တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) ၶႂ်ႈဢုပ်ႇဢူဝ်း ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လူၺ်ႈလၢႆးၵတ်းယဵၼ်၊ ၵူၺ်းၵႃႈ ၶႂ်ႈၵႄႈလိတ်ႈ ပၼ်ႁႃပၢင်တိုၵ်းဢွၼ်တၢင်း။ ၶႂ်ႈတုၵ်းယွၼ်းႁႂ်ႈ UNFC ႁႃပၼ်တီႈဢုပ်ႇဢူဝ်း ဢၼ်လွတ်ႈလႅဝ်းတီႈၼိုင်ႈ။ ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ၾၢႆႇပွင်ႇၶၢဝ်ႇ TNLA ၸဝ်ႈႁၢၼ်မၢႆႇဢၢႆႈၵျေႃႇ ဝႆႉၼင်ႇၼႆ။

ထၢမ်- မိူဝ်ႈဝၼ်းတီႈ 04/05/2016)ၼႆႉၾၢႆႇ TNLA ယိုတ်းလႆႈတပ်ႉပၢင်သဝ်း RCSS/SSA ၼႆၶႃႈႁႃႉ၊ ပဵၼ်ႁိုဝ်ၶႃႈ၊ လၢတ်ႈၼႄပၼ်ႁူဝ်ယွႆႈမၼ်းဢိတ်းၼိုင်ႈၶႃႈ?။


တွပ်ႇ-ၸႂ်ႈယဝ်ႉ။ ၸဵမ်မိူဝ်ႈႁၢင်လိူၼ်ၾႅပ်ႉၿိဝ်ႊရီႊ (2016)မႃးၼႆႉ ပၢင်တိုၵ်းႁဝ်းၼႂ်းၵႄႈ TNLA တင်း RCSS/SSA ၼႆႉႁၢဝ်ႈႁႅင်းမႃး၊ RCSS ၶဝ်ၼႆႉ ၽိူမ်ႉထႅမ်ဢဵၼ်ႁႅင်းသိုၵ်းသေ ဢဝ်တီႈယူႇမႃးၵႂၢင်ႈၵႂၢင်ႈၶႂၢင်ၶႂၢင် ၼႂ်းၸိုင်ႈတႆးပွတ်းႁွင်ႇ။ မိူၼ်ၼင်ႇၸွမ်းသဵၼ်ႈတၢင်း ပၢင်ႇၵၼၢႆး-မၢၼ်ႈဝုၼ်း (ၼႂ်းၸႄႈဝဵင်းၼမ်ႉၶမ်း)ၼႆႉ ၶဝ်ဢဝ်တီႈယူႇမႃး၊ ၶဝ်ပၵ်းတပ်ႉပၢင်သဝ်းမႃးၼမ်ႉႁႅင်းၼႃႇယဝ်ႉ။ ၾၢႆႇၼိူဝ်တႃႈပုင်ႇ (ၼမ်ႉၶမ်း) ၼိူဝ်ၵုင်းၽြႃးၼၼ်ႉၵေႃႈ ၶဝ်မႃးဢဝ်တီႈယူႇဝႆႉ။ တႄႇဢဝ်ႁူဝ်လိူၼ်မၢတ်ႊၶျ်မႃးၼႆႉ လႆႈပဵၼ်ပၢင်တိုၵ်းၵၼ် ၵူႈဝၼ်း။ တေႃႇထိုင်ဝၼ်းတီႈ 4-5 ၵေႃႈလႆႈပဵၼ်ပၢင်တိုၵ်းၵၼ်။


မိူဝ်ႈဝၼ်းတီႈ 4 လႆႈပဵၼ်ပၢင်တိုၵ်းလၢႆၵမ်း၊ တႄႇဢဝ်ၵၢင်ၼႂ် 6 မူင်းတေႃႇထိုင်ၵၢင်ၶမ်းလပ်းသိင်ႇ။ ၵွပ်ႈၼၼ်လႄႈ ႁဝ်းၶႃႈၵေႃႈလႆႈယိုတ်းဢဝ်တပ်ႉပၢင်သဝ်း RCSS/SSA လႆႈ 3 တီႈ၊ လွင်ႈဝၢတ်ႇၸဵပ်း လူႉတၢႆတႄႉ မီးတင်းသွင်ၾၢႆႇ၊ ႁဝ်းၶႃႈယိုတ်းလႆႈမၢၵ်ႇမိုဝ်ႈၸိုၼ်းယၢမ်း လႄႈၶူဝ်းၼုင်ႈတၢင်းမႆ RCSS ၵမ်ႈၽွင်ႈလႄႈ ၶူဝ်းၶွင်ၵိၼ်ယႅမ်ႉၵမ်ႈၽွင်ႈ။


