ဢိင်ၼိူဝ်ဝၢၼ်ႈၵူၼ်း ဝၢၼ်ႈႁူဝ်ပၢင်ႇ ၼႂ်းၸႄႈဝဵင်းၼမ်ႉၶမ်း ထုၵ်ႇၾႆးၽဝ်ယဝ်ႉသေ မူႇၸုမ်း 9 ၸုမ်း ႁွင်ႉပၢင်ၵုမ်ဢုပ်ႇဢူဝ်း လႆႈၸႂ်တူၵ်းလူင်း ႁဵတ်းလိၵ်ႈထိုင် ႁူဝ်ပဝ်ႈ PSLF/TNLA ႁႂ်ႈႁပ်ႉပုၼ်ႈၽွၼ်းသၢႆႈတႅၼ်း ၊ တုၵ်းယွၼ်းပႃး မိူဝ်းၼႃႈမႃး ယႃႇႁႂ်ႈပဵၼ်ထႅင်ႈ ။

ပူၼ်ႉမႃးမိူဝ်ႈဝၼ်းတီႈ 08/05/2016 တင်ႈတႄႇဝၢႆးဝၼ်း ယၢမ်း 2 မူင်းတေႃႇထိုင် 5 မူင်းၶိုင်ႈ ၊ ယူႇတီႈမူႇၸုမ်း ဢၼ်ပၵ်းတီႈ ဝဵင်းၼမ်ႉၶမ်း တင်းမူတ်း 9 ၸုမ်း ႁူမ်ႈၵၼ်ႁဵတ်းပၢင်ၵုမ် တီႈဝတ်ႉၸေႇယသုၶ ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။ ၵူၼ်းမႃးၶဝ်ႈႁူမ်ႈပၢင်ၵုမ် မီးမူႇၸုမ်း ၼႂ်းဝဵင်းၼမ်ႉၶမ်း 9 ၸုမ်းလႄႈ သင်ၶၸဝ်ႈ ၊ ၵူၼ်းဝၢၼ်ႈၵူၼ်းသူၼ် ပႃးၸဵမ်ၽူႈၵွၼ်းပွၵ်ႉယွမ်ႇ ဝၢၼ်ႈ ဢိူင်ႇ ၼႂ်းဝဵင်းၼမ်ႉၶမ်း၊ ပႃႊတီႊၵၢၼ်မိူင်း ပႃႊတီႊသိူဝ်ၽိူၵ်ႇ - ၸိူဝ်းၼႆႉ ။

ပၢင်ၵုမ်ၼႆႉ လႆႈၸႂ်တူၵ်းလူင်းတႅမ်ႈလိၵ်ႈထိုင် ႁူဝ်ပဝ်ႈ တႅဝ်းႁူမ်ႈပူတ်းပွႆႇမိူင်းပလွင်ႈ / တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈတဢၢင်း (PSLF/TNLA) တူၵ်ႇလၢတ်ႈႁႂ်ႈ PSLF/TNLA ႁပ်ႉပုၼ်ႈၽွၼ်း လွင်ႈဢၼ်ၽဝ်ဝၢၼ်ႈ ၽဝ်ႁိူၼ်း ၵူၼ်းဝၢၼ်ႈၵူၼ်းသူၼ်ၼၼ်ႉ ၵူၺ်းဢမ်ႇၵႃး ၊ တုၵ်းယွၼ်းပႃး မိူဝ်းၼႃႈထႃႇပၢႆမႃးၵေႃႈ ယႃႇႁႂ်ႈလႆႈပဵၼ်ထႅင်ႈ - ၵူၼ်းၼုမ်ႇၽူႈၶဝ်ႈႁူမ်ႈပၢင်ၵုမ် ၵေႃႉၼိုင်ႈလၢတ်ႈ ။

မိူဝ်ႈဝၼ်းတီႈ 06/05/2016 ဢိင်ၼိူဝ် တပ်ႉသိုၵ်းတဢၢင်း (TNLA) တင်း တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ်သေ ၵူၼ်းဝၢၼ်ႈၵူၼ်းသူၼ် ၼႂ်းၸႄႈဝဵင်းၼမ်ႉၶမ်း ထုၵ်ႇပူၼ်ႉပႅၼ်သုၼ်ႇလႆႈၵူၼ်း မိူၼ်ၼင်ႇထုၵ်ႇၽဝ်ဝၢၼ်ႈသူၼ်ႁိူၼ်းယေး ၊ ထုၵ်ႇတီႉၺွပ်းပေႃႉထုပ်ႉၶႃႈႁႅမ်တၢႆ ၊ ထုၵ်ႇဢဝ်ၶူဝ်းၶွင်ၶူဝ်းႁိူၼ်း ၶူဝ်းယေးၵႂႃႇ လွၵ်ႇလွၵ်ႇလၢႆလၢႆ ၸိူဝ်းၼႆႉ ။

