ၵူၼ်းၼုမ်ႇတႆး ပွၵ်ႉၼိူဝ် ဝဵင်းၼမ်ႉၶမ်း သွင်ၵေႃႉ ၸူဝ်းၵၼ်ၵႂႃႇၵိၼ်ၼမ်ႉၼဵင်ႈဝၢၼ်သေ ႁၢႆ ၽၢတ်ႇႁိူၼ်းၵႂႃႇ ၶၢဝ်းတၢင်း 6 ဝၼ်း တေႃႇထိုင်ယၢမ်းလဵဝ်  တၢႆႁိုဝ်၊ လိပ်းႁိုဝ် ပႆႇလႆႈႁူႉၶၢဝ်ႇငၢဝ်း သင်ၸွမ်း ၼႆယဝ်ႉ ။


ဝၼ်းတီႈ 22/06/2016 ယၢမ်း 09:30 မူင်းပၢႆ ၸၢႆးမၢဝ်း ႁွတ်ႈမႃးႁိူၼ်းၸၢႆးမၢဝ်းသႂ်သေ ၸူဝ်းႁွင်ႉၵႂႃႇ ၵိၼ်ၼမ်ႉၼဵင်ႈ ၊ ၶဝ်သွင်ၵေႃႉ ယူႇပွၵ်ႉၼိူဝ် ၸႄႈဝဵင်းၼမ်ႉၶမ်း ၊ ၸူဝ်းႁွင်ႉၵၼ်ၵႂႃႇႁႃၵိၼ် ၼမ်ႉၼဵင်ႈဝၢၼ်သေ ႁၢႆဢွၵ်ႇႁိူၼ်းၵႂႃႇၸိူင်ႉၼၼ်လႄႈ ႁဵတ်းႁႂ်ႈပေႃႈမႄႈမႆႈၸႂ်ၸွမ်းတႄႉၼႆ ၼၢင်းတဵင်းႁၢၼ်ႇ ၵေႃႉပဵၼ်မႄႈၸၢႆးမၢဝ်းသႂ် လၢတ်ႈၼႄၼင်ႇၼႆ ။

ၼၢင်းတဵင်းႁၢၼ်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၼႂ်းဝဵင်းၼမ်ႉၶမ်းၼႆႉ ၶႃႈႁဝ်းၶဝ် ႁႃပေႃးၸႄးၸွၵ်ႇယဝ်ႉ ၸဝ်ႈၼႃႈတီႈပလိၵ်ႈမၢၼ်ႈ ၊ ၽူႈၵွၼ်းပွၵ်ႉၵေႃႈ တင်ႇလၢတ်ႈဝႆႉယဝ်ႉ ၊ ၶႃႈႁဝ်း သွၵ်ႈႁႃလုၵ်ႈၸၢႆးၶႃႈၼႆႉ ပေႃးၶႂ်ႈယွင်ႇတၢႆယဝ်ႉၶႃႈ ၊ မၢင်ၵေႃႉၵေႃႈလၢတ်ႈဝႃႈ ႁၼ်ၶဝ်ၶိုၼ်ႈၵႂႃႇတၢင်းမူႇၸႄႈ သမ်ႉဝႃႈၼႆ ၶႃႈၶဝ်ထူဝ်းထၢမ်တူၺ်း ၊ ၵႂႃႇႁႃၵေႃႈ ဢမ်ႇႁၼ် ။ သင်ဝႃႈ ၽႂ်ႁၼ်တူဝ်ၶဝ် သွင်ၵေႃႉ တၢႆႁိုဝ်၊ လိပ်းႁိုဝ် ၼႆၵေႃႈ ၶႅၼ်းတေႃႈၵပ်းသိုပ်ႇမႃး ပၼ်ၶႃႈႁဝ်း သေၵမ်းၶႃႈ ” ဝႃႈၼ ႆ။