ထၢမ်-ပၢင်တိုၵ်းၼႆႉ ၵႂၢင်ႈၶႂၢင်ၵႃႈႁိုဝ်ၶႃႈ၊ ထိုင်မႃးတၢင်းလႂ်ယဝ်ႉၶႃႈ?။


တွပ်ႇ-ပၢင်တိုၵ်းၼႆႉ မၼ်းၵႂၢင်ႈၶႂၢင်လူင်းမႃး၊ လုၵ်ႉတၢင်းၼမ်ႉၶမ်းသေ လူင်းမႃးထိုင်တၢင်းသီႇပေႃႉ၊ လႅၼ်ၶႅၼ်ႈသီႇပေႃႉ-ၼမ်ႉသၼ်ႇ ၸိူဝ်းၼႆႉၵေႃႈပဵၼ်။ တၢင်းႁူးသူၼ် တၢင်းၵျွၵ်ႉမႄးၸိူဝ်းၼႆႉၵေႃႈပဵၼ်၊ တၢင်းၼမ်ႉၶမ်းသမ်ႉ ႁိမ်းႁွမ်းႁူဝ်ပၢင်ႇ၊ မၢၼ်ႈဝုၼ်း ပၢင်ႇၵၼၢႆးၸိူဝ်းၼႆႉ၊ တၢင်းတႃႈပုင်ႇသၢႆးလႅင်ၸိူဝ်းၼႆႉ၊ တၢင်းလွႆႁွမ် ဝၢၼ်ႈၸၢမ်ၸိူဝ်းၼႆႉ၊ ပဵၼ်ပၢင်တိုၵ်းၵၼ်ယူႇၵူႈဝၼ်း။


ထၢမ်-လွင်ႈတႃႇတေဢုပ်ႇဢူဝ်းၵၼ်တင်း RCSS ၊ ဢၼ်ဝႃႈ RCSS တုၵ်းယွၼ်းဝႆႉ ၶႂ်ႈဢုပ်ႇဢူဝ်း လူၺ်ႈလၢႆးၵတ်းၵတ်းယဵၼ်ယဵၼ် ဢၼ်ဝႃႈၼၼ်ႉၶႃႈလူး တၢင်းၾၢႆႇ TNLA သမ်ႉမီးၵၢင်ၸႂ်ၸိူင်ႉႁိုဝ်ၶႃႈ?။


တွပ်ႇ- တင်းသွင်ပႃႈသွင်ၾၢႆႇၼႆႉ ႁဝ်းၶႃႈလႆႈၸႂ်ၵၼ်ဝႆႉယဝ်ႉ။ တႃႇတေဢုပ်ႇဢူဝ်းၵေႃႈယွမ်းႁပ်ႉယူႇ၊ ထုၵ်ႇလီလႆႈဢုပ်ႇဢူဝ်းၵၼ်ယူႇ။ ၵူၺ်းၵႃႈ ႁဝ်းဢုပ်ႇၵၼ်ၼေႃႈၼႆသေ မႃးဢုပ်ႇၵၼ်ၵမ်းသိုဝ်ႈတႄႉပႆႇမီး။ RCSS ၵေႃႈလႆႈယိုၼ်ႈမိုဝ်းမႃးတၢင်း UNFC (ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း) ၊ ႁဝ်းၵေႃႈလႆႈယိုၼ်ႈၵႂႃႇတၢင်း UNFC ၊ ဢဝ် UNFC ႁဵတ်းၵၢင်မၼ်းသေ ပွင်ႇၶၢဝ်ႇပၼ်တင်းသွင်ၾၢႆႇယူႇ။


ၵၢင်ၸႂ်ႁဝ်းၶႃႈတႄႉ RCSS ၼႆႉ မၼ်းပဵၼ်ၸုမ်းဢၼ်လူင်းလၢႆးမိုဝ်းယဝ်ႉယဝ်ႉ၊ ၶဝ်ၵေႃႈၵႂႃႇလႆႈၵူႈတီႈ၊ ၵႂႃႇၼႂ်းမိူင်းၵေႃႈလႆႈ၊ ၵႂႃႇၼွၵ်ႈမိူင်းၵေႃႈလႆႈ၊ မိူၼ်ၼင်ႇႁဝ်းၶႃႈ TNLA ၼႆႉသမ်ႉဢမ်ႇပႆႇလႆႈလူင်းလၢႆးမိုဝ်းလႄႈ ဢမ်ႇၸၢင်ႈၵႂႃႇတၢင်းလႂ်။ ၵွပ်ႈၼၼ်လႄႈ ႁဝ်းၵေႃႈလႆႈတုၵ်းယွၼ်းတီႈ UNFC ဝႆႉ၊ ႁႂ်ႈႁႃပၼ်ႁဝ်းၶႃႈ ၼႃႈလိၼ်ဢၼ်လွတ်ႈလႅဝ်းသေတီႈတီႈ၊ တီႈဢၼ်ဢမ်ႇၸႂ်ႈၼႂ်းမိူင်းၼၼ်ႉ၊ တီႈဢၼ်သၢင်ႇထုၵ်ႇၼၼ်ႉ ႁဝ်းၶႃႈလႆႈတႅမ်ႈလိၵ်ႈသေပွင်ႇၶၢဝ်ႇဝႆႉၸူးတီႈ UNFC ယဝ်ႉ။ ပေႃးယဝ်ႉၵေႃႈႁႂ်ႈ UNFC ၵဵပ်းပၼ်သၢႆမၢႆ ၵူၼ်းၸိူဝ်းတေမႃးႁူပ်ႉထူပ်းဢုပ်ႇဢူဝ်းၵၼ်တင်းႁဝ်း။ လွင်ႈတႃႇတေဢုပ်ႇဢူဝ်းၵၼ်ၼႆႉ ပဵၼ်လွင်ႈၼိုင်ႈ။


