ၸၼ်ႉၸွမ်မႁႃၸူလႃးလူင်းၵွၼ်း မိူင်းၵွၵ်ႇ ၊ ဢၼ်ၶိူဝ်းႁေႃၶမ်း ပဵၼ်ၵဝ်ႉၵၼ်းၵေႃႇတင်ႈၵမ်ႉထႅမ်မႃး ပၢၼ်သိုပ်ႇပၢၼ် တေမွပ်ႈယိုၼ်ႈ ၸုမ်ႈၶူး Ph.D ပၼ် Dr. ၸၢႆးမွၵ်ႇၶမ်း ၵေႃႉပဵၼ်ၵႅမ်ၸွမ်ၸိုင်ႈၵဝ်ႇ မိူင်းမၢၼ်ႈ ။

ဝၼ်းတီႈ 15/05/2016 တေမႃးၼႆႉ ယူႇတီႈၸၼ်ႉၸွမ်မႁႃၸူလႃးလူင်းၵွၼ်း ဢၼ်ၶိူဝ်းႁေႃၶမ်းမိူင်းထႆး ဢွၼ်ႁူဝ်ပဵၼ်ၵဝ်ႉၵၼ်းၵေႃႇတင်ႈမႃး တေမွပ်ႈယိုၼ်ႈၸုမ်ႈၶူး Ph.D ပၼ် Dr. ၸၢႆးမွၵ်ႇၶမ်း၊ ၵဵဝ်ႇၵပ်းလွင်ႈ လႆႈၶတ်းသၢင်ႈႁၢင်ႈပွင် လွင်ႈၾၢႆႇပၢႆးပၺ်ၺႃမႃး ။ ၼႂ်းဝၼ်းတီႈ 15/05/2016 ၼႆႉ တေၸတ်းပၢင်ၵႅဝ်ႈ မွပ်ႈယိုၼ်ႈၸုမ်ႈၶူး တင်ႈတႄႇၵၢင်ၼႂ်တေႃႇထိုင် ဝၢႆးဝၼ်း 3 မူင်း ။ ဝၢႆးဝၼ်း 5 မူင်းတေႃႇထိုင်ၵၢင်ၶမ်ႈ သမ်ႉတေၸတ်းပၢင်ယွင်ႈယေႃးမၼ်းၸဝ်ႈ - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၸဝ်ႈတူၼ်ၶူးၼၼ်တသႃမိ ၼုမ်ႇတႆး မွၵ်ႇလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ - ၻွၵ်ႊတိူဝ်ႊၸၢႆးမွၵ်ႇၶမ်းၼႆႉ ၸဵမ်မိူဝ်ႈပႆႇပဵၼ်ၵႅမ်ၸွမ်ၸိုင်ႈၼၼ်ႉ မၼ်းၸဝ်ႈၼႆႉ ပဵၼ်ႁူဝ်ပဝ်ႈ ငဝ်ႈငုၼ်းၵေႃလိၵ်ႈလၢႆးလႄႈၾိင်ႈငႄႈတႆး ပတ်းပိုၼ်ႉမိူင်းႁူမ်ႈတုမ်သေ ၶတ်းသၢင်ႈႁၢင်ႈပွင်လွင်ႈ ပၢႆးပၺ်ၺႃမႃး ။ လႆႈႁပ်ႉတၼ်းႁဵင်း ၵႅမ်ၸွမ်ၸိုင်ႈယဝ်ႉၵေႃႈ ၵဵဝ်ႇၵပ်းလူၺ်ႈပၢႆးပၺ်ၺႃ ၼွၵ်ႈမိူင်းၼႂ်းမိူင်း ၸိူဝ်းၼႆႉ ဢွၼ်ႁူဝ်တူင်ႉၼိုင်မႃးတႃႇသေႇ ။ ၵွပ်ႈၼၼ် ၸင်ႇလႆႈမွပ်ႈယိုၼ်ႈၸုမ်ႈၶူး Ph.D ၵဵဝ်ႇၵပ်းပၢႆးပၺ်ၺႃ Educational administration ထိုင် ၻွၵ်ႊတိူဝ်ႊၸၢႆးမွၵ်ႇၶမ်း - ဝႃႈၼႆ ။


ၼွၵ်ႈၼိူဝ်သေ ၻွၵ်ႊတိူဝ်ႊၸၢႆးမွၵ်ႇၶမ်းယဝ်ႉ ဢၼ်တေလႆႈႁပ်ႉၸုမ်ႈၶူးပွၵ်ႈၵမ်းၼႆႉ ယင်းမီးၸဝ်ႈတူၼ်ၶူး သင်ၶတႆး 18 ၸဝ်ႈ ။ ၼႂ်းၼၼ်ႉ ဢၼ်လႆႈၸုမ်ႈၶူး M.A 3 ၸဝ်ႈ ၊ လႆႈ B.A  15 ၸဝ်ႈ ။


ၵဵဝ်ႇၵပ်းပၢင်မွပ်ႈယိုၼ်ႈၸုမ်ႈၶူးၼႆႉသေ မူႇၸုမ်းၼွၵ်ႈမိူင်းၼႂ်းမိူင်း တေမႃးၶဝ်ႈႁူမ်ႈတင်းၼမ်ၵူၺ်းဢမ်ႇၵႃး ၊ ၽူႈမီးၸၼ်ႉလုမ်းၽွင်းတၢင်မၢၼ်ႈ တီႈမိူင်းၵွၵ်ႇၵေႃႈ တေမႃးၶဝ်ႈႁူမ်ႈၸွမ်း - ၼႆယဝ်ႉ ။


ၸၼ်ႉၸွမ်မႁႃၸူလႃးလူင်းၵွၼ်းၼႆႉ ၵေႃႇတင်ႈမႃးမိူဝ်ႈပီသႃသၼႃ 2432 ၊ ယၢမ်းလဵဝ် ၵေႃႇတင်ႈမႃးလႆႈ 127 ပီ ၊ ပဵၼ်ၸဝ်ႈၶုၼ်ႁေႃၶမ်းထႆး တူၼ်တီႈ 5 မိူင်းထႆး ဢွၼ်ႁူဝ်ပဵၼ်ၵဝ်ႉၵၼ်းၵေႃႇတင်ႈမႃး ၊ ၶိူဝ်းႁေႃၶမ်းထႆး ပၢၼ်သိုပ်ႇပၢၼ်ၵေႃႈ ပဵၼ်ၵဝ်ႉၵၼ်းမႃးသေ ၸွႆႈထႅမ်ၾၢႆႇပၢႆးပၺ်ၺႃမႃးတႃႇသေႇ ႁၢၼ်ႉတေႃႇယၢမ်းလဵဝ် ။