ၵူၼ်းၼုမ်ႇတႆး ဝဵင်းၼမ်ႉၶမ်း ၵေႃႉၼိုင်ႈ လၢတ်ႈဝႃႈ “ တေႃႈလဵဝ် ႁၢၼ်ႉၶၢႆ ၶူဝ်းၼႂ်းဝဵင်းၼမ်ႉၶမ်းႁဝ်း ယၢမ်းၵၢင်ၶမ်ႈ 20:00 မူင်း ၵႂႃႇၼႆႉ ဢမ်ႇမီးၵူၼ်းသိုဝ်ႉၵူၼ်းၶၢႆသင်သေႁၢၼ်ႉယဝ်ႉ ၊ ၼႂ်းၵၢင်ဝဵင်းၼမ်ႉၶမ်းၵေႃႈ ဢမ်ႇမီးၵူၼ်းၵႂႃႇမႃး ယဵၼ်သီႇသီႇ မိူၼ်မိူင်းႁၢမ်းလူင်ဝႆႉယဝ်ႉ ၊ ၵၢတ်ႇၵၢင်ၶမ်ႈ ဝဵင်းၼမ်ႉၶမ်းၵေႃႈ ပေႃးထိုင် ယၢမ်း ပႅတ်ႇမူင်းတဵမ်ၵူၺ်း ပိူၼ်ႈဢွၼ်ၵၼ် သိမ်းၶူဝ်းၽႂ်မၼ်းသေ ၼႅတ်ႈပွၵ်ႈႁိူၼ်းၸဵမ်ၸဝ်ႉ ။ မိူဝ်ႈပႆႇမီးပၼ်ႁႃလွင်ႈသုၵ်းသၵ်ႉ / ယုင်ႈ ပၢင်တိုၵ်းတႄႉ ၼႂ်းၵၢတ်ႇၵၢင်ၶမ်ႈၼႆႉ ၵူၼ်းၵိုၼ်း / ၵူၼ်းၶွၼ်ႈ သိုဝ်ႉၶၢႆၵၼ် တေႃႇထိုင်  22:00-23:00 မူင်း ၵၢင်ၶိုၼ်းၵွၼ်ႇ” ဝႃႈၼႆ ။


ၵဵဝ်ႇၵပ်းလွင်ႈၵူၼ်းၼုမ်ႇၼမ်ႉၶမ်းႁၢႆၼႆႉသေ ၸၢႆးမၢဝ်းသႂ် ဢႃယု (21) ပီ ၊ ပဵၼ်လုၵ်ႈၸၢႆး ၸၢႆးၵျေႃႇဢူး လႄႈ ၼၢင်းတဵင်းႁၢၼ်ႇ ။ ၸၢႆးမၢဝ်း ဢႃယု (19) ပီ ၊ ပဵၼ်လုၵ်ႈၸၢႆး ၸၢႆးထုၼ်းယဵၼ်ႇ လႄႈ ၼၢင်းတဵင်းၵျီႇ ၊ ၶဝ်သွင် 2 ၵေႃႉ ယူႇသဝ်း ပွၵ်ႉၼိူဝ် ဝဵင်းၼမ်ႉၶမ်း ႁၢႆတူဝ်ၵႂႃႇ တင်းသွင် ၼႆယဝ်ႉ ။


မိူဝ်ႈဝၼ်းတီႈ 06/06/2016 ပူၼ်ႉမႃးၼႆႉ ၵူၼ်းၼုမ်ႇတႆး ၼမ်ႉၶမ်း 7 ၵေႃႉ (ပႃးၵူၼ်းႁေႃႈရူတ်ႉ) လုၵ်ႉၼမ်ႉၶမ်း ၵႂႃႇလႃႈသဵဝ်ႈလႄႈ ၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈတိၵႂႃႇ ။ ၵူၼ်းမိူင်းတႄႉ ဢွၼ်ၵၼ်လၢတ်ႈဝႃႈ ပဵၼ်သိုၵ်းလွႆတိၵႂႃႇ ၊ လွင်ႈၼႆႉ ၾၢႆႇသိုၵ်းလွႆဢမ်ႇယွမ်းႁပ်ႉ ။ ယွၼ်ႉပၼ်ႁႃဝူင်ႈၵၢင်သိုၵ်းလွႆ TNLA တင်း RCSS/SSA သေ တင်ႈတႄႇ ႁူဝ်ပီ 2016 မႃး တေႃႇယၢမ်းလဵဝ်  တုမ်ႉယွၼ်ႈ လွင်ႈၶွတ်ႇလိူတ်ႈၸၢဝ်းၶိူဝ်း ၊ တုမ်ႉတိူဝ်ႉပႃႈ လွင်ႈယူႇ လွင်ႈၵိၼ် ၵူၼ်းဝၢၼ်ႈ ၼႆယဝ်ႉ ။