ၵူၺ်းၵႃႈ ဢၼ်ပဵၼ်ယူႇယၢမ်းလဵဝ်ၼႆႉ ဢၼ်တႄႉမၼ်းသမ်ႉ တေလႆႈၵႄႈလိတ်ႈပၼ်ႁႃလွင်ႈပၢင်တိုၵ်းၼႆႉ ဢွၼ်တၢင်း၊ ယွၼ်ႉပိူဝ်ႈ RCSS ၶဝ်ၶႂၢၵ်ႈၼႃႈလိၼ်မႃးၼႂ်းၼႃႈလိၼ်ႁဝ်း၊ မႃးတီႉၺွပ်းၵူၼ်းတဢၢင်းႁဝ်း၊ ပူၼ်ႉပႅၼ်သုၼ်ႇလႆႈၵူၼ်းႁဝ်းသေ ၵူၼ်းမိူင်းတဢၢင်းလႄႈသင်ၶၸဝ်ႈၶဝ် ႁူမ်ႈၵၼ်သေ တုၵ်းယွၼ်း တၢင်းၸွႆႈထႅမ်မႃးတီႈ တပ်ႉသိုၵ်းတဢၢင်းႁဝ်း ႁႂ်ႈၵႅတ်ႇၶႄႁႄႉၵင်ႈပၼ်၊ ႁႂ်ႈၵႂၢတ်ႇလၢင်ႉၼႃႈလိၼ်ပၼ် ၼႆလႄႈ ႁဝ်းၶႃႈၵေႃႈၸင်ႇလႆႈပဵၼ်ပၢင်တိုၵ်းၵၼ်ယူႇတိၵ်းတိၵ်း။ ဢၼ်ၼႆႉ မၼ်းပဵၼ်ပၼ်ႁႃ ဢၼ်ႁဝ်းလူဝ်ႇလႆႈၵႄႈၶႆၵမ်းလဵဝ်၊ ပေႃးႁဝ်းဢမ်ႇၵႄႈၶႆပၼ်ႁႃဢၼ်ၼႆႉယဝ်ႉ ႁဝ်းဢမ်ႇၸၢင်ႈၶၢမ်ႈၵႂႃႇ ဢုပ်ႇဢူဝ်းၵၼ်လႆႈ၊ ႁဝ်းတေလႆႈၵႄႈၶႆပၼ်ႁႃဢၼ်ၼႆႉဢွၼ်တၢင်း။


ထၢမ်-ၵဵဝ်ႇၵပ်းလွင်ႈဢုပ်ႇဢူဝ်းၵၼ်သေ လွင်ႈပဵၼ်ပၢင်တိုၵ်းၵၼ်ယူႇၼႆႉ ဢၼ်လႂ်လမ်ႇလွင်ႈ၊ ၶႂ်ႈသင်ႇလၢတ်ႈသင်ၸိူင်ႉႁိုဝ်ထႅင်ႈၶႃႈ?။


တွပ်ႇ- RCSS တင်းႁဝ်းၼႆႉ မိူဝ်ႈၵူႈပွၵ်ႈ ႁဝ်းဢမ်ႇယၢမ်ႈပဵၼ်ပၢင်တိုၵ်းၵၼ်မႃးသေပွၵ်ႈ၊ ဢမ်ႇယၢမ်ႈပိုတ်းယိုဝ်းၵၼ်မႃး။ ၵူၺ်းၵႃႈ ဝၢႆးလင်ၶဝ်လူင်းလၢႆးမိုဝ်း NCA ယဝ်ႉ ၶဝ်ၵေႃႈသူင်ႇႁႅင်းသိုၵ်း ၶိုၼ်ႈမႃးၼႂ်းၼႃႈလိၼ်တဢၢင်းတူင်ႉၼိုင် တိၵ်းတိၵ်းသေ ပၼ်ႁႃဢၼ်ဢမ်ႇၵိုင်ႇလီပဵၼ်ၼႂ်းၵႄႈၸၢဝ်းၶိူဝ်းၵေႃႈ လႆႈပဵၼ်မႃးယဝ်ႉ၊ ၵူၺ်းၵႃႈ ဢၼ်လီသုတ်းတႄႉ ဢုပ်ႇဢူဝ်းၵၼ်သေၵႄႈလိတ်ႈပၼ်ႁႃၼၼ်ႉယဝ်ႉ။ ဢၼ်ဢုပ်ႇဢူဝ်းၵၼ် လူၺ်ႈၵတ်းၵတ်းယဵၼ်ယဵၼ်ၼႆႉ ပဵၼ်သဵၼ်ႈတၢင်းဢၼ်လီသုတ်းယူႇၶႃႈ။