ပႃႊတီႊႁူဝ်သိူဝ် (SNLD) တင်းပႃႊတီႊတဢၢင်း (TNP) ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ႁူမ်ႈၵၼ်ႁဵတ်းလိၵ်ႈ သူင်ႇထိုင် တုၵ်းယွၼ်းႁႂ်ႈႁူဝ်ပဝ်ႈ RCSS / SSA လႄႈ PSLF / TNLA ႁႂ်ႈၵိုတ်းပၼ်ပၢင်တိုၵ်း ၊ ႁႂ်ႈၵူၼ်းဝၢၼ်ႈ ၵူၼ်းမိူင်းၸိူဝ်းပၢႆႈၽေးသိုၵ်း လႆႈပွၵ်ႈမိူဝ်းယူႇၶိုၼ်းႁိူၼ်းယေးဝၢၼ်ႈသူၼ်သေ လႆႈႁဵတ်းၵိၼ်ၵၢၼ် ႁႃလဵင်ႉတွင်ႉတူဝ်ၵဝ်ႇ ။

ပူၼ်ႉမႃးမိူဝ်ႈဝၼ်းတီႈ 20/05/2016 ယူႇတီႈငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) တီႈဝဵင်းၼမ်ႉၶမ်း ၊ ဢၼ်ၸၢႆးယီႈ ပဵၼ်ၽူႈဢွၼ်ႁူဝ် တင်း ပႃႊတီႊၸိူဝ်ႉၸၢတ်ႈတဢၢင်း (TNP) ဝဵင်းၼမ်ႉၶမ်း ဢၼ်ၵႅမ်ႁူဝ်ပဝ်ႈ ဢူးပႃႉတၢၼ်း ဢွၼ်ႁူဝ် ၊ သွင်ပႃႊတီႊလႆႈႁူမ်ႈၵၼ်သေ ႁဵတ်းလိၵ်ႈၸူးထိုင် ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ငဝ်ႈၸိုင်ႈလွႆတႆးလႅင်း လႄႈ ႁူဝ်ပဝ်ႈတႅဝ်းႁူမ်ႈပူတ်းပွႆႇမိူင်းပလွင်ႈ / တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (PSLF/TNLA) - ၼႆယဝ်ႉ ။


ၼႂ်းလိၵ်ႈတၢင်ႇလၢတ်ႈ ယွၼ်းမဵတ်ႉတႃႇႁပ်ႉတုင်း တုၵ်းယွၼ်းထိုင်တီႈႁူဝ်ပဝ်ႈတင်းသွင် ပိူင်လူင်မၼ်း ႁႂ်ႈၵိုတ်းပၼ်ပၢင်တိုၵ်း ၊ ႁႂ်ႈၵူၼ်းပၢႆႈၽေးသိုၵ်းသိူဝ် လႆႈပွၵ်ႈမိူဝ်းႁိူၼ်းယေးဝၢၼ်ႈသူၼ်ၶိုၼ်းသေ လႆႈမိူဝ်းႁဵတ်းႁႃၵိၼ်လဵင်ႉတွင်ႉ ၵႂႃႇငၢႆႈငၢႆႈလူမ်လူမ် ။ တင်းမူတ်းမီး 9 ၶေႃႈ ။


ၵဵဝ်ႇၵပ်းလွင်ႈၼႆႉ ၵူၼ်းၼုမ်ႇဢၼ်ၶပ်းၶိုင် တႃႇတေပဵၼ်ပၢင်ၵုမ် ၵေႃႉၼိုင်ႈလၢတ်ႈဝႃႈ - “ တႃႇတေႁဵတ်း ၽိုၼ်လိၵ်ႈဢၼ်ၼႆႉ ဢွၼ်ၼႃႈမိူဝ်ႈပႆႇႁဵတ်းၼၼ်ႉ ပႃႊတီႊႁူဝ်သိူဝ်လႄႈ ပႃႊတီႊတူၼ်ႈၼဵင်ႈ လႆႈႁူပ်ႉထူပ်းၵၼ် ဝၼ်းတီႈ 19/05/2016 ယၢမ်းဝၢႆးဝၼ်း 16:25 မူင်း ။ ဢုပ်ႇဢူဝ်းလႆႈၸႂ်ၵၼ်သေ ဝၼ်းတီႈ 20 ၸင်ႇလႆႈပဵၼ်ႁဵတ်းၽိုၼ်လိၵ်ႈဢွၵ်ႇမႃး ။ ယိူင်းဢၢၼ်းပိူဝ်ႈတႃႇ ပႃႊတီႊႁူဝ်သိူဝ်လႄႈ ပႃႊတီႊတူၼ်ႈၼဵင်ႈၼႆႉ ၼင်ႇႁိုဝ်ပေႃးတေလႆႈ ၸွႆႈၵႄႈၶႆ / ၵႄႈလိတ်ႈပၼ် လွင်ႈပၼ်ႁႃတီႈဝၢၼ်ႈႁူဝ်ပၢင်ႇ ဢၼ်လႆႈထုၵ်ႇၾႆးၽဝ် လင်ႁိူၼ်းၵူၼ်း 64 လင်ၼၼ်ႉ ၊ ပၢင်ဢုပ်ႇဢူဝ်း ႁဵတ်းတီႈလုမ်းႁူဝ်သိူဝ် ဝဵင်းၼမ်ႉၶမ်း ”- ဝႃႈၼႆ ။


