သင်ၶလႄႈၵူၼ်းမိူင်းဝဵင်းၵျွၵ်ႉမႄးႁူမ်ႈၵၼ် ၼႄၵၢင်ၸႂ်သၢၼ်ၶတ်းလွင်ႈႁဵတ်းသၢင်ႈၸုမ်းသိုၵ်း PSLF/TNLA ၸုတ်ႇၽဝ်ႁိူၼ်းၵူၼ်းဝၢၼ်ႈ ၊ ႁႂ်ႈသၢႆႈတႅၼ်းပၼ်ၶူဝ်းၶွင်ႁိူၼ်းယေး  ဢၼ်လႆႈ လူႉသုမ်းၵႂႃႇတင်းသဵင်ႈ ။

ဝၼ်းတီႈ 28/05/2016 ၶၢဝ်းယၢမ်း 08:00 မူင်းၵၢင်ၼႂ် သင်ၶၸဝ်ႈလႄႈပီႈၼွင်ႉၵူၼ်းမိူင်း ၵျွၵ်ႉမႄး 3,000 ပၢႆတုမ်ၵၼ်တီႈၵျွင်းတႆးၵမ်ႇပေႃးၸႃႉ ဝဵင်းၵျွၵ်ႉမႄး သေ ၼေ ၵၢင်ၸႂ်  ပႆတၢင်း ႁွပ်ႈဝဵင်း လဵပ်ႈၾၢႆႇတူၵ်းၵၢတ်ႇ လူင်းၵႂႃႇတၢင်းႁူင်းငဝ်းတူင်ႉၵဝ်ႇ ၊သိုပ်ႈလဵပ်ႈလူင်းၵႂႃႇၸွမ်း သဵၼ်ႈတၢင်း ပၻွၵ်ႉလၢၼ်းသေ ၶိုၼ်းၶိုၼ်ႈမိူဝ်းတီႈၵျွင်းတႆး ၵမ်ႇပေႃးၸႃႉ ။


ၵူၼ်းၶဝ်ႈႁူမ်ႈၼႄၵၢင်ၸႂ်  ၵေႃႉၼိုင်ႈ လၢတ်ႈဝႃႈ - “ ၵူၼ်းမိူင်းတႆးၵူႈၵေႃႉထုၵ်ႇလီႁတ်းႁၢၼ် ဢွၵ်ႇမႃး ၽွမ်ႉႁူမ်ႈၵၼ် သၢၼ်ၶတ်းၼႄၵၢင်ၸႂ်ၵူႈဝဵင်း ။ ပေႃးႁဝ်းၵုမ်ႇၵူဝ်သေ ယူႇႁင်းၽႂ်မၼ်းၸိုင် ပိူၼ်ႈတေ ထၢင်ႇႁၢင်ႈ လူလၢႆ ၊ ထၢင်ႇလဵၵ်ႉႁဝ်း။ ပေႃးႁဝ်းၽွမ်ႉၵၼ် ၊ ႁူမ်ႈၵၼ်လႆႈၸိုင်  ပိူၼ်ႈၵေႃႈတေႁၼ် ၊ ၼွၵ်ႈမိူင်းၵေႃႈတေႁူႉ ၊ လူင်ပွင်ႈၸိုင်ႈမႂ်ႇၶဝ်ၵေႃႈတေလႆႈႁူႉဝႃႈထုၵ်ႇလီတူၺ်းထိုင်ၵူၼ်းမိူင်းၸွႆႈထႅမ်ၵူၼ်းမိူင်း ၊ ယႃႇႁႂ်ႈလႆႈပဵၼ်ဝႃႈ  လူင်ပွင်ၸိုင်ႈမႂ်ႇဢမ်ႇမႃးၸွႆႈထႅမ်သင် ၵူၼ်းမိူင်း ” - ဝႃႈၼႆ ။


