငမ်းတူဝ်ၵဝ်ႇ၊ ၸႄႈမိူင်းၽႂ်ၵေႃႈႁႂ်ႈမိူင်းၼၼ်ႉ လႆႈၽွင်းငမ်း- ဝႃႈၼႆ။


ႁူဝ်ၼႃႈပီႇတုၸိတ်ႉသႅင်ၵႅဝ်ႉ ၸွမ်ႁၢၼ်လွႆမၢဝ်း ၵၢဝ်ႇလၢတ်ႈဝႃႈ- ဢိင်ၼိူဝ်ဝႃႇတၵူၼ်းၶိူဝ်းယႂ်ႇ ဝႃႇတၸဝ်ႈၵဝ်ႇ ပဵၼ်ယႂ်ႇ။ ဢိင်ၼိူဝ်ဢမ်းၼၢၸ်ႈ(ဢႃႇၼႃႇ)သိုၵ်းသေ ၸင်ႇလႆႈပဵၼ်မႃးပၢင်တိုၵ်းၼႂ်းမိူင်း (ၵၢင်မိူင်း)။ ၵွပ်ႈၼၼ် ၼင်ႇႁိုဝ်ပၢင်တိုၵ်းၼႂ်းမိူင်း ပၼ်ႁႃၼႂ်းမိူင်းပေႃးတေယဝ်ႉတူဝ်ႈ ၵတ်းယဵၼ်ၼၼ်ႉ တၵ်းတေလႆႈမီး လွင်ႈၽဵင်ႇပဵင်း၊ မီးလွင်ႈၶိုၼ်ႈသင်ႉၶိုၼ်ႈသုင်ၵႂႃႇ ၽဵင်ႇၽဵင်ႇပဵင်းပဵင်းၵၼ် ၸင်ႇတေၵိုတ်းလႆႈလွင်ႈၼႆႉ- ဝႃႈၼႆ။


မိူဝ်ႈပီ 1996 လိူၼ်ၵျုၼ်ႊ 6 ဝၼ်းၼၼ်ႉ ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ႁူဝ်ပဝ်ႈၸဝ်ႈၶုၼ်ထုၼ်းဢူး။ ၽူႈၼမ်းတပ်ႉသိုၵ်းၸိုင်ႈတႆး SSA ၸွမ်ႁၢၼ်ၸၢႆးၼွင်ႉ။ ၽူႈၼမ်း တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (SSNA) ၸဝ်ႈသိုၵ်းလူင်ၵၢၼ်းယွတ်ႈ၊ 3 ၸဝ်ႈ 3 ၸုမ်းၸိူဝ်းၼႆႉဢွၼ်ႁူဝ် ႁူမ်ႈၵၼ်ၵေႃႇတင်ႈမႃး  ၵေႃႁူမ်ႈသၢင်ႈၸိုင်ႈတႆး (SSJAC) ။ မိူဝ်ႈတႄႇၶွတ်ႇၽွတ်ႈၼၼ်ႉ ၸႂ်ႉၸိုဝ်ႈဝႃႈ ၶွင်ႊသီႊငမ်းယဵၼ်ၸိုင်ႈတႆး (SSPC) ၊ ဝၢႆးမႃးၶိုၼ်းလႅၵ်ႈလၢႆႈပဵၼ် ၵေႃႁူမ်ႈသၢင်ႈၸိုင်ႈတႆး (SSJAC) မႃးတေႃႇထိုင်ယၢမ်းလဵဝ်၊ လႆႈမႃး 20 ပီတဵမ်ယဝ်ႉ။

(ၵၢၼ်မိူင်း)