လိၵ်ႈၶေႃႈပိုၼ်ၽၢဝ်ႇ 9 ၶေႃႈ ဢၼ် ပႃႊတီႊႁူဝ်သိူဝ် (SNLD) တင်းပႃႊတီႊတဢၢင်း (TNP) ဝဵင်းၼမ်ႉၶမ်း ႁူမ်ႈၵၼ်ဢွၵ်ႇ မဵတ်ႉတႃႇတုၵ်းယွၼ်းထိုင်တီႈ ႁူဝ်ပဝ်ႈ RCSS/SSA လႄႈ PSLF/TNLA ၼၼ်ႉ မီးၼင်ႇၼႆ ။


1. ပူၼ်ႉမႃးၸဵမ်မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ 2015 ၼၼ်ႉ တပ်ႉသိုၵ်းၸိုင်ႈတႆး (RCSS/SSA) လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (PSLF / TNLA) လႆႈပဵၼ်ပၢင်တိုၵ်းၵၼ်မႃး။ ယွၼ်ႉပိူဝ်ႈပၢင်တိုၵ်းသေ ၵူၼ်းဝၢၼ်ႈၵူၼ်းမိူင်းလႆႈဢွၼ်ၵၼ်ပၢႆႈၽေးသိုၵ်း ၊ မိူၼ်ၼင်ႇပီႈၼွင်ႉတႆး ပီႈၼွင်ႉပလွင်ႈ / တဢၢင်း ၊ ပီႈၼွင်ႉၶၢင်ၶဝ်ၸိူဝ်းၼႆႉ လႆႈပၢႆႈယၢၼ်ႁိူၼ်းယေး တီႈလိၼ်သူၼ်ႁႆႈၼႃးသေ လႆႈပဵၼ်ၵူၼ်းပၢႆႈၽေးသိုၵ်းသိူဝ်ယူႇ တေႃႇထိုင်ဝၼ်းမိူဝ်ႈၼႆႉ ။


