ပိူဝ်ႈတႃႇပဵၼ်မႃး ပၢင်ၵုမ်လူင်ပၢင်လူင် ပွၵ်ႈၵမ်း 2 ႁိုဝ် ပၢင်ၵုမ်လူင် 21 ႁူဝ်ပၢၵ်ႇပီမိူင်းၼၼ်ႉ ၽူႈၼမ်း ၸိၵ်းၸွမ် RCSS တင်း ၽူႈၼမ်းယၢင်း KNU ႁူပ်ႉဢုပ်ႇၵုမ်ၵၼ် ယဝ်ႉတူဝ်ႈၵႂႃႇ ။


တင်ႈတႄႇဝၼ်းတီႈ 30 လိူၼ်ဢေႊပရိူဝ်ႊလ် တေႃႇထိုင်ဝၼ်းတီႈ 2 လိူၼ်မေႊ 2016 ၼႆႉ ၽူႈၼမ်း ၸိၵ်းၸွမ် ၶွင်ႊသီႊဢဝ်ၶိုၼ်းၸိုင်ႈတႆး (RCSS) တင်းၽူႈၼမ်းၸိၵ်းၸွမ် ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) လႆႈႁူပ်ႉထူပ်းဢုပ်ႇၵုမ်ၵၼ် တီႈဝဵင်းၵဵင်းမႆႇ ၸိုင်ႈထႆး ။ ပၢင်ၵုမ်လူင်ၶၢဝ်းတၢင်း 3 ဝၼ်းၼၼ်ႉ လႆႈဢုပ်ႇၵုမ်ၵၼ် ဝၢင်းၽႅၼ်တႃႇပၢင်ၵုမ်လူင်ပၢင်လူင် ပွၵ်ႈၵမ်း 2 ႁိုဝ် ပၢင်ၵုမ်လူင်ၸူဝ်ႈၶူပ်ႇ 21 ႁူဝ်ပၢၵ်ႇပီမိူင်း ၊ ၸွမ်းၼင်ႇၵေႃႉပဵၼ်ၽူႈၼမ်း ပႃႊတီႊ NLD ဢၼ်ပေႉပၢင်လိူၵ်ႈတင်ႈပီ 2015 လႄႈ ၽူႈၵိူဝ်းၵုမ်ၸိုင်ႈမိူင်း ၵေႃႈၸႂ်ႈ ၼၢင်းဢွင်ႇသၢၼ်းၸုၵျီႇ ယိုၼ်ႈမိုဝ်းမႃးၼၼ်ႉ - ၼႆယဝ်ႉ ။

ၵဵဝ်ႇၵပ်းလွင်ႈပၢင်ၵုမ် တီႈၵဵင်းမႆႇၼႆႉ ၽူႈၵိူဝ်းၵုမ် RCSS ၸဝ်ႈၶိုၼ်းသႂ် လၢတ်ႈၼႄဝႃႈ - 1. RCSS တင်း KNU ၼႆႉ ၶဝ်ပဵၼ်ၸုမ်းဢူၺ်းလီၵၼ်မႃးၸဵမ်မိူဝ်ႈပီ 1996 ၊ ၶဝ်သွင်ၸုမ်းၵေႃႈတိုၼ်းၵႆႉႁူပ်ႉထူပ်းၵၼ်တႃႇသေႇ ။ 2. ၶဝ်မီးပၢင်သွၼ်ၵဵဝ်ႇၵပ်းလွင်ႈၾႅတ်ႊၻရႄႊလ် (Federal) တီႈၵဵင်းမႆႇ ။ ႁူဝ်ၼႃႈတၢင်းသွင်ၸုမ်းၼႆႉ ပဵၼ်ၽူႈဢွၼ်ႁူဝ်လႄႈ ၵႅမ်ၽူႈဢွၼ်ႁူဝ်တီႈၼႂ်း PPST ဢၼ်ပဵၼ်ၽူႈၼမ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း EAO ၸုမ်းၸိူဝ်းဢၼ်လႆႈလူင်းလၢႆးမိုဝ်းၵႂႃႇ ။ ၸဵမ်မိူဝ်ႈလိူၵ်ႈတင်ႈ ၽူႈဢွၼ်ႁူဝ်လႄႈ ၵႅမ်ၽူႈဢွၼ်ႁူဝ် ၼႂ်းလိူၼ်မၢတ်ႊၶျ်ၼၼ်ႉမႃး ၶဝ်သွင်ၸုမ်း ပႆႇလႆႈၶိုၼ်းႁူပ်ႉထူပ်းၵၼ်သေပွၵ်ႈလႄႈ ၶဝ်မႃးထူပ်းၵၼ်ၵူၺ်း ။ ၾၢႆႇၼိုင်ႈၵေႃႈ ၶဝ်ဢုပ်ႇၵၼ်တႃႇၶပ်းၶိုင် လွင်ႈၼၢင်းဢွင်ႇသၢၼ်းၸုၵျီႇ လၢတ်ႈဝႆႉဝႃႈ တေၸတ်းပၢင်ၵုမ်ပၢင်လူင်ႁူဝ်ပၢၵ်ႇ 21 ပီမိူင်းၼၼ်ႉ - ဝႃႈၼႆ ။


ၸွမ်သိုၵ်းယွတ်ႈသိုၵ်း ဢၼ်ပဵၼ်ႁူဝ်ပဝ်ႈ RCSS လႄႈတင်း ၸွမ်သိုၵ်းလူင် မူႇတူးသေးၽူဝ်း ဢၼ်ပဵၼ်ႁူဝ်ပဝ်ႈ KNU ၼႆႉ ပိူဝ်ႈတႃႇတေဢွၼ်ႁူဝ်ၵႂႃႇၼႂ်းၸုမ်း ၸုမ်းဢွၼ်ႁူဝ် ၶၵ်ႉၵၢၼ်လွင်ႈငမ်းယဵၼ် ၸုမ်းၸၢဝ်းၶိူဝ်း ၸိူဝ်းယိပ်းၵွင်ႈၵၢင်ႇ EAO-PPST ၼၼ်ႉၼႆသေ လုၵ်ႈၸုမ်းတင်းသဵင်ႈလႆႈလိူၵ်ႈတင်ႈဝႆႉ ၶဝ်သွင်ၸဝ်ႈၼႆႉ ပဵၼ်ၽူႈဢွၼ်ႁူဝ်လႄႈ ၵႅမ်ၽူႈဢွၼ်ႁူဝ် ပူၼ်ႉမႃးမိူဝ်ႈဝၼ်းတီႈ 24/03/2016 ။

(ၵၢၼ်မိူင်း)