ၼႂ်းလိၵ်ႈဢၼ်တႅမ်ႈထိုင် ႁူဝ်ပဝ်ႈ PSLF/TNLA ၼၼ်ႉလၢတ်ႈပႃးဝႃႈ - ဢၼ်ပူၼ်ႉပႅၼ်ၼိူဝ်ၵူၼ်းဝၢၼ်ႈ ၵူၼ်းမိူင်းၼၼ်ႉ ႁႂ်ႈမႃးၼွမ်း ယွမ်းၽိတ်း (တွင်းပၢၼ်ႇ) ၊ ႁႂ်ႈႁပ်ႉပုၼ်ႈၽွၼ်း ဢၼ်ၽဝ်ႁိူၼ်းယေးၵူၼ်းဝၢၼ်ႈ ၵူၼ်းသူၼ်ၼၼ်ႉသေ သၢႆႈတႅၼ်းပၼ်ၶိုၼ်း - ၼႆယဝ်ႉ ။

ၵဵဝ်ႇၵပ်းလွင်ႈဝၢၼ်ႈႁူဝ်ပၢင်ႇ ထုၵ်ႇၾႆးၽဝ်ၼႆႉ ပူၼ်ႉမႃးမိူဝ်ႈဝၼ်းတီႈ 07/05/2016 ၼၼ်ႉ ၾၢႆႇတပ်ႉသိုၵ်း TNLA ဢွၵ်ႇလိၵ်ႈပိုၼ်ၽၢဝ်ႇဝႃႈ - ၾၢႆႇတပ်ႉသိုၵ်း TNLA ၼႆႉ ဢမ်ႇမီးပေႃႇလသီႇ ပူၼ်ႉပႅၼ်ၵူၼ်းဝၢၼ်ႈ ၵူၼ်းမိူင်း ၊ ဢၼ်ႁဵတ်းႁႂ်ႈၵူၼ်းမိူင်းတူၵ်းယၢၵ်ႈတူၵ်းၽၢၼ် ၊ ဢၼ်တီႉၺွပ်းၵူၼ်းမိူင်းဝႆႉၵေႃႈဢမ်ႇမီး ၊ ဢၼ်တေယႃႉၶူဝ်းႁိူၼ်း ၵူၼ်းဝၢၼ်ႈၵူၼ်းသူၼ်ၵေႃႈ ဢမ်ႇမီးပၵ်းပိူင် - ဝႃႈၼႆ ။

ဢိင်ၼိူဝ် ဢၼ်လႆႈတႅမ်ႈလိၵ်ႈထိုင် PSLF/TNLA ၼႆႉသေ ၵေႃႉပဵၼ်ႁူဝ်ပဝ်ႈမူႇၸုမ်းၽွမ်ႉႁူမ်ႈ မိူင်းၼမ်ႉၶမ်း လုင်းလိူၼ်မျၢတ်ႈ ၵေႃႈလၢတ်ႈဝႃႈ - ဢၼ်ထူပ်းၺႃးပၼ်ႁႃၸိူင်ႉၼႆၼႆႉ ဢမ်ႇၵွမ်ႉၵႃႈပီႈၼွင်ႉတႆး တီႈဝၢၼ်ႈႁူဝ်ပၢင်ႇၵူၺ်း ၊ ပိူင်ပဵၼ်ဢၼ်ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း တိူဝ်ႉၸႂ်ႉတိူဝ်ႉၶေႃးၸိူဝ်းၼႆႉ တင်းပတ်းပိုၼ်ႉၼႂ်းမိူင်းႁူမ်ႈတုမ်မိူင်းမၢၼ်ႈၵေႃႈ မိူဝ်းၼႃႈထႃႇပၢႆမႃးၼႆႉ ဢမ်ႇၵိုင်ႇလီမီးထႅင်ႈယဝ်ႉ - ဝႃႈၼႆ ။