2. ယွၼ်ႉပိူဝ်ႈပၢင်တိုၵ်းၼႂ်းၵႄႈ တပ်ႉသိုၵ်းတႆးလႄႈတဢၢင်းၼၼ်ႉသေ ၵူၼ်းဝၢၼ်ႈၵူၼ်းမိူင်း ဢၼ်ယူႇသဝ်း ၼႂ်းပိုၼ်ႉတီႈၼႃႈလိၼ်ပၢင်တိုၵ်းၼၼ်ႉ မိူၼ်ၼင်ႇပီႈၼွင်ႉတႆး ၊ ပီႈၼွင်ႉတဢၢင်း ၊ ပီႈၼွင်ႉၶၢင် ဢၼ်ယူႇႁူမ်ႈႁွမ်းၸွမ်းၵၼ်မႃး မိူၼ်ပီႈဢွၵ်ႇၼွင်ႉပဵၼ်ၵၼ်မႃး ပီယၢဝ်းၶၢဝ်းႁိုင်ၼၼ်ႉၵေႃႈ ယၢမ်းလဵဝ် လႆႈႁူပ်ႉထူပ်းတၢင်းယၢပ်ႇၽိုတ်ႇ မိူၼ်ၼင်ႇၵႂႃႇယၢပ်ႇမႃးယၢပ်ႇ ၊ လွင်ႈႁႃၵိၼ်လဵင်ႉတွင်ႉၵေႃႈယၢပ်ႇ ၊ မိူၼ်ဢၼ်ႁႄႉႁၢမ်ႈတႃႇႁႃၵိၼ်လဵင်ႉတွင်ႉ ။ ၼွၵ်ႈသေၼၼ်ႉ ဝူဝ်းၵႂၢႆးသတ်းလဵင်ႉၵေႃႈလႆႈလူႉသုမ်း ၊ ႁိူၼ်းယေးၵေႃႈထုၵ်ႇၾႆးမႆႈသေ ၵူၼ်းဝၢၼ်ႈၵူၼ်းမိူင်းဢမ်ႇမီးႁိူၼ်းယေးတီႈယူႇ ၊ လႆႈပၢႆႈယၢၼ်ႁိူၼ်းယေး တီႈယူႇသေ လႆႈလူႉသုမ်းၶူဝ်းၶွင် ။ လုၵ်ႈလၢင်းၵေႃႈဢမ်ႇလႆႈႁဵၼ်းလိၵ်ႈလီလီ ၊ သုမ်းသုၼ်ႇလႆႈႁဵၼ်းလိၵ်ႈလၢႆး ၊ လႆႈလူႉသုမ်းထႅင်ႈ လိၼ်သူၼ်ႁႆႈၼႃး တႃႇႁဵတ်းၵိၼ်ၵၢၼ်လဵင်ႉတွင်ႉလႄႈ ယၢမ်းလဵဝ် လႆႈႁူပ်ႉထူပ်းတၢင်းယၢပ်ႇၽိုတ်ႇ တႃႇယူႇတႃႇၵိၼ်ၵူၺ်းဢမ်ႇၵႃး လႆႈတုမ်ႉတိူဝ်ႉပႃးပၢႆးၸႂ်လိူဝ်ႁႅင်း။ လွင်ႈတုမ်ႉတိူဝ်ႉၸႂ်ၼႆႉ ပေႃးဢမ်ႇၶႂ်ႈၸၢင်ႈလၢတ်ႈဢွၵ်ႇၼႄၵၼ် လႆႈယဝ်ႉ ။


3. ယွၼ်ႉပိူဝ်ႈပဵၼ်လွင်ႈတုမ်ႉတိူဝ်ႉၸိူင်ႉၼႆမႃးလႄႈ မိူၼ်ၼင်ႇတႆးလႄႈ တဢၢင်း (ပလွင်ႈ) ဢၼ်ယူႇၸွမ်းၵၼ်မႃး ပီယၢဝ်းၶၢဝ်းႁိုင် မိူၼ်ၼင်ႇပီႈဢွၵ်ႇၼွင်ႉပဵၼ်ၵၼ်ၼၼ်ႉၵေႃႈ ယၢမ်းလဵဝ် ႁၼ်ထိုင်ၼိူဝ်ၵၼ် မိူၼ်ၼင်ႇၽူႈၶဵၼ်လူင်သေယဝ်ႉ ဢမ်ႇႁတ်းယုမ်ႇယမ်ၵၼ် ၊ ဢမ်ႇၶႂ်ႈယူႇၸွမ်းၵၼ် ၊ ၵူဝ်ႁႄၵၼ်သေ လႆႈမႆႈႁူမႆႈၸႂ်ဝႆႉယူႇၵူႈၼႂ်ၶမ်ႈဝၼ်းၶိုၼ်း ။


4. ၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ၸိူဝ်းထူပ်းၽေးသိုၵ်းသိူဝ်သေ ပၢႆႈၽေးသိုၵ်းယူႇယၢမ်းလဵဝ်ၼႆႉ လွင်ႈပၢႆးပၺ်ၺႃ ပၢႆးႁူႉပၢႆးႁၼ်ၸိူဝ်းၼႆႉၵေႃႈ ဢမ်ႇၼမ် ။ ၵမ်ႈၼမ်ပဵၼ်ၵူၼ်းၽၢၼ်ၶၢၼ်ၸႂ် ဢၼ်ႁဵတ်းၵိၼ်ႁႃၵိၼ်ၼႂ်းတီႈလိၼ် ႁႆႈၼႃးၸဝ်ႈၵဝ်ႇၵႂႃႇဝၼ်းလႂ်ၵိၼ်ဝၼ်းၼၼ်ႉၵူၺ်း ။ ယၢမ်းလဵဝ် ယွၼ်ႉပဵၼ်ပၢင်တိုၵ်းယဝ်ႉသေ လႆႈပွႆႇပႅတ်ႈႁိူၼ်းယေး လိၼ်သူၼ်ႁႆႈၼႃးၸဝ်ႈၵဝ်ႇသေ လႆႈၵႂႃႇယူႇတီႈပၢင်သဝ်းၵူၼ်းပၢႆႈၽေး လူၺ်ႈၼမ်ႉႁူၼမ်ႉတႃ ၊ လႆႈပိုင်ႈဢိင်တၢင်းၵိၼ်တၢင်းယႅမ်ႉ ဢၼ်မီးၸဝ်ႈၸေႇတၼႃႇၶဝ် မႃးလူႇတၢၼ်း မႃးၸွႆႈထႅမ်ၼၼ်ႉၵူၺ်း ။