လိူဝ်ၼၼ်ႉၵူၼ်းမိူင်းဝဵင်းၵျွၵ်ႉမႄးလႆႈဢွၵ်ႇၽိုၼ်လိၵ်ႈ သၢၼ်ၶတ်းပၢင်တိုၵ်းဢၼ်ပဵၼ်ယူႇယၢမ်းလဵဝ် ၽိုၼ်ၼိုင်ႈ - ပႃးဝႆႉ 4 ၶေႃႈ ။


1. သင်ၶလႄႈပေႃႈမႄႈပီႈၼွင်ႉၵူၼ်းမိူင်းသၢၼ်ၶတ်းလွင်ႈၸုမ်းသိုၵ်းတဢၢင်း PSLF/TNLA တဵၵ်းတဵင် လူလၢႆ ဢဝ်တၢႆ ၸုတ်ႇၽဝ်ႁိူၼ်း ၊ ဢဝ်ၵူၼ်းမိူင်းႁဵတ်းတႃႁူဝ်ႉလႄႈပိုတ်ႇပၢင်တိုၵ်းၼႂ်းဝၢၼ်ႈ ။


2. ၸုမ်းယိပ်းၵွင်ႈၵၢင်ႇၸုမ်းလႂ်သေဢမ်ႇဝႃႈ ႁဵတ်းလွင်ႈပူၼ်ႉပႅၼ် တီႉၺွပ်းၵူၼ်းမိူင်းသေ ဢဝ်ႁဵတ်း ပဵၼ်တူဝ်ယိူဝ်ႇသိုၵ်းလႄႈယိူဝ်ႇငိုၼ်းၼၼ်ႉ ႁဝ်းၶႃႈပေႃႈမႄႈၵူၼ်းမိူင်း တိုၼ်းသၢၼ်ၶတ်း ။


3. သင်ၶလႄႈပေႃႈမႄႈၵူၼ်မိူင်းသၢၼ်ၶတ်းလွင်ႈၸုမ်းသိုၵ်းတဢၢင်း PSLF/TNLA ဢၼ်ႁဵတ်းႁႂ်ႈမီး ပၼ်ႁႃၸၢဝ်းၶိူဝ်းတႅၵ်ႇယၢႆႈၵၼ် ။


4. ၸုမ်းသိုၵ်းတဢၢင်း PSLF/TNLA တေလႆႈဢဝ်ပုၼ်ႈၽွၼ်းသၢႆႈတႅၼ်းပၼ်ၶိုၼ်း ဢၼ်ၶႃႈႁႅမ် ၵူၼ်း ဝၢၼ်ႈတၢႆ ၊ ၸုတ်ႇၽဝ် ဝၢၼ်ႈတေႃႉသၢင်ႇ၊ ဝၢၼ်ႈပၢင်မၢၵ်ႇမိုဝ်း လႄႈ ဝၢၼ်ႈႁူဝ်ပၢင်ႇ ဢိူင်ႇမိူင်းဝီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ လႄႈဢၼ်လႆႈႁႅမ်တၢႆၵူၼ်းမိူင်းမင်းၵုင်း 7 ၵေႃႉ မိူဝ်ႈ 2016 /02/07 ၼၼ်ႉတင်းမူတ်း ။


ဢိင်ၼိူဝ် ၼႂ်းၸိုင်ႈတႆးပွတ်းႁွင်ႇ ၸႄႈဝဵင်းၼမ်ႉၶမ်းၼၼ်ႉ တင်ႈတႄႇႁူဝ်လိူၼ်မေႊၼႆႉမႃး တပ်ႉ သိုၵ်း ၸိုင်ႈတႆး (RCSS/SSA) တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (PSLF/TNLA) ၶိုၼ်း ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်းသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းၼပ်ႉႁူဝ်ပၢၵ်ႇႁူဝ်ႁဵင် လႆႈပၢႆႈ ၽေးသိုၵ်း။ ၼွၵ်ႈသေၼၼ်ႉ ၵူၼ်းဝၢၼ်ႈၵေႃႈလႆႈလူႉတၢႆ ၊ ဝၢၼ်ႈသူၼ် ႁိူၼ်းယေးၵေႃႈၺႃး ၽဝ် ။