5. ၵွပ်ႈၼၼ်လႄႈ ယၢမ်းလဵဝ် ပဵၼ်ၶၢဝ်းယၢမ်းႁူဝ်ၾူၼ်ယဝ်ႉ ၊ ပဵၼ်ၶၢဝ်းယၢမ်းဢၼ်ၵူၼ်းပၢႆႈၽေးၶဝ် ထုၵ်ႇလႆႈပွၵ်ႈမိူဝ်းႁဵတ်းႁႆႈႁဵတ်းသူၼ်ယဝ်ႉ ။ ၵူၺ်းၵႃႈ မိူဝ်ႈလဵဝ်ၼႆႉ သမ်ႉထူပ်းၽေးသိုၵ်းသိူဝ်သေ တႃႇတေပွၵ်ႈပိူဝ်းသေၵႂႃႇႁဵတ်းၵၢၼ်သူၼ်ၵၢၼ်ႁႆႈၼႆႉ ၵူၼ်းဝၢၼ်ႈၵူၼ်းမိူင်းလႆႈမႆႈၸႂ် ဢွၼ်ၵၼ်ၵူဝ်ႁႄဝႆႉ။ သင်ၸိူဝ်ႉဝႃႈၾူၼ်တူၵ်းမႃးသေ ပီၼႆႉ ဢမ်ႇလႆႈႁဵတ်းသူၼ်ႁဵတ်းႁႆႈၼႆ ပီတေမႃးပီၼႃႈ တႃႇတေယူႇသဝ်းၵႂႃႇ ထႅင်ႈၼႆႉတႄႉ တိုၼ်းယၢပ်ႇၽိုတ်ႇၼၵ်းၸႂ်တႄႉတႄႉယဝ်ႉ ။


6. ယွၼ်ႉပိူဝ်ႈၼႆ ၶႂ်ႈတုၵ်းယွၼ်းထိုင်တီႈ တင်းသွင်ၸုမ်းသွင်ၾၢႆႇ ႁႂ်ႈဝႆႉၸႂ်မဵတ်ႉတႃႇ ၵရုၼႃႇယႂ်ႇယႂ်ႇ ၼမ်ၼမ်သေ ၸွႆႈထႅမ်ပၼ်ၵူၼ်းပၢႆႈၽေး ႁႂ်ႈလႆႈပွၵ်ႈမိူဝ်းယူႇတီႈဝၢၼ်ႈသူၼ်ၶိုၼ်းသေ လႆႈႁဵတ်းႁႃၵိၼ် လဵင်ႉတွင်ႉ ၵႂႃႇၵတ်းၵတ်းယဵၼ်ယဵၼ်သေၵမ်း ။


7. ၼင်ႇႁိုဝ်ၵူၼ်းပၢႆႈၽေးသိုၵ်း တေလႆႈမိူဝ်းယူႇတီႈဝၢၼ်ႈသူၼ်ၶိုၼ်းသေ လႆႈႁႃၵိၼ်လဵင်ႉတွင်ႉၵတ်းၵတ်း ယဵၼ်ယဵၼ်ၼၼ်ႉၵေႃႈ ၶႂ်ႈယွၼ်းၶေႃႈမၼ်ႈၵႅၼ်ႇတီႈတင်းသွင်ၾၢႆႇ ႁႂ်ႈႁပ်ႉႁွင်းပၼ်ဝႃႈ တေဢမ်ႇၵႂႃႇယႃႉၵဝ်း ၵူၼ်းဝၢၼ်ႈၵူၼ်းသူၼ် ၊ တေဢမ်ႇယႃႉၵဝ်းႁဵတ်းႁႂ်ႈၵူၼ်းသူၼ် လႆႈမႆႈႁူမႆႈၸႂ်ထႅင်ႈ ။ ပေႃးဝႃႈပၼ်ၶေႃႈမၼ်ႈၵႅၼ်ႇ လႆႈၸိူင်ႉၼႆတႄႉ ယိင်ႈၶႅၼ်းတေၶႅမ်ႉ ၊ ၵူၼ်းဝၢၼ်ႈၵူၼ်းမိူင်းတေၸူမ်းသိူဝ်းလိူဝ်ၵဝ်ႇ ။ ယွၼ်ႉၼၼ် ၶႂ်ႈမဵတ်ႉတႃႇတုၵ်းယွၼ်းယႂ်ႇယႂ်ႇၼမ်ၼမ် ။


8. တႆးလႄႈ ပီႈၼွင်ႉတဢၢင်း (ပလွင်ႈ) ဢၼ်လႆႈယူႇႁူမ်ႈႁွမ်းၸွမ်းၵၼ်မႃး မိူၼ်ၼင်ႇပီႈဢွၵ်ႇၼွင်ႉၵၼ် ၸဵမ်မိူဝ်ႈပၢၼ်လႂ်လႂ်ၼၼ်ႉ ၼင်ႇႁိုဝ်တေယူႇၵတ်းၵတ်းယဵၼ်ယဵၼ်သေ ႁၵ်ႉႁွမ်ၵၼ်ၵႂႃႇထႅင်ႈ တေႃႇပေႃးသုတ်း ၸူဝ်ႈလုမ်ႈၾႃႉၼၼ်ႉ ႁဝ်းၶႃႈထုၵ်ႇလီလႆႈၵိုတ်း လွင်ႈသုၵ်ႉယုင်ႈဢူၼ်ၵဝ်း ၊ ဢၼ်ပဵၼ်သိုၵ်းယူႇမိူဝ်ႈလဵဝ်ၼႆႉ ႁဝ်းထုၵ်ႇလီႁဵတ်းႁႂ်ႈမၼ်းသုတ်းသဵင်ႈႁၢႆဝၢႆးဝႆးဝႆး ၊ ၼင်ႇႁိုဝ်တေႁၢႆဝၢႆးလႆႈၼၼ်ႉၵေႃႈ ၶႂ်ႈတုၵ်းယွၼ်းႁူဝ်ပဝ်ႈ တင်းသွင်ၾၢႆႇ ႁႂ်ႈဝႆႉၸႂ်ယိုၼ်းယၢဝ်း ၊ ၶႂ်ႈႁႂ်ႈၵိုတ်းပၼ်ပၢင်တိုၵ်းသေ ၵေႃႇသၢင်ႈလွင်ႈငမ်းယဵၼ်ထႃဝရ ဢၼ်မၼ်ႈၵိုမ်းယိုၼ်းယၢဝ်း ၊ ႁႂ်ႈမႃးၼင်ႈၼိူဝ်တင်ႇၼိူဝ်ၽိူၼ်သေ ႁူပ်ႉထူပ်းဢုပ်ႇဢူဝ်းၵၼ် ႁႃၶေႃႈတွပ်ႇ ၶေႃႈလႆႈၸႂ်ၵၼ်လီလီ ။ ႁဝ်းၶႃႈဢွၼ်ၵၼ်တုၵ်းယွၼ်းမႃး ယႂ်ႇယႂ်ႇၼမ်ၼမ် ။


9. လိၵ်ႈၽိုၼ်ၼႆႉ ႁဝ်းၶႃႈယူႇတီႈ ပႃႊတီႊႁူဝ်သိူဝ် (SNLD) ၼမ်ႉၶမ်း လႄႈ ပႃႊတီႊၸိူဝ်ႉၸၢတ်ႈတဢၢင်း (TNP) ၼမ်ႉၶမ်း သွင်ၸုမ်းႁူမ်ႈၵၼ်သေ လႆႈသူင်ႇထိုင် တုၵ်းယွၼ်းထိုင်ယႂ်ႇယႂ်ႇၼမ်ၼမ်တီႈ တပ်ႉသိုၵ်းၸိုင်ႈတႆး (RCSS/SSA) လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (PSLF/TNLA) ႁႂ်ႈဝႆႉၸႂ်ယႂ်ႇယႂ်ႇၵႂၢင်ႈၵႂၢင်ႈ ၊ ႁႂ်ႈဢၢၼ်ႇတူၺ်းသေ တုမ်ႉတွပ်ႇပၼ်ၶိုၼ်း - မုင်ႈမွင်းဝႆႉၼင်ႇၼႆ ။